KPOJIEMƆ KO NI AKƐHÃ YOHANE

1 Saji ni Yesu Kristo jie lɛ kpo* koni ekɛtsɔɔ enyɔji+ lɛ nibii ni sa akɛ aba mli oya nɔŋŋ. Yesu nine shɛ enɛ nɔ kɛjɛ Nyɔŋmɔ dɛŋ.+ Ni etsu ebɔfo lɛ, ni ehã ebɔfo lɛ tsɔ okadii anɔ ejie kpo etsɔɔ enyɔŋ Yohane,+ 2 mɔ ni ye Nyɔŋmɔ wiemɔ lɛ kɛ odase ni Yesu Kristo ye lɛ he odase lɛ, hɛɛ, eye nibii fɛɛ ni ena lɛ he odase. 3 Mɔ ni kaneɔ gbalɛ nɛɛ mli wiemɔi lɛ kɛ mɛi ni nuɔ emli wiemɔi lɛ ni amɛyeɔ nibii ni aŋmala yɛ mli lɛ anɔ lɛ yɛ miishɛɛ,+ ejaakɛ be ni ato lɛ eshɛ etã.

4 Yohane kɛ wolo nɛɛ miimaje asafoi kpawo+ ni yɔɔ Asia kpokpaa lɛ nɔ lɛ:

Dromɔ kɛ toiŋjɔlɛ ahã nyɛ kɛjɛ “mɔ ni yɔɔ amrɔ nɛɛ kɛ mɔ ni yɛ momo lɛ kɛ mɔ ni baaba lɛ”+ dɛŋ, kɛ agbɛnɛ hu, kɛjɛ mumɔi kpawo+ ni yɔɔ emaŋtsɛ sɛi lɛ hiɛ lɛ ŋɔɔ, 5 kɛ agbɛnɛ hu, kɛjɛ Yesu Kristo, “Odasefonyo Anɔkwafo lɛ,”+ “kromɔbi ni ji klɛŋklɛŋ mɔ ni te shi kɛjɛ gbohii ateŋ lɛ,”+ kɛ “shikpɔŋ lɛ nɔ maŋtsɛmɛi lɛ a-Nɔyelɔ lɛ”+ dɛŋ.

Mɔ ni sumɔɔ wɔ+ ni etsɔ lɛ diɛŋtsɛ elá lɛ nɔ ehã wɔye wɔhe kɛjɛ wɔhe eshai lɛ amli lɛ+— 6 ni ehã wɔtsɔmɔ maŋtsɛmɛi,*+ osɔfoi+ kɛhã e-Nyɔŋmɔ kɛ e-Tsɛ lɛ—hɛɛ, lɛ akɛ anunyam kɛ hewalɛ ahã kɛya naanɔ. Amen.

7 Naa! Eeba kɛ atatui lɛ,+ ni hiŋmɛi fɛɛ hiŋmɛi baana lɛ, kɛ mɛi ni tsurɔ lɛ nii lɛ; ni shikpɔŋ lɛ nɔ wekui lɛ fɛɛ baagbála amɛhe mai kɛ awerɛho yɛ ehewɔ.+ Hɛɛ, Amen.

8 Yehowa* Nyɔŋmɔ kɛɛ, “Miji Alfa lɛ kɛ Omega lɛ,*+ mɔ ni yɔɔ amrɔ nɛɛ kɛ mɔ ni yɛ momo lɛ kɛ mɔ ni baaba lɛ, Ofe lɛ.”+

9 Mi Yohane, nyɛnyɛmi kɛ mɔ ni kɛ nyɛ náa gbɛfaŋnɔ yɛ amanehulu+ lɛ kɛ maŋtsɛyeli+ lɛ kɛ shifimɔ+ lɛ mli yɛ Yesu ni wɔkɛbɔɔ lɛ hewɔ lɛ,+ miyɛ ŋshɔkpɔ ni atsɛɔ lɛ Patmo lɛ nɔ, yɛ Nyɔŋmɔ he sane ni miwieɔ kɛ Yesu he odase ni miyeɔ lɛ hewɔ. 10 Yɛ mumɔ lɛ naa lɛ, miyaje Nuŋtsɔ lɛ gbi lɛ nɔ, ni minu gbee ko ni naa wa tamɔ tɛtɛrɛmantɛrɛ gbɛɛmɔ yɛ misɛɛ, 11 ni ekɛɛ akɛ: “Nɔ ni onaa lɛ, ŋmaa owo wolokpo* mli ni okɛmaje asafoi kpawo lɛ: yɛ Efeso,+ yɛ Smirna,+ yɛ Pergamo,+ yɛ Tiatira,+ yɛ Sarde,+ yɛ Filadelfia,+ kɛ agbɛnɛ hu, yɛ Laodikea.”+

12 Mitsɔ mihe koni makwɛ mɔ ni kɛ mi wieɔ lɛ, ni be ni mitsɔ mihe lɛ, mina shika tsuru kanetsei kpawo,+ 13 ni mɔ ko tamɔ gbɔmɔ bi+ yɛ kanetsei lɛ ateŋ, ni ewo atade kakadaŋŋ ni shɛɔ enajiashi, ni ekɛ shika tsuru mlifiinɔ efi etsitsi. 14 Agbɛnɛ hu, eyitso kɛ eyitsɔi yɛɔ tamɔ kooloo hetsɔi yɛŋ, tamɔ snoo, ni ehiŋmɛii tamɔ lalilɛi,+ 15 ni enaji* tamɔ akɔɔble krɔŋŋ+ ni edɔ yɛ flɔnɔɔ mli, ni egbee tamɔ nui babaoo gbɛɛmɔ. 16 Ni ehiɛ ŋulamii kpawo yɛ eninejurɔ,+ ni klante kakadaŋŋ ni ehiɛ kɛ esɛɛ fɛɛ naa ba waa jɛ edaaŋ,+ ni ehiɛ tamɔ hulu ni miitso kɛ ehewalɛ fɛɛ.+ 17 Be ni mina lɛ lɛ, migbee shi yɛ enaji anaa tamɔ mɔ ni egbo.

Ni ekɛ eninejurɔ ŋmɛ minɔ ni ekɛɛ: “Kaashe gbeyei. Miji Klɛŋklɛŋ mɔ lɛ+ kɛ Naagbee mɔ lɛ,+ 18 kɛ mɔ ni hiɛ kã lɛ;+ migbo,+ shi naa! mihiɛ kã kɛmiiya naanɔi anaanɔ,+ ni mihiɛ gbele kɛ Gbonyobu* lɛ naa samfei lɛ.+ 19 No hewɔ lɛ, ŋmaa nibii ni ona lɛ, kɛ nibii ni yɔɔ lɛ, kɛ nibii ni baaba yɛ enɛɛmɛi asɛɛ lɛ. 20 Shi ŋulamii kpawo ni ona yɛ mininejurɔ lɛ kɛ shika tsuru kanetsei kpawo lɛ ahe teemɔŋ saji krɔŋkrɔŋi lɛ nɛ: Ŋulamii kpawo lɛ damɔ shi kɛhã asafoi kpawo lɛ abɔfoi lɛ, ni kanetsei kpawo lɛ damɔ shi kɛhã asafoi kpawo lɛ.+

2 “Ŋmaa oyahã Efeso+ asafo lɛ bɔfo+ lɛ akɛ: Nii ni mɔ ni hiɛ ŋulamii kpawo lɛ yɛ eninejurɔ, ni enyiɛɔ shika tsuru kanetsei kpawo lɛ ateŋ lɛ kɛɛ nɛ:+ 2 ‘Mile onifeemɔi lɛ, kɛ nitsumɔ ni otsuɔ waa lɛ kɛ oshifimɔ lɛ, ni akɛ, oŋmɛɛɛ mɛi fɔji agbɛ, ni oka mɛi ni kɛɔ akɛ bɔfoi ji amɛ,+ shi amɛjeee lɛ okwɛ, ni ona akɛ amalelɔi ji amɛ. 3 Agbɛnɛ hu, ofiɔ shi, ni otee nɔ ohiɛ nibii amli yɛ migbɛ́i lɛ hewɔ,+ ni etɔko bo.+ 4 Shi sane ni miyɔɔ yɛ ohe nɛ, no ji akɛ oŋmɛɛ oklɛŋklɛŋ suɔmɔ lɛ he.

5 “‘No hewɔ lɛ, kaimɔ he ni ojɛ ogbee shi lɛ, ni otsake otsui+ ni otsu nitsumɔi ni otsu klɛŋklɛŋ lɛ. Kɛji ofeee nakai lɛ, maba oŋɔɔ, ni majie okanetso+ lɛ kɛje egbɛhe lɛ, ja otsake otsui.+ 6 Fɛɛ sɛɛ lɛ, obɔɔ enɛ he mɔdɛŋ: onyɛɔ nitsumɔi ni atsuɔ yɛ Nikolai jamɔ kuu lɛ mli,+ ni mi hu minyɛɔ lɛ. 7 Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ:+ Mɔ ni yeɔ kunim lɛ,+ mahã eye wala tso lɛ ni yɔɔ Nyɔŋmɔ paradeiso lɛ mli lɛ nɔ yibii.’+

8 “Ŋmaa oyahã Smirna asafo lɛ bɔfo lɛ akɛ: Nii ni ‘Klɛŋklɛŋ mɔ lɛ kɛ Naagbee mɔ lɛ,’+ mɔ ni gbo ni eba wala mli ekoŋŋ lɛ, kɛɛ nɛ:+ 9 ‘Mile omanehulu lɛ kɛ ohia lɛ—shi niiatsɛ ji bo+—ni mile bɔ ni mɛi ni kɛɔ akɛ Yudafoi ji amɛ, shi yɛ anɔkwale mli lɛ amɛjeee, shi moŋ amɛji Satan kpeehe lɛ gbeɔ nyɛhe guɔ lɛ.+ 10 Kaashe amanehului ni obaana lɛ gbeyei.+ Naa! Abonsam baaya nɔ ekɛ nyɛteŋ mɛi komɛi awo tsuŋ koni akɛka nyɛ waa, ni nyɛbaana amanehulu gbii nyɔŋma. Ye anɔkwa kɛyashi gbele mli po, ni mahã bo wala akekere lɛ.+ 11 Mɔ ni yɔɔ toi lɛ, hã enu+ nɔ ni mumɔ lɛ kɛɔ asafoi lɛ: Mɔ ni yeɔ kunim lɛ,+ egboŋ gbele ni ji enyɔ lɛ kɔkɔɔkɔ.’+

12 “Ŋmaa oyahã Pergamo asafo lɛ bɔfo lɛ akɛ: Nii ni mɔ ni hiɛ klante kakadaŋŋ ni ehiɛ kɛ esɛɛ fɛɛ naa ba waa lɛ kɛɛ nɛ:+ 13 ‘Mile he ni oyɔɔ lɛ, ni ji he ni Satan maŋtsɛ sɛi lɛ yɔɔ lɛ; shi okã he ohiɛ migbɛ́i lɛ mli kpɛŋŋ,+ ni okwaaa hemɔkɛyeli ni oyɔɔ yɛ mimli+ lɛ yɛ midasefonyo anɔkwafo Antipa gbii lɛ amli po,+ mɔ ni agbe lɛ+ yɛ nyɛmasɛi, yɛ he ni Satan yɔɔ lɛ.

14 “‘Shi miyɛ saji fioo komɛi yɛ ohe, no ji akɛ, oyɛ mɛi yɛ jɛmɛ ni hiɛ Bileam tsɔɔmɔ lɛ mli,+ mɔ ni tsɔɔ Balak+ akɛ ekɛ nanetɔ̃tɔmɔnɔ afɔ̃ Israelbii lɛ ahiɛ, ni amɛye nibii ni akɛshã afɔle ahã amagai, ni amɛbɔ ajwamaŋ lɛ.*+ 15 Nakai nɔŋŋ hu oyɔɔ mɛi ni hiɛ Nikolai jamɔ kuu lɛ tsɔɔmɔ lɛ mli.+ 16 No hewɔ lɛ, tsakemɔ otsui. Kɛji ofeee nakai lɛ, maba oŋɔɔ oya, ni mikɛ amɛ baabawu kɛ midaaŋ klante kakadaŋŋ lɛ.+

17 “‘Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ:+ Mɔ ni yeɔ kunim lɛ,+ mahã lɛ mana ni akɛtee lɛ eko,+ ni mahã lɛ fɔbitɛ yɛŋ, ni yɛ fɔbitɛ lɛ nɔ lɛ, aŋma gbɛ́i hee ko ni mɔ ko mɔ ko leee akɛ ja mɔ ni náa fɔbitɛ lɛ pɛ.’

18 “Ŋmaa oyahã Tiatira+ asafo lɛ bɔfo lɛ akɛ: Nii ni Nyɔŋmɔ Bi lɛ, mɔ ni hiŋmɛii tamɔ lalilɛi+ ni enaji* tamɔ akɔɔble krɔŋŋ lɛ kɛɛ nɛ:+ 19 ‘Mile onifeemɔi lɛ, kɛ osuɔmɔ lɛ kɛ ohemɔkɛyeli lɛ kɛ osɔɔmɔ lɛ kɛ oshifimɔ lɛ, ni akɛ, nibii ni ofeɔ sɛɛkpee nɛɛ fe nɔ ni ofee tsutsu lɛ.

20 “‘Shi sane ni miyɔɔ yɛ ohe nɛ, no ji akɛ onáa nakai yoo Yezebel,+ mɔ ni tsɛɔ ehe gbalɔ yoo, ni etsɔɔ minyɔji lɛ anii ni elakaa amɛ koni amɛbɔ ajwamaŋ* lɛ,+ ni amɛye nibii ni akɛshã afɔle ahã amagai lɛ, he tsui. 21 Ni mihã lɛ be koni ekɛtsake etsui, shi esumɔɔɔ akɛ etsake etsui kɛje ejwamaŋbɔɔ* lɛ he. 22 Naa! miiba mashɛ lɛ mafɔ̃ hela saa nɔ, ni mɛi ni kɛ lɛ fiteɔ gbãla lɛ, mashɛrɛ amɛ mawo amanehulu kpeteŋkpele mli, ja amɛtsake amɛtsui kɛje enifeemɔi lɛ ahe. 23 Ni mikɛ gbele hela baagbe ebii lɛ, koni asafoi lɛ fɛɛ aná ale akɛ miji mɔ ni taoɔ mligbɛ susumɔi* kɛ tsuii amli lɛ, ni mahã nyɛteŋ mɔ fɛɛ mɔ bɔ ni sa enifeemɔi lɛ.+

24 “‘Shi miikɛɛ nyɛ mɛi ni eshwɛ yɛ Tiatira lɛ, mɛi fɛɛ ni enyiɛɛɛ tsɔɔmɔ nɛɛ sɛɛ, ni amɛnáaa amɛle nɔ ni atsɛɔ lɛ “Satan nibii ni mli kwɔlɔ”+ lɛ akɛ: Mikɛ jatsu kroko eŋmɛŋ nyɛnɔ. 25 Fɛɛ sɛɛ lɛ, nyɛhiɛa nɔ ni nyɛyɔɔ lɛ mli kɛyashi be ni maba.+ 26 Ni mɔ ni yeɔ kunim, ni ehiɛɔ minifeemɔi lɛ amli kɛyashiɔ naagbee lɛ, mahã lɛ hegbɛ yɛ jeŋmaji lɛ anɔ,+ 27 tamɔ bɔ ni mi hu miná kɛjɛ mi-Tsɛ ŋɔɔ lɛ, ni ekɛ dadetso baakpala mɛi lɛ tamɔ tookwɛlɔ feɔ lɛ,+ koni ejwara amɛ dukuduku tamɔ ajwaraa sũ kukwɛii* lɛ. 28 Ni mahã lɛ leebi ŋulami lɛ.+ 29 Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ.’

3 “Ŋmaa oyahã Sarde asafo lɛ bɔfo lɛ akɛ: Nii ni mɔ ni hiɛ Nyɔŋmɔ mumɔi kpawo+ lɛ kɛ ŋulamii kpawo+ lɛ kɛɛ nɛ: ‘Mile onifeemɔi lɛ, akɛ ohiɛ gbɛ́i* akɛ ohiɛ kã, shi ogbo.+ 2 Hã ohiɛ ahi ohe nɔ,+ ni owaje nii ni eshwɛ ni heɔ agboi lɛ, ejaakɛ minako akɛ otsu onitsumɔi lɛ jogbaŋŋ kɛmɔ shi* yɛ mi-Nyɔŋmɔ lɛ hiɛ. 3 No hewɔ lɛ, yaa nɔ ohã nɔ ni oná kɛ nɔ ni onu lɛ ahi ojwɛŋmɔ mli,* ni oya nɔ ohiɛ mli, ni otsake otsui.+ Anɔkwa, kɛ́ ohiɛ etsɛ̃ɛɛ lɛ, maba tamɔ julɔ,+ ni oleŋ nɔ ŋmɛlɛtswaa nɔ ni maba onɔ lɛ kwraa.+

4 “‘Shi oyɛ mɛi fioo komɛi* yɛ Sarde ni woko amɛtadei lɛ muji,+ ni amɛkɛ mi baanyiɛ yɛ atadei yɛji amli,+ ejaakɛ amɛsa nakai. 5 No hewɔ lɛ, mɔ ni yeɔ kunim lɛ,+ abaawo lɛ atadei yɛji,+ ni migbeŋ* egbɛ́i yɛ wala wolo lɛ mli kɔkɔɔkɔ,+ shi moŋ matsĩ egbɛ́i lɛ tã yɛ mi-Tsɛ kɛ ebɔfoi lɛ ahiɛ.+ 6 Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ.’

