Nditịm N̄wed Utịn̄ikọ

KE INI ẹnọde mmọ utịn̄ikọ, ediwak owo ẹsisịn ọkpọsọn̄ ukeme ndiwewet enye n̄kama, ọtọn̄ọde ke ntọn̄ọikọ tutu esịm utịtikọ. Mbemiso ẹkụrede nditịm utịn̄ikọ oro, ekeme ndidi ẹyebem iso ẹwet n̄kpọ ediwak ediwak. Emi ekeme ndida ediwak hour.

Ndi afo esitịm mme utịn̄ikọ fo ntre? Nte afo akpama ndikpep usụn̄ oro ememde akan? Edieke afo ekpepde nte ẹkpetịmde n̄wed utịn̄ikọ, idiyomke afo ewewet aba kpukpru n̄kpọ. Emi ọyọnọ fi ekese ini ndikpep nte edinọde utịn̄ikọ oro. Utịn̄ikọ fo ididịghe mmemmem kpọt ndinọ edi eyenen̄ede enem ndikop onyụn̄ enen̄ede onụk otuowo fo ndinam n̄kpọ.

Edi akpanikọ, ẹsinọ akpan n̄wed utịn̄ikọ ke mme utịn̄ikọ an̄wa oro ẹnọde ke esop. Nte ededi, isidịghe ntre ye ekese utịn̄ikọ eken. Ẹkeme ndinọ fi ibuot nneme m̀mê ibuotikọ kpọt. Mîdịghe ẹkeme ndidọhọ fi eneme aban̄a akpan ebiet ke n̄wed. Ndusụk ini ẹkeme ndinọ fi sụk esisịt ntọt. Oyoyom afo etịm n̄wed utịn̄ikọ fo ke kpukpru mme utọ utịn̄ikọ oro.

Uwụtn̄kpọ oro odude ke page 41 ọyọnọ fi ekikere ke nte ekpetịmde ibio ibio n̄wed utịn̄ikọ. Tịm fiọk ete ke akpan n̄kpọ kiet kiet ọtọn̄ọ ke ubọk ufien ndien ẹwet enye ke ikpọ abisi. Ẹwet mme ekikere oro ẹdade ẹsọn̄ọ enye ke idak akpan n̄kpọ kiet kiet. Ẹwet mme udiana n̄kpọ oro ẹdidade ẹtat mme ekikere oro ke idak mmọ ẹnyụn̄ ẹnam mmọ ẹsịk esisịt ẹdụk n̄kan̄ nnasia. Tịn̄ enyịn dụn̄ọde n̄wed utịn̄ikọ emi. Tịm fiọk ete ke akpan n̄kpọ iba oro ẹdude ẹnyene nnennen ebuana ye ibuotikọ. Fiọk, n̄ko, ete ke mme udiana n̄kpọ idịghe sụk mme inem inem n̄kpọ. Utu ke oro, mmọ kiet kiet ọsọn̄ọ akpan n̄kpọ oro enye odude ke idak.

Ke ini afo etịmde n̄wed utịn̄ikọ, ekeme ndidi enye iditiehe ata ukem ukem nte uwụtn̄kpọ emi. Edi edieke afo ọfiọkde mme edumbet oro ẹbuanade, mmọ ẹyen̄wam fi nditịm n̄wed utịn̄ikọ fo nnyụn̄ nda ini oro ekemde ntịm eti utịn̄ikọ. Didie ke afo ọkpọtọn̄ọ?

Dụn̄ọde, Sion̄o, Nyụn̄ Tịm

Oyom afo enyene ibuotikọ. Ibuotikọ idịghe sụk ntatara ibuot nneme oro ẹkemede nditịn̄ ke ikọ kiet. Enye edi akpan ekikere oro afo oyomde ndisio n̄wụt, ndien enye owụt usụn̄ emi afo oyomde ndineme ibuot nneme fo. Edieke ẹnọde ibuotikọ, dụn̄ọde ọkpọikọ kiet kiet ye ntịn̄enyịn. Edieke anade afo atat ibuotikọ oro ẹnọde fi etiene se ẹwetde ke n̄wed, kpep n̄wed oro ye ibuotikọ oro ke ekikere. Edieke ẹnọde fi sụk ibuot nneme, do edidi mbiomo fo ndimek ibuotikọ. Nte ededi, mbemiso anamde oro, ekeme ndidi ọyọfọn afo anam ndusụk ndụn̄ọde. Ebede ke nditie in̄wan̄-in̄wan̄, afo ayawak ndinyene mbufa ekikere.

