Yitso 16
Fa 20: Nyɔŋmɔ Afii Akpe Maŋtsɛyeli Lɛ Ebɛŋkɛ
ABƐBUA NI HAA ALEƆ BƆ NI EBƐŊKƐ KPAAKPA EHA
80. Beni afee ni wɔle akɛ “amanehulu kpeteŋkpele” lɛ ebɛŋkɛ kɛ gbeyei lɛ, mɛɛ Yesu wiemɔ ni kɔɔ egbalɛ lɛ mli sane ko ni he hiaa waa he esa akɛ wɔbo toi?
80 Ehe ehiaaa ni wɔle nɔ afi diɛŋtsɛ gbi kɛ ŋmlɛtswaa ni “amanehulu kpeteŋkpele” lɛ baafɛ ashwie “nibii agbɛjianɔtoo” nɛɛ fɛɛ nɔ lɛ. Beni afee ni wɔle akɛ agbɛnɛ ebɛŋkɛ waa ni eyɛ gbeyei fe tsutsu lɛ, fɛɛ ni esa akɛ wɔfee ji ni wɔbo nɔ ni Yesu kɛɛ ni he hiaa yɛ egbalɛ nɛɛ mli lɛ toi: “Shi nyɛkasea agbamitso abɛ ni ebuɔ lɛ: Beni eniji lɛ efrɔke ni ebɔi fumɔ lɛ, nyɛle akɛ latsaa be lɛ eshɛ eta. Nakai nɔŋŋ nyɛ hu beni nyɛaana nii nɛɛ fɛɛ lɛ, nyɛlea akɛ eshɛ agboi lɛ anaa eta. Lɛlɛŋ, miikɛɛnyɛ akɛ: Nɛkɛ yinɔ nɛɛ hoŋ, ja nii nɛ fɛɛ eba mli da. Ŋwɛi kɛ shikpɔŋ baaho aya; shi miwiemɔ lɛ hoŋ eyaŋ.”—Mateo 24:32-35.
81. Mɛɛ odaseyeli wɔ ni wɔyɔɔ yinɔ nɛɛ mli lɛ baanyɛ ale kɛjɛ mli akɛ “okadi” ni Yesu gba fɔ shi lɛ naagbee eshɛ shi eta?
81 Enyiɛ lolo esa akɛ wɔ ni wɔyɔɔ nɛkɛ yinɔ nɛɛ ni na Jeŋ Ta I fɛmɔ yɛ 1914 lɛ ana lolo yɛ Yesu gbalɛ nɛɛ mlibaa he koni wɔle akɛ “eshɛ agboi lɛ anaa eta”? Mɛni ekoŋŋ wɔbaatao akɛ nɔ ni wɔkɛbaaye odase? Ashiko wɔ akɛ mɛi ni ehao ni wɔleee nibii ni yaa nɔ yɛ shikpɔŋ nɔ kɛjɛ be mli ni Jeŋmaji Abei lɛ ba naagbee yɛ 1914 nɛɛ he nɔ ko. Ákɛ gbɔmɛi ni yɔɔ nilee ni nuɔ nii ashishi ni kaseɔ Biblia lɛ, wɔheɔ wɔyeɔ akɛ “beni [Kristo] eba lɛ kɛ nibii agbɛjianɔtoo lɛ naagbee he okadi” lɛ naagbee ebɛŋkɛ kwraa.—Mateo 24:3, NW.
