Maŋtsɛyeli Shiɛmɔ​—Agbɛ Sane Kpakpa lɛ Ashwã Je Lɛŋ Fɛɛ

GBI ko ni oyaaa nitsumɔ lɛ, oto gbɛjianɔ akɛ obaaya shiɛmɔ. Onu he akɛ etɔ bo, no hewɔ lɛ oshashao shi fioo. Oná kulɛ obaajɔɔ ohe jogbaŋŋ nakai leebi lɛ! Shi osɔle yɛ he, ni okpɛ mli akɛ obaaya shiɛmɔ. Okɛ nyɛmiyoo onukpa ko ni kɛ afii saŋŋ esɔmɔ lɛ tsu nii yɛ shiɛmɔ nitsumɔ lɛ mli, ni bɔ ni ekɛ shifimɔ kɛ mlihilɛ esɔmɔ lɛ ta otsuiŋ waa. Be ni nyɛshiɛɔ anɔkwale lɛ yɛ shĩa kɛ shĩa lɛ, okai akɛ onyɛmimɛi Kristofoi krokomɛi ni yɔɔ je lɛŋ fɛɛ lɛ hu kɛ woji kɛ nibii krokomɛi lɛ nɔŋŋ miijaje sane nɛɛ nɔŋŋ, ni amɛ fɛɛ amɛnáa tsɔsemɔ kome too lɛ nɔŋŋ mli gbɛfaŋnɔ. Be ni oshɛɔ shĩa lɛ, onu he akɛ ohe ewa bo naakpa. Omii shɛ ohe waa akɛ otaaa shĩa!

Amrɔ nɛɛ, Kristofoi ashiɛmɔ nitsumɔ lɛ ji Nyɔŋmɔ Maŋtsɛyeli lɛ nitsumɔ titri. Yesu gba fɔ̃ shi akɛ, yɛ naagbee gbii nɛɛ amli lɛ, abaashiɛ kɛkpele je lɛŋ fɛɛ. (Mat. 24:14) Te egbalɛ nɛɛ eba mli ehã tɛŋŋ? Wɔbaasusu shiɛlɔi lɛ, gbɛi ni amɛtsɔɔ nɔ amɛshiɛɔ, kɛ nibii ni amɛkɛtsu nii ni eye ebua mɛi akpekpei komɛi yɛ je lɛŋ fɛɛ, ni amɛbayɔse akɛ Nyɔŋmɔ Maŋtsɛyeli lɛ ji nɔ ko ni yɔɔ diɛŋtsɛ lɛ ahe yɛ fã nɛɛ mli!