Ẹsida Ẹmịn̄ Mme N̄wed Oro Isidade In̄wam “Kpukpru Orụk Owo”

Jehovah Abasi oyom “kpukpru orụk owo” ẹnyene “nnennen ifiọk akpanikọ.” (1 Timothy 2:3, 4) Edi, nditọ-ete nnyịn ye mbon oro isikwọrọde ikọ inọ ẹsem nsio nsio usem. Kpukpru isua imesimịn̄ mme n̄wed oro ẹkperede ndisịm biliọn iba ke nsio nsio usem. Nso ke inam man ikeme ndimịn̄ mme n̄wed ikọ Abasi nnyịn ke ediwak usem, edi nnyịn inen̄ekede ibiat okụk?

Nti Masịn Umịn̄n̄wed ye Itie Umịn̄n̄wed Ifan̄ Kpọt

Tọn̄ọ n̄kpọ nte 1980 esịm 1990, ikesimịn̄ mme magazine nnyịn ke nsio nsio itie 40. Tọn̄ọ oro, imokpụhọde nte isimịn̄de mme n̄wed nnyịn sụn̄sụn̄ man ikeme ndimịn̄ mmọ ke nsio nsio itie usụkkiet kpọt. Kpa ke mme isua oro, ibat usem emi imịn̄de mme n̄wed nnyịn ọdọk utịm ike itiokiet akan nte ekedide! Nso inam ikeme ndimịn̄ mme n̄wed nnyịn ke ata ediwak usem ke itie umịn̄n̄wed ifan̄ kpọt? N̄kpọ kiet emi an̄wamde nnyịn edi nti masịn umịn̄n̄wed.

Mbufa masịn oro inyenede an̄wam nnyịn ikeme ndimịn̄ ediwak n̄wed ke ekpri ini. Ini ikesidade mme n̄kani masịn oro imịn̄ mme n̄wed nnyịn, ekesidi ima imịn̄ enye emi ima ana ikpụhọde mme n̄kpọ man ikeme ndida mmịn̄ mme n̄wed en̄wen, ndien oro ama esinam ibiat ediwak ini mbemiso ikemede ndimịn mme n̄wed en̄wen. Idaha-emi, idaha nnyịn ini aba ndikpụhọde n̄kpọ ke mme masịn ima iyom ndimịn̄ n̄wed en̄wen. Imesimịn̄ ediwak n̄wed idaha-emi isọp ikan nte ikesimịn̄de akpa, idem ye n̄wed ke mme usem oro mbon oro ẹsemde mînen̄ekede iwak. Imọdiọn̄ọ ke nsio nsio n̄kpọ oro isimịn̄de esiyom mbufa plate umịn̄n̄wed. Ke ufan̄ ọfiọn̄ 12 emi, imabiat n̄kpọ nte miliọn dollar iba ndidep mbufa plate umịn̄n̄wed.a Ntre ima iyom ndimịn̄ n̄kpri n̄kpri n̄kpọ ifan̄, isida masịn oro mîyomke plate umịn̄n̄wed imịn̄ mmọ. Mme mbufa masịn umịn̄n̄wed emi anam ikeme ndimịn ediwak n̄kpọ, mme n̄kpọ umịn̄n̄wed inyụn̄ itakke nnyịn.

Ke ufan̄ isua ita oro ebede, imabiat se ikande miliọn dollar duop ida idep mbufa masịn umịn̄n̄wed ke ofụri ererimbot. Kop nte idade ndusụk mme masịn oro imịn̄ mme Bible nnyịn mi. Ini akpa, enyene nsio nsio n̄kpọ 40 emi nditọ-ete ẹkesinamde man ẹkeme ndimịn Bible kiet nsio. Mme n̄kpọ emi ẹsịne ndikpok, ndikịm ndian kiet, ndida sandpaper nnam enye ọdọnọ, ye ndinam enye eye. N̄kpọ en̄wen edi ke mme owo ẹkesitan̄ Bible emi ẹnyụn̄ ẹtịm mmọ ẹbon ke nsio nsio itie man ẹnam mme n̄kpọ oro ibatde mi. Idaha-emi idinam nsio nsio n̄kpọ duop kpọt sia mbufa masịn oro idepde ọtọ ediwak n̄kpọ adian kiet anam. Emi anam utom oro mbon oro ẹsimịn̄de Bible ẹsinamde inen̄ekede isọn̄ aba nte ekesisọn̄de. Ke n̄kọk itie-utom Japan, ẹkesida hour itiaita ẹdian Bible 2,000. Edi idaha-emi, idida hour itiaita oro idian Bible 35,000!

