ምዕራፍ 29

የሞቱ ሰዎች በምን ዓይነት ሁኔታ ላይ ይገኛሉ?

በወረቀት የሚታተመው

የምትወደውን ሰው በሞት አጥተህ ታውቃለህ? እንዲህ ያለ ከባድ ሁኔታ ሲያጋጥምህ የሚከተሉት ጥያቄዎች ወደ አእምሮህ ይመጡ ይሆናል፦ ‘የሞቱ ሰዎች በምን ዓይነት ሁኔታ ላይ ይገኛሉ? በሞት የተለዩንን የምንወዳቸውን ሰዎች ዳግመኛ እናገኛቸው ይሆን?’ መጽሐፍ ቅዱስ ለእነዚህ ጥያቄዎች የሚሰጠውን የሚያጽናና መልስ በዚህና በቀጣዩ ምዕራፍ ላይ እንመለከታለን።

1. የሞቱ ሰዎች በምን ዓይነት ሁኔታ ላይ ይገኛሉ?

ኢየሱስ ሞትን ከከባድ እንቅልፍ ጋር አመሳስሎታል። ሞት ከእንቅልፍ ጋር የሚመሳሰለው እንዴት ነው? ጭልጥ ያለ እንቅልፍ የወሰደው ሰው በዙሪያው የሚከናወነውን ነገር አያውቅም። በተመሳሳይም አንድ ሰው ከሞተ በኋላ ምንም ሥቃይ አይሰማውም። ለጓደኞቹና ለቤተሰቦቹ ምንም ያህል ፍቅር የነበረው ቢሆን እንኳ ከሞተ በኋላ የብቸኝነት ስሜት ሊሰማው አይችልም። መጽሐፍ ቅዱስ “ሙታን . . . ምንም አያውቁም” ይላል።—መክብብ 9:5⁠ን አንብብ።

2. ስለ ሞት እውነቱን ማወቃችን ምን ጥቅም ያስገኝልናል?

ብዙ ሰዎች ሞትን አልፎ ተርፎም የሞቱ ሰዎችን ይፈራሉ! መጽሐፍ ቅዱስ ስለ ሞት የሚናገረውን ነገር ማወቅ ግን ያጽናናል። ኢየሱስ ‘እውነት ነፃ ያወጣችኋል’ ብሏል። (ዮሐንስ 8:32) አንዳንድ ሃይማኖቶች ሰው ከሞተ በኋላ በሕይወት መኖሯን የምትቀጥል የማትሞት ነፍስ እንዳለች ያስተምራሉ፤ መጽሐፍ ቅዱስ ግን እንዲህ አይልም። ማንም ሰው ከሞተ በኋላ አይሠቃይም። በተጨማሪም ሙታን ምንም ነገር ስለማያውቁ እኛን ሊጎዱን አይችሉም። እንዲሁም ከሞቱ ሰዎች ጋር በተያያዘ ለየት ያለ ሃይማኖታዊ ሥርዓት መፈጸም ወይም ስለ እነሱ መጸለይ አያስፈልገንም።

አንዳንዶች ‘የሞቱ ሰዎችን ማነጋገር እንችላለን’ ይላሉ። ሆኖም ይህ ሊሆን የማይችል ነገር ነው። ቀደም ሲል እንደተመለከትነው ‘ሙታን ምንም አያውቁም።’ በሞት የተለዩአቸውን ሰዎች እንደሚያነጋግሩ የሚያስቡ ሰዎች የሚያነጋግሩት የሞቱትን ሰዎች ሳይሆን እነሱን መስለው የሚቀርቡ አጋንንትን ሊሆን ይችላል። ስለዚህ ሞትን በተመለከተ እውነቱን ማወቃችን ከአጋንንት ይጠብቀናል። ይሖዋ ከሞቱ ሰዎች ጋር ለመነጋገር መሞከር እንደሌለብን አስጠንቅቆናል፤ ምክንያቱም አጋንንት በዚህ ተጠቅመው ሊጎዱን እንደሚችሉ ያውቃል።—ዘዳግም 18:10-12⁠ን አንብብ።

ጠለቅ ያለ ጥናት

መጽሐፍ ቅዱስ ሞትን በተመለከተ ምን እንደሚያስተምር በስፋት እንመለከታለን። በተጨማሪም አፍቃሪ የሆነው አምላክ የሞቱ ሰዎችን እንደማያሠቃይ እርግጠኛ መሆን የምትችለው ለምን እንደሆነ እናያለን።

አንድ ሰው በባለቤቱና በልጆቹ እናት ለቅሶ ላይ ከሁለት ትናንሽ ልጆቹ ጋር ወንበር ላይ ተቀምጦ። ወዳጅ ዘመዶቻቸው ቤተሰቡን ለማጽናናትና ለመደገፍ በቦታው ተገኝተዋል

3. የሞቱ ሰዎች የሚገኙበትን ሁኔታ በተመለከተ እውነታው ምንድን ነው?

