Mbụme Oro Mme Andikot Ẹbụpde
Ndi Abasi Esida Nditọwọn̄ man Ẹkedi Angel ke Heaven?
Ke ini eyenọwọn̄ akpade, mme ufan ubon oro ẹkeme ndidomo ndidọn̄ mmọ esịt ke ndidọhọ ẹte, “Abasi oyom angel en̄wen ke heaven.” Ndi oro etie fi nte esịne ifiọk?
Edieke edide akpanikọ ke Abasi esinam nditọwọn̄ ẹkpan̄a ke ntak emi enye oyomde mme angel en̄wen ke heaven, emi ọkpọwọrọ ke enye edi ibak. Bible inyịmeke ye ekikere emi. (Job 34:10) Ete emi enyenede esịtmbọm ikpawamakede eyen ibọ ete ye eka en̄wen man anam esiemmọ nditọ ẹwak. Edi idụhe ete m̀mê eka emi enyenede esịtmbọm akan Jehovah, emi akpan edu esie edide ima. (1 John 4:8) Akwa ima esie ikpedehedei iyak enye ọdiọk ntre.
Bụp idemfo ete, ‘Ndi Abasi oyom mme angel en̄wen ke heaven?’ Bible ọdọhọ ke kpukpru edinam Abasi ẹdi edinen ẹnyụn̄ ẹfọn ẹma. (Deuteronomy 32:4) Enye ndibot akpakịp angel nnennen nnennen ama ọfọn ama, ibat ama ekem. (Daniel 7:10) Ndi Abasi ama edue ibat angel oro enye okoyomde? Nsa-o! Ke akpanikọ, Ata Ọkpọsọn̄ Abasi ikpedehedei inam orụk ndudue oro. Edi akpanikọ ke Jehovah ememek ndusụk owo man ẹkabade mme owo eke spirit nte mme andibuana ke Obio Ubọn̄ esie eke heaven, edi mmọ idịghe nditọwọn̄ ke ini oro mmọ ẹkpan̄ade.—Ediyarade 5:9, 10.
Ntak en̄wen emi Abasi mîkpatan̄ke nditọwọn̄ ke isọn̄ ika heaven edi ke emi ikpekemke ye se enye akaduakde aban̄a nditọwọn̄ ke ntọn̄ọ. Abasi ọkọdọhọ Adam ye Eve ke In̄wan̄ Eden ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye.” (Genesis 1:28) Nditọ ẹdi enọ Abasi, ndien enye ọnọ mmọ man ẹkpesu ata akpa uduak esie emi edide edinen ubonowo ndiyọhọ isọn̄. Akananam enye iduakke nditọwọn̄ ẹkpan̄a nsek man ẹkpekabade mme angel. Bible etịn̄ in̄wan̄-in̄wan̄ ete ke nditọ ẹdi “udeme Jehovah.” (Psalm 127:3) Ndi Jehovah, emi edide Abasi ima, akpafiak ọbọ enọ emi enye ọkọnọde ete ye eka? Nsa Abasi mbon-o!
Eyenọwọn̄ ndikpa nsek esinam owo enen̄ede ofụhọ, ayat esịt, onyụn̄ okop ubiak. Ntre, nso idotenyịn ke ete ye eka oro eyen mmọ akpade ẹnyene? Bible ọn̄wọn̄ọ ke Abasi ayanam anana-ibat owo ẹset ẹdidu uwem ke Paradise mi ke isọn̄. Da enyịn ikike kụt nditọwọn̄—emi ẹkopde nsọn̄idem—nte ẹsetde ẹdidu ye mbonubon mmọ. (John 5:28, 29) Abasi oyom nditọwọn̄ ẹkọri, ẹdara uwem, ẹnyụn̄ ẹkpep n̄kpọ ẹban̄a enye ye uduak esie kaban̄a isọn̄. Ntem, nditọwọn̄ oro ẹkpan̄ade idịghe mme angel ke heaven, edi ẹbet ndiset ke n̄kpa ndidu ke Paradise mi ke isọn̄. Ini oro, edima Andibot eyese aban̄a n̄kpri ye ikpọ, ndien mmọ ẹyekop idatesịt ndituak ibuot nnọ Jehovah Abasi ke nsinsi.