Shi Ni Aaadamɔ Kpɛŋŋ Yɛ Hemɔkɛyeli Mli Yɛ Fimɔbei Amli
AAWA anɔkwa Kristofoi ayi waa yɛ shikpɔŋ nɛɛ hei sɔrɔtoi pii, tamɔ bɔni eba yɛ klɛŋklɛŋ afii oha lɛ mli lɛ. Ni taakɛ Kristofoi damɔ shi kpɛŋŋ yɛ hemɔkɛyeli lɛ mli yɛ no gbii lɛ anɔ lɛ, nakai nɔŋŋ amɛfeɔ ŋmɛnɛ hu. Afi 1978 naagbeegbɛ lɛ, wolo ko ni nɔkwɛlɔ gbɛfalɔ ko ŋma emaje jakumaŋ ni esɔmɔɔ yɛ mli lɛ ninenitsumɔhe lɛ tsɔɔ yiwaa ni yɔɔ gbeyei ni akɛbaa Odasefoi lɛ anɔ yɛ jakumaŋ lɛ hé krɛdɛɛ ko lɛ. Amɛshifimɔ lɛ jeɔ kpo faŋŋ akɛ Kristofoi anɔkwayeli he odaseyelinii ni hiɛ yɔɔ nyam.
Taakɛ nɔkwɛlɔ gbɛfalɔ lɛ amaniɛbɔɔ tsɔɔ lɛ, mɛi anaagbalɔi lɛ kɛɛ Odasefoi akuu ko akɛ: “Wɔsumɔŋ ni wɔnu Yesu he shiɛmɔ ni nyɛshiɛɔ-ɔ dɔŋŋ.” Shi Odasefoi lɛ ha hetoo akɛ: “Wɔnaaa tɔmɔ ko yɛ nɔni Yesu fee-ɛ he. Nohewɔ-ɔ tɔmɔ ko bɛ nɔni wɔshiɛɔ yɛ ehe-ɛ he.”
Enɛ wɔ mɛi lɛ amli la. Nohewɔ lɛ amɛha Odasefoi—nyɛmimɛihii etɛ kɛ nyɛmimɛiyei enyɔ—lɛ loó woji ni amɛhiɛ lɛ fɛɛ kɛtee heko aaafee kilomitai enumɔ (shitoi 3) jɛkɛmɔ. Amɛyasha woji lɛ fɛɛ yɛ jɛi. Agbɛnɛ beni amɛkpala nyɛmimɛi lɛ kɛtee hiɛ fioo lɛ, amɛbɔi nyɛmimɛiyei lɛ, ateŋ mɔkome yii—gbekɛyoo fioo ko—be mli ni mɛikrokomɛi lɛ damɔ shi ni amɛmiikwɛ. Amɛtsɔ amɛhiɛ amɛha nyɛmimɛihii lɛ agbɛnɛ ni amɛkɛɛ: “Gbekɛyoo-ɛ kɛɛ nyɛnyɛ̀ enɔ akɛ etsɔ Odasefonyo.” Shi nyɛmiyoo fioo ni ayilɛ etsɛko tsɔ lɛ nu ni ebo ekɛɛ: “Amɛ-ŋ-male.”
Kɛkɛ ni afimɔ nyɛmimɛihii lɛ ateŋ mɔkome niji yɛ esɛɛ. Ayilɛ aahu kɛyashi etɔ mu; Beni yiwalɔi lɛ bolɔ akɛ “afɔ̃ɔ nakai Yesu Yesu-ɛ” sɛɛ lɛ, amɛyi nyɛminuu kroko hu ni amɛfo etoi kome. Ayi nyɛminuu ni ji etɛ lɛ gbeyeigbeyei ni shwɛ fioo ni ehiŋmɛi kome afite kwraa. Shi nyɛmimɛi nɛɛ ateŋ mɔkomɔko kwaaa ehemɔkɛyeli yɛ niseniianifeemɔ nɛɛ fɛɛ sɛɛ.
