Be Nɔ Yeli, Emlijaa yɛ Gbɛ ni Sa Nɔ

YƐ BE mli ni ehe miihia ni oma bɔ ni onitsɔɔmɔ mɔɔ shi ehaa lɛ nɔ mi lɛ, ehe miihia hu ni ogbala ojwɛŋmɔ kɛba be sɛɛkɛlɛ ní okɛbaaha lɛ nɔ. Ato wɔkpeei lɛ ahe gbɛjianɔ koni aje shishi ni akpa yɛ be pɔtɛɛ ko naa. Kɛ́ wɔɔnyɛ wɔfee enɛ lɛ, no lɛ ehe miihia ni mɔ fɛɛ mɔ ni yɔɔ nifeemɔ yɛ gbɛjianɔtoo lɛ mli lɛ aye abua.

Yɛ Biblia beaŋ lɛ, no mli lɛ bɔ ni gbɔmɛi buɔ shihilɛ amɛhaa lɛ yɛ srɔto yɛ bɔ ni eji yɛ hei babaoo ŋmɛnɛ lɛ he. Awieɔ be he kɛ wiemɔi tamɔ “kɛbaa ŋmɛlɛ nɛɛhu mli” loo “gbɛkɛ ŋmɛji ejwɛ mli.” (Mat. 20:3-6; Yoh. 1:39) Efɔɔɔ kaa akɛ abaatsɔɔ be pɔtɛɛ ni akɛfee daa gbi nifeemɔ ko. Yɛ je lɛŋ hei komɛi ŋmɛnɛ lɛ, nakai pɛpɛɛpɛ ji bɔ ni amɛbuɔ be.

Shi kɛlɛ, eyɛ mli akɛ kusumii loo nɔ ni mɔ diɛŋtsɛ sumɔɔ baanyɛ aha gbɔmɛi susuŋ be he moŋ, shi kɛ́ wɔkase bɔ ni wɔɔfee wɔye be nɔ jogbaŋŋ lɛ, ehe baaba sɛɛnamɔ. Kɛ́ aha mɛi babaoo nifeemɔ yɛ gbɛjianɔtoo ko mli lɛ, ehe baahia ni asusu be ni akɛha nifeemɔ fɛɛ nifeemɔ lɛ he. Abaanyɛ akɛ shishitoo mla ní tsɔɔ akɛ “afee nii fɛɛ bɔ ni yɔɔ fɛo kɛ gbɛnaa gbɛnaa” lɛ atsu nii jogbaŋŋ ni akɛto be ni ahaa wɔ yɛ wɔkpee mli nifeemɔi amli lɛ he.—1 Kor. 14:40.

Bɔ ni Ooofee ni Oye Be ni Akɛha Bo lɛ Nɔ. Nɔ ni he hiaa ji hesaamɔ. Bei pii lɛ, nɔ ni haa wielɔi komɛi nyɛɛɛ aye amɛbe nɔ ji amɛhe ní amɛsaaa jogbaŋŋ. Ekolɛ, amɛheɔ amɛhe amɛyeɔ tsɔ fe nine. Aloo ekolɛ amɛtsiɔ be kɛyaa sɛɛ kɛyashiɔ be mli ni amɛnáaa be ni fa dɔŋŋ ni amɛkɛaasaa amɛhe. Nɔ titri ni baaha onyɛ oye obe nɔ jogbaŋŋ ji ní obaajie hiɛsɔɔ kpo yɛ onifeemɔ lɛ he, ni oná suɔmɔ akɛ obaasaa ohe jogbaŋŋ.