Ndisụhode Ibat Itie Ubon N̄wed Anam Nnyịn Inen̄ekede Ibiat Okụk

Nnyịn ndisụhọde ibat itie ubon n̄wed oro ibọpd anam nnyịn inen̄ekede ibiat okụk oro nditọ-ete ẹtịpde. Idaha-emi ikemede ndimịn̄ n̄kpri n̄kpri n̄kpọ ifan̄ mi nnyụn̄ nsọsọp n̄kpụhọde n̄kpọ ke masịn man ikeme ndimịn n̄kpọ en̄wen, an̄wam nnyịn isụhọde ibat n̄wed oro ibonde ke itie umịn̄n̄wed. Gary, emi anamde utom ke n̄kọk itie-utom United States ọkọdọhọ: “Akpa akpa, ama ọsọn̄ nnyịn ndinịm ke ndimịn̄ ibat ibat n̄wed ediwak ini eyenyene ufọn. Ntre ikesiyom ndimịn̄ ediwak n̄wed inikiet.” Gary aka iso ete: “Akpa isua emi ikọtọn̄ọde ndimịn̄ ibat ibat n̄wed ediwak ini, tọsịn dollar 60,000 ama odoro ke okụk oro ikabiatde ida idep plate umịn̄n̄wed ye pepa. Edi kpa ke isua oro, okụk emi okodụkde nnyịn ekpat ama ekpere ndisịm miliọn dollar 2 sia ima isụhọde ibat itie ubon n̄wed oro ikenyenede!” Mme utọ okụk ntre ke ẹsidian ẹda ẹbọp mme Ufọkmbono Obio Ubọn̄ nnyịn ẹnyụn̄ ẹda ẹn̄wam nditọ-ete oro oto-obot afanikọn̄ esịmde.

Nnyịn ndisụhọde ibat itie ubon n̄wed ke ndusụk n̄kọk itie-utom nnyịn anam inyene mme itie se ida inam mme n̄kpọ en̄wen. Mme n̄kọk itie-utom emi ẹsida mme itie oro ẹnam mme n̄kpọ oro edin̄wamde ke utom Bethel. N̄kpọ en̄wen edi ke nnyịn ndisụhọde ibat itie umịn̄n̄wed oro ibọpde, anam nnyịn ibiatke ediwak okụk ndibọp mbufa n̄kọk itie-utom. Ke uwụtn̄kpọ, ke 2018, ẹma ẹsio itie umịn̄n̄wed ke n̄kọk itie-utom Britain ẹka n̄kọk itie-utom Central Europe, ẹma ẹnyụn̄ ẹsion̄o ndusụk itie umịn̄n̄wed ke ndusụk n̄kọk itie-utom ẹka mme n̄kọk itie-utom en̄wen. Se ikanamde emi ama anam ediwak miliọn dollar odụk nnyịn ekpat, ama onyụn̄ anam inyene ediwak okụk ndida mbọp obufa n̄kọk itie-utom nnyịn ke Chelmsford ke England.

“Afo Emeti Mi!”

Ata akpan n̄kpọ edi ke nnyịn ndinyene mme masịn emi anamde utom umịn̄n̄wed efere anam ediwak owo ẹkeme ndinen̄ede n̄kpere Jehovah. Idaha-emi imekeme ndimịn̄ mme n̄wed nnyịn ke ediwak usem, ekpededi mbon emi ẹkotde n̄wed oro inen̄ekede iwak. Ke uwụtn̄kpọ, n̄kpọ nte owo 35,000 ẹsem usem Wallis, ndien mmọ ẹdu ke New Caledonia, Wallis ye Futuna. Edi ke August 2024, ima isio ofụri Bible Edisana N̄wed Abasi​—Edikabade Eke Obufa Ererimbot ke usem Wallis. Asuanetop kiet emi esemde usem Wallis, emi ekerede Selafina ọdọhọ ete: “Mma nsikot ndusụk n̄kpọ ke Bible usem French emi mîkan̄wan̄ake mi. Edi ini n̄kọbode Bible ke usem Wallis, mmọn̄eyet ama asiaha mi ke enyịn. Mma mbọn̄ akam ndọhọ, ‘O Jehovah, afo emeti mi! Afo edi Abasi emi mîsinamke asari.’”

Kpa ye oro ofụri mbon oro ẹsemde usem Sanga ke Democratic Republic of Congo mîsịmke 500,000, ima isio n̄wed Du Ata Uwem ke Nsinsi! ke usem oro. Josué, emi odude ke esop usem Sanga ọdọhọ ete: “Ama esisọn̄ ndikabade ndusụk ikọ nnyụn̄ nnam mmọ ẹn̄wan̄a nditọ ukpepn̄kpọ Bible mi. Kpa ye oro, se idude ke n̄wed oro ikesin̄wan̄ake nditọ ukpepn̄kpọ Bible mi. Enen̄ede enem mi nte ẹsiode n̄wed emi ke usem Sanga! Idaha-emi se isikpepde enen̄ede an̄wan̄a nditọ ukpepn̄kpọ Bible mi, ntịn̄ke-tịn̄ ediwak ikọ idaha-emi mbemiso se ikpepde an̄wan̄ade mmọ.”

Imosion̄o mme n̄wed ikọ Abasi nnyịn ke ata ediwak usem inyụn̄ ideme inọ ata ediwak owo idaha-emi ikan nte akanam inamde. Okụk oro mbufo ẹsitịpde esịnede enye oro ẹsitịpde ke donate.jw.org, ke isida inam kpukpru emi. Ẹsọsọn̄ọ eti eti ke ofụri se ẹsinọde man ẹda ẹnam utom Abasi.