7 “Ŋmaa oyahã Filadelfia asafo lɛ bɔfo lɛ akɛ: Nii ni mɔ ni yɔɔ krɔŋkrɔŋ,+ anɔkwafo lɛ,+ mɔ ni hiɛ David samfee lɛ,+ mɔ ni gbeleɔ ni mɔ ko ŋaaa, ni eŋaa hu ni mɔ ko gbeleee lɛ kɛɛ nɛ: 8 ‘Mile onifeemɔi lɛ—naa! mikɛ shinaa ni agbele ema ohiɛ,+ ni mɔ ko nyɛŋ aŋa. Ni mile akɛ hewalɛ fioo oyɔɔ, ni oye miwiemɔ lɛ nɔ, ni oye migbɛ́i lɛ anɔkwa. 9 Naa! Mahã mɛi ni jɛ Satan kpeehe lɛ ni kɛɔ akɛ Yudafoi ji amɛ, shi amɛjeee,+ shi malemɔ moŋ amɛmaleɔ lɛ—naa! mahã amɛba ni amɛbakoto onaji anaa, ni mahã amɛle akɛ misumɔɔ bo. 10 Akɛni oye mishifimɔ lɛ he wiemɔ lɛ nɔ* hewɔ lɛ,+ mi hu mikɛ bo baato yɛ kaa ŋmɛlɛtswaa+ lɛ ni baaba shikpɔŋ muu lɛ fɛɛ nɔ, koni akɛka mɛi ni yɔɔ shikpɔŋ lɛ nɔ lɛ mli. 11 Miiba oya.+ Yaa nɔ ohiɛ nɔ ni oyɔɔ lɛ mli, koni mɔ ko mɔ ko akashɔ̃ okekere lɛ.+

12 “‘Mɔ ni yeɔ kunim lɛ—mafee lɛ akulashiŋ yɛ mi-Nyɔŋmɔ lɛ sɔlemɔ shĩa lɛ mli, ni ejeŋ kpo kɛjɛŋ mli dɔŋŋ, ni maŋma mi-Nyɔŋmɔ lɛ gbɛ́i+ kɛ mi-Nyɔŋmɔ lɛ maŋ lɛ, ni ji Yerusalem Hee+ lɛ ni jɛɔ ŋwɛi ekpelekeɔ shi kɛjɛɔ mi-Nyɔŋmɔ lɛ ŋɔɔ lɛ gbɛ́i, kɛ mi diɛŋtsɛ migbɛ́i hee lɛ, yɛ enɔ.+ 13 Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ.’

14 “Ŋmaa oyahã Laodikea+ asafo lɛ bɔfo lɛ akɛ: Nii ni Amen+ lɛ, anɔkwa odasefonyo+ ni yeɔ anɔkwa lɛ,+ Nyɔŋmɔ nibɔɔ lɛ shishijee lɛ kɛɛ nɛ:+ 15 ‘Mile onifeemɔi lɛ, akɛ ojɔko ŋanii ni odɔko klakla hu. Miná ni kulɛ ojɔ ŋanii aloo odɔ klakla. 16 No hewɔ lɛ, akɛni kulɔkulɔ oyɔɔ ni ojɔko ŋanii+ ni odɔko klakla+ hu hewɔ lɛ, mibafɛ̃ bo yɛ midaaŋ mashwie. 17 Ejaakɛ okɛɔ akɛ: “Niiatsɛ ji mi+ ni miyɛ nii ni nɔ ko nɔ ko ehiaaa mi,” shi oleee akɛ ooye awerɛho ni onii hu yɛ mɔbɔ ni ohiafo kɛ shwilafo kɛ mɔ ni hiɛ ehe folo ji bo, 18 miiwo bo ŋaa akɛ ohé shika tsuru ni atsuu he yɛ la mli yɛ miŋɔɔ koni otsɔ niiatsɛ, kɛ atadei yɛji koni owo ni ohe akakã folo ni ana ohiɛgbele lɛ,+ kɛ hiŋmɛi tsofa ni okɛkpa ohiŋmɛii anɔ+ koni ona nii.+

19 “‘Mɛi fɛɛ ni misumɔɔ amɛsane lɛ, mijajeɔ amɛ ni mitsɔseɔ amɛ.+ No hewɔ lɛ, ohiɛ adɔ ni otsake otsui.+ 20 Naa! midamɔ shinaa lɛ naa miitswa kɔkɔɔkɔ. Kɛ́ mɔ ko nu migbee ni egbele shinaa lɛ, maba eshĩa lɛ ni mikɛ lɛ baabaye gbɛkɛ niyenii lɛ, ni lɛ hu ekɛ mi baaye. 21 Mɔ ni yeɔ kunim lɛ,+ mahã ekɛ mi ata mimaŋtsɛ sɛi lɛ nɔ,+ tamɔ bɔ nɔŋŋ ni mi hu miye kunim ni mikɛ mi-Tsɛ ta emaŋtsɛ sɛi lɛ nɔ lɛ.+ 22 Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ.’”

4 Enɛ sɛɛ lɛ mikwɛ, ni naa! shinaa ko ni agbele yɛ ŋwɛi, ni klɛŋklɛŋ gbee ni minu ni kɛ mi wie lɛ tamɔ tɛtɛrɛmantɛrɛ, ni ekɛɛ: “Kwɔɔ kɛba biɛ nɛɛ, ni matsɔɔ bo nibii ni sa akɛ aba mli lɛ.” 2 Enɛ sɛɛ lɛ, amrɔ lɛ, miyaje mumɔ lɛ hewalɛ lɛ mli, ni naa! maŋtsɛ sɛi ko ma shi yɛ ŋwɛi, ni mɔ ko ta maŋtsɛ sɛi lɛ nɔ.+ 3 Ni mɔ ni ta nɔ lɛ, kɛ́ aakwɛ lɛ lɛ, etamɔ yaspi tɛ+ kɛ sardio tɛ,* ni kwaabuɛtɛ ni tamɔ emerald tɛ bɔle maŋtsɛ sɛi lɛ he fɛɛ kɛkpe.+

4 Maŋtsɛ sɛii 24 mamɔ shi yɛ maŋtsɛ sɛi lɛ he fɛɛ kɛkpe, ni mina onukpai 24+ ni wo atadei yɛji tara maŋtsɛ sɛii nɛɛ anɔ, ni shika tsuru akekerei bumɔ amɛyitsei. 5 Sarawai+ kɛ gbei kɛ nugbɔshiimɔi+ miijɛ maŋtsɛ sɛi lɛ mli kɛmiiba; ni la miitso yɛ kanei kpawo amli yɛ maŋtsɛ sɛi lɛ hiɛ, ni enɛɛmɛi damɔ shi kɛhã Nyɔŋmɔ mumɔi kpawo lɛ.+ 6 Nɔ ko yɛ maŋtsɛ sɛi lɛ hiɛ tamɔ glase ŋshɔ,+ tamɔ kristalo.

Bɔɔ nii ejwɛ ni hiɛ kamɔ+ ni hiŋmɛii eyimɔ amɛhiɛ kɛ amɛsɛɛ obɔbɔ yɛ maŋtsɛ sɛi lɛ teŋ* ni amɛbɔle maŋtsɛ sɛi lɛ he kɛkpe. 7 Klɛŋklɛŋ bɔɔ nɔ ni hiɛ kã lɛ tamɔ jata,+ ni bɔɔ nɔ ni hiɛ kã ni ji enyɔ lɛ tamɔ tsinanuu,+ ni bɔɔ nɔ ni hiɛ kã ni ji etɛ+ lɛ hiɛ tamɔ gbɔmɔ hiɛ, ni bɔɔ nɔ ni hiɛ kã ni ji ejwɛ+ lɛ tamɔ okropɔŋ ni miifiliki.+ 8 Ni bɔɔ nii ejwɛ ni hiɛ kamɔ lɛ ateŋ mɔ fɛɛ mɔ yɛ fiji ekpaa; ni amɛfiji lɛ ahe kɛ amɛmli eyimɔ obɔbɔ kɛ hiŋmɛii sɔŋŋ.+ Ni jetsɛremɔ kɛ jenamɔ fɛɛ lɛ, amɛyaa nɔ amɛkɛɔ akɛ: “Krɔŋkrɔŋ, krɔŋkrɔŋ, krɔŋkrɔŋ ji Yehowa*+ Nyɔŋmɔ, Ofe lɛ, mɔ ni yɛ momo lɛ, kɛ mɔ ni yɔɔ amrɔ nɛɛ, kɛ mɔ ni baaba lɛ.”+

9 Be fɛɛ be ni bɔɔ nii ni hiɛ kamɔ lɛ kɛ anunyam kɛ woo kɛ shidaa baahã mɔ ni ta maŋtsɛ sɛi lɛ nɔ ni hiɛ kã kɛmiiya naanɔi anaanɔ lɛ,+ 10 onukpai 24+ lɛ hoɔ gbeɔ shi yɛ mɔ ni ta maŋtsɛ sɛi lɛ nɔ lɛ hiɛ, ni amɛjáa mɔ ni hiɛ kã kɛmiiya naanɔi anaanɔ lɛ, ni amɛshɛrɛɔ amɛkekerei lɛ amɛshwieɔ maŋtsɛ sɛi lɛ hiɛ, amɛkɛɔ akɛ: 11 “Yehowa* wɔ-Nyɔŋmɔ, bo ji mɔ ni sa akɛ akɛ anunyam+ lɛ kɛ woo+ lɛ kɛ hewalɛ+ lɛ ahã, ejaakɛ bo obɔ nibii fɛɛ,+ ni osuɔmɔ naa hewɔ amɛba shihilɛ mli ni abɔ amɛ.”

5 Ni mina wolokpo* ko yɛ mɔ ni ta maŋtsɛ sɛi lɛ nɔ lɛ ninejurɔ,+ ni aŋma nii yɛ emli kɛ esɛɛ fɛɛ, ni asɔo naa kpɛŋŋ kɛ niianaasɔomɔnii kpawo. 2 Ni mina ŋwɛibɔfo hewalɔ ko ni kɛ gbee ni wa miijaje akɛ: “Namɔ ji mɔ ni sa akɛ egbeleɔ wolokpo lɛ naa ni etserɛɔ enaasɔomɔnii lɛ?” 3 Shi mɔ ko mɔ ko bɛ ŋwɛi loo shikpɔŋ lɛ nɔ loo shikpɔŋ lɛ shishi ni baanyɛ wolokpo lɛ naa agbele loo ekwɛ mli. 4 Mifó aahu ejaakɛ anáaa mɔ ko mɔ ko ni sa akɛ egbeleɔ wolokpo lɛ naa aloo ekwɛɔ mli. 5 Shi onukpai lɛ ateŋ mɔ kome kɛɛ mi akɛ: “Kpa yaafo. Naa! Jata lɛ ni jɛ Yuda weku lɛ mli lɛ,+ David shishifã lɛ,+ eye kunim,+ ni no hewɔ lɛ, esa mɔ ni gbeleɔ wolokpo lɛ naa, ni etserɛɔ enaasɔomɔnii kpawo lɛ.”

6 Ni mina gwantɛŋbi+ ko ni tamɔ nɔ ni agbe lɛ,+ damɔ shi yɛ maŋtsɛ sɛi lɛ kɛ bɔɔ nii ejwɛ ni hiɛ kamɔ lɛ ateŋ kɛ onukpai lɛ ateŋ,+ ni eyɛ akolontoi kpawo kɛ hiŋmɛii kpawo, ni hiŋmɛii lɛ damɔ shi kɛhã Nyɔŋmɔ mumɔi kpawo+ ni atsu kɛtee shikpɔŋ lɛ fɛɛ nɔ lɛ. 7 Amrɔ lɛ, eba ni ebahe wolokpo lɛ yɛ mɔ ni ta maŋtsɛ sɛi lɛ nɔ lɛ ninejurɔ.+ 8 Be ni ehe wolokpo lɛ, bɔɔ nii ejwɛ ni hiɛ kamɔ lɛ kɛ onukpai 24 + lɛ ho gbee shi yɛ Gwantɛŋbi lɛ hiɛ, ni amɛteŋ mɔ fɛɛ mɔ hiɛ saŋku kɛ shika tsuru tsɛnsii kɛ amɛmli tsofa-kɛ-ŋmai obɔbɔ. (Tsofa-kɛ-ŋmai lɛ damɔ shi kɛhã mɛi krɔŋkrɔŋi lɛ asɔlemɔi lɛ.)+ 9 Ni amɛlá lala hee ko+ amɛkɛɛ: “Osa akɛ oheɔ wolokpo lɛ ni otserɛɔ enaasɔomɔnii lɛ, ejaakɛ agbe bo ni okɛ olá lɛ hé mɛi ohã Nyɔŋmɔ+ kɛjɛ weku fɛɛ weku kɛ wiemɔ fɛɛ wiemɔ kɛ gbɔmɛi srɔtoi fɛɛ kɛ jeŋmaŋ fɛɛ jeŋmaŋ mli,+ 10 ni ohã amɛtsɔmɔ maŋtsɛmɛi*+ kɛ osɔfoi amɛhã wɔ-Nyɔŋmɔ lɛ,+ ni amɛbaaye shikpɔŋ lɛ nɔ akɛ maŋtsɛmɛi.”+

11 Ni mikwɛ, ni minu ŋwɛibɔfoi babaoo ni ebɔle maŋtsɛ sɛi lɛ kɛ bɔɔ nii ni hiɛ kamɔ lɛ kɛ onukpai lɛ ahe kɛkpe lɛ agbee, ni amɛyibɔ ji akpei nyɔŋma toi akpei nyɔŋmai abɔ kɛ akpe toi akpei abɔ,+ 12 ni amɛkɛ gbee ni wa miikɛɛ akɛ: “Mɔ ni sa akɛ akɛ hewalɛ kɛ ninámɔ kɛ hiɛshikamɔ kɛ nyɛmɔ kɛ woo kɛ anunyam kɛ jɔɔmɔ lɛ ahã+ lɛ ji Gwantɛŋbi lɛ ni agbe lɛ lɛ.”+

13 Ni minu akɛ bɔɔ nii fɛɛ ni yɔɔ ŋwɛi kɛ shikpɔŋ lɛ nɔ kɛ shikpɔŋ lɛ shishi+ kɛ ŋshɔ hiɛ, kɛ nibii fɛɛ ni yɔɔ amɛmli lɛ miikɛɛ akɛ: “Akɛ jɔɔmɔ kɛ woo+ kɛ anunyam kɛ nyɛmɔ ahã mɔ ni ta maŋtsɛ sɛi lɛ nɔ+ lɛ kɛ Gwantɛŋbi+ lɛ kɛya naanɔi anaanɔ.”+ 14 Bɔɔ nii ejwɛ ni hiɛ kamɔ lɛ miikɛɛ akɛ: “Amen!” ni onukpai lɛ ho gbee shi ni amɛjá Nyɔŋmɔ.

