Nso ke Bible Etịn̄ Aban̄a Nte Ẹtopde Nditọwọn̄ Ẹwot ke Ufọkn̄wed Idahaemi?

Ke May 24, 2022, ata idiọk n̄kpọ mmọn̄eyet ama etịbe ke Uvalde ke Texas, U.S.A. N̄wed-mbụk n̄kpọntịbe emi ẹkotde The New York Times ọdọhọ ke ‘owo ama odụk Robb Elementary School okotop nditọwọn̄ 19 ye titia iba owot.’

Idịghe akpa ini utọ enyene-ndịk n̄kpọ mmọn̄eyet emi etịbede edi oro. N̄wed-mbụk n̄kpọntịbe emi ẹkotde USA Today ọdọhọ “ke mme idiọkowo ẹma ẹdụk ufọkn̄wed ke United States isua oko utịm ike-249 ẹketop ikan̄ ntịme ntịme ẹwot mme owo. Eke isua oko ama abari mmọn̄! Utọ n̄kpọ oro akanam itịbeke ntre ke isua kiet kpọt tọn̄ọ ke 1970.”

Ntak emi mme owo ẹbakde ibak ntem-e? Nso ke ikpanam ke ini utọ enyene-ndịk ibak ntre etịbede? Ndi ibak ye afai eyetre ke ererimbot emi? Bible ọbọrọ kpukpru mbụme emi.

Ntak emi afai ye ibak etịbede kpukpru ini ke ererimbot emi?

•  Bible okot eyo nnyịn emi “mme akpatre usen” emi ediwak owo mînyeneke “ndammana ima,” “etie obom obom” ẹnyụn̄ ẹbak ibak utọ oro idụhe. Bible ọdọhọ ke mme idiọkowo emi “ẹyedọdiọn̄ ẹdiọk ẹka iso.” (2 Timothy 3:1-5, 13) Edieke oyomde ndifiọk se Bible etịn̄de aban̄a emi, kot ibuotikọ emi, “Did the Bible Predict the Way People Think and Act Today?”

Ediwak owo ẹkere ntak emi Abasi akpayakde utọ enyene-ndịk n̄kpọ mmọn̄eyet emi etịbe. Edieke oyomde ndifiọk se Bible etịn̄de aban̄a emi, kot ibuotikọ emi, “Ntak Emi N̄kpọ Esinamde Nti Owo?”

Nso ke ikpanam ke ini utọ enyene-ndịk ibak ntre etịbede?

•  “Kpukpru n̄kpọ oro ẹkewetde ke ini edem, ẹkewet mmọ ndida nteme nnyịn, man ikpenyene idotenyịn oto ke . . . ndọn̄esịt oro N̄wed Abasi ọnọde.”​—Rome 15:4.

Bible ekeme ndin̄wam fi ọdiọn̄ọ nte okpodude uwem ke ererimbot ibak ye afai emi. Mbọk kot Ẹdemede! Ikọmbakara emi ekerede, “Will Violence Ever End?,” oro edi, “Ndi Enyene Ini Emi Afai Mîdidụhe Aba?”

Edieke oyomde ndifiọk nte mme ete ye eka ẹkpen̄wamde nditọ mmọ man ndiọi mbụk n̄kpọntịbe edifịna mmọ akaha, kot ibuotikọ emi, “Disturbing News Reports and Your Children.”

Ndi ibak ye afai eyetre ke ererimbot emi?

•  Abasi “ayafak ukpọn̄ mmọ osio ke ufịk ye afai.”​—Psalm 72:14.

•  “Mmọ ẹyeda akan̄kan̄ mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ eto. Idụt idimenke akan̄kan̄ itiene idụt, mmọ idinyụn̄ ikpepke aba ekọn̄.”​—Micah 4:3.

Abasi ayanam se owo ndomokiet mîkemeke ndinam. Ukara esie ke heaven ayabiat kpukpru n̄kpọ afai ye kpukpru n̄kpọekọn̄, onyụn̄ anam afai ye ibak etre ke ererimbot emi. Edieke oyomde ndifiọk se Obio Ubọn̄ Abasi edinamde, kot ibuotikọ emi, “‘Ediwak Emem Oyodu’ ke Obio Ubọn̄ Abasi.”