E kilai Jiova o Tui Tevita qai nuitaki koya. Nira vaqarai koya na kena meca, wili kina o Tui Saula, e masuti Jiova me vukei koya. Ni sauma o Jiova nona masu qai vakabulai koya, e kaya: “E bula o Jiova!” (Same 18:46) Nona cavuta qori, e sega ni kaya wale tiko ga ni bula dina na Kalou. E tukuni ena dua na ivola ni vakaraitaka sara ga o Tevita nona vakabauta ni Jiova e “Kalou bula, e dau vukei ira tu ga na nona tamata.” Io, mai na veika e sotava, e kila o Tevita ni bula dina tiko na nona Kalou. E uqeti koya me gumatua ni qaravi Jiova, me vakacaucautaki koya tale ga. (Same 18:28, 29, 49) Nida vakadeitaka ni Kalou bula o Jiova, eda na gumatua ni qaravi koya. Eda na yaloqaqa meda vosota na veika rarawa qai veiqaravi mai vu ni lomada. Eda na vakadeitaka sara ga meda volekati Jiova tiko ga. w24.06 20-21 ¶3-4

Na cava eda vulica ena ka e vola o Paula vei ira e Cesalonaika? Nida rogoca na itukutuku e veisaqasaqa kei na iVolatabu se itukutuku e sega ni vakadeitaki, ena vinaka meda vakaraitaka na yalomatua. A yaco qori ena Matanitu Makawa kei Rusia, era veisoliyaka na keda meca e dua na ivola e tukuni ni volai mai na itikotiko liu. Era uqeti kina na tacida mera tauyavutaka e dua na isoqosoqo e tu vakataki koya. Ia era sega ni vakacalai na tacida yalodina. Era liaca ni sega sara ga ni salavata kei na veika era vakavulici kina. Nikua tale ga, o ira na keda meca era vakayagataka na Internet mera vakavu veilecayaki ra qai saga mera tawasei keda. Me kua mada ga ni “vakasesei vakatotolo na [noda] vakasama,” ena noda taqomaki keda nida vakadeitaka ni ka eda rogoca e salavata kei na ka dina eda sa vulica oti.—2 Ces. 2:2; 1 Joni 4:1. w24.07 12 ¶14-15

Na vakatulewa bibi duadua e rawa ni cakava e dua, ya me yalataki koya vei Jiova me lewe ni nona vuvale qai sokaloutaki koya. E vinakata o Jiova meda cakava kece qori. Na vuna? E vinakata meda veitokani kei koya, meda rawata tale ga na bula tawamudu. (Vkru. 30:19, 20; Kala. 6:7, 8) O Jiova e sega ni vakasaurarataka e dua me qaravi koya. E vinakata me noda yadua na vakatulewa. Vakacava ke dua e papitaiso e beca na lawa ni Kalou ni valavala ca bibi? Ke sega ni veivutuni, me biu tani mai na ivavakoso. (1 Kor. 5:13) Ia ena gauna mada ga qori, e vinakata tiko ga o Jiova me veivutuni qai lesu vua. Qori e dua na vuna bibi e vakarautaka kina na ivoli me rawa ni vosoti ira na veivutunitaka nodra ivalavala ca. Ni Kalou dauloloma o Jiova, e vakamasuti ira era valavala ca bibi mera veivutuni.—Saka. 1:3; Roma 2:4; Jeme. 4:8. w24.08 14 ¶1-2