Mma N̄kabade Isụn̄utom Kpa ye Emi N̄kedide Owo O-Bụt

N̄kamana ke Vienna ke Austria ke 1951. Ikedi mbon Catholic. N̄kedi owo o-bụt edi mma nnịm ke Abasi do, mma nsinyụn̄ n̄wak ndibọn̄ akam. Ini n̄kedide isua usụkkiet, ete mi ama ọtọn̄ọ ndikpep Bible ye Mme Ntiense Jehovah. Ekpri ini ekebe, eka mi ama etiene enye ekpep.

Ikebịghike ima iditiene idu ke Esop Döbling ke Vienna. Kpukpru nnyịn ke ubon ima isidian ubọk inam ediwak n̄kpọ. Ikesitie kiet ikot inyụn̄ ikpep Bible, isan̄a ntre idụk mbono esop inyụn̄ inam utom ke n̄kpri mbono. Toto ke ekpri ke ete mi akan̄wam mi nnen̄ede mma Jehovah. Akam esie ekesidi yak ami ye udun̄wan eka mi idi mme asiakusụn̄. Edi ini oro ikọdọn̄ke mi ndidi asiakusụn̄.

INI N̄KỌTỌN̄ỌDE NDINAM UTOM OFỤRI INI NNỌ ABASI

N̄kana baptism ke 1965 ini ndide isua 14. Edi ima ika ukwọrọ-ikọ, ama esisọn̄ mi ndisan̄a mbịne mbon emi mmendiọn̄ọke n̄kọkwọrọ ikọ nnọ. Mfịna en̄wen ekedi ke ekesitie mi nte ndịghe n̄kpọ ndomokiet, ntre mma nnen̄ede nyom mme ubọkn̄ka mi ẹmen mi ẹsịn ke otu. Ikebịghike mma ntọn̄ọ ndidụk ndụk ye mbon emi mînamke n̄kpọ inọ Jehovah. Enye oro eketịbe ekpri ini ke mma n̄kana baptism. Kpa ye emi ekenemde mi ndidi ufan mmọ, esịt ama afịna mi ke ntak emi n̄kesiwakde ndidu ye mbon emi mîkponoke Jehovah. Edi ama ọsọn̄ mi nditre ndụk ye mmọ. Nso ikan̄wam mi?

Kpa ke idaha ini oro, eyenan̄wan isua 16 emi ekekerede Dorothée ama edidu ke esop nnyịn. Ama akpa mi idem ndikụt nte enye esisịnde idem ọkwọrọ ikọ ke ufọk ke ufọk. Mma nsọn̄ọ enye ekpri, edi n̄kenen̄ekede nsịn idem n̄kwọrọ ikọ. Mma n̄kere nte: ‘Ete ye eka mi ẹdi Mme Ntiense Jehovah, edi Dorothée kpọt edi Ntiense Jehovah ke ubon mmọ. Enye odụn̄ ye eka esie emi idem mîsọn̄ke, kpa ye oro enye isifiakke ukwọrọ-ikọ!’ Uwụtn̄kpọ esie ama anam ọdọn̄ mi ndinen̄ede nsịn idem nnam n̄kpọ nnọ Jehovah. Ke oro ama ekebe, ikebịghike ami ye Dorothée ikedisan̄a ntre inam utom usiakusụn̄. Ikọtọn̄ọ ye usiakusụn̄ unọ un̄wam emi ẹkesikotde utom usiakusụn̄ ini nduọkodudu, aka ko nnyịn mbiba ima ididi mme asiakusụn̄ ofụri ini. Ifịk Dorothée ama ebe mi. Akpa owo emi n̄kọtọn̄ọde ndikpep Bible, enye akan̄wam mi nnyene. Nte ini akakade, ikesinen̄ekede isọn̄ mi aba ndikwọrọ ikọ edide ke ufọk ke ufọk, ke efak, m̀mê ke ebiet en̄wen.

Akpa isua emi nnamde utom usiakusụn̄ ofụri ini, Brọda Heinz emi ekedide eyen Austria ama edidu ke esop nnyịn. Enye ekekpep akpanikọ ke Canada ini akakade ndise eyeneka esiemmọ erenowo emi ekedide Ntiense Jehovah. Ẹkenọ Heinz edidu ke esop nnyịn ke Vienna nte akpan asiakusụn̄. Toto ke akpa usen emi n̄kokụtde enye ke enye okodụk mi esịt. Edi enye okoyom ndidi isụn̄utom, ndien ami n̄koyomke ndidi. Ntre nsonso oro, n̄kayakke enye ọdiọn̄ọ ke esịt mi ama enye. Edi nte ini akakade, ami ye Heinz ima itọn̄ọ ufan, inam ndọ, ekem idiana kiet inam utom usiakusụn̄ ke Austria.