6 Ni mina akɛ Gwantɛŋbi+ lɛ tse niianaasɔomɔnii kpawo lɛ ateŋ ekome,+ ni minu akɛ bɔɔ nii ejwɛ ni hiɛ kamɔ lɛ ateŋ mɔ kome+ kɛ gbee ni tamɔ nugbɔshiimɔ kɛɛ: “Ba!” 2 Ni mikwɛ, ni naa! okpɔŋɔ yɛŋ,+ ni mɔ ni ta enɔ lɛ hiɛ gãi; ni ahã lɛ akekere,+ ni eje kpo, eeye kunim koni egbe ekunimyeli lɛ naa.+

3 Be ni etse niianaasɔomɔnɔ ni ji enyɔ lɛ, minu akɛ bɔɔ nɔ ni hiɛ kã ni ji enyɔ+ lɛ kɛɛ: “Ba!” 4 Okpɔŋɔ kroko ni tsuɔ tamɔ lalilɛi je kpo, ni ahã mɔ ni ta enɔ lɛ hegbɛ akɛ ejie toiŋjɔlɛ kɛje shikpɔŋ lɛ nɔ koni amɛgbegbee amɛhe, ni ahã lɛ klante wulu ko.+

5 Be ni etse niianaasɔomɔnɔ ni ji etɛ lɛ,+ minu akɛ bɔɔ nɔ ni hiɛ kã ni ji etɛ+ lɛ kɛɛ: “Ba!” Ni mikwɛ, ni naa! okpɔŋɔ diŋ, ni mɔ ni ta enɔ lɛ hiɛ nsɛnii yɛ edɛŋ. 6 Minu nɔ ko ni tamɔ gbee ko yɛ bɔɔ nii ejwɛ ni hiɛ kamɔ lɛ ateŋ miikɛɛ: “Wiiti susumɔnɔ kome* lɛ denario kome*+ kɛ barle* susumɔnii etɛ* lɛ denario kome; ni oliv mu lɛ kɛ wain lɛ, kaakpãtã hiɛ.”+

7 Be ni etse niianaasɔomɔnɔ ni ji ejwɛ lɛ, minu bɔɔ nɔ ni hiɛ kã ni ji ejwɛ+ lɛ gbee miikɛɛ: “Ba!” 8 Ni mikwɛ, ni naa! okpɔŋɔ ni ekɔla tamɔ lamulu, ni mɔ ni ta enɔ lɛ gbɛ́i ji Gbele. Ni Gbonyobu* lɛ nyiɛ esɛɛ kpaakpa. Ni ahã amɛ hegbɛ yɛ shikpɔŋ lɛ mlijai ejwɛ mli ekome nɔ, akɛ amɛkɛ klante kakadaŋŋ kɛ hɔmɔ+ kɛ gbele hela kɛ shikpɔŋ lɛ nɔ kooloi awuiyelɔi lɛ agbegbee amɛ.+

9 Be ni etse niianaasɔomɔnɔ ni ji enumɔ lɛ, mina mɛi ni agbe yɛ Nyɔŋmɔ wiemɔ lɛ hewɔ kɛ agbɛnɛ hu yɛ odase ni amɛye lɛ hewɔ+ lɛ asusumai*+ yɛ afɔleshaa latɛ lɛ shishi.+ 10 Amɛbolɔ kɛ gbee ni wa akɛ: “Nuŋtsɔ Ofe, mɔ krɔŋkrɔŋ kɛ anɔkwafo,+ mɛɛ be po obaamɛ kɛyashi dani obaakojo ni otɔ wɔlá lɛ he owele yɛ mɛi ni yɔɔ shikpɔŋ lɛ nɔ lɛ anɔ?”+ 11 Ni ahã amɛteŋ mɔ fɛɛ mɔ atade yɛŋ kakadaŋŋ,+ ni akɛɛ amɛ akɛ amɛjɔɔ amɛhe be fioo lolo, kɛyashi amɛnanemɛi nyɔji lɛ kɛ amɛnyɛmimɛi ni aaba abagbe amɛ tamɔ bɔ ni agbe amɛ hu lɛ ayibɔ lɛ baashɛ.+

12 Ni mina be ni etse niianaasɔomɔnɔ ni ji ekpaa lɛ, ni shikpɔŋhosomɔ kpele ko ba; ni hulu lɛ tsɔ ediŋ tamɔ kpekpe ni akɛ tsɔi* fee, ni nyɔɔŋtsere muu lɛ fɛɛ tsɔ tamɔ lá,+ 13 ni ŋwɛi ŋulamii lɛ tserɛ shwie shikpɔŋ, tamɔ bɔ ni agbami tso nɔ agbamii ŋmilikitii tserɛɔ shwieɔ shi kɛ́ kɔɔyɔɔ ni naa wa waa hoso agbami tso lɛ. 14 Ni ŋwɛi ho etee tamɔ wolokpo* ni aakota,+ ni atsirɛ gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ kɛje egbɛhe.+ 15 Ni shikpɔŋ lɛ nɔ maŋtsɛmɛi lɛ kɛ abladei lɛ kɛ tatsɛmɛi lɛ kɛ niiatsɛmɛi lɛ kɛ hewalɔi lɛ kɛ nyɔŋ fɛɛ nyɔŋ kɛ mɛi fɛɛ ni jeee nyɔji, yateetee amɛhe yɛ tɛkploi amli kɛ agbɛnɛ hu, yɛ gɔji atɛsai amli.+ 16 Ni amɛtee nɔ amɛkɛɛ gɔji lɛ kɛ tɛsai lɛ akɛ: “Nyɛbagbea wɔnɔ,+ ni nyɛkɛ wɔ atea kɛjea mɔ ni ta maŋtsɛ sɛi lɛ nɔ+ lɛ hiɛ, kɛ Gwantɛŋbi+ lɛ mlifu lɛ naa, 17 ejaakɛ amɛmlifu gbi wulu lɛ eshɛ,+ ni namɔ baanyɛ naa adamɔ?”+

7 Enɛ sɛɛ lɛ, mina ŋwɛibɔfoi ejwɛ damɔ shikpɔŋ lɛ koji ejwɛ lɛ anɔ, ni amɛhiɛ shikpɔŋ lɛ kɔɔyɔi ejwɛ lɛ amli kpɛŋŋ, koni kɔɔyɔɔ ko akatswa yɛ shikpɔŋ lɛ nɔ loo ŋshɔ lɛ nɔ loo tso ko nɔ. 2 Ni mina ŋwɛibɔfo kroko miikwɔ kɛmiijɛ hulushiteehe* kɛmiiba, ni ehiɛ Nyɔŋmɔ hiɛkãalɔ lɛ niianaasɔomɔnɔ; ni ebolɔ kɛ gbee ni wa ekɛɛ ŋwɛibɔfoi ejwɛ lɛ ni ahã amɛ hegbɛ akɛ amɛye shikpɔŋ lɛ kɛ ŋshɔ lɛ awui lɛ 3 akɛ: “Nyɛkayea shikpɔŋ lɛ loo ŋshɔ lɛ loo tsei lɛ awui, kɛyashi be ni wɔkɛ niianaasɔomɔnɔ baakadi+ wɔ-Nyɔŋmɔ lɛ nyɔji lɛ ahiɛnai dã.”+

4 Ni minu mɛi ni akɛ niianaasɔomɔnɔ lɛ ekadi amɛ lɛ ayibɔ, mɛi 144,000,+ ni akɛ niianaasɔomɔnɔ ekadi amɛ kɛjɛ Israelbii lɛ aweku fɛɛ weku mli:+

9 Enɛ sɛɛ lɛ mikwɛ, ni naa! asafoku babaoo ko, ni gbɔmɔ ko gbɔmɔ ko nyɛŋ akane, ni jɛ jeŋmaŋ fɛɛ jeŋmaŋ kɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ mli,+ damɔ maŋtsɛ sɛi lɛ hiɛ kɛ Gwantɛŋbi lɛ hiɛ, ni amɛwo atadei yɛji kakadaji;+ ni amɛhiɛ tɛŋ blɛoi yɛ amɛdɛŋ.+ 10 Ni amɛyaa nɔ amɛbolɔɔ kɛ gbee ni wa akɛ: “Wɔnáa wɔyiwalaheremɔ lɛ kɛjɛɔ wɔ-Nyɔŋmɔ lɛ, mɔ ni ta maŋtsɛ sɛi lɛ nɔ lɛ,+ kɛ Gwantɛŋbi lɛ ŋɔɔ.”+

11 Ŋwɛibɔfoi lɛ fɛɛ damɔ maŋtsɛ sɛi lɛ kɛ onukpai+ lɛ kɛ bɔɔ nii ejwɛ ni hiɛ kamɔ lɛ ahewɔ kɛkpe, ni amɛkɛ amɛhiɛ bumɔ shi yɛ maŋtsɛ sɛi lɛ hiɛ ni amɛjá Nyɔŋmɔ 12 amɛkɛɛ: “Amen! Yijiemɔ lɛ kɛ anunyam lɛ kɛ hiɛshikamɔ lɛ kɛ shidaa lɛ kɛ woo lɛ kɛ hewalɛ lɛ kɛ nyɛmɔ lɛ ji wɔ-Nyɔŋmɔ lɛ nɔ kɛmiiya naanɔi anaanɔ.+ Amen.”

13 Onukpai lɛ ateŋ mɔ kome here nɔ ekɛɛ mi akɛ: “Mɛi ni wo atadei yɛji kakadaji nɛɛ,+ namɛi ni, ni nɛgbɛ amɛjɛ?” 14 Ni amrɔ lɛ, mikɛɛ lɛ akɛ: “Minuŋtsɔ, bo ole.” Ni ekɛɛ mi akɛ: “Mɛnɛɛmɛi ji mɛi ni je amanehulu kpeteŋkpele lɛ mli lɛ,+ ni amɛfɔ amɛtadei kakadaji lɛ ahe ni amɛhã eyɛ futaa yɛ Gwantɛŋbi lɛ lá lɛ mli.+ 15 No hewɔ ni amɛyɔɔ Nyɔŋmɔ maŋtsɛ sɛi lɛ hiɛ, ni amɛkɛ sɔɔmɔ krɔŋŋ hãa lɛ jetsɛremɔ kɛ jenamɔ yɛ esɔlemɔ shĩa lɛ; ni mɔ ni ta maŋtsɛ sɛi lɛ nɔ+ lɛ baalɛɛ emama tsũ lɛ mli kɛha amɛnɔ.+ 16 Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ, hulu eshãŋ amɛ hu ni amɛnuŋ dɔlɛ ni naa wa ko he dɔŋŋ,+ 17 ejaakɛ Gwantɛŋbi+ lɛ ni yɔɔ maŋtsɛ sɛi lɛ teŋ lɛ baakwɛ amɛ tamɔ tookwɛlɔ feɔ lɛ,+ ni ebaatsɔɔ amɛ gbɛ kɛya wala nuhiŋmɛii ahe.+ Ni Nyɔŋmɔ baatsumɔ amɛhiŋmɛiiaŋ yaafonui fɛɛ.”+

8 Be ni etse niianaasɔomɔnɔ ni ji kpawo lɛ,+ afee diŋŋ yɛ ŋwɛi aaafee ŋmɛlɛtswaa fã. 2 Ni mina ŋwɛibɔfoi kpawo+ ni damɔ Nyɔŋmɔ hiɛ lɛ, ni akɛ tɛtɛrɛmantɛrɛi kpawo hã amɛ.

3 Ŋwɛibɔfo kroko ni hiɛ shika tsuru tsofa-kɛ-ŋma shãanɔ ba, ni ebadamɔ afɔleshaa latɛ lɛ he,+ ni akɛ tsofa-kɛ-ŋma babaoo+ hã lɛ, koni ekɛhã yɛ shika tsuru afɔleshaa latɛ+ lɛ ni ma maŋtsɛ sɛi lɛ hiɛ lɛ nɔ kɛfata mɛi krɔŋkrɔŋi lɛ fɛɛ asɔlemɔi lɛ ahe. 4 Tsofa-kɛ-ŋma lɛ lasu lɛ te shi kɛjɛ ŋwɛibɔfo lɛ dɛŋ kɛtee Nyɔŋmɔ hiɛ, ni mɛi krɔŋkrɔŋi lɛ asɔlemɔi+ lɛ hu fata he. 5 Shi amrɔ lɛ, ŋwɛibɔfo lɛ ŋɔ tsofa-kɛ-ŋma shãanɔ lɛ, ni eje afɔleshaa latɛ lɛ nɔ la lɛ eko ewo lɛ obɔ, ni etsi eshwie shikpɔŋ lɛ nɔ. Ni nugbɔshiimɔi kɛ gbei kɛ sarawagbalamɔi+ kɛ shikpɔŋhosomɔ ba. 6 Ni ŋwɛibɔfoi kpawo lɛ ni hiɛ tɛtɛrɛmantɛrɛi kpawo+ lɛ saa amɛhe koni amɛkpã.

7 Klɛŋklɛŋ mɔ lɛ kpã etɛtɛrɛmantɛrɛ lɛ. Ni nyɔŋmɔŋtɛ kɛ la ni lá futu mli ba, ni atsi ashwie shikpɔŋ lɛ nɔ;+ ni shikpɔŋ lɛ mlijai etɛ mli ekome shã, ni tsei amlijai etɛ mli ekome shã, ni jwɛi fɔ fɛɛ shã.+

8 Ŋwɛibɔfo ni ji enyɔ lɛ kpã etɛtɛrɛmantɛrɛ lɛ. Ni ashɛ nɔ ko ni tamɔ gɔŋ wulu ko ni miitso kɛ la afɔ̃ ŋshɔ lɛ mli.+ Ni ŋshɔ lɛ mlijai etɛ mli ekome tsɔ lá;+ 9 ni ŋshɔ lɛ mli bɔɔ nii ni hiɛ kamɔ* lɛ amlijai etɛ mli ekome gboi,+ ni meelei lɛ amlijai etɛ mli ekome fite.

10 Ŋwɛibɔfo ni ji etɛ lɛ kpã etɛtɛrɛmantɛrɛ lɛ. Ni ŋulami wulu ko ni miitso tamɔ kane jɛ ŋwɛi bagbee shi, ni egbee fai lɛ amlijai etɛ mli ekome kɛ nuhiŋmɛii lɛ anɔ.+ 11 Ŋulami lɛ gbɛ́i ji Joomɔtso. Ni enɛ hã nui lɛ amlijai etɛ mli ekome joo, ni mɛi pii gboi yɛ nui lɛ ahewɔ, ejaakɛ amɛmiijoo.+

12 Ŋwɛibɔfo ni ji ejwɛ lɛ kpã etɛtɛrɛmantɛrɛ lɛ. Ni atswa hulu lɛ mlijai etɛ mli ekome+ kɛ nyɔɔŋtsere lɛ mlijai etɛ mli ekome kɛ ŋulamii lɛ amlijai etɛ mli ekome nɔ, bɔ ni afee ni amɛmlijai etɛ mli ekomekome awo duŋ,+ ni jetsɛremɔ mlijai etɛ mli ekome lɛ, akaná la, ni jenamɔ hu nakai nɔŋŋ.

13 Ni mikwɛ, ni minu akɛ okropɔŋ ko ni miifiliki yɛ ŋwɛi teŋ lɛ kɛ gbee ni wa kɛɛ: “Kpoo, kpoo, kpoo+ hã mɛi ni yɔɔ shikpɔŋ lɛ nɔ lɛ, yɛ tɛtɛrɛmantɛrɛi ni eshwɛ ni ŋwɛibɔfoi etɛ lɛ miiba amɛbakpã lɛ agbɛɛmɔi lɛ ahewɔ!”+

9 Ŋwɛibɔfo ni ji enumɔ lɛ kpã etɛtɛrɛmantɛrɛ lɛ.+ Ni mina ŋulami ko ni ejɛ ŋwɛi ebagbee shikpɔŋ lɛ nɔ, ni akɛ bu kwɔŋkwɔŋ lɛ naa samfee+ lɛ hã ŋulami lɛ. 2 Egbele bu kwɔŋkwɔŋ lɛ naa, ni lasu te shi kɛjɛ bu lɛ mli tamɔ flɔnɔɔ wulu ko mli lasu, ni bu lɛ mli lasu lɛ hewɔ lɛ, hulu lɛ wo duŋ,+ ni kɔɔyɔɔ lɛ hu nakai nɔŋŋ. 3 Ni baalabii jɛ lasu lɛ mli kɛba shikpɔŋ lɛ nɔ,+ ni ahã amɛ hewalɛ, hewalɛ kome too lɛ nɔŋŋ ni shikpɔŋ lɛ nɔ nyɔŋmɔŋkrakroi* lɛ yɔɔ lɛ. 4 Akɛɛ amɛ akɛ amɛkaye shikpɔŋ lɛ nɔ jwɛi loo kwɛ̃ɛ nii ko loo tso ko awui, akɛ ja mɛi ni bɛ Nyɔŋmɔ niianaasɔomɔnɔ lɛ okadi lɛ yɛ amɛhiɛnai lɛ pɛ.+

5 Ni ahãaa baalabii lɛ hegbɛ akɛ amɛgbe amɛ, shi moŋ akɛ amɛpiŋ amɛ nyɔji enumɔ, ni amɛpiŋmɔ lɛ tamɔ piŋmɔ ni mɔ piŋɔ kɛ́ nyɔŋmɔŋkrakro*+ tsɛ̃ lɛ lɛ. 6 Nakai gbii lɛ amli lɛ, mɛi baatao gbele, shi amɛnaŋ kɔkɔɔkɔ, ni amɛbaashwe akɛ amɛgboi, shi gbele baajo amɛnaa foi.

7 Ni baalabii lɛ tamɔ okpɔŋɔi ni asaa amɛ kɛhã ta;+ nibii komɛi ni tamɔ shika tsuru akekerei bumɔ amɛyitsei, ni amɛhiɛ tamɔ gbɔmɛi ahiɛ, 8 shi amɛyitsɔi tamɔ yei ayitsɔi. Ni amɛnyanyɔji tamɔ jatai anɔ,+ 9 ni amɛwo damai tamɔ dade damai. Ni amɛfijiaŋ gbɛɛmɔ tamɔ shwiilii ni okpɔŋɔi miigbala kɛ foi kɛmiiya ta agbɛɛmɔ.+ 10 Agbɛnɛ hu, amɛyɛ leii ni tsɛ̃rɛ̃ɔ mɔ tamɔ nyɔŋmɔŋkrakroi* anɔ, ni hewalɛ ni amɛkɛbaaye mɛi awui nyɔji enumɔ lɛ yɛ amɛleii lɛ amli.+ 11 Amɛyɛ maŋtsɛ ni yeɔ amɛnɔ, bu kwɔŋkwɔŋ lɛ bɔfo lɛ.+ Ni atsɛɔ egbɛ́i yɛ Hebri mli akɛ Abadon,* shi yɛ Greek mli lɛ, atsɛɔ egbɛ́i akɛ Apolion.*

12 Kpoo kome eho. Naa! Eshwɛ kpoo enyɔ+ ni baaba yɛ nibii nɛɛ asɛɛ.

13 Ŋwɛibɔfo ni ji ekpaa+ lɛ kpã etɛtɛrɛmantɛrɛ lɛ.+ Ni minu gbee ko kɛjɛ shika tsuru afɔleshaa latɛ+ ni ma Nyɔŋmɔ hiɛ lɛ akolontoi lɛ amli 14 ni miikɛɛ ŋwɛibɔfo ni ji ekpaa ni hiɛ tɛtɛrɛmantɛrɛ lɛ akɛ: “Fɛnemɔ bɔfoi ejwɛ lɛ ni afimɔ amɛ yɛ Yufrate faa wulu+ lɛ naa lɛ.” 15 Ni afɛne bɔfoi ejwɛ lɛ ni asaa amɛ ato ŋmɛlɛtswaa lɛ kɛ gbi lɛ kɛ nyɔɔŋ lɛ kɛ afi lɛ koni amɛgbe gbɔmɛi amlijai etɛ mli ekome.

