Mbụme Oro Mme Andikot Ẹbụpde
Ndi Ẹma Ẹbebiere Se Iditịbede Inọ Nnyịn?
Ndusụk owo ẹdọhọ ke akan̄a ama ebebiere usen n̄kpa owo. Mbon en̄wen ẹte ke Abasi ke idem esiemmọ esibiere ini oro owo edikpade. Ke adianade do, mme utọ owo oro ẹdọhọ ke owo ikemeke ndikpan mme akpan n̄kpọntịbe oro ẹwọrọde owo. Ndi afo ekere ntre?
Afo emekeme ndibụp idemfo mme mbụme emi: ‘Edieke edide akpanikọ ke nnyịn ikemeke ndinam n̄kpọ ndomokiet ndikpụhọ se isitịbede inọ nnyịn, edieke edide Abasi m̀mê akan̄a ama ebebiere se iditịbede, ufọn emi isibọn̄de akam? Edieke onyụn̄ edide ke ẹma ẹbebiere se iditịbede inọ nnyịn, ntak emi isinamde n̄kpọ man ikpeme idem nnyịn? Ntak emi isisede edem mbiba mbemiso ibede usụn̄? Ntak emi nnyịn mîkpawatke ubomisọn̄ edieke ikpade mmịn?’
Bible idehedei idọhọ ke ifọnke ikpeme idem. Utu ke Bible ndikọdọhọ ke akan̄a ama ebebiere kpukpru n̄kpọ, enye okowụk nditọ Israel ete ẹkpeme idem. Ke uwụtn̄kpọ, ẹma ẹwụk mmọ ẹte ẹbọp ibio ibibene ẹkanade mbatmbat ọkọm ufọk mmọ. Emi ekedi mbak owo ediduọ. Ntak emi Abasi ọkpọnọde orụk ewụhọ oro edieke edide ẹma ẹbebiere ke owo oyodorode ke ọkọm oro ọduọ akpa?—Deuteronomy 22:8.
Nso kaban̄a mbon oro ẹkpan̄ade ke ntak mme oto-obot afanikọn̄ m̀mê ke ntak mme afanikọn̄ en̄wen emi mmọ mîkemeke ndinyan̄a? Ndi ẹma ẹbebiere “usenọfiọn̄ emi mmọ ẹdikpade”? Baba, Edidem Solomon emi eketienede ewet Bible asian nnyịn ke ‘ini ye unọmọ ẹtịbe ẹnọ nnyịn kpukpru.’ (Ecclesiastes 9:11) Mmọdo, inamke n̄kpọ m̀mê n̄kpọ emi etịbede ọdiọk m̀mê edi esen esen adan̄a didie, owo ikebiereke-biere afanikọn̄ inịm.
Edi ndusụk owo ẹdọhọ ke emi ikemke ye se Solomon eketịn̄de ke Ecclesiastes 3:1, 2, ete: “Ẹmenịm ini ẹnọ kpukpru n̄kpọ: kpukpru utom ke idak enyọn̄ ẹnyụn̄ ẹnyene ekem ini mmọ: ini eke ẹmande, ye ini eke ẹkpade.” Edi ndi Solomon ọkọdọhọ ke akan̄a ebiere kpukpru n̄kpọ oro ẹnamde? Ẹyak inen̄ede idụn̄ọde ikọ esie.
Solomon ikọdọhọke ke ẹma ẹbebiere ini emi owo edimanade ye ini emi owo edikpade ẹnịm. Utu ke oro, ikọ esie ọkọwọrọ ke mme owo ẹkaka iso ndimana nnyụn̄ n̄kpa. Ke akpanikọ, enyene ini emi esịt enemde owo ye ini emi mînemke. Solomon ọdọhọ ete: “Ẹmenịm . . . ini eke ẹtuade, ye ini eke ẹsakde.” Solomon ọdọhọ ke mme utọ n̄kpọ oro ẹkade-ka iso nditịbe do ye mme afanikọn̄ emi owo mîkebemke iso ifiọk ẹdi ọsọ n̄kpọ ke uwem, oro edi, ke “kpukpru utom ke idak enyọn̄.” (Ecclesiastes 3:1-8; 9:11, 12) Ke ntre, utịt ikọ edi ke nnyịn ikpọduọhọ inyịne ke mme edinam idem nnyịn tutu ifre enyịn iban̄a Andibot nnyịn.—Ecclesiastes 12:1, 13.
Okposụkedi emi uwem ye n̄kpa ẹnen̄erede ẹn̄wan̄a Andibot nnyịn, enye ibiereke-biere n̄kpọ emi inịm inọ nnyịn. Bible ọdọhọ ke Abasi ọnọ kpukpru nnyịn idotenyịn ndidu uwem ke nsinsi. Edi Abasi inyịkke-nyịk nnyịn ibọ enọ emi. Utu ke oro, Ikọ esie ọdọhọ ete: “Yak owo eke amade ọbọ mmọn̄ uwem ọn̄wọn̄ ke mfọn.”—Ediyarade 22:17.
Ih, ana ima ndibọ “mmọn̄ uwem.” Ke ntem, idịghe akan̄a ebiere ini iso nnyịn. Mme ubiere, edu, ye edinam nnyịn ẹnen̄ede ẹbiere ini iso nnyịn.