INI ỌKỌTỌN̄ỌDE NDIDỌN̄ MI NDIDI ISỤN̄UTOM

Heinz ama esiwak ndidọhọ mi ke imọ ikpama ndidi isụn̄utom. Akananam enye ikenyịkke mi ndidi isụn̄utom, edi enye ama esibụp mi mme mbụme emi akanamde utom oro ọdọn̄ mi, utọ nte, “Sia nnyịn mînyeneke nditọ, ndi imekeme ndisịn idem nnam n̄kpọ nnọ Jehovah n̄kan nte inamde idaha-emi?” Sia n̄kedide owo o-bụt, ndidi isụn̄utom ama anam mi ndịk. N̄kedi asiakusụn̄, edi ndidi isụn̄utom eketie mi nte okpon akan mi. Kpa ye oro, Heinz ekedi anam anam, enye emen nneme isụn̄utom edi. N̄kpọ en̄wen emi enye akanamde ekedi ndidọhọ mi yak nnen̄ede nsịn ekikere ke nte n̄kemede ndin̄wam mbon en̄wen utu ke ndinen̄ede n̄kere mban̄a mme n̄kpọ emi ẹnamde mi ndịk. Item esie ama an̄wam mi eti-eti.

Sụn̄sụn̄ sụn̄sụn̄, ama ọtọn̄ọ ndidọn̄ mi ndidi isụn̄utom, ntre ima isịn n̄wed iben̄e ndika Ufọkn̄wed Gilead. Edi asan̄a-utom n̄kọk itie-utom idụt oro ama ọdọhọ yak nnen̄ede n̄kpep Ikọmbakara kan̄a. Ke mma n̄kodomo ndinam ntre isua ita, ama akpa nnyịn idem nte ẹkenọde nnyịn ikodu ke esop emi ẹsemde Yugoslavian ke Salzburg ke Austria. Ima idu do isua itiaba, inyụn̄ inam utom circuit isua kiet. Usem Serbo-Croatian emi ẹkesemde do ama ọsọn̄, edi ima inyene ediwak owo emi ikesikpepde Bible.

Ke 1979, nditọ-ete emi ẹdade usụn̄ ke n̄kọk itie-utom ke idụt oro ẹma ẹdọhọ ika Bulgaria ikodu ke ekpri ini. Sia edide ẹma ẹtre Mme Ntiense Jehovah ndikwọrọ ikọ do, ẹkedọhọ inam nte ika nduọkodudu do, edi ẹdọhọ ikûkwọrọ ikọ, yak idedịbe imen mme n̄wed Ikọ Abasi nnyịn emi ẹkenamde ata n̄ken̄e n̄ken̄e ntem isọk sista ition emi ẹkedụn̄de ke Sofia emi edide ibuot obio Bulgaria. Idem ama enyek mi eti-eti edi Jehovah ama an̄wam mi nnam utom oro. Ami ndikokụt nte mme sista oro ẹnyenede uko ẹnyụn̄ ẹkopde idatesịt kpa ye edide ẹma ẹdiọn̄ọ ke ẹkeme ndimụm mmimọ n̄kọkọbi ama anam mbiere ke se ededi emi esop Jehovah ẹdọhọde nnam, ke nyesịn ofụri ukeme mi nnam.

Ke ekpri ini ama ekebe, ima ifiak isịn n̄wed iben̄e ndika Gilead. Isan̄ enye emi ẹma ẹnyịme. Ikekere ke idika enye emi ẹnịmde ke Ikọmbakara ke United States. Edi ke November 1981, esop Abasi ẹma ẹtọn̄ọ ndinịm Ufọkn̄wed Gilead ke n̄kọk itie-utom emi okodude ke Wiesbaden ke Germany. Ntre ima ikeme ndika ufọkn̄wed oro ke usem German, se ẹkekpepde ikonyụn̄ isọn̄ke ndin̄wan̄a mi. Edi m̀mọ̀n̄ ke ẹdinọ nnyịn ika?