82. Te Yesu kɛɛ akɛ esa akɛ wɔfee wɔnii wɔha tɛŋŋ yɛ jeŋ saji ahe yɛ eparousia lɛ mli?
82 Ani enɛ haoɔ wɔ? Ani ejieɔ miishɛɛ ni yɔɔ shihilɛ mli bianɛ lɛ kɛyaa? Esaaa akɛ ofeɔ nakai, ni efeee nakai hu. Ejaakɛ Yesu kɛɛ ekaselɔi lɛ bɔ ni esa akɛ amɛfee amɛnii yɛ jeŋ saji ahe yɛ eparousia be ni anaaa lɛ nɛɛ mli, akɛ: “Ni okadii aaaba hulu kɛ nyɔŋtsere kɛ ŋulamii amli, ni jeŋmaji afimɔ lɛ aaaba shikpɔŋ lɛ nɔ, ni amɛaafee yeyeeye, yɛ ŋshɔ kɛ ŋshɔkei agbɛɛmɔ hewɔ; ni nɔ̃ aaanyɔnyɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ; ejaakɛ aaahoso ŋwɛi hewalɛi lɛ tete. Kɛkɛ lɛ amɛaana gbɔmɔ bi lɛ akɛ eeeba yɛ atatuŋ kɛ hewalɛ kɛ anunyam babaoo. Shi beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛ kpɔmɔ lɛ miibɛŋkɛ.”—Luka 21:25-28.
83. No hewɔ lɛ enɛ jeee be ni “mɛi ni ahala” lɛ kɛ “asafo babaoo” lɛ kɛaafee mɛni, ni mɛni ji nɔ ni kpɔmɔ tsɔɔ kɛhaa amɛ?
83 Ani wɔ ni wɔyɔɔ yinɔ nɛɛ mli lɛ ena akɛ nɛkɛ ‘nibii nɛɛ etsɔ naa shi’? Ani wɔna “nibii nɛɛ” akɛ eeba mli yɛ afii nyɔŋmanyɔŋmai abɔ lɛ amli kɛjɛ 1914 Ŋ.B.? Akɛni wɔna enɛɛmɛi hewɔ lɛ, esaaa akɛ wɔhaa majimaji ateŋ “fimɔ” lɛ haoɔ wɔ. Ehe ehiaaa ni wɔdɔrɔ kɔmɔɔ yɛ jamɔ nyɔŋyeli ni Babilon kpeteŋkpele lɛ ni Kristendom fata he lɛ kɛbaa wɔ nɔ lɛ shishi dɔŋŋ. Eji be ni esa akɛ wɔhole wɔ yitsei anɔ tamɔ Ŋwɛi Flooflo Nyɔŋmɔ lɛ, Nuŋtsɔ Maŋtsɛ Yehowa lɛ jálɔi ni amɛye amɛhe. Enɛ jeee be ni esa akɛ wɔkɛ nijiaŋwujee kwɛɔ shikpɔŋ dɔŋŋ. Eji be ni asa akɛ wɔhole wɔ yitsei anɔ kɛya ŋwɛi ni wɔkwɛ odaseyelii sɔrɔtoi ni maa wɔsɛɛ be nɔ mi kɛhaa adesai lɛ yɛ Ŋmalɛ Krɔŋkrɔŋ lɛ ni Yesu gbalɛ lɛ yɔɔ mli lɛ mli la ni kpɛɔ fɛfɛo lɛ. Tɔmɔ ko kwraa bɛ shishinumɔ ni yɔɔ odaseyelii nɛɛ asɛɛ lɛ he: Kpɔmɔ ebɛŋkɛ! Nɔ ni enɛ tsɔɔ kɛha Nyɔŋmɔ “mɛi ni ehala” lɛ kɛ “asafo babaoo” lɛ ni ji amɛnanemɛi jálɔi lɛ ji je ni amɛaaje “amanehulu kpeteŋkpele” ni ka amɛhiɛ nɔŋŋ lɛ mIi. Kɛji akɛ wɔje nakai “amanehulu kpeteŋkpele” lɛ mli yɛ ŋwɛi yibaamɔ shishi lɛ, nɔ ni wɔbaashi yɛ wɔsɛɛ ji ŋmɛnɛŋmɛnɛ nibii agbɛjianɔtoo ni gbeɔ mɔ lɛ amaŋfo koikoi lɛ ni ehiŋ saamɔ lɛ. Nɔ ni gbeleɔ yɛ wɔhiɛ yɛ anunyam mli ji Nyɔŋmɔ nibii agbɛjianɔtoo hee lɛ!