Naagbee lɛ, amɛkɛ nyɛmimɛi lɛ tee faa ko naa akɛ amɛyaashiu amɛ ni amɛgboi. Beni anyiɛ gbɛ kɛyaa lɛ, nyɛmimɛi lɛ sɔle kɛ hiɛdɔɔ. Kɛkɛ ni yiwalɔi lɛ tsake amɛjwɛŋmɔ ni amɛkpala nyɛmimɛi lɛ kɛku sɛɛ kɛtee amɛshiai amli. Amɛkɛɛ nyɛmimɛi lɛ akɛ amɛkaya maŋ mli ni Maŋtsɛyeli Asa lɛ yɔɔ lɛ, ja nyɔji etɛ eho dã. Kɛlɛ enɔ Hɔgbaa lɛ, nyɛmimɛihii lɛ ateŋ mɔkome tee kpee yɛ nakai maŋ lɛ mli.
Sɛɛ mli lɛ, hii krokomɛi yagbá Odasefoi enumɔ nɛɛ nɔŋŋ anaa. Amɛbi Odasefoi lɛ akɛ: “Namɔ nɔ nyɛtsɔɔ kɛyaa Nyɔŋmɔ ŋɔɔ?” Nyɛmimɛi lɛ ateŋ mɔkome ha hetoo akɛ: “Wɔtsɔɔ Yesu nɔ.” Enaaa enyɔɔɔ shi ni amɛnaagbalɔi lɛ ateŋ mɔkome kɛɛ, “Wɔtsɔɔɔ wɔniimɛi asisai anɔ wɔyaa Nyɔŋmɔ ŋɔɔ.” Mɔkroko hu kɛfata he akɛ: “Nyɛ-ɛ nyɛjaaa nyɛniimɛi, bɛ-ɛ?” Shi Odasefoi lɛ etswaaa amɛsɛŋ.
No ni naagbalɔi lɛ ateŋ mɔkome kɛ tso ko ni da waa bɔi nyɛmimɛi lɛ yii. Mɛikrokomɛi bafata ehe, ni amɛfimɔ atswɛrɛi amɛkɛshimɔ nyɛmimɛi lɛ, ni amɛshimɔ amɛ ŋtiai kɛ amɛspaaterei lɛ. Beni be shwie mli lɛ, kuu kroko baŋɔ nyɛmimɛi Iɛ ateŋ mɔkome kɛtee koni amɛyata edaaŋ. Afãlɛ akɛ ebolɔ akɛ, “Aha ta lɛ aya nɔ.” Akɛni ekpɛlɛɛɛ ni ekɛɔ nakai hewɔ lɛ ayilɛ ekoŋŋ. Eyiwalɔi lɛ ateŋ mɔkome kɛɛ: “Tsɔ otoi kroko-ɛ hu oha wɔ ejaakɛ Yesu kɛɛ kɛji mɔko gbá otoiŋ-ɛ esani otsɔ ekroko-ɛ hu ohalɛ.”
Nyɛminuu lɛ fee nakai, ni eŋmɔ be mli ni mɛikrokomɛi lɛ yeɔ ehe fɛo lɛ. Shi mɔni kɛɛlɛ akɛ etsɔ etoi kroko lɛ hu ehalɛ lɛ gbaaa etoiŋ nɔni ji shii enyɔ, shi moŋ ekɛɛ yɛ hefɛoyeli gbɛ nɔ akɛ: “Otamɔ sɛkɛyelɔ ko. Yaa!” Shi mɛikrokomɛi bɔilɛ yii kɛ amɛtũi lɛ asɛɛtsei kɛ agbɛnɛ atswɛrɛi hu, ni mɛikomɛi shilɛ ŋtiai kɛ amɛspaaterei tsiŋmoo lɛ. No mli lɛ áyilɛ aahu ni ehiii nako feemɔ kwraa.