16 Tabilɔi ni tara okpɔŋɔi lɛ anɔ lɛ ayibɔ ji akpei nyɔŋmai enyɔ toi akpei nyɔŋma;* minu amɛyibɔ lɛ. 17 Ni bɔ ni mina okpɔŋɔi lɛ kɛ amɛnɔtaralɔi lɛ yɛ ninaa lɛ mli nɛ: Amɛwo damai ni hiɛ la kɛ hiakinto-bluu* kɛ wuɔfɔ kɔla, ni okpɔŋɔi lɛ ayitsei tamɔ jatai ayitsei,+ ni la kɛ lasu kɛ sɔlfa fãa kɛjɛɔ amɛdaaŋ. 18 Nɛkɛ haomɔi etɛ ni ji la kɛ lasu kɛ sɔlfa ni fãa kɛjɛɔ amɛdaaŋ nɛɛ, akɛgbe gbɔmɛi amlijai etɛ mli ekome. 19 Ejaakɛ okpɔŋɔi lɛ ahewalɛ yɛ amɛdaaŋ kɛ amɛleii amli, ejaakɛ amɛleii lɛ tamɔ onufui, ni yitsei yɛ naa, ni nomɛi amɛkɛyeɔ awui lɛ.

20 Shi gbɔmɛi ni shwɛ ni nɛkɛ haomɔi nɛɛ egbeee amɛ lɛ, amɛtsakeee amɛtsui yɛ amɛninenaa nitsumɔi lɛ ahe; amɛkpaaa daimonioi lɛ kɛ shika tsuru kɛ jwiɛtɛi kɛ akɔɔble kɛ tɛ kɛ tso amagai ni amɛnaaa nii ni amɛnuuu nii ni amɛnyɛɛɛ amɛnyiɛ lɛ ajamɔ.+ 21 Ni amɛtsakeee amɛtsui yɛ gbɔmɛi ni amɛgbeɔ kɛ mumɔi ni amɛkɛshãraa kɛ ajwamaŋ* ni amɛbɔɔ kɛ ju ni amɛjuɔ lɛ ahe.

10 Ni mina ŋwɛibɔfo hewalɔ kroko jɛ ŋwɛi miikpeleke shi, ni ewula kɛ atatu,* ni kwaabuɛtɛ yɛ eyiteŋ, ni ehiɛ tamɔ hulu,+ ni enaji* tamɔ la akulashiŋi, 2 ni ehiɛ wolokpo* bibioo ni agbele naa yɛ edɛŋ. Ni ekɛ enanejurɔ ma ŋshɔ lɛ nɔ, shi enane abɛku ma shikpɔŋ lɛ nɔ, 3 ni ebo kɛ gbee ni wa tamɔ jata ni miihũu.+ Ni be ni ebo lɛ, nugbɔshiimɔi kpawo+ lɛ agbei wie.

4 Agbɛnɛ, be ni nugbɔshiimɔi kpawo lɛ wie lɛ, kulɛ miihe maŋma, shi minu gbee ko jɛ ŋwɛi+ miikɛɛ: “Sɔomɔ nibii ni nugbɔshiimɔi kpawo lɛ wie lɛ anaa, ni kaaŋmala oshwie shi.” 5 Ŋwɛibɔfo ni mina akɛ edamɔ ŋshɔ lɛ nɔ kɛ shikpɔŋ lɛ nɔ lɛ wó eninejurɔ nɔ kɛtee ŋwɛi, 6 ni ekɛ mɔ ni hiɛ kã kɛmiiya naanɔi anaanɔ lɛ,+ mɔ ni bɔ ŋwɛi kɛ nibii ni yɔɔ mli lɛ, kɛ shikpɔŋ lɛ kɛ nibii ni yɔɔ mli lɛ, kɛ ŋshɔ lɛ kɛ nibii ni yɔɔ mli lɛ,+ kã kitã akɛ: “Amɛŋ dɔŋŋ. 7 Shi yɛ gbii ni ŋwɛibɔfo ni ji kpawo+ lɛ miihe akpã etɛtɛrɛmantɛrɛ+ lɛ amli lɛ, teemɔŋ sane krɔŋkrɔŋ+ ni Nyɔŋmɔ jaje akɛ sane kpakpa etsɔɔ lɛ diɛŋtsɛ enyɔji ni ji gbalɔi+ lɛ baaba naagbee lɛɛlɛŋ.”

8 Ni gbee ni minu kɛjɛ ŋwɛi+ lɛ kɛ mi wie ekoŋŋ ni ekɛɛ: “Yaa ni oyahe wolokpo ni agbele naa lɛ yɛ ŋwɛibɔfo ni damɔ ŋshɔ lɛ nɔ kɛ shikpɔŋ lɛ nɔ lɛ dɛŋ.”+ 9 Mitee ŋwɛibɔfo lɛ ŋɔɔ ni miyakɛɛ lɛ ni ekɛ wolokpo bibioo lɛ ahã mi. Ekɛɛ mi akɛ: “Hemɔ ni oye,+ ni ebaajoo yɛ omusuŋ, shi ebaaŋɔɔ tamɔ wo yɛ odaaŋ.” 10 Mihe wolokpo bibioo lɛ yɛ ŋwɛibɔfo lɛ dɛŋ ni miye,+ ni eŋɔɔ tamɔ wo yɛ midaaŋ,+ shi be ni miye lɛ, ejoo yɛ mimusuŋ. 11 Ni amɛkɛɛ mi akɛ: “Esa akɛ ogba gbalɛ ni kɔɔ gbɔmɛi kɛ jeŋmaji kɛ wiemɔi kɛ maŋtsɛmɛi pii ahe ekoŋŋ.”

11 Ni ahã mi gãlã* ko ni tamɔ tso,*+ ni ekɛɛ: “Tee shi ni osusu Nyɔŋmɔ sɔlemɔ shĩa lɛ jamɔhe lɛ kɛ afɔleshaa latɛ lɛ, ni okane mɛi ni jáa Nyɔŋmɔ yɛ mli lɛ. 2 Shi kpo lɛ ni yɔɔ sɔlemɔ shĩa lɛ jamɔhe lɛ agbó lɛ naa lɛ, shi no, kaasusu, ejaakɛ akɛhã jeŋmaji lɛ, ni amɛbaanaanaa maŋ krɔŋkrɔŋ lɛ nɔ+ nyɔji 42.+ 3 Mahã midasefoi enyɔ lɛ abu kpekpe ni amɛgba gbii 1,260.” 4 Mɛnɛɛmɛi oliv tsei enyɔ lɛ kɛ kanetsei enyɔ+ lɛ feɔ amɛhe okadi+ lɛ, ni amɛdamɔ shikpɔŋ lɛ nɔ Nuŋtsɔ lɛ hiɛ.+

5 Kɛ́ mɔ ko miitao aye amɛ awui ko lɛ, la jɛɔ amɛdaaŋ ni ekpãtãa amɛhenyɛlɔi lɛ ahiɛ. Kɛ́ eba lɛ akɛ mɔ ko miitao aye amɛ awui lɛ, nɛkɛ gbɛ nɔ nɔŋŋ sa akɛ atsɔ agbe lɛ. 6 Mɛnɛɛmɛi yɛ hegbɛ akɛ amɛŋa ŋwɛi naa+ koni nugbɔ akanɛ+ yɛ amɛgbalɛ gbii lɛ amli, ni amɛyɛ hegbɛ hu yɛ nui lɛ anɔ akɛ amɛhã etsɔ lá,+ ni amɛkɛ haomɔi srɔtoi ahao shikpɔŋ lɛ shii abɔ ni amɛsumɔɔ.

7 Kɛ́ amɛgbe amɛdaseyeli lɛ naa lɛ, kooloo awuiyelɔ ni jɛ bu kwɔŋkwɔŋ lɛ mli lɛ kɛ amɛ baawu ta, ni ebaaye amɛnɔ kunim ni ebaagbe amɛ.+ 8 Ni amɛgbohii lɛ baajwere gbɛjegbɛ wulu ni yɔɔ maŋ kpeteŋkpele lɛ mli lɛ nɔ, he ni Sodom kɛ Ejipt, ni ji he ni agbe amɛ-Nuŋtsɔ lɛ hu yɛ tso jaŋŋ lɛ nɔ yɛ lɛ, feɔ he mfoniri lɛ. 9 Ni gbɔmɛi srɔtoi kɛ wekui kɛ wiemɔi kɛ jeŋmaji lɛ ateŋ mɛi komɛi baakwɛ amɛgbohii lɛ gbii etɛ kɛ fã,+ ni amɛŋmɛŋ gbɛ ni akɛ amɛgbohii lɛ ayaŋmɛ gbonyobu mli. 10 Ni mɛi ni yɔɔ shikpɔŋ lɛ nɔ lɛ baaná miishɛɛ babaoo yɛ amɛhewɔ, ni amɛmli baafili amɛ, ni amɛkɛ nikeenii baamaje amɛhe, ejaakɛ nɛkɛ gbalɔi enyɔ nɛɛ piŋ mɛi ni yɔɔ shikpɔŋ lɛ nɔ lɛ.

11 Gbii etɛ kɛ fã lɛ sɛɛ lɛ, wala mumɔ jɛ Nyɔŋmɔ ŋɔɔ babote amɛmli,+ ni amɛte shi amɛdamɔ amɛnaji anɔ, ni gbeyei kpeteŋkpele mɔmɔ mɛi ni na amɛ lɛ. 12 Ni amɛnu gbee ni wa ko jɛ ŋwɛi miikɛɛ amɛ akɛ: “Nyɛkwɔa kɛbaa biɛ nɛɛ.” Ni amɛkwɔ kɛtee ŋwɛi yɛ atatu lɛ mli, ni amɛhenyɛlɔi lɛ na amɛ.* 13 Nakai ŋmɛlɛtswaa lɛ nɔ nɔŋŋ lɛ, shikpɔŋhosomɔ wulu ko ba, ni maŋ lɛ mlijai nyɔŋma mli ekome kumɔ eshwie shi; ni shikpɔŋhosomɔ lɛ gbe mɛi 7,000, ni gbeyei mɔmɔ mɛi ni shwɛ lɛ, ni amɛkɛ anunyam hã ŋwɛi Nyɔŋmɔ lɛ.

14 Kpoo ni ji enyɔ+ lɛ eho. Naa! Kpoo ni ji etɛ lɛ miiba oya.

15 Ŋwɛibɔfo ni ji kpawo lɛ kpã etɛtɛrɛmantɛrɛ lɛ.+ Ni anu gbei ni wa yɛ ŋwɛi miikɛɛ akɛ: “Wɔ-Nuŋtsɔ lɛ kɛ e-Kristo+ lɛ miiye je lɛ nɔ+ amrɔ nɛɛ,* ni ebaaye maŋtsɛ kɛya naanɔi anaanɔ.”+

16 Ni onukpai 24+ ni tara amɛmaŋtsɛ sɛii anɔ yɛ Nyɔŋmɔ hiɛ lɛ kɛ amɛhiɛ bumɔ shi ni amɛjá Nyɔŋmɔ 17 amɛkɛɛ: “Wɔmiida bo shi, Yehowa* Nyɔŋmɔ, Ofe lɛ, mɔ ni yɔɔ amrɔ nɛɛ+ kɛ mɔ ni yɛ momo lɛ, ejaakɛ oŋɔ ohewalɛ kpeteŋkpele lɛ, ni obɔi nɔyeli akɛ maŋtsɛ.+ 18 Shi jeŋmaji lɛ amli fu, ni bo diɛŋtsɛ hu omlifu lɛ ba, ni be ni ato lɛ shɛ, be ni abaakojo gbohii lɛ ni ajwere+ onyɔji ni ji gbalɔi+ lɛ kɛ mɛi krɔŋkrɔŋi lɛ kɛ mɛi ni sheɔ ogbɛ́i lɛ gbeyei lɛ, mɛi bibii kɛ mɛi wuji lɛ, koni afite mɛi ni fiteɔ shikpɔŋ lɛ.”*+

19 Ni agbele Nyɔŋmɔ sɔlemɔ shĩa lɛ jamɔhe lɛ ni yɔɔ ŋwɛi lɛ naa, ni ana ekpaŋmɔ adeka lɛ yɛ esɔlemɔ shĩa lɛ jamɔhe lɛ mli.+ Ni sarawai gbála ni gbei kɛ nugbɔshiimɔi kɛ shikpɔŋhosomɔi kɛ nyɔŋmɔŋtɛi babaoo ba.

12 Ni ana okadi kpeteŋkpele ko yɛ ŋwɛi: Yoo+ ko ni ewula kɛ hulu,* ni nyɔɔŋtsere yɛ enajiashi, ni ŋulamii 12 akekere bu eyitso, 2 ni ehiɛ musu. Ni eebolɔ, ni eekɔmɔ ni eepiŋ ni ebaafɔ.

3 Ana okadi kroko yɛ ŋwɛi. Naa! Drako kpeteŋkpele+ ni tsuɔ tamɔ lalilɛi ni yɔɔ yitsei kpawo kɛ akolontoi nyɔŋma, ni maŋtsɛ faii* kpawo bumɔ eyitsei; 4 ni elei gbala ŋwɛi ŋulamii+ amlijai etɛ mli ekome, ni etsirɛ amɛ eshwie shikpɔŋ lɛ nɔ.+ Ni drako lɛ tee nɔ edamɔ yoo+ ni baafɔ lɛ hiɛ, koni kɛ́ efɔ lɛ, emi ebi lɛ.

5 Ni yoo lɛ fɔ binuu,+ hɛɛ nuu, mɔ ni kɛ dadetso baakpala jeŋmaji lɛ fɛɛ tamɔ tookwɛlɔ feɔ lɛ.+ Ni ashá ebi lɛ kɛtee Nyɔŋmɔ ŋɔɔ kɛ emaŋtsɛ sɛi lɛ masɛi. 6 Ni yoo lɛ jo foi kɛtee ŋa lɛ nɔ, he ni Nyɔŋmɔ esaa he ko yɛ ehã lɛ lɛ, kɛ he ni amɛbaalɛ lɛ gbii 1,260 yɛ lɛ.+

7 Ni ta te shi yɛ ŋwɛi: Mikael*+ kɛ ebɔfoi lɛ fã drako lɛ nɔ ta, ni drako lɛ kɛ ebɔfoi lɛ kɛ amɛ wu 8 shi aye amɛnɔ* kunim,* ni amɛnáaa gbɛ dɔŋŋ yɛ ŋwɛi. 9 No hewɔ lɛ, ashɛ drako kpeteŋkpele+ lɛ afɔ̃, blema onufu lɛ,+ ni atsɛɔ lɛ Abonsam+ kɛ Satan+ lɛ, mɔ ni lakaa shikpɔŋ muu lɛ fɛɛ* lɛ;+ ashɛ lɛ afɔ̃ shikpɔŋ,+ ni ashɛrɛ ebɔfoi lɛ hu ashwie afata ehe. 10 Ni minu gbee ko ni wa yɛ ŋwɛi miikɛɛ:

“Agbɛnɛ, wɔ-Nyɔŋmɔ lɛ yiwalaheremɔ lɛ kɛ ehewalɛ lɛ kɛ e-Maŋtsɛyeli+ lɛ eba,+ ni e-Kristo lɛ kɛ ehegbɛ lɛ ebɔi nitsumɔ, ejaakɛ ashɛ mɔ ni wieɔ wɔnyɛmimɛi lɛ ahe efɔŋ lɛ, mɔ ni wieɔ amɛhe efɔŋ jetsɛremɔ kɛ jenamɔ yɛ wɔ-Nyɔŋmɔ lɛ hiɛ lɛ afɔ̃!+ 11 Ni amɛye enɔ kunim+ yɛ Gwantɛŋbi lɛ lá lɛ hewɔ,+ kɛ agbɛnɛ hu, yɛ amɛdaseyeli wiemɔ lɛ hewɔ,+ ni kɛ́ eba lɛ akɛ amɛbaagboi po lɛ, amɛdɔɔɔ amɛsusumai ahe.*+ 12 Enɛ hewɔ lɛ, nyɛ ŋwɛii kɛ nyɛ mɛi ni nyɛyɔɔ jɛmɛ, nyɛnyaa! Kpoo hã shikpɔŋ lɛ kɛ ŋshɔ lɛ,+ ejaakɛ Abonsam ekpeleke shi kɛba nyɛŋɔɔ, emli efu waa diɛŋtsɛ, ejaakɛ ele akɛ be fioo kɛkɛ eyɔɔ.”+

13 Agbɛnɛ, be ni drako lɛ na akɛ ashɛ lɛ afɔ̃ shikpɔŋ lɛ,+ ewa yoo+ lɛ ni fɔ binuu lɛ yi. 14 Shi akɛ okropɔŋ wulu+ lɛ fiji enyɔ lɛ hã yoo lɛ, koni efiliki kɛje onufu+ lɛ hiɛ kɛya eshihilɛhe lɛ yɛ ŋa lɛ nɔ, he ni abaalɛ lɛ yɛ, be kɛ bei kɛ be fã*+ lɛ.

