Ndinyene Ufan Idiyakke Okop Ndobo​—Nte Bible Ekemede Ndin̄wam

Ke 2023, nta mbon emi ẹnen̄erede ẹdiọn̄ọ n̄kpọ ẹban̄a nsọn̄idem owo, ẹma ẹdikụt ke ndobo edi ata idiọk udọn̄ọ oro oyomde ẹsọsọp ẹnam n̄kpọ ẹban̄a. Ndi imekeme ndikan ndobo?

• Dr. Vivek Murthy, akamba dọktọ kiet ke U.S, ọkọdọhọ ete: “Nnyịn nditie ke idem nnyịn nnyụn̄ ntre ndidian idem ye mme owo ekeme ndinam idọn̄ọ, inyụn̄ iyakke ikop inemesịt.” Enye ọkọdọhọ n̄ko ete: “Imekeme ndikan mfịna emi.” Nso ke ikeme ndinam? “Imekeme ndisinam n̄kpri n̄kpri n̄kpọ oro ẹdinamde inen̄ede ikpere mme ufan nnyịn.”a

Idịghe ndidian̄ade ntie ikpọn̄ kpọt esinam nnyịn ikop ndobo. Ndusụk owo ẹsisịne ke otuowo, edi ẹsụk ẹkokop ndobo. Inamke n̄kpọ m̀mê nso inam ikop ndobo, Bible ekeme ndin̄wam nnyịn. Nti item oro ẹdude ke Bible ẹkeme ndin̄wam nnyịn ikan ndobo inyụn̄ itetịm ikpere mme ufan nnyịn.

Mme item Bible oro ẹkemede ndin̄wam nnyịn

Sineme nneme ye mme owo. Idịghe ndisitịn̄ se ifịnade nnyịn kpọt, edi ana isikpan̄ utọn̄ inọ mbon en̄wen n̄ko. Ama enen̄ede owụt ke amama mme owo, ẹyedi nti ufan.

• Item Bible: “Ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.”​—Philippi 2:4.

Nam ufan ye nsio nsio owo. Nyịme ndinam ufan ye mbon emi ẹkponde ẹnyụn̄ ekpride ẹkan fi, ye mbon emi ẹtode obio en̄wen.

• Item Bible: “Etat esịt mbufo.”​—2 Corinth 6:13.

Edieke oyomde ndidiọn̄ọ n̄kpọ en̄wen oro akpanamde man enyene nti ufan, kot ibuotikọ emi “Satisfying Our Hunger for Friendship.”