የሞቱ ሰዎች የሚገኙበትን ሁኔታ በተመለከተ በዓለም ዙሪያ የተለያየ አመለካከት አለ። መቼም እነዚህ ሁሉ አመለካከቶች እውነት ሊሆኑ እንደማይችሉ የታወቀ ነው።

የሞቱ ሰዎች የሚገኙበትን ሁኔታ በተመለከተ በአካባቢህ ያለው አመለካከት ምንድን ነው?

መጽሐፍ ቅዱስ ምን እንደሚያስተምር ለማወቅ ቪዲዮውን ተመልከቱ።

ቪዲዮ፦ ስንሞት ምን እንሆናለን?—ተቀንጭቦ የተወሰደ (1:19)

‘ስንሞት ምን እንሆናለን?—ተቀንጭቦ የተወሰደ’ ከተባለው ቪዲይ ላይ የተወሰደ ትዕይንት፦ 1. ሆስፒታል አልጋ ላይ ያለ የአንድ ሰው ሬሳ 2. አንድ ሰው በባቡር ሲጓዝ እንቅልፍ ወስዶት። ከግራውና ከቀኙ ሁለት ሰዎች አሉ

መክብብ 3:20⁠ን አንብቡ፤ ከዚያም በሚከተሉት ጥያቄዎች ላይ ተወያዩ፦

በዚህ ጥቅስ መሠረት ሰው ከሞተ በኋላ ምን ይሆናል?
ሰው ሲሞት በሕይወት መኖሯን የምትቀጥል ነገር አለች?

መጽሐፍ ቅዱስ የኢየሱስ የቅርብ ወዳጅ ስለነበረው ስለ አልዓዛር ሞት ይናገራል። ዮሐንስ 11:11-14⁠ን አንብቡ፤ ጥቅሱ ሲነበብ ኢየሱስ አልዓዛር የሚገኝበትን ሁኔታ የገለጸው እንዴት እንደሆነ ለማስተዋል ሞክር። ከዚያም በሚከተሉት ጥያቄዎች ላይ ተወያዩ፦

ኢየሱስ ሞትን ከምን ጋር አመሳስሎታል?
ይህ ንጽጽር የሞቱ ሰዎች ስለሚገኙበት ሁኔታ ምን ያስተምረናል?
መጽሐፍ ቅዱስ ሞትን በተመለከተ ስለሚያስተምረው ትምህርት ምን ይሰማሃል?

4. ስለ ሞት እውነቱን ማወቃችን ይጠቅመናል

ሞትን በተመለከተ እውነቱን ማወቃችን የሞቱ ሰዎችን እንዳንፈራ ይረዳናል። መክብብ 9:10⁠ን አንብቡ፤ ከዚያም በሚከተለው ጥያቄ ላይ ተወያዩ፦

የሞቱ ሰዎች ሊጎዱን ይችላሉ?

የመጽሐፍ ቅዱስን እውነት ማወቃችን ‘የሞቱ ሰዎች በሕይወት ያሉትን ሊጎዱ ይችላሉ’ ወይም ‘ሊመለኩ ይገባል’ ከሚለው እምነትም ይጠብቀናል። ኢሳይያስ 8:19⁠ን እና ራእይ 4:11⁠ን አንብቡ፤ ከዚያም በሚከተለው ጥያቄ ላይ ተወያዩ፦

ለሞቱ ሰዎች አምልኮ የሚያቀርብን ወይም የእነሱን እርዳታ ለማግኘት የሚሞክርን ሰው በተመለከተ ይሖዋ ምን የሚሰማው ይመስልሃል?

የሞቱ ሰዎችን ለማክበር ተብለው የሚደረጉ ልማዶችን የሚያሳዩ ሥዕሎች፦ 1. አንድ ሰው የመቃብር ቦታ ጋ ምግብ አቅርቦ ተንበርክኮ ሲጸልይ 2. ሦስት ሰዎች ለየት ያለ ልብስ ለብሰው ሲጨፍሩ 3. ከራስ ቅል የተሠሩ ጭንብሎች አድርገው እንዲሁም ትላልቅ አጽሞችን ይዘው ሰልፍ የወጡ ሰዎች — ስለ ሞት እውነቱን ማወቃችን ይሖዋን ከሚያሳዝኑ ልማዶች እንድንርቅ ይረዳናል

5. ስለ ሞት እውነቱን ማወቃችን ያጽናናናል

ብዙ ሰዎች ቀደም ሲል ለሠሩት ኃጢአት፣ ከሞቱ በኋላ እንደሚቀጡ ተምረዋል። ሆኖም ማንም ሰው፣ ሌላው ቀርቶ በጣም መጥፎ ነገሮችን ያደረገ ሰው እንኳ ከሞተ በኋላ እንደማይሠቃይ ማወቃችን ያጽናናናል። ሮም 6:7⁠ን አንብቡ፤ ከዚያም በሚከተለው ጥያቄ ላይ ተወያዩ፦