Awo Biblia kɛ Nitsumɔ He Hewalɛ

WƆSHWELƐ ji ní wɔgbala mɔ fɛɛ mɔ jwɛŋmɔ kɛba Nyɔŋmɔ Wiemɔ lɛ, Biblia lɛ nɔ. Nakai wolo krɔŋkrɔŋ lɛ nɔ wɔdamɔɔ wɔkɛ wɔshɛɛ sane ni wɔshiɛɔ lɛ haa, ni wɔmiisumɔ ni wɔha gbɔmɛi ayɔse akɛ nɔ ni wɔkɛɔ lɛ jɛɛɛ wɔ diɛŋtsɛ wɔsusumɔi amli, shi moŋ ejɛ Nyɔŋmɔ ŋɔɔ. Ehe miihia ni gbɔmɛi aná hekɛnɔfɔɔ yɛ Biblia lɛ mli.

Yɛ Shiɛmɔ Nitsumɔ lɛ Mli. Kɛ́ oosaa ohe kɛha shiɛmɔ nitsumɔ lɛ, halamɔ ŋmalɛ kome loo enyɔ be fɛɛ be ni obaakane otsɔɔ mɛi ni taoɔ ni amɛbo toi lɛ. Kɛ́ ooto gbɛjianɔ ni okpa Biblia kasemɔ wolo ko hiɛ kuku po lɛ, bei pii lɛ sɛɛnamɔ yɛ he akɛ oookane Biblia ŋmalɛ ko ni sa. Biblia lɛ yɛ hewalɛ ni ekɛaatsɔɔ mɛi ni tamɔ gwantɛŋi lɛ anii fe nɔ fɛɛ nɔ ni wɔɔnyɛ wɔkɛɛ wɔ diɛŋtsɛ. He ni hegbɛ baŋ ni onyɛ okane Biblia lɛ, obaanyɛ otsɛ wiemɔi ayisɛɛ kɛjɛ mli. Yɛ klɛŋklɛŋ afii oha lɛ mli lɛ, no mli lɛ Ŋmalɛ wolokpoi lɛ bɛ babaoo. Ni kɛlɛ, Yesu kɛ ekaselɔi lɛ tsɛ́ wiemɔi ayisɛɛ babaoo kɛjɛ Ŋmalɛi lɛ amli. Esa akɛ wɔ hu wɔbɔ mɔdɛŋ koni wɔkase ŋmalɛi lɛ wɔwo wɔyitsoŋ ni wɔkɛ enɛɛmɛi atsu nii bɔ ni sa yɛ wɔshiɛmɔ nitsumɔ lɛ mli, ni bei komɛi lɛ wɔtsɛ wiemɔi ayisɛɛ kɛjɛ mli kɛkɛ.

Kɛ́ eba akɛ obaakane Biblia lɛ, hiɛmɔ lɛ bɔ ni shiatsɛ lɛ baanyɛ anyiɛ nɔ ni okaneɔ lɛ sɛɛ. Kɛ́ shiatsɛ lɛ nyiɛ sɛɛ yɛ lɛ diɛŋtsɛ e-Biblia lɛ mli lɛ, ekolɛ ebaabo nɔ ni ekaneɔ lɛ toi jogbaŋŋ.

Shi kɛlɛ, esa akɛ oyɔse akɛ Biblia shishitsɔɔlɔi komɛi egba afã yɛ Nyɔŋmɔ Wiemɔ lɛ mli. Amɛ shishitsɔɔmɔi lɛ kɛ nɔ ni yɔɔ shishijee Biblia wiemɔi lɛ amli lɛ kpãaa gbee yɛ nɔ ko nɔ ko mli. Ŋmɛnɛŋmɛnɛ shishitsɔɔmɔi babaoo ejie Nyɔŋmɔ diɛŋtsɛ gbɛi lɛ kɛjɛ mli, etsimɔ nɔ ni shishijee wiemɔ lɛ kɛɔ yɛ shihilɛ ni gbohii lɛ yɔɔ mli lɛ nɔ, ni etsimɔ nɔ ni Biblia lɛ kɛɔ yɛ Nyɔŋmɔ yiŋtoo kɛha shikpɔŋ lɛ he lɛ nɔ. Bɔni afee ni otsɔɔ mɔ ko nɔ ni afee lɛ, ehe baahia ni okɛ ŋmalɛi otii lɛ ato Bibliai srɔtoi ahe loo mra be mli shishitsɔɔmɔi yɛ nakai wiemɔ lɛ nɔŋŋ mli lɛ he. Reasoning From the Scriptures lɛ kɛ gbɛ̀i srɔtoi ni atsɔɔ wiemɔi otii ashishi yɛ kuku ni akɛfɔɔ nitsumɔ mli babaoo lɛ haa yɛ saneyitsei babaoo he. Mɔ fɛɛ mɔ ni sumɔɔ anɔkwale lɛ baada shi yɛ nilee ni kɔɔ anɔkwa saji lɛ ahe lɛ he.