Beni amɛfee aahu ni amɛnyɛɛɛ amɛha nyɛminuu lɛ akwa ehemɔkɛyeli lɛ, amɛkpalelɛ amɛha klɛŋklɛŋ kuu ni waa nyɛmimɛi lɛ ayi lɛ. Mɛnɛɛmɛi tee nɔ amɛbɔ mɔdɛŋ akɛ amɛ aaatsake ejwɛŋmɔ koni ekpɛlɛ nɔ ni ekɛɛ “Aha ta lɛ aya nɔ.” Amɛkɛɛlɛ akɛ, “enɛ-ɛ nɔko bibioo ko kɛkɛ ni.” Shi nyɛminuu lɛ damɔ shi kpɛŋŋ ni ekpɛlɛɛɛ nɔni amɛtaoɔ ni efee lɛ nɔ ehaaa amɛ yɛ yii ni ayilɛ yɛ enɛ sɛɛ lɛ fɛɛ sɛɛ.
Aaafee nakai beaŋ nɔŋŋ ni nyɛminuu lɛ ŋa bati nɔni yaa nɔ lɛ nɔ. Beni aná ale mɔni eji lɛ, hii lɛ ka akɛ amɛ aaakɔne eyiŋ koni eha ewu lɛ akɛɛ nakai wiemɔ kuku lɛ. Shi nyɛmiyoo lɛ etswaaa esɛŋ. No mli lɛ átswa nyɔɔŋ nyɔŋma kɛ enyɔ momo—ni abɔi nyɛminuu lɛ niseniianifeemɔ kɛjɛ leebi—kɛkɛ ni yiwalɔi lɛ anijiaŋ je wui ni amɛtee.
Enɔ jetsɛremɔ lɛ nyɛmimɛi lɛ to amɛyiŋ akɛ amɛbaashi kpokpaa lɛ nɔ nigii ni amɛshi amɛshiai kɛ heloonaa nibii ni amɛyɔɔ lɛ amɛshwie shi beni afee ni mɛi ajwɛŋmɔ akaba amɛnɔ tsɔ. Amɛkɛ Odasefoi komɛi kpe, ni mɛnɛɛmɛi miikwɛ nɛkɛ nyɛmimɛi ni edamɔ nɔnaa babaoo naa nɛɛ anɔ kɛbashi ŋmɛnɛ.
Mɛni ji nɛkɛ Odasefoi ni awaa amɛyi nɛɛ asubaŋ? Amɛkɛɔ akɛ, ‘Wɔtswa wɔfai akɛ kɛji ehe aaahia akɛ wɔgboi yɛ Yehowa gbɛi hewɔ-ɔ, wɔɔɔfee nakai.’ Ni nakai nɔŋŋ amɛkɛma amɛyiwalɔi lɛ ahiɛ ni amɛkɛɛ amɛ yɛ faŋŋ. Mɛni ejɛ nɛkɛ emuuyeli kɛ anɔkwayeli mlihiɛmɔ nɛɛ mli kɛba? Nɔkome ji akɛ, anu ni mɛi ni na bɔni amɛfi shi amɛha yɛ niseniianifeemɔ ni naa wa shishi lɛ ateŋ mɛikomɛi kɛɛ: “Yehowa ji anɔkwa Nyɔŋmɔ-ɔ.”
[Akrabatsa ni yɔɔ baafa 19]
“No be lɛ mli lɛ amɛ aaajie nyɛ amɛwo amanehulu mli, ni agbe nyɛ; ni migbɛi lɛ hewɔ lɛ jeŋmaji fɛɛ aaanyɛ nyɛ. Ni no be lɛ mli lɛ mɛi pii anane aaatɔtɔ, ni amɛ aaatsɔɔtsɔɔ amɛnanemɛi asɛɛgbɛ, ni amɛ aaanyɛnyɛɛ amɛhe. Ni amale-gbalɔi pii baate shi, ni amɛ aaalaka mɛi pii. Ni nɔni mlakwamɔ baafa hewɔ lɛ, mɛi pii asuɔmɔ lɛ he aaajɔ. Shi mɔni hiɛɔ mli kɛyawulaa shi lɛ, lɛ aaahere eyiwala.”—Mat. 24:9-13.