IMA IKỌKWỌRỌ IKỌ KE IDỤT EMI ẸKEN̄WANADE EKỌN̄

Ẹkenọ nnyịn ika Kenya! Edi n̄kọk itie-utom Kenya ẹma ẹbụp nnyịn m̀mê ikpama ndika n̄kodu ke Uganda emi ekperede Kenya. Se ibede isua duop mbemiso ini oro, Idi Amin emi ekedide akwa owo-ekọn̄ ama adiana ye mbonekọn̄ en̄wen ọbọ ukara do. Ke ntak ukara ufịk emi enye akakarade, ke mme isua emi eketienede, ediwak tọsịn owo ẹma ẹkpan̄a, ediwak miliọn ẹnyụn̄ ẹkụt ukụt. Ekem ke 1979, ẹma ẹbọ Idi Amin ukara. Idịghe se ẹtetịn̄, ndịk ama anam mi ndika idụt emi ẹsụk ẹn̄wanade ekọn̄ do. Edi se ikekpepde ke Gilead ama anam ibuọt idem ye Jehovah. Ntre ima inyịme ndika.

Ndutịme ikedịghe ekpri ke Uganda. Kop mi nte Heinz eketịn̄de aban̄a nte n̄kpọ eketiede do ke N̄wedisua (Ikọmbakara) eke 2010. Enye ọkọdọhọ ete: ‘Ediwak n̄kpọ ikodụho, n̄kpọ nte mmọn̄ ikodụho, owo ikonyụn̄ ikemeke ndikot owo ke fon. Ẹma ẹsitop mme owo ẹnyụn̄ ẹyịp n̄kpọ mme owo akpan akpan ke okoneyo. Eyo ama okụt, kpukpru owo ẹkesidọn̄ọ ke ufọk. Mme owo ẹma ẹsiwak ndibọn̄ akam ẹte Abasi okûyak ẹdiyịp n̄kpọ mmimọ m̀mê ẹtop mmimọ ẹwot.’ Kpa ye mme mfịna oro, nditọ-ete ke idụt oro ẹkesụk ẹkaka iso ẹnam n̄kpọ ẹnọ Jehovah ye idatesịt!

Ke 1982, ami ye Heinz ima idisịm Kampala emi edide ibuot obio Uganda. Akpa ọfiọn̄ ition emi ikodude do, ikodụn̄ ye Brọda Sam Waiswa ye Christina n̄wan esie. Nditọ mmọ ition ye iman mmọ inan̄ ẹkedụn̄ kpa ke ufọk oro. Brọda Waiswa ye Sista Waiswa ye mbonubon mmọ ẹkesiwak ndidia udia inikiet ke usen, oro akanam akpa nnyịn idem nte mmọ ẹkesikemede ndibuana ekpri se mmọ ẹkenyenede ye nnyịn. Ini ikodụn̄de ye mmọ, ami ye Heinz ima ikpep ediwak nti n̄kpọ emi ẹken̄wamde nnyịn ke utom isụn̄utom nnyịn. Ke uwụtn̄kpọ, ima ikpep ndisida ekpri mmọn̄ nyere mmọn̄. Ndien ima inam ndek ima ke itie uka-ikọt, ikesida mmọn̄ emi ikemende idarade idem iyet ndek oro ifep. Ke 1983, ami ye Heinz ima ikụt ufọk ke Kampala ke ebiet emi mfịna mîkenen̄ekede ikpon.

Ukwọrọ-ikọ ama enem nnyịn tutu. Mmeti ọfiọn̄ kiet emi ikọnọde mme owo se ibede magazine 4,000! Edi nte mme owo ẹkemade Ikọ Abasi ekenem nnyịn akan. Mmọ ẹma ẹkpono Abasi ẹnyụn̄ ẹma ndineme nneme mban̄a Bible. Heinz ama esinyene n̄kpọ nte owo 10 esịm 15 ndikpep Bible, ami n̄ko kpa ukem oro. Ima ikpep n̄kpọ eti-eti ito mbon emi ikesikpepde Bible. Ke uwụtn̄kpọ, ima ima ido mmọ. Kpukpru urua mmọ ẹkesisasan̄a ẹka mbono esop, ẹsasan̄a ẹnyọn̄; akananam isemeke idem, kpukpru ini iso imam imam.