Nte afo anamde mme usio-ukot emi, ka iso ndibụp idemfo: ‘Ntak emi ibuotikọ emi edide akpan n̄kpọ ọnọ otuowo mi? Nso idi uduak mi?’ Enye ikpedịghe sụk ndikụre se isịnede ke n̄wed m̀mê ndinọ inem inem utịn̄ikọ edi ekpedi ndinọ otuowo fo n̄kpọ oro enyenede ufọn. Ke ini uduak utịn̄ikọ fo ọwọrọde ada, wet enye nịm. Ka iso nditi enye nte afo etịmde utịn̄ikọ oro.

Ke ama ekebiere uduak utịn̄ikọ fo onyụn̄ emek ibuotikọ oro ekemde ye enye (m̀mê odụn̄ọrede nte ibuotikọ oro ẹnọde fi odotde ye uduak oro), afo emekeme ndinam ndụn̄ọde oro enen̄erede enyene iwụk. Yom n̄kpọ oro edinyenede akpan ufọn ọnọ otuowo fo. Kûyom ndidọn̄ kpukpru n̄kpọ, edi yom mme akpan n̄kpọ oro ẹsịnede ifiọk ẹnyụn̄ ẹnen̄erede ẹnyene ufọn. Nyene iwụk ke udomo ndụn̄ọde oro afo anamde. Ke ata ediwak idaha afo ọyọsọp enyene ntọt oro awakde akan se afo ekemede ndida nnam n̄kpọ, ntre oyoyom afo asasat.

Diọn̄ọ mme akpan n̄kpọ oro oyomde afo eneme man afo atat ibuotikọ fo onyụn̄ esịm uduak fo. Mmọ emi ẹyekabade ẹdi ndutịm fo, kpa akpan n̄wed utịn̄ikọ fo. Mme akpan n̄kpọ ifan̄ ẹkpenyene ndidu? Ke ibio ibio nneme, eyedi iba ekem, ndien nte ido edide, ition ekem ke utịn̄ikọ oro akam ọniọn̄de ke hour kiet. Ekeme ndidi otuowo fo eyenen̄ede eti mme akpan n̄kpọ fo, edieke mmọ mîwakke.

Ke ndondo oro afo enyenede ibuotikọ fo ye mme akpan n̄kpọ ke ekikere, tịm ndụn̄ọde fo. Biere se inyenede ebuana nnennen nnennen ye mme akpan n̄kpọ fo. Sat mme ọyọhọ ntọt oro ẹdinamde utịn̄ikọ fo esịne inem. Ke ini afo emekde mme itie N̄wed Abasi ndida nsọn̄ọ mme akpan n̄kpọ, tịm fiọk mme ekikere oro ẹdin̄wamde fi ndikọk ibuot ke mme itien̄wed oro ke usụn̄ oro esịnede ifiọk. Sịn ntọt kiet kiet ke idak akpan n̄kpọ. Edieke ndusụk ntọt oro mîkemke ye akpan n̄kpọ fo ndomokiet, sio enye fep—idem ọkpọkọm enye enem didie—mîdịghe sịn enye ke n̄kpọ udọn̄n̄wed man ada anam n̄kpọ ini efen. Da sụk mme n̄kpọ oro ẹfọnde ẹkan. Edieke afo odomode nditịm mme n̄kpọ oro ẹwakde ẹkaha, afo eyetịn̄ ikọ ọsọp inua akaha ndien utịn̄ikọ fo editie enyọn̄ enyọn̄. Ọfọn ndisio ibat ibat akpan n̄kpọ oro ẹnen̄erede ẹnyene ufọn ẹnọ otuowo n̄wụt nnyụn̄ ntịn̄ mmọ mfọn mfọn. Kûdia ini.