Ani onifeemɔ lɛ ji nikanemɔ? Klɛŋklɛŋ lɛ, susumɔ Nikasemɔ 4 kɛyashi 7 lɛ he, nɔ ni wieɔ naatselɛ, sɛ̃ŋ nu mii, shishinumɔ ni yɔɔ sɛɛ lɛ nɔmimaa, kɛ saji otii titrii lɛ anɔmimaa he lɛ he. No sɛɛ lɛ, okɛ nakai ŋaawoo lɛ atsu nii beni okaneɔ nifeemɔ ni akɛha bo lɛ mli waa lɛ. Ha ohe be. Ani ehe miihia ni okane nii oyayaayai bɔni afee ni ogbe naa yɛ be ni akɛha bo lɛ naa? Kanemɔ lɛ oyayaayai yɛ hei ni he ehiaaa tsɔ lɛ, shi yaa nɔ ni okɛ sɛ̃ŋ nu mii kɛ tsui shi ŋmɛɛ atsu nii ni okɛma saji otii titrii lɛ anɔ mi. Kasemɔ shii abɔ. Yɛ be mli ni oyaa hiɛ yɛ onaatselɛ lɛ mli lɛ, efeŋ nɔ ni wa kɛha bo akɛ obaaye obe nɔ.

Ani obaakwɛ wolo nɔ ni owie? Ehe ehiaaa ni oŋmala nibii babaoo—tamɔ wiemɔ ni aŋmala emli saji fɛɛ—koni onyɛ oye be nɔ jogbaŋŋ. Beni otsuɔ Nikasemɔ 25 lɛ he nii lɛ, obaale gbɛ ni hi ni obaatsɔ nɔ. Okɛ saji otii enumɔ nɛɛ awo ojwɛŋmɔ mli: (1) Saamɔ wiemɔ lɛ he jogbaŋŋ, shi kaaha ekɛ kakadaŋŋ tsɔ. (2) Ha saji otii titrii lɛ afee faŋŋ yɛ ojwɛŋmɔ mli, shi kaakase saji lɛ fɛɛ oowo oyitsoŋ. (3) Ŋmaa be ni obaasumɔ ni oye yɛ owiemɔ lɛ fã fɛɛ fã mli, loo be ni esa akɛ okɛgbe fãi komɛi anaa lɛ yɛ owolo lɛ nɔ. (4) Kɛ́ oosaa ohe lɛ, susumɔ nibii ni obaanyɛ ojie kɛjɛ mli kɛji eba lɛ akɛ be ni okɛhaa lɛ miita lɛ he. (5) Kasemɔ wiemɔ ni obaaha lɛ.

Feemɔ ni ooofee okwɛ lɛ he miihia. Yɛ be mli ni ofeɔ okwɛɔ lɛ, kwɛmɔ be ni okɛbaagbe fã fɛɛ fã lɛ naa. Yaa nɔ otĩ wiemɔ ni obaaha lɛ mli okwɛ shii abɔ kɛyashi owiemɔ muu lɛ fɛɛ baabote be ni akɛha bo lɛ mli. Kaabɔ mɔdɛŋ akɛ okɛ saji babaoo baawo mli. Ha ohe be babaoo ejaakɛ wiemɔ ni obaaha yɛ mɛi ahiɛ lɛ baahe be babaoo fe be ni okɛsaa ohe yɛ teemɔŋ lɛ.

Efãi lɛ Amlijaa. Be nɔ yeli kɛ wiemɔ lɛ fãi lɛ amlijaramɔ yɛ gbɛ ni sa nɔ lɛ yɛ tsakpaa. Esa akɛ okɛ be lɛ mli babaoo awie saji titrii lɛ ahe. Jɛmɛ ji he ni tsɔsemɔ mli saji otii lɛ fɛɛ yɔɔ. Esa akɛ hiɛkpamɔ wiemɔ lɛ sɛɛ akɛ bɔ ni sa koni enyɛ etsu otii etɛ ni asusu he yɛ Nikasemɔ 38 lɛ mli lɛ he nii. Esaaa akɛ wiemɔ lɛ diɛŋtsɛ sɛɛ kɛɔ fe nine, bɔ ni ehaŋ oná be ni okɛ naamuu ni mɔɔ shi aha, bɔ ni ekɛ Nikasemɔ 39 lɛ kpãaa gbee.

Mɔdɛŋ ni ooobɔ koni onyɛ oye obe nɔ lɛ baaha owiemɔ lɛ afee nɔ ni sa, ni ebaatsɔɔ bulɛ ni oyɔɔ kɛha mɛi krokomɛi ni yɔɔ nifeemɔ yɛ gbɛjianɔtoo lɛ mli lɛ kɛ agbɛnɛ hu kɛha asafo muu lɛ fɛɛ.