Yɛ Asafoŋ Kpeei Ashishi. Esa akɛ awo mɛi fɛɛ hewalɛ koni amɛkɛ amɛ-Bibliai lɛ atsu nii yɛ asafoŋ kpeei ashishi. Enɛ tsuɔ nibii kpakpai yɛ gbɛ̀i babaoo nɔ. Eyeɔ ebuaa ni ehaa toibolɔi lɛ ajwɛŋmɔ hiɔ nɔ ni asusuɔ he lɛ nɔ. Ekɛ nɔ ni hiŋmɛi lɛ naa lɛ fataa tsɔsemɔ ni wielɔ lɛ kɛhaa lɛ he. Ni enyɛɔ nɔ ewoɔ mɛi heei ni yɔɔ wiemɔ lɛ he miishɛɛ lɛ ajwɛŋmɔi amli akɛ Biblia lɛ ji wɔhemɔkɛyelii lɛ ajɛɛhe lɛɛlɛŋ.

Kɛ́ mɛi ni boɔ bo toi lɛ baanyiɛ Ŋmalɛi ni okaneɔ lɛ sɛɛ yɛ amɛ diɛŋtsɛ amɛ Bibliai lɛ amli loo amɛfeŋ nakai lɛ, baadamɔ bɔ ni owoɔ amɛ hewalɛ ohaa lɛ nɔ. Nine ní aaafɔ̃ amɛ tɛ̃ɛ lɛ ji gbɛ ni hi fe fɛɛ lɛ ateŋ ekome.

Ákɛ wielɔ lɛ, eji ogbɛnaa nii akɛ otsɔɔ ŋmalɛi lɛ ateŋ nɔ ni otaoɔ ni oma nɔ mi kɛtsɔ ha ni oooha toibolɔi lɛ agbele ni amɛkwɛ nɔ lɛ nɔ. Ehi akɛ oookane ŋmalɛi ni baaye abua bo koni owie osaji otii lɛ ahe. Kɛkɛ lɛ, kɛ be yɛ lɛ, okɛ fioo krokomɛi ni fiɔ osane naataamɔ lɛ sɛɛ lɛ efata he.

Eji anɔkwale akɛ, bei pii lɛ ŋmalɛ ní oootsɛ loo nine ni ooofɔ̃ toibolɔi lɛ koni amɛgbele ni amɛkwɛ nɔ lɛ pɛ kɛkɛ faaa. Kɛ́ okane ŋmalɛ kome ni no sɛɛ lɛ otee ekroko nɔ dani otoibolɔi lɛ nyɛ amɛgbele klɛŋklɛŋ nɔ̃ lɛ, no lɛ etsɛŋ ni amɛnijiaŋ baaje wui ni amɛnyiɛŋ Biblia lɛ kanemɔ lɛ sɛɛ dɔŋŋ. Esa akɛ ofee mɔ ni yɔɔ sɛɛyoomɔ. Kɛ́ mɛi babaoo gbele ŋmalɛ lɛ, kanemɔ.

Susumɔ nii ahe kɛtsɔ hiɛ. Tsĩi ŋmalɛ ni obaakane lɛ tã kɛtsɔ hiɛ bɔ ni sa. Enɛ baaba be ni afiteɔ, ni ji mɛ ni amɛɔ ni toibolɔi lɛ kɛgbele ŋmalɛ lɛ dã lɛ shi. Yɛ be mli ni obaasusu saji fioo pɛ he kɛji oha toibolɔi lɛ be ni amɛkɛgbele ŋmalɛi lɛ, sɛɛnamɔi lɛ baaha efee nɔ ni sa jogbaŋŋ.