COVID-19 Owot N̄kpọ Nte Owo Miliọn Itiokiet​—Nso ke Bible Etịn̄ Aban̄a Emi?

Esop Emi Ẹsede Ẹban̄a Nsọn̄idem Ererimbot emi ẹdiọn̄ọde nte World Health Organization (WHO), ẹkedọhọ ke May 23, 2022 ke COVID-19 owot n̄kpọ nte owo miliọn itiokiet. Edi esop emi ẹkedọhọ ke n̄wedmbụk n̄kpọntịbe eke May 5, 2022 ke ibat mbon emi COVID-19 owotde enen̄ede awak akan oro. Ẹkedọhọ ke isua 2020 ye 2021, ke ‘ofụri ibatowo emi COVID-19 owotde, m̀mê emi COVID-19 ekenyenede ubọk ke n̄kpa mmọ ama ekpere ndisịm owo miliọn 15.’ Ndi Bible etịn̄ n̄kpọ ndomokiet aban̄a utọ enyene-ndịk afanikọn̄ emi?

Bible ama ọdọhọ ke ndiọi udọn̄ọ ada-owo-ibuot ẹyedu

•  Jesus ọkọdọhọ ke “ndiọi udọn̄ọ” ẹyedu ke mme akpatre usen, m̀mê “ukperedem ini.”​—Luke 21:11; 2 Timothy 3:1, Edisana Ŋwed Abasi Ibom.

Prọfesi emi Jesus eketịn̄de mi ke osu idahaemi. Edieke oyomde ndifiọk n̄kpọ en̄wen mban̄a emi, kot ibuotikọ emi, “Nso Idi Idiọn̄ọ ‘Mme Akpatre Usen,’ M̀mê Idiọn̄ọ ‘Utịt Ererimbot Emi’?”

Bible ọdọn̄ owo esịt

•  ‘Abasi kpukpru ndọn̄esịt ọdọn̄ nnyịn esịt ke kpukpru ukụt nnyịn.’​—2 Corinth 1:3, 4.

Ikọ Abasi ọdọn̄ ediwak owo emi owo mmọ akpade esịt. Kot se isụk itịn̄de emi ke ibuotikọ emi “Se Akpanamde ke Ini Owo Fo Akpade” ye ibuotikọ emi, “Mfọnn̄kan N̄kpọ Oro Edin̄wamde Mbon Oro Owo Mmọ Akpade.”

Bible etịn̄ se iditrede kpukpru afanikọn̄ emi ke nsinsi

•  “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.”​—Matthew 6:10.

Ata ekpri ini ntem ayak, ‘Obio Ubọn̄ Abasi’ ayanam idem ọsọn̄ kpukpru owo. Owo ndomokiet “ididọhọke ite: ‘Ndọdọn̄ọ.’” (Mark 1:14, 15; Isaiah 33:24) Se vidio emi, Nso Idi Obio Ubọn̄ Abasi? man etịm ọfiọk n̄kpọ aban̄a ukara eke heaven emi ye se enye edinamde.

Mbọk tiene kpep Bible man enye akpan̄wam fi ye ubon fo; mbufo ẹyenyụn̄ ẹdiọn̄ọ nti n̄kpọ emi Abasi ọn̄wọn̄ọde ndinam nnọ nnyịn.