Ẹkedian Triangle Emi Edide Kọlọ Mmọn̄ibọn̄ ke Ọfọn̄ Mmọ
Maud odụn̄ ke France, enye anam utom ke ufọkn̄wed, ndien utom esie edi ndin̄wam nditọwọn̄ emi ẹbiomode ndo ke ini ẹkpepde mmọ n̄kpọ. Ke ndondo emi, nditọ ufọkn̄wed ke klas kiet ẹkekpep n̄kpọ ẹban̄a nte mbon Nazi ẹkesobode mme Jew ẹnyụn̄ ẹdọn̄de mme owo ke ufọk-n̄kpọkọbi. Ẹma ẹsikịm ekpri ọfọn̄ ẹdian ke ọfọn̄ mbon n̄kpọkọbi, ọfọn̄ emi ekedi nsio nsio kọlọ. Ẹkeda kọlọ ọfọn̄ oro ye nte enye etiede ẹdiọn̄ọ ntak emi ẹkekọbide owo.
Ke ini titia kiet okosụk ekpepde n̄kpọ aban̄a triangle emi edide kọlọ mmọn̄ibọn̄, emi ẹkediande ke ọfọn̄ ndusụk mbon n̄kpọkọbi, enye ọkọdọhọ ete: “N̄kere ke ẹkesidian enye ke ọfọn̄ irenowo emi ẹkesidan̄de ye irenowo, ye iban emi ẹkesidan̄de ye iban.” Ke titia oro ama ekekpep n̄kpọ ama ọwọrọ, Maud ama ekenyene nneme ye enye onyụn̄ ọdọhọ enye ke mbon Nazi ẹkeda triangle oro ẹdiọn̄ọ mbon n̄kpọkọbi emi ẹdide Mme Ntiense Jehovah.a Enye ama ọdọhọ ke iyada vidio ye n̄wed emi aban̄ade n̄kpọ emi isọk enye. Titia oro ama enyịme, onyụn̄ ọdọhọ ke enye ekeme ndineme ye nditọ ufọkn̄wed n̄ko.
Usen en̄wen, titia en̄wen ama ekpep nditọ ufọkn̄wed n̄kpọ aban̄a mbon Nazi. Enye akada chart emi owụtde nsio nsio idiọn̄ọ oro ẹkekịmde ẹdian ke ọfọn̄ mbon n̄kpọkọbi ekpep mmọ n̄kpọ. Chart oro ama owụt ke mbon n̄kpọkọbi oro ẹkekịmde triangle oro edide kọlọ mmọn̄ibọn̄ ẹdian ke ọfọn̄ mmọ ẹkedi Mme Ntiense Jehovah. Ke titia oro ama okokụre, Maud ama ọkọnọ enye mme n̄kpọ en̄wen emi aban̄ade Mme Ntiense Jehovah oro ẹkedude ke ufọk-n̄kpọkọbi. Titia oro ama ọbọ, onyụn̄ ọdọhọ ama ekem yak Maud edineme n̄kpọ oro ye nditọ ufọkn̄wed oro.
Maud akama n̄wed ye vidio emi enye akadade eneme ikọ Abasi ye nditọ ufọkn̄wed
Maud ama eketịm se enye edidade minit 15 ineme ye akpa klas oro. Edi ini ekekem, titia oro ama ọdọhọ enye ada hour kiet eneme. Maud ọkọtọn̄ọ ye ndibre vidio emi owụtde nte mbon Nazi ẹkekọbọde Mme Ntiense Jehovah. Ke ini vidio oro ekebrede ekesịm itie emi mbon Nazi ẹkemende nditọ Mme Ntiense Jehovah 800 ẹkpọn̄ ete ye eka mmọ, Maud ama anam vidio oro atuak ada do onyụn̄ okot mbụk emi aban̄ade nditọwọn̄ ita ke otu oro. Ke vidio oro ama ekebre ama, Maud ama okot leta emi Gerhard Steinacher, eyen Ntiense Jehovah emi okotode Austria onyụn̄ edide isua 19, ekewetde ke 1940 ọnọ ete ye eka esie esisịt ini mbemiso mbon Nazi ẹwotde enye.b
Ukem n̄kpọ Maud akanamde ke akpa klas, ke enye akanam ke ọyọhọ klas iba. Ke ntak emi Maud ekenyenede uko etịn̄ ikọ, titia iba emi ẹsisiak Mme Ntiense Jehovah ini ekededi oro mmọ ẹkpepde nditọ ufọkn̄wed n̄kpọ ẹban̄a mbon oro mbon Nazi ẹkekọbide.
a Ke ini ọyọhọ ekọn̄ ererimbot iba, ẹma ẹsịn Mme Ntiense Jehovah ke Germany ke ufọk-n̄kpọkọbi ke ntak emi mmọ mîkamaha ndida ye ukara Nazi. Ini oro, ẹkesikot mmọ Bibelforscher, oro edi, Nditọ Ukpepn̄kpọ Bible.
b Ẹkebiere n̄kpa ẹnọ Gerhard Steinacher sia enye mîkamaha nditiene mbon Germany n̄n̄wana ekọn̄. Kop mi se enye ekewetde ke leta mbemiso ẹwotde enye: “Ami nsụk ndi eyenọwọn̄. Edi edieke Ọbọn̄ ọnọde mi ukeme, nyọsọn̄ọ nda koro se mben̄ede Enye edi oro.” Ẹma ẹwot enye ke ndan̄nsiere. Ẹkewet ke itiatudi esie ẹte: “Enye akakpa sia okoyomde ndikpono Abasi.”