Ke ọtọ emi, tịm utịn̄ikọ fo ke nde ke nde edieke mûkanamke ntre ke mbemiso. Luke andiwet Gospel ama anam emi. Ke ama ekenyene akpakịp ntọt oro ẹnyenede ebuana ye ibuot nneme esie, enye ama obon mmọ “ke itie ke itie.” (Luke 1:3) Afo emekeme nditịm utịn̄ikọ fo ntiene ini m̀mê n̄kpọntịbe, eyedi nte ekemde ye ntak n̄kpọ etịbede ye utịp emi enye ekenyenede m̀mê mfịna ye usọbọ, ọkọn̄ọde ke se itịmde inyene uforo ikan man esịm uduak fo. Owo ikpenyeneke ndikpụhọde inikiet inikiet nto ekikere kiet n̄ka efen. Ekpenyene ndida mme andikpan̄ utọn̄ nnọ fi usụn̄ sụn̄sụn̄ nto ekikere kiet nsịm efen, ye unana editịn̄ mme ikọ oro owo mîkemeke ndisọp nda n̄keyịri. Uyarade oro ẹnọde ekpenyene ndida otuowo n̄kesịm mme ubiere oro ẹwụtde eti ibuot. Nte afo etịmde mme akpan n̄kpọ fo, kere nte utịn̄ikọ fo editiede otuowo fo ke utọn̄. Nte mmọ ẹyesọp ẹtiene usụn̄ ukere n̄kpọ fo? Nte oyonụk mmọ ndinam n̄kpọ mban̄a se mmọ ẹkopde, nte ekemde ye uduak oro afo enyenede ke ekikere?

Ekem, tịm ntọn̄ọikọ oro edemerede udọn̄ ke ibuot nneme fo, oro onyụn̄ owụtde otuowo fo nte ke se afo oyomde nditịn̄ enen̄ede enyene ufọn ọnọ mmọ. Ekeme ndin̄wam ndiwewet ibat ibat akpa udịmikọ fo. Ke akpatre, diomi utịtikọ oro edemerede udọn̄ emi ekemde ye uduak fo.

Edieke afo etịmde n̄wed utịn̄ikọ fo ke eti ini, afo eyenyene ini ndinam enye ọfọn mbemiso ọnọde utịn̄ikọ oro. Ekeme ndidi afo oyokụt ke oyom ada ndụn̄ọde, uwụtn̄kpọ, m̀mê ifiọk n̄kpọntịbe ifan̄ ọsọn̄ọ ndusụk ekikere. Ndisịn n̄kpọntịbe eke ndondo emi m̀mê ndusụk n̄kpọ oro ẹdemerede udọn̄ ke n̄kann̄kụk ekeme ndin̄wam otuowo fo ndinen̄ede nsọp n̄kụt ebuana oro utịn̄ikọ emi enyenede. Nte afo odụn̄ọrede utịn̄ikọ fo, afo emekeme ndikụt mme ifet efen efen ndinam ntọt oro ekem ye otuowo fo. Ndidụn̄ọde nnyụn̄ nnam utịn̄ikọ ọfọn edi akpan n̄kpọ ke nditịm eti ibuot nneme akabade edi utịn̄ikọ oro enyenede uforo.

Ndusụk mme etịn̄ikọ ẹkeme ndiyom mme n̄wed utịn̄ikọ oro ẹwetde n̄kpọ awak n̄kan mme etịn̄ikọ en̄wen. Edi edieke afo adade sụk mme akpan n̄kpọ ifan̄ etịm nneme fo, osion̄ode se mînen̄ekede inọ mmọ nsọn̄ọ efep, onyụn̄ etịmde mme ekikere fo ke itie ke itie, afo oyokụt ete ke esisịt ini, idiyomke afo ewewet kpukpru n̄kpọ aba. Oro ekeme nditre ubiat ini didie ntem! Ndien oyofori uduot utịn̄ikọ fo. Ayana in̄wan̄-in̄wan̄ nte ke afo ke enen̄ede ọbọ ufọn oto ukpepn̄kpọ Ufọkn̄wed Utom Ukara Abasi.