Lalai
Nɛgbɛ Ohiŋmɛii Yɔɔ?
BEI pii lɛ Nyɔŋmɔ tsuji kɛ naagbai kɛ kaai kpeɔ. Kɛji ebalɛ nakai lɛ, Ŋwɛi Flooflonyo lɛ yelikɛbuamɔ he hiaa mɔ. Ani yɛ nakai be mli lɛ, okɛ hiɛdɔɔ kpaa Yehowa Nyɔŋmɔ fai kɛhaa yelikɛbuamɔ, ni okwɛɔ gbɛtsɔɔmɔ gbɛ kɛjɛɔ eŋɔɔ?
Enɛ ji hewalɛwoo ni wɔbaanyɛ wɔna kɛjɛ Lala 123. Wɔkaneɔ yɛ jɛi akɛ: “Bo miholeɔ mihiŋmɛii anɔ mikwɛɔ, bo mɔni ota ŋwɛi lɛ.” (Lala 123:1) Akɛni Nyɔŋmɔ Ofe lɛ yɛ ŋwɛi heni yɔɔ shɔŋŋ fe fɛɛ hewɔ lɛ, nɔni lalatsɛ lɛ baanyɛ ekɛɛ nɔŋŋ ji akɛ eeehole ehiŋmɛii anɔ kɛaaya ŋwɛi be mli ni ekpaa Bɔlɔ lɛ fai akɛ ena lɛ mɔbɔ lɛ. Beni otsɔɔ yiŋtoo hewɔ ni ewoɔ ehiɛ nɔ ekwɛɔ Yehowa lɛ, etee nɔ ekɛɛ: “Naa, bɔni tsuji ahiŋmɛii kwɛɔ amɛnuntsɔmɛi anine, ni weyoo hiŋmɛii kwɛɔ ewulaa nine lɛ, nakai nɔŋŋ wɔhiŋmɛii kwɛɔ Yehowa, wɔ-Nyɔŋmɔ lɛ, kɛyashi beyinɔ ni eeena wɔ mɔbɔ. Naa wɔ mɔbɔ, Yehowa, naa wɔ mɔbɔ; ejaakɛ heguɔgbee eyimɔ wɔ obɔbɔ! Wɔhefɛo ni mɛi ni he ejɔ amɛ lɛ yeɔ kɛ wɔhe guɔ ni hewolɔi lɛ gbeɔ lɛ, eyimɔ wɔsusuma obɔbɔ.”—Lala 123:2-4.
Tsuji kɛ weyei kwɛɔ amɛnuntsɔmɛi kɛ amɛwulai aniji jogbaŋŋ beni afee ni amɛnyɛ amɛna nɔni amɛ aaatao aloo nɔni amɛ aaasumɔ akɛ afee aha amɛ. Tsuji lɛ aaanyɛ ana shihilɛ mli hiamɔnii kɛ hebuu kɛjɛ nuntsɔmɛi kɛ awulai lɛ adɛŋ. Nakai nɔŋŋ Nyɔŋmɔ tsuji woɔ amɛhiɛianɔ amɛkwɛɔlɛ, ni amɛsumɔɔ akɛ amɛle esuɔmɔnaanii yɛ saji amli ni amɛnine ashɛ hebuu, tsuijurɔ kɛ jɔɔmɔ nɔ kɛjɛ edɛŋ.
No mli lɛ aaye lalatsɛ lɛ kɛ enyɛmimɛi Israelbii lɛ ahe fɛo. Yɛ amɛhe guɔ ni amɛhenyɛlɔi gbeɔ hewɔ lɛ, esa jogbaŋŋ akɛ amɛ aaakpa Yehowa fai ni ena amɛ mɔbɔ. Amɛhe guɔ ni agbe lɛ jeee nii ni efɔɔɔ kaa, shi moŋ nii ni kã he daa. Agbe amɛhe guɔ babaoo. “Hewolɔi” ni feɔ nakai lɛ ‘ahe ejɔ amɛ,’ no ji akɛ etamɔ nɔni amɛyɛ shweshweeshwe.
Shihilɛi ni tamɔ enɛ lɛ ba beni asaà atswaa Yerusalem gbogboi lɛ ekoŋŋ yɛ Nehemia nɔkwɛmɔ shishi lɛ. Biblia lɛ bɔ amaniɛ nɛɛ yɛ nɔni henyɛlɔi lɛ kɛɛ lɛ he akɛ: “Eba mli akɛ, beni Sanbalat nu akɛ wɔmiitswa gbogbo lɛ, emli fu ni emli wo la naakpa, ni eye Yudafoi lɛ ahe fɛo, ni ekɛɛ yɛ enyɛmimɛi lɛ kɛ Samaria ta lɛ hiɛ akɛ: Mɛni nɛkɛ Yudafoi wudɔwudɔi nɛɛ feɔ nɛɛ? Ani aŋmɛ amɛ gbɛ? Ani amɛbaashã afɔle? Ani amɛ aaagbe naa gbi kome jenamɔ? Kolɛ amɛbaatsĩɛ tɛi lɛ ahiɛ kɛjɛ tsukoi ni eshã lɛ akui lɛ amli lo? Kɛkɛ ni Tobia, Amonnyo lɛ ni damɔ emasɛi lɛ, kɛɛ: Nɔni amɛtswaa nɛɛ po lɛ, kɛ́ osɔ tu yi nɔ lɛ, eeekumɔ amɛtɛ́ gbogbo lɛ tete!”—Neh. 3:33-35.
Esa kadimɔ jogbaŋŋ akɛ yɛ henyɛlɔi ashiteekɛwoo kɛ hefɛoyeli ni naa wa fɛɛ sɛɛ lɛ, asaa atswa Yerusalem gbogboi lɛ kɛ̃. Nɔ̃ titri hewɔ ni ebalɛ nakai ji akɛ Nehemia kɛ enanemɛi nitsulɔi lɛ bi Yehowa dɛŋ yelikɛbuamɔ. (Neh. 3:36, 37) Kɛji wɔ hu wɔkã he wɔbi Yehowa koni ena wɔ mɔbɔ ni ejɔɔ wɔ lɛ, wɔnine enyɛŋ shi kɔkɔɔkɔ. Ebaaha wɔna nibii ni wɔkpaa fai wɔbiɔ lɛ.—1 Yoh. 3:21, 22.