Ke 1985 ye ke 1986, ekọn̄ ama asiaha ikaba efen ke Uganda. Ima isiwak ndikụt n̄kpri nditọwọn̄ emi ẹketan̄de ẹdọn̄ ke ekọn̄ nte ẹkamade ikpọ ikan̄, ẹfiọk usụn̄; eke ebebe, mmọ ẹse idem. Ini oro, ima isibọn̄ akam idọhọ Jehovah ọnọ nnyịn ọniọn̄ onyụn̄ anam esịt ana nnyịn sụn̄ nte isụk ikwọrọde ikọ. Jehovah ama esinyụn̄ ọbọrọ mme akam nnyịn. Ndondo emi ikụtde owo emi edimade ndikop se ikọwọrọde, ndịk ama esikpọn̄ nnyịn.

Ama esinem nnyịn n̄ko ndikwọrọ ikọ nnọ mbon emi mîtoho idụt oro. Ke uwụtn̄kpọ, ima isobo ye Murat ye Dilbar Ibatullin emi ẹketode Tatarstan (Central Russia). Ebe ye n̄wan ke mmọ ẹkedi, ima inyụn̄ ikpep Bible ye mmọ. Murat ekedi dọktọ. Mmọ ẹma ẹdidụk esop, ke ẹnyụn̄ ẹnam n̄kpọ ẹnọ Jehovah tutu emi. Nte ini akakade, mma nsobo Tatjana Vileyska emi okotode Ukraine, emi okoyomde ndiwot idem. Edi ke eyenan̄wan oro ama akana baptism, enye ama afiak ọnyọn̄ Ukraine. Aka ko enye ama edinam utom ke itie ukabade n̄wed, esikabade n̄wed ọnọ esop Abasi.a

MBUFA MFỊNA

Ke 1991, ini ami ye Heinz ikade nduọkodudu ke Austria, n̄kọk itie-utom idụt oro ẹma ẹdọhọ nnyịn ke ẹnọ nnyịn obufa utom, ke ẹdọhọ ikodu ke Bulgaria. Ke ukara mbon Communist ke Eastern Europe ama ọkọduọ, ẹma ẹsịn Mme Ntiense Jehovah enyịn̄ ke n̄wed ke Bulgaria nte ido ukpono. Mmetetịn̄ ke ami ye Heinz ima ikaka idụt oro, ke ikedịbe imen mme n̄wed Ikọ Abasi nnyịn ika do ini owo mîkayakke Mme Ntiense Jehovah ẹkwọrọ ikọ aba do. Edi idaha-emi ẹkedọhọ ikodu do ikwọrọ ikọ.

Ẹkedọhọ ikûfiak uka Uganda aba. Ntre ima ibe do ika Bethel ke Germany ikọbọ moto iwat ika Bulgaria. Nnyịn ikafiakke ika Uganda ikatan̄ n̄kpọ nnyịn inyụn̄ ikọm nditọ-ete unyọn̄. Otu emi ẹkenọde nnyịn ikodu inam n̄kpọ Abasi ke Sofia ẹkenyene n̄kpọ nte mme asuanetop 20.

Mfịna emi ikenyenede ke Bulgaria ekedi isio. Akpa ekedi ke nnyịn ikọdiọn̄ọke usem idụt oro. N̄kpọ en̄wen edi ke n̄kukụre n̄wed Ikọ Abasi nnyịn emi okodude ke usem Bulgarian ẹkedi Akpanikö oro Adade osim Nsinsi Uwem ye N̄wed Mi eke Mme Mbụk Bible. Ama ọsọn̄ nnyịn ndinyene mbon emi idikpepde Bible. Kpa ye mme mfịna oro, nnyịn owo ifan̄ emi ikodude ke otu oro ima isịn idem ikwọrọ ikọ. Utom nnyịn ama odụk mbon Ufọkabasi Orthodox enyịn. Ini oro ke ukọbọ ọkọtọn̄ọ.