15 Ni onufu lɛ fɛ̃ nu tamɔ faa ko kɛjɛ edaaŋ eshwie yoo lɛ sɛɛ, koni faa lɛ asha yoo lɛ. 16 Shi shikpɔŋ lɛ baye ebua yoo lɛ, ni shikpɔŋ lɛ gbele edaaŋ ni emi faa ni drako lɛ fɛ̃ kɛjɛ edaaŋ eshwie lɛ. 17 No hewɔ lɛ, drako lɛ mli fu yoo lɛ, ni eyiŋ etee koni ekɛ yoo lɛ seshi* ni eshwɛ ni yeɔ Nyɔŋmɔ kitãi lɛ anɔ ni akɛ nitsumɔ ewo amɛdɛŋ akɛ amɛye Yesu he odase+ lɛ ayawu.+

13 Ni ewa edamɔ shi* yɛ ŋshɔnaa shia lɛ nɔ.

Ni mina kooloo awuiyelɔ+ ko miije kpo kɛmiijɛ ŋshɔ+ lɛ mli kɛmiiba, ni eyɛ akolontoi nyɔŋma kɛ yitsei kpawo, ni maŋtsɛ faii* nyɔŋma bumɔ ekolontoi lɛ anɔ, shi gbɛ́ii ni gbeɔ Nyɔŋmɔ he guɔ yɛ eyitsei lɛ anɔ. 2 Agbɛnɛ kooloo awuiyelɔ ni mina lɛ tamɔ kootsɛ,* shi enaji tamɔ oshishibrishi naji, ni enaabu tamɔ jata naabu. Ni drako+ lɛ kɛ lɛ diɛŋtsɛ ehewalɛ lɛ kɛ emaŋtsɛ sɛi lɛ kɛ hegbɛ kpele hã lɛ.+

3 Mina eyitsei lɛ ateŋ ekome tamɔ nɔ ni epila waa bɔ ni eehe egbo, shi atsa epilamɔ lɛ,+ ni shikpɔŋ muu lɛ fɛɛ nyiɛ kooloo awuiyelɔ lɛ sɛɛ ni amɛnaa ekpɛ amɛhe. 4 Ni amɛjá drako lɛ ejaakɛ ekɛ hegbɛ lɛ ehã kooloo awuiyelɔ lɛ, ni amɛjá kooloo awuiyelɔ lɛ kɛ wiemɔ nɛɛ amɛkɛɛ: “Namɔ tamɔ kooloo awuiyelɔ lɛ, ni namɔ baanyɛ ekɛ lɛ awu?” 5 Ahã lɛ naabu ni wieɔ nii wuji ni wieɔ eshiɔ krɔŋkrɔŋ nibii hu, ni ahã lɛ hegbɛ ni ekɛtsu nii nyɔji 42.+ 6 Ni egbele enaa ewie eshi Nyɔŋmɔ,+ ewie eshi egbɛ́i lɛ kɛ eshihilɛhe lɛ, mɛi ni hiɔ ŋwɛi lɛ po.+ 7 Aŋmɛ lɛ gbɛ koni ekɛ mɛi krɔŋkrɔŋi lɛ awu ta ni eye amɛnɔ kunim,+ ni ahã lɛ hegbɛ yɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ kɛ jeŋmaŋ fɛɛ jeŋmaŋ nɔ. 8 Ni mɛi fɛɛ ni yɔɔ shikpɔŋ lɛ nɔ lɛ baajá lɛ. Kɛjɛ be ni ato je lɛ shishi* lɛ, aŋmako amɛteŋ mɔ ko mɔ ko gbɛ́i yɛ Gwantɛŋbi ni agbe lɛ+ lɛ wala wolokpo* lɛ mli.+

9 Kɛji mɔ ko yɛ toi lɛ, hã enu.+ 10 Kɛji ato akɛ aŋɔ mɔ ko nom lɛ, abaaŋɔ lɛ nom. Kɛ́ mɔ ko kɛ klante gbe mɔ ko lɛ,* esa akɛ akɛ klante agbe lɛ.+ Biɛ shifimɔ kɛ hemɔkɛyeli+ yɛ mɛi krɔŋkrɔŋi+ lɛ agbɛfaŋ he ehia yɛ.+

11 Kɛkɛ ni mina kooloo awuiyelɔ kroko ni miije kpo kɛmiijɛ shikpɔŋ lɛ mli, ni eyɛ akolontoi enyɔ tamɔ gwantɛŋbi, shi ebɔi wiemɔ tamɔ drako.+ 12 Etsuɔ klɛŋklɛŋ kooloo awuiyelɔ+ lɛ hegbɛ lɛ fɛɛ he nii yɛ ehiɛ. Ni ehãa shikpɔŋ lɛ kɛ mɛi ni yɔɔ shikpɔŋ lɛ nɔ lɛ jáa klɛŋklɛŋ kooloo awuiyelɔ ni atsa epilamɔ lɛ.+ 13 Ni efeɔ okadii wuji, ni ehãa la po jɛɔ ŋwɛi baa shikpɔŋ lɛ nɔ yɛ gbɔmɛi ahiɛ.

14 Elakaa mɛi ni yɔɔ shikpɔŋ lɛ nɔ lɛ, yɛ okadii ni aŋmɛ lɛ gbɛ ni efee yɛ kooloo awuiyelɔ lɛ hiɛ lɛ hewɔ, ni yɛ nakai be lɛ mli nɔŋŋ lɛ, ekɛɔ mɛi ni yɔɔ shikpɔŋ lɛ nɔ lɛ akɛ amɛfee amaga+ amɛhã kooloo awuiyelɔ lɛ ni klante naa pilamɔ lɛ yɔɔ ehe shi ená hewalɛ ekoŋŋ lɛ.+ 15 Ni aŋmɛ lɛ gbɛ ni ekɛ kɔɔyɔɔ ni amuɔ* ahã kooloo awuiyelɔ lɛ amaga lɛ, koni kooloo awuiyelɔ lɛ amaga lɛ awie, ni kooloo awuiyelɔ lɛ amaga lɛ ahã agbe mɛi fɛɛ ni kpoɔ akɛ amɛbaajá kooloo awuiyelɔ lɛ amaga lɛ.

16 Enyɛɔ gbɔmɛi fɛɛ—mɛi bibii kɛ mɛi wuji, niiatsɛmɛi kɛ ohiafoi, mɛi ni jeee nyɔji kɛ nyɔji—anɔ akɛ amɛkpɛlɛ ni akadi amɛ yɛ amɛninejurɔ nɔ loo yɛ amɛhiɛnai,+ 17 ni akɛ, mɔ ko mɔ ko nyɛŋ ahé nii loo ehɔ̃ɔ nii, akɛ ja mɔ ni yɔɔ okadi lɛ, loo kooloo awuiyelɔ lɛ gbɛ́i+ loo egbɛ́i yibɔ lɛ pɛ.+ 18 Biɛ hiɛshikamɔ he ehia yɛ: Mɔ ni yɔɔ sɛɛyoomɔ lɛ abu kooloo awuiyelɔ lɛ yibɔ lɛ he akɔntaa, ejaakɛ gbɔmɔ yibɔ ni, ni eyibɔ lɛ ji 666.+

14 Ni mikwɛ, ni naa! Gwantɛŋbi+ lɛ damɔ Zion Gɔŋ lɛ nɔ,+ ni mɛi 144,000+ ni aŋma egbɛ́i kɛ e-Tsɛ gbɛ́i+ yɛ amɛhiɛnai fata ehe. 2 Minu gbɛɛmɔ ko kɛjɛ ŋwɛi tamɔ nui pii agbɛɛmɔ, ni etamɔ nugbɔshiimɔ kpeteŋkpele gbɛɛmɔ; ni gbɛɛmɔ ni minu lɛ tamɔ lalɔi ni miitswa amɛsaŋkui agbɛɛmɔ. 3 Ni amɛmiilá lala ko ni tamɔ lala hee+ yɛ maŋtsɛ sɛi lɛ hiɛ kɛ bɔɔ nii ejwɛ ni hiɛ kamɔ+ lɛ kɛ onukpai+ lɛ ahiɛ, ni mɔ ko mɔ ko nyɛɛɛ lala lɛ akase akɛ ja mɛi 144,000+ lɛ ni ahé kɛjɛ shikpɔŋ lɛ nɔ lɛ pɛ. 4 Mɛnɛɛmɛi ji mɛi ni kɛ yei buleko amɛhe; anɔkwa, oblahii ni kɛ yei náko bɔlɛ dã ji amɛ.+ Amɛji mɛi ni yaa nɔ amɛnyiɛɔ Gwantɛŋbi lɛ sɛɛ kɛyaa he fɛɛ he ni eyaa lɛ.+ Ahé mɛi nɛɛ+ kɛjɛ gbɔmɛi ateŋ akɛ klɛŋklɛŋ yibii+ kɛhã Nyɔŋmɔ kɛ Gwantɛŋbi lɛ, 5 ni anaaa amale ko yɛ amɛdaaŋ; kpa ko bɛ amɛhe.+

6 Ni mina ŋwɛibɔfo kroko miifiliki yɛ ŋwɛi teŋ,* ni ehiɛ naanɔ sane kpakpa ni eyaajaje etsɔɔ mɛi ni yɔɔ shikpɔŋ lɛ nɔ lɛ, kɛ jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ, kɛ gbɔmɛi srɔtoi fɛɛ.+ 7 Ekɛ gbee ni wa miiwie akɛ: “Nyɛshea Nyɔŋmɔ gbeyei ni nyɛkɛ anunyam ahãa lɛ, ejaakɛ ŋmɛlɛtswaa ni ekɛbaakojo lɛ eshɛ,+ no hewɔ lɛ, nyɛjáa mɔ ni fee ŋwɛi kɛ shikpɔŋ lɛ kɛ ŋshɔ lɛ+ kɛ nuhiŋmɛii lɛ.”

8 Ŋwɛibɔfo kroko, mɔ ni ji enyɔ nɔ, nyiɛ sɛɛ ni ekɛɛ: “Egbee shi! Babilon Kpeteŋkpele+ lɛ egbee shi,+ yoo ni hã jeŋmaji lɛ fɛɛ nu ejwamaŋbɔɔ* lɛ he akɔnɔ* wain lɛ eko lɛ!”+

9 Ŋwɛibɔfo kroko, mɔ ni ji etɛ nɔ, nyiɛ amɛsɛɛ, ni ekɛ gbee ni wa kɛɛ: “Kɛ́ mɔ ko já kooloo awuiyelɔ+ lɛ kɛ emaga lɛ, ni ená okadi yɛ ehiɛnaa loo enine he lɛ,+ 10 ebaanu Nyɔŋmɔ mlifu wain ni afutuko mli ni afɔse awo Nyɔŋmɔ mlifu kɔɔpoo lɛ mli lɛ hu eko,+ ni akɛ la kɛ sɔlfa baapiŋ lɛ+ yɛ ŋwɛibɔfoi krɔŋkrɔŋi lɛ ahiɛ kɛ Gwantɛŋbi lɛ hiɛ. 11 Ni amɛpiŋmɔ* lɛ lasu lɛ teɔ shi kɛyaa naanɔi anaanɔ,+ ni mɛi ni jáa kooloo awuiyelɔ lɛ kɛ emaga lɛ, kɛ mɔ fɛɛ mɔ ni náa egbɛ́i lɛ okadi lɛ, náaa hejɔɔmɔ jetsɛremɔ kɛ jenamɔ.+ 12 Biɛ shifimɔ yɛ mɛi krɔŋkrɔŋi lɛ agbɛfaŋ he ehia yɛ,+ mɛi ni yeɔ Nyɔŋmɔ kitãi lɛ anɔ ni amɛhiɛɔ Yesu hemɔkɛyeli lɛ mli kpɛŋŋ lɛ.”+

13 Ni minu gbee ko jɛ ŋwɛi miikɛɛ, “Ŋmaa: Mɛi ni kɛ Nuŋtsɔ lɛ efee ekome ni gboiɔ+ kɛjɛ be nɛɛ nɔ kɛyaa lɛ yɛ miishɛɛ. Hɛɛ, mumɔ lɛ kɛɛ, hã amɛjɔɔ amɛhe kɛjɛ amɛnitsumɔi lɛ amli, ejaakɛ amɛnitsumɔi lɛ kɛ amɛ nyiɛɔ.”*

14 Ni mikwɛ, ni naa! atatu yɛŋ ko, ni mɔ ko ni tamɔ gbɔmɔ bi ta atatu lɛ nɔ,+ ni shika tsuru akekere bu eyitso, ni ehiɛ nikpamɔ kakla ni naa ba yɛ edɛŋ.

15 Ŋwɛibɔfo kroko je kpo kɛjɛ sɔlemɔ shĩa lɛ jamɔhe lɛ mli, ni ebolɔ kɛ gbee ni wa ekɛɛ mɔ ni ta atatu lɛ nɔ lɛ akɛ: “Okɛ onikpamɔ kakla lɛ abɔi nikpamɔ, ejaakɛ nikpamɔ ŋmɛlɛtswaa lɛ eshɛ, ejaakɛ shikpɔŋ lɛ nɔ nikpamɔ nii lɛ etsu.”+ 16 Ni mɔ ni ta atatu lɛ nɔ lɛ kpã enikpamɔ kakla lɛ mli ewo shikpɔŋ lɛ nɔ, ni akpa shikpɔŋ lɛ nɔ nii lɛ.

17 Ni ŋwɛibɔfo kroko je kpo kɛjɛ sɔlemɔ shĩa lɛ jamɔhe ni yɔɔ ŋwɛi lɛ mli, ni lɛ hu ehiɛ nikpamɔ kakla ni naa ba.

18 Ni ŋwɛibɔfo kroko je kpo kɛjɛ afɔleshaa latɛ lɛ mli, ni eyɛ la lɛ nɔ hewalɛ. Ni ekɛ gbee ni wa bo etsɛ mɔ ni hiɛ nikpamɔ kakla ni naa ba lɛ, ekɛɛ: “Okɛ onikpamɔ kakla lɛ abɔi nikpamɔ ni obua shikpɔŋ lɛ nɔ wain yibii kushai lɛ anaa, ejaakɛ eyibii lɛ etsu.”+ 19 Ŋwɛibɔfo lɛ kpã enikpamɔ kakla lɛ mli ewo shikpɔŋ lɛ nɔ, ni ebua shikpɔŋ lɛ nɔ wain yibii lɛ anaa, ni ekɛwo bu wulu ni akɛŋaa wain ni damɔ shi kɛhã Nyɔŋmɔ mlifu lɛ mli.+ 20 Anaanaa wain yibii lɛ anɔ yɛ maŋ lɛ sɛɛ, ni lá jɛ bu ni akɛŋaa wain lɛ mli ni ekwɔ kɛtee ŋwɛi aahu kɛyashɛ okpɔŋɔi lɛ amanyoflɛi lɛ ahe kɛtee gbɛ jekɛmɔ stadioi 1,600.*

15 Ni mina okadi kroko yɛ ŋwɛi, eji okadi kpele, ni eyɛ naakpɛɛ, ŋwɛibɔfoi kpawo+ ni hiɛ haomɔi kpawo. Enɛɛmɛi ji naagbee haomɔi lɛ, ejaakɛ nomɛi akɛbaagbe Nyɔŋmɔ mlifu lɛ naa.+

2 Ni mina nɔ ko tamɔ glase ŋshɔ+ ni akɛ la efutu, ni mɛi ni eye kooloo awuiyelɔ lɛ kɛ emaga+ lɛ kɛ egbɛ́i lɛ yibɔ+ lɛ nɔ kunim+ lɛ damɔ glase ŋshɔ lɛ masɛi, ni amɛhiɛ Nyɔŋmɔ saŋkui lɛ. 3 Amɛmiilá Nyɔŋmɔ nyɔŋ Mose lala+ lɛ kɛ Gwantɛŋbi+ lɛ lala lɛ, akɛ:

“Yehowa* Nyɔŋmɔ, Ofe+ lɛ, onitsumɔi lɛ dara ni amɛyɛ naakpɛɛ.+ Naanɔi a-Maŋtsɛ,+ ogbɛi lɛ ja ni anɔkwa ji amɛ.+ 4 Yehowa,* namɔ po sheŋ bo gbeyei, ni ewoŋ ogbɛ́i lɛ hiɛ nyam, ejaakɛ bo okome too ji anɔkwafo?+ Ejaakɛ jeŋmaji lɛ fɛɛ baaba ni amɛbajá yɛ ohiɛ,+ ejaakɛ ajie ojalɛ famɔi lɛ akpo.”

5 Enɛ sɛɛ lɛ mikwɛ, ni agbele odase buu lɛ jamɔhe+ lɛ naa yɛ ŋwɛi,+ 6 ni ŋwɛibɔfoi kpawo ni hiɛ haomɔi kpawo+ lɛ je kpo kɛjɛ jamɔhe lɛ mli, ni amɛwo klala ni he tse ni kpɛlɛɔ kaŋkaŋ, ni amɛkɛ shika tsuru mlifiinii efimɔ amɛtsitsii. 7 Bɔɔ nii ejwɛ ni hiɛ kamɔ lɛ ateŋ mɔ kome kɛ shika tsuru tsɛnsii kpawo ni eyimɔ obɔbɔ kɛ Nyɔŋmɔ ni hiɛ kã kɛyaa naanɔi anaanɔ lɛ mlifu lɛ hã ŋwɛibɔfoi kpawo lɛ.+ 8 Ni jamɔhe lɛ mli yi obɔ kɛ lasu yɛ Nyɔŋmɔ anunyam lɛ hewɔ,+ kɛ agbɛnɛ hu yɛ ehewalɛ lɛ hewɔ, ni mɔ ko mɔ ko nyɛɛɛ jamɔhe lɛ mli abote kɛyashi be ni agbe ŋwɛibɔfoi kpawo lɛ ahaomɔi kpawo+ lɛ anaa.

