Mme Mbụme Oro Mme Andikot Ẹbụpde
Ini ewe ke utom ukwọrọ-ikọ emi inamde idaha-emi editre?
Jesus ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matt. 24:14) Ikọ Greek emi ẹkabarede nte “utịt” ke ufan̄ikọ emi, ke ufan̄ikọ 6, ye ke ufan̄ikọ 13 edi teʹlos. Enye ada aban̄a utịt ererimbot Satan emi ke Armageddon. (Edi. 16:14, 16) Ntre iyaka iso ikwọrọ eti mbụk mbemiso utịt oro edi; oro edi ke ima itetre ukwọrọ-ikọ, ibịghike Armageddon ọtọn̄ọ. Se itịn̄de emi ke ida ikpụhọde se ikesikpepde iban̄a n̄kpọ emi.
Ikesidọhọ ke iyetre ndikwọrọ eti mbụk akwa ukụt ama ọtọn̄ọ ye nsobo emi ẹdisobode Akwa Babylon. (Edi. 17:3, 5, 15, 16) Ikesikere ke n̄kpọntịbe oro edidi utịt “isua mfọnido Jehovah,” emi ọwọrọde ke Jehovah idinọhọ mme owo ifet aba ndiwụt m̀mê mmọ ẹyenam n̄kpọ ẹban̄a eti mbụk emi mmọ ẹkekopde. (Isa. 61:2) Ikesikere n̄ko ke eyedi se mbon emi ẹdibọhọde akwa ukụt ẹwụtde ke mmimọ ida ye Jehovah mbemiso akwa ukụt ọtọn̄ọde. Ikesimen mmọ idomo ye mme Jew emi ẹkebọhọde nsobo Jerusalem ke isua 607 mbemiso eyo Christ. Ẹma ẹnenịm mme Jew oro idiọn̄ọ ke ọkpọ-iso mbemiso nsobo oro sia mmọ ẹkesituak ibuot ẹnọ Jehovah ẹnyụn̄ ẹsua ukwan̄ido. (Ezek. 5:11; 9:4) Se ikesimende idomo oro ikemke ye se Jesus eketịn̄de ke Matthew 24:14, emi owụtde ke mme owo ẹsụk ẹkeme ndinyene ifet ndinam n̄kpọ mban̄a eti mbụk mbemiso utịt edide ke Armageddon.
Nte Matthew 24:14 enen̄erede an̄wan̄a nnyịn idaha-emi anam yak ikpụhọde se ikesikpepde iban̄a etop emi ebietde edịm itiat, emi ẹketịn̄de ẹban̄a ke Ediyarade 16:21. Ndụn̄ọde efen efen emi inamde iban̄a itie N̄wed Abasi mbiba oro owụt ke se kiet etịn̄de ekem ye se enye eken etịn̄de. Didie? Nte mme owo ẹnamde n̄kpọ ẹban̄a eti mbụk Obio Ubọn̄ emi mmọ ẹkopde ke ida idiọn̄ọ ke edi ntre. Apostle Paul ekewet ete ke etop Obio Ubọn̄ edi eti mbụk ye ‘ufịk uwem’ ọnọ “mbon oro ẹnyan̄ade.” Edi ama-edi mme asua Abasi, ke edi idiọk mbụk ye ‘ufịk n̄kpa’ ọnọ mmọ. (2 Cor. 2:15, 16) Mmọ ẹsua etop Obio Ubọn̄ koro etop oro anam ẹnen̄ede ẹkụt se ererimbot mmọ emi edide, ke edi itie ibak, ke Satan akara enye, ke ẹmọn̄ ẹsobo ererimbot emi ke mîbịghike.—John 7:7; 1 John 2:17; 5:19.
N̄kpọ en̄wen edi ke ndamban̄a edịm itiat oro ‘oyokpon etieti.’ Oro ọwọrọ ke etop emi idikwọrọde ke ini akwa ukụt ekeme ndidi ọyọsọn̄ akan nte edide idaha-emi, oyonyụn̄ esịm mme owo akan nte edide idaha-emi; oro edi, ke ẹyenen̄ede ẹnam ẹdiọn̄ọ enyịn̄ Jehovah ẹkan nte ẹnamde idaha-emi. (Ezek. 39:7) Ke ẹma ẹkesobo Akwa Babylon, ini itetịn̄ mi Armageddon esesịm ama, ndi ndusụk owo ẹyema etop oro nte emi owo amade n̄kpọ emi enemde ufịk? Imekere ntre. Ekeme ndidi mmọ ẹyeti mîdịghe ẹkokop ke ediwak isua emi ekebede ke Mme Ntiense Jehovah ẹma ẹsitetịn̄ ke ẹyesobo nsunsu ido ukpono, ke se mmọ ẹkesitịn̄de ke mmimọ ikụt oro.
Oro ebiet se iketịbede ke Egypt ke eset ke Abasi ama akada Ufen Duop amia idụt oro. Ke Jehovah ‘ama ekebiere ikpe ọnọ kpukpru mme abasi Egypt,’ “mbuaha udịmowo” emi mîkedịghe nditọ Israel ẹma ẹtiene ikọt Abasi ẹwọrọ ke idụt oro. (Ex. 12:12, 37, 38) Ekeme ndidi isenowo oro ẹketiene ikọt Abasi ẹwọrọ ini mmọ ẹkekụtde nte Ufen Duop emi Moses ọkọdọhọde ke ẹyesịm nditọ Egypt ẹkesịmde mmọ.
Owo ekededi emi ediwọn̄ọrede ibịne Jehovah ke ẹma ẹkesobo Akwa Babylon eyenyene ifet ndin̄wam nditọ-ete Christ emi ẹdisụk idude ke isọn̄. (Matt. 25:34-36, 40) Imọdiọn̄ọ ke ifet emi mme owo ẹdinyenede ndidi se ẹbatde mmọ nte erọn̄ eyetre ekpri ini mbemiso Armageddon ọtọn̄ọde, ini nsụhọ mbon emi ẹyetde aran ẹdikade ikodu ke heaven.
Nte n̄kpọ emi an̄wan̄ade nnyịn idaha-emi anam inen̄ede ikụt nte ima ye mbọm Jehovah okponde. Imenen̄ede ikụt ke enye “[iyomke] baba owo kiet atak edi oyom kpukpru owo ẹkabade esịt.”—2 Pet. 3:9.