Ke 1994, ukara ikadaha aba Mme Ntiense Jehovah nte ido ukpono, ẹkenyụn̄ ẹnam n̄kpọ ye nnyịn nte idi mbon idiọk n̄ka. Ẹma ẹmụm ndusụk nditọ-ete ẹkekọbi. Nsu emi mme ọkọmbụk n̄kpọntịbe ke TV ye ke n̄wedmbụk n̄kpọntịbe ẹkesude ẹban̄a nnyịn ikedịghe ekpri. Sia Mme Ntiense Jehovah mîsisịnke iyịp, mmọ ẹkedọhọ ke nnyịn isiyak nditọ nnyịn ẹkpan̄a; ẹfiak ẹdọhọ ke nnyịn isidọhọ Mme Ntiense eken ẹwot idem. Ama ọsọn̄ mi ye Heinz ndikwọrọ ikọ. Ima ika ukwọrọ-ikọ, ndusụk owo ẹma ẹsiwak ndifiori nnyịn n̄kpo, ẹkot bodisi ẹdimụm nnyịn, ẹnyụn̄ ẹtop n̄kpọ ẹtọ nnyịn. Owo ikekemeke ndimen mme n̄wed Ikọ Abasi nnyịn ndụk idụt oro, okonyụn̄ edi ọkpọsọn̄ n̄kpọ ndikụt eke edinọde nnyịn itie ke ukpe-okụk yak isinịm mbono esop. Ini kiet ntem emi ikenịmde akamba mbono, mme bodisi ẹma ẹdi ẹdisuan mbono oro. Akananam ami ye Heinz ikwe utọ usua oro. Uganda emi ikotode idi, mme owo ẹketie ufan ufan, ediwak owo ẹnyụn̄ ẹma ndikop Ikọ Abasi! Nso ikan̄wam mi ye Heinz iyọ se ikedide idikụt emi?

Ndidu ye nditọ-ete ke idụt oro ekedi n̄kpọ emi adatde nnyịn esịt. Ama enem nditọ-ete oro nte mmọ ẹkekụtde akpanikọ, mmọ ẹma ẹnyụn̄ ẹma un̄wam emi ikan̄wamde mmọ. Kpukpru owo ẹkediana kiet ẹnyụn̄ ẹn̄wam kiet eken. Mme n̄kpọ emi ẹketịbede do ẹma ẹkpep nnyịn ke imekeme ndikop inemesịt ke utom ekededi emi esop Abasi ẹdọn̄de nnyịn edieke ikade iso ima mme owo.

Edi nte ini akakade, mfịna oro ama ọtọn̄ọ ndisụhọde ubọk. Ẹma ẹfiak ẹsịn Mme Ntiense Jehovah enyịn̄ ke n̄wed nte ido ukpono ke 1998, ndien ikebịghike ima inyene ediwak n̄wed Ikọ Abasi nnyịn ke usem Bulgarian. Ekem ke 2004, ẹma ẹyak obufa n̄kọk itie-utom ẹnọ Abasi. Mfịn esop 57 ẹdu ke Bulgaria, mme asuanetop 2,953 ẹnyụn̄ ẹdu do. Ke isua utom emi osụk ebebe mi, owo 6,475 ẹkedụk Editi. Enyene ini emi sista ition kpọt ẹkedude ke Sofia, idaha-emi esop usụkkiet ẹdu ke obio oro! Imenen̄ede ikụt nte “ekpri [akabarede] edi tọsịn.”​—Isa. 60:22.

MMA NYỌ MME MFỊNA EMI ẸKESỊMDE MI KE IDEMMI

Nsio nsio udọn̄ọ ẹyịre mi. Ke mme isua emi ebede, ekụt nte nsio nsio n̄kpọ ẹkọride ke esịt idem mi ke nsio nsio itie, idem ke ibuot mi. Enyene ọkpọsọn̄ usọbọ kiet emi ẹkenọde mi man ẹnam n̄kpọ emi ọkọride mi ke ibuot do ataha. Ekem mma ndika usiakidem ke India man ẹkesịbe n̄kpọ oro ẹfep, edi owo ikesịbeke kpukpru. Usiakidem oro akada hour 12. Ke mma n̄kodu ke n̄kọk itie-utom India yak idem afiak ọsọn̄ mi, ima idinyọn̄ ika ikanam utom nnyịn ke Bulgaria.