16 Ni minu gbee ko ni wa jɛ jamɔhe lɛ mli+ miikɛɛ ŋwɛibɔfoi kpawo lɛ akɛ: “Nyɛyaa ni nyɛyafɔsea Nyɔŋmɔ mlifu tsɛnsii kpawo lɛ amli nii lɛ nyɛshwiea shikpɔŋ lɛ nɔ.”+

2 Klɛŋklɛŋ ŋwɛibɔfo lɛ yiŋ etee, ni eyafɔse etsɛnsi lɛ mli nii lɛ eshwie shikpɔŋ lɛ nɔ.+ Ni mɛi ni kooloo awuiyelɔ lɛ okadi yɔɔ amɛhe+ ni amɛjáa emaga+ lɛ famɔ faji fɔji ni waa mɔ he waa.+

3 Ŋwɛibɔfo ni ji enyɔ lɛ fɔse etsɛnsi lɛ mli nii lɛ ewo ŋshɔ lɛ mli.+ Ni etsɔ lá+ tamɔ gbonyo nɔ, ni bɔɔ nɔ fɛɛ bɔɔ nɔ* ni hiɛ kã lɛ gbo, hɛɛ, nibii ni yɔɔ ŋshɔ lɛ mli lɛ gboi.+

4 Ŋwɛibɔfo ni ji etɛ lɛ fɔse etsɛnsi lɛ mli nii lɛ ewo fai kɛ nuhiŋmɛii lɛ amli.+ Ni amɛtsɔmɔ lá.+ 5 Minu akɛ nui lɛ anɔ ŋwɛibɔfo lɛ miikɛɛ: “Bo, mɔ ni oyɔɔ amrɔ nɛɛ kɛ mɔ ni yɛ momo,+ anɔkwafo lɛ,+ jalɔ ji bo, akɛni okojo nɛkɛ kojomɔi nɛɛ hewɔ,+ 6 ejaakɛ amɛshwie mɛi krɔŋkrɔŋi lɛ kɛ gbalɔi lɛ alá shi,+ ni ohã amɛ lá koni amɛnu;+ esa amɛ nakai.”+ 7 Ni minu akɛ afɔleshaa latɛ lɛ miikɛɛ: “Hɛɛ, Yehowa* Nyɔŋmɔ, Ofe+ lɛ, anɔkwa kɛ jalɛ ji oyiŋkpɛi lɛ.”*+

8 Ŋwɛibɔfo ni ji ejwɛ lɛ fɔse etsɛnsi lɛ mli nii lɛ eshwie hulu lɛ nɔ,+ ni ahã hulu lɛ hegbɛ akɛ ekɛ la ashã gbɔmɛi lɛ. 9 Ni dɔlɛ kpele lɛ shã gbɔmɛi lɛ, shi amɛwie amɛshi Nyɔŋmɔ, mɔ ni yɔɔ hegbɛ yɛ haomɔi nɛɛ anɔ lɛ gbɛ́i lɛ, ni amɛtsakeee amɛtsui koni amɛwo ehiɛ nyam.

10 Ŋwɛibɔfo ni ji enumɔ lɛ fɔse etsɛnsi lɛ mli nii lɛ eshwie kooloo awuiyelɔ lɛ maŋtsɛ sɛi lɛ nɔ. Ni emaŋtsɛyeli lɛ wo duŋ,+ ni amɛbɔi amɛlilɛi kɔɔmɔ yɛ piŋmɔ ni amɛpiŋɔ lɛ hewɔ, 11 shi amɛwie amɛshi ŋwɛi Nyɔŋmɔ lɛ yɛ piŋmɔ ni amɛpiŋɔ kɛ amɛfaji lɛ ahewɔ, ni amɛtsakeee amɛtsui kɛjeee amɛnitsumɔi lɛ ahe.

12 Ŋwɛibɔfo ni ji ekpaa lɛ fɔse etsɛnsi lɛ mli nii lɛ ewo Yufrate faa wulu+ lɛ mli, ni emli nu lɛ mii+ koni akɛsaa gbɛ ahã maŋtsɛmɛi+ ni jɛ hulushiteehe lɛ.*

13 Ni mina wiemɔi etɛ ni jɛ mumɔŋ ni he tseee* ni tamɔ kɔkɔdenei miije kpo kɛmiijɛ drako lɛ daaŋ+ kɛ kooloo awuiyelɔ lɛ daaŋ kɛ amale gbalɔ lɛ daaŋ. 14 Anɔkwa, amɛji wiemɔi ni jɛ daimonioi aŋɔɔ, ni amɛfeɔ okadii,+ ni amɛyaa shikpɔŋ muu lɛ fɛɛ nɔ maŋtsɛmɛi lɛ aŋɔɔ, koni amɛyabua amɛnaa kɛya Nyɔŋmɔ Ofe lɛ gbi wulu+ lɛ nɔ ta lɛ.+

15 “Naa! Miiba tamɔ julɔ.+ Mɔ ni yaa nɔ eshiɔ kpe+ ni hãaa abajie etadei anɔhaanɔi lɛ yɛ ehe, koni ekanyiɛ kɛ ehe folo ni mɛi na ehiɛgbele lɛ yɛ miishɛɛ.”+

16 Ni amɛbua maŋtsɛmɛi lɛ anaa kɛtee he ko ni atsɛɔ jɛmɛ yɛ Hebri mli akɛ Harmagedon.*+

17 Ŋwɛibɔfo ni ji kpawo lɛ fɔse etsɛnsi lɛ mli nii lɛ ewo kɔɔyɔɔ lɛ mli. Kɛkɛ ni gbee ko ni wa jɛ jamɔhe lɛ mli+ kɛjɛ maŋtsɛ sɛi lɛ mli kɛɛ akɛ: “Agbe naa!” 18 Ni sarawagbalamɔi kɛ gbei kɛ nugbɔshiimɔi ba, ni shikpɔŋhosomɔ kpele ko ni kɛjɛ be ni gbɔmɛi ba shikpɔŋ lɛ nɔ nɛɛ anako enɔ dã lɛ ba,+ eji shikpɔŋhosomɔ wulu, ni enaa wa waa. 19 Maŋ kpeteŋkpele+ lɛ mli gbála etɛ, ni jeŋmaji lɛ amaji lɛ kumɔ eshwie shi; ni akai Babilon Kpeteŋkpele+ lɛ yɛ Nyɔŋmɔ hiɛ, koni akɛ kɔɔpoo ni Nyɔŋmɔ mlifu ni naa wa lɛ wain lɛ yɔɔ mli lɛ ahã lɛ.+ 20 Agbɛnɛ hu, ŋshɔkpɔ fɛɛ ŋshɔkpɔ jo foi, ni gɔji lɛ, anaaa amɛ dɔŋŋ.+ 21 Kɛkɛ ni nyɔŋmɔŋtɛi kpelei, ni eko fɛɛ eko tsiimɔ aaafee talɛnta kome,* jɛ ŋwɛi bashwie gbɔmɛi lɛ anɔ,+ ni gbɔmɛi lɛ wie amɛshi Nyɔŋmɔ yɛ nyɔŋmɔŋtɛi lɛ ahaomɔ lɛ hewɔ,+ ejaakɛ haomɔ lɛ da fe nine.

17 Ŋwɛibɔfoi kpawo ni hiɛ tsɛnsii kpawo lɛ ateŋ mɔ kome+ ba ni ebakɛɛ mi akɛ: “Ba, ni matsɔɔ bo toigbalamɔ ni baaba ashawo kpeteŋkpele lɛ ni ta nui babaoo lɛ anɔ lɛ nɔ lɛ,+ 2 mɔ ni shikpɔŋ lɛ nɔ maŋtsɛmɛi lɛ kɛ lɛ bɔ ajwamaŋ,*+ ni ejwamaŋbɔɔ* lɛ he wain lɛ hã shikpɔŋ lɛ nɔ bii lɛ tɔrɔ dãa lɛ.”+

3 Ni ekpala mi kɛtee ŋa nɔ yɛ mumɔ lɛ hewalɛ lɛ mli. Ni mina yoo ko ta kooloo awuiyelɔ ko ni tsuɔ waa nɔ, ni kooloo lɛ he eyi obɔ kɛ gbɛ́ii ni teɔ shi ewoɔ Nyɔŋmɔ, ni eyɛ yitsei kpawo kɛ akolontoi nyɔŋma. 4 Yoo lɛ wo atade ni hiɛ pɛpol kɔla+ ni tsuɔ waa, ni akɛ shika tsuru kɛ tɛi ni jara wa kɛ adiagbai* ewula lɛ,+ ni ehiɛ shika tsuru kɔɔpoo yɛ edɛŋ, ni kɔɔpoo lɛ eyi obɔ kɛ nihiinii kɛ ejwamaŋbɔɔ* lɛ mli muji nii. 5 Aŋma gbɛ́i ko ni ji teemɔŋ sane yɛ ehiɛnaa: “Babilon Kpeteŋkpele lɛ, ashawo yei lɛ kɛ shikpɔŋ lɛ nɔ nihiinii+ lɛ anyɛ lɛ.”+ 6 Ni mina akɛ mɛi krɔŋkrɔŋi lɛ alá lɛ kɛ Yesu he odasefoi lɛ alá lɛ etɔ yoo lɛ dãa.+

Anɔkwa, be ni mina lɛ lɛ, minaa kpɛ mihe naakpa. 7 No hewɔ lɛ, ŋwɛibɔfo lɛ kɛɛ mi akɛ: “Mɛni hewɔ onaa ekpɛ ohe lɛ? Magba bo yoo lɛ, kɛ agbɛnɛ hu, kooloo awuiyelɔ lɛ ni yɔɔ yitsei kpawo kɛ akolontoi nyɔŋma lɛ ni yoo lɛ ta enɔ+ lɛ ahe teemɔŋ sane lɛ:+ 8 Kooloo awuiyelɔ lɛ ni ona lɛ, kulɛ eyɛ, shi ebɛ, shi ebaajɛ bu kwɔŋkwɔŋ+ lɛ mli eje kpo, ni ebaaya hiɛkpatamɔ mli. Ni shikpɔŋ lɛ nɔ bii lɛ—mɛi ni aŋmako amɛgbɛ́ii yɛ wala wolokpo* lɛ mli+ kɛjɛ be ni ato je lɛ shishi lɛ*—anaa baakpɛ amɛhe kɛ́ amɛna bɔ ni kulɛ kooloo awuiyelɔ lɛ yɛ, shi ebɛ, shi ebaaba lɛ.

9 “Biɛ jwɛŋmɔ kɛ hiɛshikamɔ* he ehia yɛ: Yitsei kpawo+ lɛ damɔ shi kɛhã gɔji kpawo ni yoo lɛ ta nɔ lɛ. 10 Ni maŋtsɛmɛi kpawo yɔɔ: Enumɔ egbee shi, ekome yɛ, ni ekroko lɛ náko aba; shi kɛ́ eba lɛ, esa akɛ ehi shi be fioo. 11 Ni kooloo awuiyelɔ ni kulɛ eyɛ, shi ebɛ lɛ,+ eji maŋtsɛ ni ji kpaanyɔ hu, shi ejɛ maŋtsɛmɛi kpawo lɛ mli, ni ebaaya hiɛkpatamɔ mli.

12 “Akolontoi nyɔŋma lɛ ni ona lɛ damɔ shi kɛhã maŋtsɛmɛi nyɔŋma, mɛi ni nine shɛko maŋtsɛyeli ko nɔ, shi kɛ̃lɛ amɛbaaná hegbɛ amɛkɛ kooloo awuiyelɔ lɛ aye nɔ akɛ maŋtsɛmɛi ŋmɛlɛtswaa kome. 13 Mɛnɛɛmɛi hiɛ yiŋtoo kome, no hewɔ lɛ, amɛkɛ amɛhewalɛ kɛ amɛhegbɛ lɛ hãa kooloo awuiyelɔ lɛ. 14 Mɛnɛɛmɛi kɛ Gwantɛŋbi lɛ baawu,+ shi akɛni Gwantɛŋbi lɛ ji nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ hewɔ lɛ,+ ebaaye amɛnɔ kunim.+ Nakai nɔŋŋ mɛi ni fata ehe, ni atsɛ amɛ ni ahala amɛ ni yeɔ anɔkwa lɛ hu baafee.”+

15 Ekɛɛ mi akɛ: “Nui lɛ ni ona lɛ, he ni ashawo yoo lɛ ta lɛ, damɔ shi kɛhã majimaji kɛ gbɔmɛi akui kɛ jeŋmaji kɛ wiemɔi.+ 16 Ni akolontoi nyɔŋma+ ni ona lɛ kɛ kooloo awuiyelɔ lɛ,+ amɛbaanyɛ ashawo yoo+ lɛ ni amɛbaafee lɛ butuu ni amɛbaajie ehe fɛɛ, ni amɛbaaye eheloo ni amɛkɛ la baashã lɛ kwraa.+ 17 Ejaakɛ Nyɔŋmɔ kɛwo amɛtsuiiaŋ koni amɛtsu eyiŋtoo he nii,+ hɛɛ, koni amɛkɛ amɛmaŋtsɛyeli lɛ ahã kooloo awuiyelɔ lɛ kɛtsu amɛyiŋtoo kome lɛ he nii,+ kɛyashi be ni abaagbe Nyɔŋmɔ wiemɔi lɛ anaa. 18 Ni yoo+ lɛ ni ona lɛ damɔ shi kɛhã maŋ kpeteŋkpele ni yeɔ* shikpɔŋ lɛ nɔ maŋtsɛmɛi lɛ anɔ lɛ.”

18 Enɛ sɛɛ lɛ, mina ŋwɛibɔfo kroko miikpeleke shi kɛmiijɛ ŋwɛi, ni eyɛ hegbɛ kpele, ni enunyam lɛ hã shikpɔŋ lɛ nɔ tse heŋŋ. 2 Ni ekɛ gbee ni wa bo ekɛɛ: “Egbee shi! Babilon Kpeteŋkpele lɛ egbee shi,+ ni etsɔ daimonioi ashihilɛhe kɛ he ko ni mumɔ fɛɛ mumɔ* ni he tseee kɛ loofɔlɔ fɛɛ loofɔlɔ ni he tseee ni anyɛɔ hu lɛ hiɔ!+ 3 Ejaakɛ ehã jeŋmaji lɛ fɛɛ etɔrɔ kɛ ejwamaŋbɔɔ* lɛ he akɔnɔ* wain lɛ,+ ni shikpɔŋ lɛ nɔ maŋtsɛmɛi lɛ kɛ lɛ ebɔ ajwamaŋ,*+ ni shikpɔŋ lɛ nɔ jarayelɔi* lɛ etsɔmɔ niiatsɛmɛi yɛ nibii babaoo ni jara wawai ni etĩaa naa ehãa ehe ni efeee lɛ hiɛgbele lɛ hewɔ.”

4 Ni minu gbee kroko kɛjɛ ŋwɛi miikɛɛ: “Nyɛjea emli, mimaŋ,+ kɛ́ nyɛsumɔɔɔ akɛ nyɛkɛ lɛ náa gbɛfaŋnɔ yɛ ehe eshai lɛ amli, ni nyɛsumɔɔɔ hu akɛ nyɛnáa ehaomɔi lɛ eko lɛ.+ 5 Ejaakɛ ehe eshai lɛ efa kɛshɛ ŋwɛi tɔ̃ɔ,+ ni Nyɔŋmɔ ekai enifeemɔi ni ejaaa* lɛ.+ 6 Nyɛtoa lɛ najiaŋ yɛ bɔ ni ekɛ mɛi ye hã lɛ naa,+ hɛɛ, nibii ni efee lɛ, nyɛwoa lɛ he nyɔmɔ toi enyɔ;+ kɔɔpoo+ lɛ ni efutu dãa lɛ yɛ mli lɛ, nyɛfutua lɛ toi enyɔ nyɛwoa mli nyɛhãa lɛ.+ 7 Bɔ ni ewo lɛ diɛŋtsɛ ehiɛ nyam ni ebua nibii babaoo ni jara wawai anaa ehã ehe ni efeee lɛ hiɛgbele lɛ, nakai nɔŋŋ nyɛhãa epiŋa ni eyea awerɛho. Ejaakɛ eyaa nɔ ekɛɔ yɛ etsui mli akɛ: ‘Mita shi akɛ maŋnyɛ, ni mijeee yoo okulafo, ni miyeŋ awerɛho hu kɔkɔɔkɔ.’+ 8 No hewɔ ni ehaomɔi lɛ baaba yɛ gbi kome nɔ lɛ, gbele kɛ awerɛhoyeli kɛ hɔmɔ, ni akɛ la baashã lɛ kwraa,+ ejaakɛ Yehowa* Nyɔŋmɔ, mɔ ni kojo lɛ lɛ, he wa.+

9 “Ni shikpɔŋ lɛ nɔ maŋtsɛmɛi ni kɛ lɛ bɔ ajwamaŋ,* ni kɛ lɛ ná nibii babaoo ni jara wawai ni ebua naa ehã ehe ni efeee lɛ hiɛgbele lɛ mli gbɛfaŋnɔ lɛ baafó, ni amɛbaagbála amɛhe mai kɛ awerɛho yɛ ehewɔ, kɛ́ amɛna eshãa lɛ lasu lɛ. 10 Amɛbaadamɔ sɛɛ shɔŋŋ yɛ epiŋmɔ lɛ gbeyeishemɔ hewɔ, ni amɛbaakɛɛ akɛ: ‘Kpoo, kpoo, bo maŋ kpeteŋkpele,+ Babilon, bo maŋ ni he wa lɛ, ejaakɛ ŋmɛlɛtswaa kome mli ni otoigbalamɔ lɛ eba nɛɛ!’

