Mɛni Kwraa Hewɔ Amɛkaa He Amɛbaa Oshia Lɛ?

ANI obi ohe gbi ko pɛŋ akɛ mɛni hewɔ Yehowa Odasefoi baa oshinaa naa? Amɛfeɔ nakai ejaakɛ amɛmiitao mɛi ni shweɔ akɛ amɛ aaale Nyɔŋmɔ Wiemɔ ni ji Biblia lɛ mli sane babaoo lɛ. Agbɛnɛ hu amɛkɛ hiɛdɔɔ esusu nɛkɛ wiemɔi ni Yesu kɛ esɛɛnyiɛlɔi wie nɛɛ ahe ni amɛkɛtsuɔ nii hu, akɛ: “Nyɛ aaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.” (Bɔf. 1:⁠8) Yɛ nɛkɛ gbɛ nɔ lɛ, amɛmiijie suɔmɔ kpo amɛmiitsɔɔ amɛ naanyo gbɔmɔ.​—Mat. 22:​39.

Etsɛɛɛ kwraa ni Biblia kaselɔi komɛi yɔseɔ akɛ esani amɛgba mɛikrokomɛi Nyɔŋmɔ maŋtsɛyeli lɛ he sanekpakpa lɛ. Akɛ nɔkwɛmɔnɔ lɛ, Odasefoi komɛi ni yɔɔ Guadeloupe maŋ lɛ mli lɛ kɛ oblanyo ko kɛ eŋa kase Biblia lɛ otsii enyɔ pɛ ni oblanyo nɛɛ kɛ eŋa tee Kristofoi akpee ko ni afee nyɛsɛɛ nɛɛ. Beni amɛná amɛle akɛ abaaya shia-kɛ-shia odaseyeli yɛ kpee gbii Iɛ ateŋ ekome nɔ lɛ, amɛshwe akɛ amɛ aaana no mli gbɛfaŋnɔ.

Amɛkɛɛ: “Jeee akɛ wɔ-ŋ-fao wɔkwɛ bɔni atsuɔ shiɛmɔ nitsumɔ-ɔ ahaa kɛkɛ, . . . shi nii ni wɔkase kɛ nɔni wɔnu ŋmɛnɛ yɛ kpee nifeemɔ-ɔ mli-ɛ eha wɔyɔse akɛ esani wɔdiɛŋtsɛ hu wɔshiɛ.” Nyɔŋmɔ Wiemɔ lɛ ha amɛná nɛkɛ suɔmɔ nɛɛ yɛ amɛmli, ni amɛná nakai odaseyeli nitsumɔ krɛdɛɛ lɛ mli gbɛfaŋnɔ lɛɛlɛŋ.

Shi mɛni yɔɔ “sanekpakpa” lɛ mli? Mɛni hewɔ enɔ bɛ lɛ? Mɛni yɔɔ he ni haa mɛi babaoo sumɔɔ akɛ amɛkɛ miishɛɛ kɛ ekaa agba no amɛtsɔɔ mɛikrokomɛi lɛ? Mɛɛba obiii Yehowa Odasefoi lɛ koni amɛhao sanebimɔi nɛɛ ahetoo mɔ, kɛji amɛba oshia ekoŋŋ lɛ? Bɔɔ mɔdɛŋ ofee nakai.