Ntetịn̄ mi, Heinz ama ọtọn̄ọ udọn̄ọ emi ekerede Huntington’s disease. Ibat ibat owo ke ererimbot ẹdọn̄ọ udọn̄ọ oro. Ndisan̄a isan̄, nditịn̄ ikọ, ndinyụn̄ mbon ubọk ye ukot itie kiet ekedi ekọn̄ ọnọ enye. Nte udọn̄ọ oro ọkọdiọkde enyịn aka, enye ikekemeke ndinam ata ediwak n̄kpọ aba, ami n̄kesinam nnọ enye. Ndusụk ini ama esikak mi eti-eti, mma nnyụn̄ n̄kere m̀mê nyosụk n̄keme ndika iso nnam oro. Edi brọda kiet emi ekekerede Bobi ekesiwak ndidi enye ama oyom ndika ukwọrọ-ikọ, enye edimen Heinz. Akparawa oro ikayakke nte Heinz mîkekemeke nditịn̄ ikọ ọfọn m̀mê nte enye mîkekemeke ndibon ubọk ye ukot itie kiet anam bụt anam enye. Mmen̄kemeke ndin̄wam Heinz, mma ndiọn̄ọ ke Bobi ayan̄wam enye. Kpa ye edide ami ye Heinz ima ibiere ke nnyịn idinyeneke nditọ ke ererimbot emi, ikada Bobi nte eyen emi Jehovah ọnọde nnyịn!​—Mark 10:29, 30.

Heinz ama ọdọn̄ọ kansa n̄ko. Ke 2015, edima ebe mi ama akpa. Ama abiak mi tutu. Ke Heinz ama akakpa, esịt ama esitịmede mi eti-eti; n̄kpa esie okosụk etie mi ndap ndap. Ke ibuot mi, osụk etie mi nte enye mmọdo ke uwem! (Luke 20:38) Kpukpru usen, mmesiwak nditi ndinem ikọ esie ye nti item emi enye ekesinọde mi. Mmenen̄ede n̄kọm Jehovah nte n̄kekemede ndidiana ye Heinz nnam n̄kpọ nnọ enye ke adan̄a ediwak isua oro.

MMỌKỌM JEHOVAH NTE ENYE AN̄WAMDE MI

Jehovah an̄wam mi nyọ kpukpru mfịna emi ẹsịmde mi. Enye an̄wam mi n̄kûdi owo o-bụt aba, onyụn̄ an̄wam mi ndi isụn̄utom emi amade-ma mme owo. (2 Tim. 1:7) Jehovah an̄wam mi ye udun̄wan eka mi; nnyịn mbiba inam utom ofụri ini inọ Abasi. Mfịn enye ye ebe esie ẹnam utom circuit ke Europe, ke circuit emi ẹsemde usem Serbian. Jehovah ama ọbọrọ akam emi ete mi ọkọbọn̄de ini ikedide n̄kpri!

Se n̄kpepde ke Bible anam esịt ana mi sụn̄. Ama ọsọn̄ ye ami, mmesikpep ‘ndidọdiọn̄ nsịn ifịk’ mbọn̄ akam nte Jesus akanamde. (Luke 22:44) Nte nditọ-ete ke esop nnyịn ke Nadezhda ke Sofia ẹmade mi ẹnyụn̄ ẹfọnde ido ye ami edi usụn̄ kiet emi Jehovah ọbọrọde akam mi. Mmọ ẹkpenyene edinam, mmọ ẹsikot mi ẹsinyụn̄ ẹwak ndidọhọ mi ke imama mi. Oro esinam esịt enen̄ede adat mi.

Mmesiwak ndikere mban̄a ediset ke n̄kpa. Mmesikere nte n̄kụtde ete ye eka mi ke etehe ufọk nnyịn, mmọ ẹye nte ẹkeyede ke usen ndọ mmọ; n̄kụt eyeneka mi an̄wan nte etemde udia, nnyụn̄ n̄kụt Heinz nte adade ekpere enan̄ mbakara esie. Mme utọ n̄kpọ emi nsikerede do ẹsinam ntre ndikere mme n̄kpọ emi ẹkemede nditịmede mi esịt, onyụn̄ anam nnen̄ede n̄kọm Jehovah.

Mma ntie n̄kere ofụri uwem mi ye nti n̄kpọ emi ndoride enyịn ndinyene ke ini iso, mmesinyịme se David eketịn̄de ke Psalm 27:13, 14 ke ofụri esịt. Enye ọkọdọhọ ete: “Mîkpedịghe emi n̄kenyenede mbuọtidem ndikụt mfọn Jehovah ke isọn̄ mme odu-uwem​—! Dori enyịn ke Jehovah; nyene uko nyụn̄ sọn̄ esịt. Ih, dori enyịn ke Jehovah.”