11 “Agbɛnɛ hu, shikpɔŋ lɛ nɔ jarayelɔi lɛ miifó ni amɛmiiye awerɛho yɛ ehewɔ, ejaakɛ mɔ ko mɔ ko bɛ ni baahé amɛjarayeli nibii lɛ fɛɛ dɔŋŋ, 12 jarayeli nibii lɛ fɛɛ, shika tsuru kɛ jwiɛtɛi kɛ tɛi ni jara wa kɛ adiagbai* kɛ klala kpakpa kɛ mama ni hiɛ pɛpol kɔla kɛ sliki mama kɛ mama ni tsuɔ waa; kɛ nɔ fɛɛ nɔ ni akɛ tso ni jeɔ ŋma fee; kɛ nɔ fɛɛ nɔ ni akɛ shwuɔ wu* loo tso ni jara wa loo akɔɔble loo dade loo marmara tɛ fee; 13 kɛ sinamon kɛ amomon* kɛ tsofa-kɛ-ŋma kɛ ojeŋma* kɛ frankinsɛnsi kɛ wain kɛ oliv mu kɛ ashikishaŋ kpakpa kɛ wiiti kɛ tsinai kɛ gwantɛŋi kɛ okpɔŋɔi kɛ shwiilii kɛ nyɔji kɛ gbɔmɛi awala.* 14 Hɛɛ, yibii kpakpai ni oshweɔ* lɛ eshi bo, ni nibii fɛɛ ni ŋɔɔŋɔi kɛ nibii fɛɛ ni yɔɔ fɛo lɛ eŋmɛɛ bo, ni onaŋ amɛ kwraa dɔŋŋ.

15 “Jarayelɔi ni hɔ̃ɔ nɛkɛ nibii nɛɛ, ni yoo lɛ ehã amɛtsɔmɔ niiatsɛmɛi lɛ, baadamɔ sɛɛ shɔŋŋ yɛ epiŋmɔ lɛ gbeyeishemɔ lɛ hewɔ, ni amɛbaafó ni amɛbaaye awerɛho, 16 ni amɛbaakɛɛ akɛ: ‘Kpoo, kpoo, maŋ kpeteŋkpele ni woɔ klala kpakpa kɛ atade ni hiɛ pɛpol kɔla kɛ atade ni tsuɔ waa ni wulaa kɛ shika tsuru hewulamɔ nibii kɛ tɛi ni jara wa kɛ adiagbai* lɛ,+ 17 ejaakɛ yɛ ŋmɛlɛtswaa kome mli lɛ, nɛkɛ ninámɔ kpele nɛɛ hiɛ ekpãtã!’

“Ni meele kudɔɔtsɛ fɛɛ kudɔɔtsɛ kɛ mɔ fɛɛ mɔ ni fãa gbɛ yɛ ŋshɔ hiɛ, kɛ amlakui kɛ mɛi fɛɛ ni náa amɛdaaŋ ŋmaa yɛ ŋshɔ hiɛ lɛ damɔ sɛɛ shɔŋŋ, 18 ni be ni amɛkwɛɔ eshãa lɛ lasu lɛ, amɛbolɔ amɛkɛɛ: ‘Mɛɛ maŋ tamɔ maŋ kpeteŋkpele lɛ?’ 19 Amɛkɛ mulu wo amɛyiteŋ, ni amɛkɛ yaafo kɛ awerɛhoyeli bolɔ amɛkɛɛ: ‘Kpoo, kpoo, maŋ kpeteŋkpele lɛ, ni mɛi fɛɛ ni yɔɔ meelei yɛ ŋshɔ hiɛ lɛ tsɔmɔ niiatsɛmɛi yɛ eninámɔ lɛ hewɔ lɛ, ejaakɛ yɛ ŋmɛlɛtswaa kome mli lɛ, akpãtã ehiɛ!’+

20 “Bo ŋwɛi, kɛ agbɛnɛ hu, nyɛ mɛi krɔŋkrɔŋi+ kɛ bɔfoi kɛ gbalɔi, nyɛnyaa yɛ ehewɔ,+ ejaakɛ Nyɔŋmɔ ekojo lɛ ehã nyɛ!”+

21 Ni ŋwɛibɔfo hewalɔ ko wó tɛ ko ni tamɔ wiɛtɛ wulu, ni eshɛ efɔ̃ ŋshɔ lɛ mli ekɛɛ: “Nɛkɛ abaashɛ Babilon maŋ kpeteŋkpele lɛ afɔ̃ oya, ni anaŋ lɛ kwraa dɔŋŋ.+ 22 Ni anuŋ lalɔi ni miitswa saŋku kɛ lalatsɛmɛi kɛ obɛntakpãlɔi kɛ tɛtɛrɛmantɛrɛkpãlɔi lɛ agbɛɛmɔ kwraa dɔŋŋ yɛ omli. Ni anaŋ ŋaalɔ ko ŋaalɔ ko ni tsuɔ ŋaa nitsumɔ ko kwraa dɔŋŋ yɛ omli, ni anuŋ wiɛtɛ gbɛɛmɔ ko hu kwraa dɔŋŋ yɛ omli. 23 Kane la ko etsoŋ kwraa dɔŋŋ yɛ omli, ni anuŋ ayemforo wu kɛ ayemforo gbee kwraa dɔŋŋ yɛ omli; ejaakɛ ojarayelɔi lɛ ji shikpɔŋ lɛ nɔ gbɔmɛi wuji, ni atsɔ mumɔi ni okɛshãraa lɛ anɔ+ alaka jeŋmaji lɛ fɛɛ. 24 Hɛɛ, emli ana gbalɔi kɛ mɛi krɔŋkrɔŋi lɛ kɛ mɛi fɛɛ ni agbe yɛ shikpɔŋ lɛ nɔ+ lɛ alá lɛ yɛ.”+

19 Enɛ sɛɛ lɛ, minu gbee ko ni wa tamɔ asafoku babaoo ko gbee yɛ ŋwɛi. Amɛkɛɛ: “Nyɛjiea Yah yi!*+ Yiwalaheremɔ lɛ kɛ anunyam lɛ kɛ hewalɛ lɛ ji wɔ-Nyɔŋmɔ lɛ nɔ, 2 ejaakɛ ekojomɔi lɛ, anɔkwale ni, ni amɛja.+ Ejaakɛ ekojo ashawo kpeteŋkpele lɛ, mɔ ni kɛ ejwamaŋbɔɔ* lɛ fite shikpɔŋ lɛ, ni agbɛnɛ hu, etɔ enyɔji lɛ alá ni yɔɔ yoo lɛ niji ahe lɛ he owele.”*+ 3 Ni amrɔ lɛ, amɛkɛɛ nɔ ni ji shii enyɔ nɔ akɛ: “Nyɛjiea Yah yi!*+ Ni yoo lɛ lasu lɛ teɔ shi kɛyaa naanɔi anaanɔ.”+

4 Ni onukpai 24+ lɛ kɛ bɔɔ nii ejwɛ ni hiɛ kamɔ+ lɛ ho gbee shi ni amɛjá Nyɔŋmɔ, mɔ ni ta maŋtsɛ sɛi lɛ nɔ lɛ, ni amɛkɛɛ: “Amen! Nyɛjiea Yah yi!”*+

5 Agbɛnɛ hu, gbee ko jɛ maŋtsɛ sɛi lɛ mli kɛɛ: “Nyɛjiea wɔ-Nyɔŋmɔ lɛ yi, nyɛ mɛi fɛɛ ni ji enyɔji,+ ni nyɛsheɔ lɛ gbeyei lɛ, mɛi bibii kɛ mɛi wuji.”+

6 Ni minu gbɛɛmɔ ko ni tamɔ asafoku babaoo ko gbee, ni etamɔ nui babaoo gbɛɛmɔ, ni etamɔ nugbɔshiimɔi ni naa wa gbɛɛmɔ. Amɛkɛɛ: “Nyɛjiea Yah yi,*+ ejaakɛ Yehowa* wɔ-Nyɔŋmɔ lɛ, Ofe+ lɛ, ebɔi nɔyeli akɛ maŋtsɛ!+ 7 Nyɛhãa wɔmii ashɛa wɔhe ni wɔmli afilia wɔ ni wɔwoa ehiɛ nyam, ejaakɛ Gwantɛŋbi lɛ yookpeemɔ lɛ eshɛ, ni eŋa lɛ esaa ehe eto. 8 Hɛɛ, ahã eŋa lɛ hegbɛ akɛ ewo klala kpakpa ni he tse ni kpɛlɛɔ kaŋkaŋ—ejaakɛ klala kpakpa lɛ damɔ shi kɛhã mɛi krɔŋkrɔŋi lɛ ajalɛ nifeemɔi lɛ.”+

9 Ni ekɛɛ mi akɛ, “Ŋmaa: Mɛi ni afɔ̃ amɛ nine kɛhã Gwantɛŋbi lɛ yookpeemɔ lɛ gbɛkɛ okpɔlɔŋmɛɛ lɛ yɛ miishɛɛ.”+ Esaa ekɛɛ mi akɛ: “Wiemɔi nɛɛ ji anɔkwa wiemɔi ni jɛ Nyɔŋmɔ ŋɔɔ.” 10 Kɛkɛ ni miho migbee enaji anaa koni majá lɛ. Shi ekɛɛ mi akɛ: “Kwɛmɔ jogbaŋŋ! Kaafee nakai!+ Bo kɛ onyɛmimɛi lɛ ni akɛ nitsumɔ ewo amɛdɛŋ akɛ amɛye Yesu he odase lɛ anaanyo nyɔŋ kɛkɛ ji mi.+ Já Nyɔŋmɔ!+ Ejaakɛ Yesu he odase lɛ ji nɔ hewɔ ni agbaa gbalɛi.”*+

11 Mina ni agbele ŋwɛi naa, ni naa! okpɔŋɔ yɛŋ ko.+ Ni mɔ ni ta nɔ lɛ, atsɛɔ lɛ Anɔkwayelɔ+ kɛ Anɔkwafo,+ ni jalɛ naa ekojoɔ yɛ ni ewuɔ ta.+ 12 Ehiŋmɛii lɛ, lalilɛii ni,+ ni maŋtsɛ faii* pii bumɔ eyitso. Eyɛ gbɛ́i ko ni aŋma ni mɔ ko mɔ ko leee akɛ ja lɛ diɛŋtsɛ, 13 ni ewo atade nɔhaanɔ ko ni lá eka mli,* ni atsɛɔ egbɛ́i akɛ, Nyɔŋmɔ Wiemɔ Lɛ.+ 14 Ni ŋwɛi asraafoi lɛ hu tara okpɔŋɔi yɛji anɔ kɛnyiɛ esɛɛ, ni amɛwo klala kpakpa ni yɛɔ ni he tse. 15 Ni klante kakadaŋŋ ni naa ba jɛɔ edaaŋ+ koni ekɛbãmɔ jeŋmaji lɛ, ni ekɛ dadetso baakpala amɛ tamɔ tookwɛlɔ feɔ lɛ.+ Agbɛnɛ hu, enaanaa wain tso yibii ni yɔɔ bu ni akɛŋaa wain ni damɔ shi kɛhã Nyɔŋmɔ Ofe lɛ mlifu ni naa wa lɛ mli lɛ nɔ.+ 16 Ni aŋma gbɛ́i ko yɛ etade nɔhaanɔ lɛ nɔ, hɛɛ, yɛ eshuɔ he, no ji, maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ.+

17 Mina ŋwɛibɔfo ko hu ni damɔ hulu lɛ mli, ni ebo kɛ gbee ni wa ni ekɛɛ loofɔji ni filikiɔ yɛ ŋwɛi teŋ* lɛ fɛɛ akɛ: “Nyɛbaa biɛ, nyɛbuaa nyɛhe naa kɛyaa Nyɔŋmɔ gbɛkɛ okpɔlɔŋmɛɛ wulu lɛ shishi,+ 18 koni nyɛye maŋtsɛmɛi aloo kɛ tatsɛmɛi aloo kɛ hewalɔi aloo+ kɛ okpɔŋɔi kɛ mɛi ni tara amɛnɔ lɛ aloo,+ kɛ mɛi fɛɛ aloo, mɛi ni jeee nyɔji kɛ nyɔji, kɛ mɛi bibii kɛ mɛi wuji fɛɛ aloo.”

19 Ni mina kooloo awuiyelɔ lɛ kɛ shikpɔŋ lɛ nɔ maŋtsɛmɛi lɛ kɛ amɛsraafoi lɛ ni abua amɛnaa ni amɛkɛ mɔ ni ta okpɔŋɔ lɛ nɔ lɛ kɛ esraafoi lɛ yaawu.+ 20 Ni amɔ kooloo awuiyelɔ lɛ, ni amɔ amale gbalɔ lɛ,+ mɔ ni fee okadii yɛ kooloo awuiyelɔ lɛ hiɛ ni ekɛlaka mɛi ni ná kooloo awuiyelɔ lɛ okadi+ lɛ kɛ mɛi ni jáa emaga lɛ,+ afata ehe. Be ni mɛi enyɔ nɛɛ fɛɛ ahiɛ kamɔ lolo lɛ, ashɛrɛ amɛ awo la kpaakpo ni tsoɔ kɛ sɔlfa lɛ mli.+ 21 Shi mɛi ni eshwɛ lɛ, akɛ klante kakadaŋŋ ni jɛ mɔ ni ta okpɔŋɔ lɛ nɔ lɛ daaŋ lɛ gbe amɛ.+ Ni loofɔji lɛ fɛɛ tɔrɔ kɛ amɛloo lɛ.+

20 Ni mina ŋwɛibɔfo ko miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfee lɛ+ kɛ tsein* wulu ko yɛ edɛŋ. 2 Emɔ drako lɛ,+ blema onufu lɛ,+ mɔ ni ji Abonsam+ kɛ Satan lɛ,+ ni efi lɛ afii 1,000. 3 Ni eshɛ lɛ efɔ̃ bu kwɔŋkwɔŋ lɛ mli+ ni eŋa eyi ni esɔo naa, koni ekalaka jeŋmaji lɛ dɔŋŋ kɛyashi be ni afii 1,000 lɛ baaba naagbee. Enɛ sɛɛ lɛ, esa akɛ ajie lɛ be fioo ko.+

4 Ni mina maŋtsɛ sɛii, ni ahã mɛi ni tara nɔ lɛ hegbɛ akɛ amɛkojo. Hɛɛ, mina mɛi ni agbe amɛ* yɛ Yesu he odase ni amɛye kɛ Nyɔŋmɔ he sane ni amɛwie lɛ hewɔ lɛ asusumai* lɛ, kɛ mɛi ni jáko kooloo awuiyelɔ lɛ loo emaga lɛ ni amɛnáko okadi lɛ yɛ amɛhiɛnaa kɛ amɛnine he lɛ.+ Ni amɛba wala mli ni amɛkɛ Kristo lɛ ye nɔ akɛ maŋtsɛmɛi+ afii 1,000. 5 (Gbohii ni eshwɛ+ lɛ baaa wala mli kɛyashi be ni afii 1,000 lɛ ba naagbee.) Enɛ ji klɛŋklɛŋ gbohiiashitee lɛ.+ 6 Mɔ fɛɛ mɔ ni náa gbɛfaŋnɔ yɛ klɛŋklɛŋ gbohiiashitee lɛ mli lɛ yɛ miishɛɛ ni eyɛ krɔŋkrɔŋ;+ gbele ni ji enyɔ+ lɛ bɛ hewalɛ ko yɛ nɛkɛ mɛi nɛɛ anɔ,+ shi moŋ, amɛbaatsɔmɔ Nyɔŋmɔ osɔfoi+ kɛ Kristo lɛ osɔfoi, ni amɛkɛ lɛ baaye nɔ akɛ maŋtsɛmɛi afii 1,000 lɛ fɛɛ.+

7 Agbɛnɛ, kɛ́ afii 1,000 lɛ ba naagbee nɔŋŋ lɛ, abaajie Satan kɛjɛ etsuŋwoo lɛ mli, 8 ni ebaaje kpo ni eyalaka nakai jeŋmaji ni yɔɔ shikpɔŋ lɛ koji ejwɛ lɛ, Gog kɛ Magog, koni ebua amɛnaa kutuu kɛhã ta lɛ. Mɛi nɛɛ ayi fa tamɔ ŋshɔnaa shia. 9 Ni amɛyiŋ kɛtee shikpɔŋ muu lɛ fɛɛ nɔ, ni amɛyabɔle mɛi krɔŋkrɔŋi lɛ nsara lɛ kɛ maŋ ni asumɔɔ lɛ kɛkpe. Shi la jɛ ŋwɛi bashã amɛ butuu.+ 10 Ni ashɛ Abonsam lɛ, mɔ ni lakaa amɛ lɛ, awo la kɛ sɔlfa kpaakpo lɛ mli, he ni kooloo awuiyelɔ+ lɛ kɛ amale gbalɔ lɛ yɔɔ momo lɛ;+ ni abaapiŋ amɛ* jetsɛremɔ kɛ jenamɔ kɛya naanɔi anaanɔ.

11 Ni mina maŋtsɛ sɛi yɛŋ kpeteŋkpele ko kɛ mɔ ni ta nɔ lɛ.+ Ni shikpɔŋ kɛ ŋwɛi jo foi kɛje ehiɛ,+ ni anáaa he ko ahã amɛ. 12 Ni mina gbohii lɛ, mɛi wuji kɛ mɛi bibii, damɔ maŋtsɛ sɛi lɛ hiɛ, ni agbele wolokpoi* anaa. Shi agbele wolokpo kroko naa; no ji wala wolokpo lɛ.+ Adamɔ nibii ni aŋmala yɛ wolokpoi lɛ amli lɛ anɔ akojo gbohii lɛ yɛ amɛnifeemɔi lɛ anaa.+ 13 Ni ŋshɔ lɛ jie gbohii ni yɔɔ emli lɛ ehã, ni gbele kɛ Gbonyobu* lɛ jie gbohii ni yɔɔ amɛmli lɛ amɛhã, ni akojo amɛteŋ mɔ fɛɛ mɔ yɛ enifeemɔi lɛ anaa.+ 14 Ni ashɛrɛ gbele kɛ Gbonyobu* lɛ ashwie la kpaakpo lɛ mli.+ Enɛ damɔ shi kɛhã gbele ni ji enyɔ lɛ,+ la kpaakpo lɛ.+ 15 Agbɛnɛ hu, mɔ fɛɛ mɔ ni anaaa akɛ aŋma egbɛ́i yɛ wala wolo lɛ mli lɛ,+ ashɛ lɛ afɔ̃ la kpaakpo lɛ mli.+

21 Ni mina ŋwɛi hee kɛ shikpɔŋ hee;+ ejaakɛ tsutsu ŋwɛi lɛ kɛ tsutsu shikpɔŋ lɛ eho etee,+ ni ŋshɔ+ lɛ bɛ dɔŋŋ. 2 Agbɛnɛ hu, mina maŋ krɔŋkrɔŋ lɛ, Yerusalem Hee lɛ, jɛ Nyɔŋmɔ ŋɔɔ yɛ ŋwɛi miikpeleke shi,+ ni asaa lɛ tamɔ ayemforo ni awula lɛ ahã ewu.+ 3 Kɛkɛ ni minu gbee ko ni wa jɛ maŋtsɛ sɛi lɛ mli kɛɛ: “Naa! Nyɔŋmɔ mama tsũ lɛ yɛ gbɔmɛi ateŋ, ni ekɛ amɛ baahi shi, ni amɛbaatsɔmɔ emaŋ. Ni Nyɔŋmɔ diɛŋtsɛ kɛ amɛ baahi shi.+ 4 Ni ebaatsumɔ amɛhiŋmɛiiaŋ yaafonui fɛɛ,+ ni gbele ehiŋ shi dɔŋŋ,+ ni awerɛhoyeli loo yaafo loo piŋmɔ* ko hu ehiŋ shi dɔŋŋ.+ Tsutsu nibii lɛ eho etee.”

5 Ni mɔ ni ta maŋtsɛ sɛi lɛ nɔ+ lɛ kɛɛ: “Naa! Miifee nibii fɛɛ ehee.”+ Esaa ekɛɛ: “Ŋmaa, ejaakɛ wiemɔi nɛɛ, anɔkwa wiemɔi ni,* ni amɛyɛ mli.” 6 Ni ekɛɛ mi akɛ: “Agbe naa! Miji Alfa lɛ kɛ Omega lɛ,* shishijee lɛ kɛ naagbee lɛ.+ Mɔ fɛɛ mɔ ni kumai yeɔ lɛ lɛ, mahã lɛ wala nuhiŋmɛi lɛ mli nu lɛ eko ni miheee lɛ nɔ ko.+ 7 Mɔ fɛɛ mɔ ni yeɔ kunim lɛ, enine baashɛ nibii nɛɛ anɔ,* ni matsɔ e-Nyɔŋmɔ, ni lɛ hu ebaatsɔ mibi. 8 Shi gbeyeilɔi lɛ kɛ mɛi ni bɛ hemɔkɛyeli+ kɛ mɛi ni he tseee ni feɔ taŋ nii kɛ gbɔmɔgbelɔi+ kɛ ajwamaŋbɔlɔi*+ lɛ kɛ mɛi ni kɛ mumɔi shãraa kɛ amagajalɔi kɛ amalelɔi fɛɛ lɛ,+ amɛbaaná amɛgbɛfaŋnɔ yɛ kpaakpo lɛ ni tsoɔ kɛ la kɛ sɔlfa lɛ mli.+ Enɛ damɔ shi kɛhã gbele ni ji enyɔ lɛ.”+

9 Ŋwɛibɔfoi kpawo ni hiɛ tsɛnsii kpawo ni eyimɔ obɔbɔ kɛ naagbee haomɔi kpawo lɛ ateŋ mɔ kome+ ba ni ebakɛɛ mi akɛ: “Ba, ni matsɔɔ bo ayemforo lɛ, Gwantɛŋbi lɛ ŋa lɛ.”+ 10 No hewɔ lɛ, ekɛ mi tee gɔŋ kpeteŋkpele ni kwɔ ko nɔ yɛ mumɔ lɛ hewalɛ lɛ mli, ni etsɔɔ mi maŋ krɔŋkrɔŋ ni ji Yerusalem lɛ ni jɛ Nyɔŋmɔ ŋɔɔ yɛ ŋwɛi eekpeleke shi,+ 11 ni eyɛ Nyɔŋmɔ anunyam lɛ.+ Ekpɛlɛɔ tamɔ tɛ ni jara wa fe fɛɛ, etamɔ yaspi tɛ ni mli tse tamɔ kristalo.+ 12 Eyɛ gbogbo kpeteŋkpele ni kwɔ kɛ agbói 12, ni ŋwɛibɔfoi 12 damɔ agbói lɛ anaa, ni akpɛ́ Israelbii lɛ awekui 12 lɛ agbɛ́ii lɛ awo agbói lɛ ahe. 13 Agbói etɛ yɛ bokãgbɛ, ni agbói etɛ yɛ kooyigbɛ, ni agbói etɛ yɛ wuoyigbɛ, ni agbói etɛ yɛ anaigbɛ.+ 14 Maŋ lɛ gbogbo lɛ yɛ faneshi tɛi 12 hu, ni Gwantɛŋbi lɛ bɔfoi 12 lɛ agbɛ́ii 12+ lɛ yɛ amɛnɔ.

15 Agbɛnɛ, mɔ ni kɛ mi wieɔ lɛ hiɛ shika tsuru gãlã* akɛ susumɔnɔ, bɔ ni afee ni ekɛsusu maŋ lɛ kɛ egbói lɛ kɛ egbogbo lɛ.+ 16 Ni maŋ lɛ kã shi koji ejwɛ, ni ekɛlɛ tamɔ elɛɛmɔ nɔŋŋ. Ni ekɛ gãlã lɛ susu maŋ lɛ, ni efee stadioi 12,000;* ni ekɛlɛ kɛ elɛɛmɔ kɛ ekwɔlɛ yeɔ egbɔ. 17 Esusu maŋ lɛ gbogbo lɛ hu, ni efee ninetalɔi 144,* yɛ gbɔmɔ susumɔnɔ naa, ni yɛ nakai be lɛ mli nɔŋŋ lɛ, eji ŋwɛibɔfo susumɔnɔ. 18 Agbɛnɛ, nɔ ni akɛtswa gbogbo lɛ ji yaspi,+ ni maŋ lɛ, shika tsuru krɔŋŋ ni tamɔ glase ni mli tse ni. 19 Awula maŋ lɛ gbogbo lɛ faneshii lɛ kɛ tɛi ni jara wa srɔtoi fɛɛ: klɛŋklɛŋ faneshi lɛ yaspi, nɔ ni ji enyɔ lɛ safiro, nɔ ni ji etɛ lɛ kalkedon, nɔ ni ji ejwɛ lɛ emerald, 20 nɔ ni ji enumɔ lɛ sardoniki, nɔ ni ji ekpaa lɛ sardio, nɔ ni ji kpawo lɛ krisolito, nɔ ni ji kpaanyɔ lɛ berilo, nɔ ni ji nɛɛhu lɛ topasion, nɔ ni ji nyɔŋma lɛ krisopraso, nɔ ni ji nyɔŋma kɛ ekome lɛ hiakinto, nɔ ni ji nyɔŋma kɛ enyɔ lɛ amɛtisto.* 21 Agbɛnɛ hu, agbói 12 lɛ, adiagbai* 12 ni; agbói lɛ eko fɛɛ eko lɛ adiagba kome akɛfee. Ni maŋ lɛ gbɛjegbɛ wulu lɛ, shika tsuru krɔŋŋ ni, ni etamɔ glase ni anaa mli.

22 Minaaa sɔlemɔ shĩa yɛ maŋ lɛ mli, ejaakɛ Yehowa* Nyɔŋmɔ, Ofe+ lɛ, kɛ agbɛnɛ hu, Gwantɛŋbi lɛ ji esɔlemɔ shĩa. 23 Ni hulu loo nyɔɔŋtsere kpɛmɔ he ehiaaa maŋ lɛ, ejaakɛ Nyɔŋmɔ anunyam lɛ kpɛɔ yɛ mli,+ ni Gwantɛŋbi lɛ ji ekane.+ 24 Ni jeŋmaji lɛ baanyiɛ yɛ ela lɛ mli,+ ni shikpɔŋ lɛ nɔ maŋtsɛmɛi lɛ baaŋɔ amɛnunyam lɛ kɛba mli. 25 Egbói lɛ, aŋamɔŋ kwraa yɛ jetsɛremɔ mli, ejaakɛ je enaŋ yɛ jɛmɛ.+ 26 Ni amɛkɛ jeŋmaji lɛ anunyam lɛ kɛ woo lɛ baaba mli.+ 27 Shi nɔ fɛɛ nɔ ni abule kɛ mɔ fɛɛ mɔ ni feɔ nihiinii ni elakaa mɛi lɛ boteŋ mli kɔkɔɔkɔ;+ ja mɛi ni aŋmala amɛgbɛ́ii yɛ Gwantɛŋbi lɛ wala wolokpo* lɛ mli lɛ pɛ baabote mli.+

22 Ni etsɔɔ mi wala nu faa+ ko ni mli tse tamɔ kristalo, ni miijɛ Nyɔŋmɔ maŋtsɛ sɛi lɛ kɛ Gwantɛŋbi+ lɛ maŋtsɛ sɛi lɛ mli 2 miiho kɛmiitsɔ maŋ lɛ gbɛjegbɛ wulu lɛ teŋ. Wala tsei ni woɔ yibii shii 12 yɛ faa lɛ toi biɛ kɛ biɛ, nyɔɔŋ fɛɛ nyɔɔŋ nɔ lɛ, amɛwoɔ yibii. Ni tsei lɛ ayibai lɛ akɛtsaa jeŋmaji lɛ.+

3 Ni loomɔ ko loomɔ ko bɛ dɔŋŋ. Shi Nyɔŋmɔ maŋtsɛ sɛi lɛ kɛ Gwantɛŋbi lɛ maŋtsɛ sɛi+ lɛ baahi maŋ lɛ mli, ni enyɔji lɛ kɛ sɔɔmɔ krɔŋŋ baahã lɛ; 4 ni amɛbaana ehiɛ,+ ni egbɛ́i baahi amɛhiɛnaa.+ 5 Agbɛnɛ hu, je enaŋ yɛ jɛmɛ,+ ni kane la loo hulu la he ehiaŋ amɛ, ejaakɛ Yehowa* Nyɔŋmɔ baakpɛ ehã amɛ akɛ la,+ ni amɛbaaye nɔ akɛ maŋtsɛmɛi kɛya naanɔi anaanɔ.+

6 Ekɛɛ mi akɛ: “Wiemɔi nɛɛ, anɔkwa wiemɔi ni,* ni amɛyɛ mli;+ hɛɛ, Yehowa,* Nyɔŋmɔ ni kɛ mumɔ tsirɛ gbalɔi lɛ,+ etsu ebɔfo lɛ koni ebatsɔɔ enyɔji lɛ nibii ni sa akɛ aba mli oya nɔŋŋ. 7 Naa! miiba oya.+ Mɔ fɛɛ mɔ ni yeɔ wolokpo* nɛɛ mli gbalɛ wiemɔi lɛ anɔ lɛ yɛ miishɛɛ.”+

8 Anɔkwa, mi Yohane, miji mɔ ni nu ni na nibii nɛɛ. Be ni minu ni mina lɛ, miho migbee shi koni majá yɛ ŋwɛibɔfo lɛ ni tsɔɔ mi nibii nɛɛ naji anaa. 9 Shi ekɛɛ mi akɛ: “Kwɛmɔ jogbaŋŋ! Kaafee nakai! Bo kɛ onyɛmimɛi lɛ, ni ji gbalɔi lɛ, kɛ mɛi ni yeɔ wolokpo nɛɛ mli wiemɔi lɛ anɔ lɛ anaanyo nyɔŋ kɛkɛ ji mi. Já Nyɔŋmɔ.”+

10 Esaa ekɛɛ mi akɛ: “Kaasɔo wolokpo nɛɛ mli gbalɛ wiemɔi lɛ anaa, ejaakɛ be ni ato lɛ ebɛŋkɛ. 11 Mɔ ni ejaaa lɛ, eya nɔ efee nii ni ejaaa, ni mɔ ni ewo ehe muji lɛ, eya nɔ ewo ehe muji; shi mɔ ni ji jalɔ lɛ, eya nɔ efee jalɛ nii, ni mɔ ni ji mɔ krɔŋkrɔŋ lɛ, eya nɔ efee mɔ krɔŋkrɔŋ.

12 “‘Naa! miiba oya, ni mihiɛ jweremɔnɔ ni mikɛhãa lɛ yɛ midɛŋ, koni mato mɔ fɛɛ mɔ najiaŋ yɛ enitsumɔ naa.+ 13 Miji Alfa lɛ kɛ Omega lɛ,*+ klɛŋklɛŋ mɔ lɛ kɛ naagbee mɔ lɛ, shishijee lɛ kɛ naagbee lɛ. 14 Mɛi ni fɔɔ amɛtadei kakadaji lɛ ahe, koni amɛná hegbɛ kɛya wala tsei lɛ ahe,+ ni amɛnyɛ amɛtsɔ maŋ lɛ agbói lɛ amli kɛbote maŋ lɛ mli+ lɛ yɛ miishɛɛ.+ 15 Maŋ lɛ sɛɛ lɛ, jɛmɛ gbei* lɛ kɛ mɛi ni kɛ mumɔi shãraa kɛ ajwamaŋbɔlɔi* lɛ kɛ gbɔmɔgbelɔi lɛ kɛ amagajalɔi lɛ kɛ mɔ fɛɛ mɔ ni sumɔɔ amale ni emaleɔ hu lɛ yɔɔ.’+

16 “‘Mi Yesu, mitsu mibɔfo lɛ koni ebaye nibii nɛɛ ahe odase etsɔɔ nyɛ yɛ asafoi lɛ ahewɔ. Miji David shishifã lɛ kɛ eseshi+ lɛ kɛ leebi ŋulami ni kpɛɔ lɛ.’”+

17 Ni mumɔ lɛ kɛ ayemforo+ lɛ yaa nɔ kɛɔ akɛ, “Ba!” ni mɔ fɛɛ mɔ ni nuɔ lɛ akɛɛ, “Ba!” ni mɔ fɛɛ mɔ ni kumai yeɔ lɛ lɛ aba;+ mɔ fɛɛ mɔ ni sumɔɔ lɛ, ebayɛ wala nu lɛ yaka ni aheee lɛ nɔ ko.+

18 “Miiye mɔ fɛɛ mɔ ni nuɔ wolokpo nɛɛ mli gbalɛ wiemɔi lɛ odase akɛ: Kɛ́ mɔ ko kɛ nɔ ko fata nibii nɛɛ ahe lɛ,+ Nyɔŋmɔ kɛ haomɔi ni aŋmala yɛ wolokpo nɛɛ mli lɛ afata he ahã lɛ;+ 19 ni kɛ́ mɔ ko jie nɔ ko kɛje wolokpo nɛɛ mli gbalɛ wiemɔi lɛ amli lɛ, Nyɔŋmɔ baajie egbɛfaŋnɔ kɛje wala tsei lɛ amli,+ kɛ agbɛnɛ hu, kɛje maŋ krɔŋkrɔŋ lɛ mli,+ nibii ni aŋmala amɛhe saji yɛ wolokpo nɛɛ mli lɛ.

20 “Mɔ ni yeɔ nibii nɛɛ ahe odase lɛ kɛɔ akɛ, ‘Hɛɛ, miiba oya.’”+

“Amen! Ba, Nuŋtsɔ Yesu.”

21 Nuŋtsɔ Yesu dromɔ lɛ kɛ mɛi krɔŋkrɔŋi lɛ ahia shi.