Se Akpanamde Ekpedi Enyene Se Eyịkde

1-2. (a) Nso ye nso ke ikọt Jehovah ẹkeme nditịmede esịt mban̄a? (b) Idineme nso ke ibuotikọ emi?

NDUSỤK ini, enyene mme n̄kpọ emi isiyịkde.a Esitịbe ọnọ kpukpru nnyịn. Se uwụtn̄kpọ mi. Uyen emi edide Ntiense Jehovah ke ekere m̀mê Jehovah osụk okụt utọ owo nte imọ. Oro ekeme ndinam enye ekere m̀mê imọ ikpanana baptism m̀mê ikpanaha. Mîdịghe kere ban̄a brọda emi mînen̄ekede ikpon owo, emi ekemekde ndida ini akparawa esie nnam n̄kpọ nnọ Jehovah utu ke ndisịn idem n̄n̄wana okụk. Okụk emi odude enye ke ubọk idahaemi edi se enye ye ubon esie ẹdade ẹdia udia, ndian̄ade isụhọke. Enye ekeme ndikere m̀mê imọ ndikada ini akparawa imọ nnam n̄kpọ Abasi akakam edi nnennen n̄kpọ. Efen edi akamba sista emi mînen̄ekede ikop odudu aba. Idem ekeme ndimem enye sia enye mîkemeke ndinam se enye ekesinamde aba. Ndi akanam omobụp idemfo utọ mbụme ntem: ‘Ndi Jehovah okụt utọ owo nte ami? Ndi mme n̄kpọ emi n̄kasanade nyak man n̄keme ndinam n̄kpọ nnọ Jehovah ẹketatak mi? Ndi ke nnyenyene ufọn nnọ Jehovah?’

² Mme mbụme ntre ẹkpedụk nnyịn esịt edi nnyịn ikpọri mmọ inịm n̄kan̄ kiet, ekeme ndinam nnyịn idibuọtke idem ye Jehovah aba iyonyụn̄ itre ndituak ibuot nnọ enye. Ke ibuotikọ emi, imọn̄ ineme nte nnyịn ndisịn ekikere ke mme item Bible ekemede ndin̄wam nnyịn edieke etiede nnyịn ke idem nte ke (1) Jehovah ikwe utọ owo nte nnyịn, (2) se ikebierede ndinam ke ini edem ikọfọnke, m̀mê (3) ke nnyịn inyeneke ufọn aba inọ Jehovah.

SE IDIN̄WAMDE FI AMA ENYENE SE EYỊKDE

3. Tịn̄ n̄kpọ kiet emi ikemede ndinam ekpedi imenyene se iyịkde.

³ Ekpedi enyene se iyịkde, n̄kpọ kiet emi ekemede ndin̄wam nnyịn edi nnyịn ndika Ikọ Abasi n̄koyom ibọrọ n̄kpọ oro. Ikpanam ntre, idem idimemke nnyịn, iyetetịm ikpere Jehovah inyụn̄ inen̄ede ‘isọn̄ọ ida ke mbuọtidem.’​—1 Cor. 16:13.

4. Didie ke ‘isidụn̄ọde kpukpru n̄kpọ ifiọk’? (1 Thessalonica 5:21)

⁴ Kot 1 Thessalonica 5:21. Omokụt ke itie oro ọdọhọ yak ‘idụn̄ọde kpukpru n̄kpọ ifiọk.’ Didie ke idinam oro? Edi nnyịn ndimen se inịmde ndomo ye se Bible etịn̄de man ikụt ite ke inịm nnennen n̄kpọ. Yak ida uyen emi ekekerede m̀mê imọ imosụk idi n̄kpọ ke enyịn Jehovah inọ uwụtn̄kpọ. Ndi akpana enye ekere ke edieke utọ n̄kpọ oro odụkde imọ ekikere, ke ọwọrọ ke akpanikọ ke edi? Ihih-o. Ana enye ‘odụn̄ọde kpukpru n̄kpọ ọfiọk,’ oro edi, ekpep Bible man ọdiọn̄ọ nte Jehovah adade enye.

5. Idinam didie “ikop” se Jehovah etịn̄de aban̄a n̄kpọ emi iyịkde?

⁵ Ima ikot Bible, esitie nte Jehovah etịn̄ ikọ ọnọ nnyịn. Edi ikpoyom ndidiọn̄ọ se enye ekerede aban̄a n̄kpọ emi iyịkde, idịghe ndikokot Bible kpọt edin̄wam. Ana ikụt ite ke imoyom mme itie Bible emi ẹban̄ade n̄kpọ oro inyụn̄ ida ini ikot mmọ. Imekeme ndida nsio nsio n̄kpọ emi esop Jehovah ẹsiode yak ẹda ẹnam ndụn̄ọde idụn̄ọde se ẹtịn̄de ẹban̄a n̄kpọ oro. (N̄ke 2:3-6) Imekeme ndibọn̄ akam ndọhọ Jehovah ada nnyịn usụn̄ ke ndụn̄ọde oro onyụn̄ an̄wam nnyịn ikụt se enye ekerede aban̄a se iyịkde oro. Ekem iyoyom mme item Bible emi ẹban̄ade n̄kpọ oro inyụn̄ iyom mme n̄kpọ ke n̄wed esop Abasi emi ẹdinyụn̄ ẹn̄wamde nnyịn ke mfịna oro. Imekeme ndidia ufọn n̄ko ima ikot mbụk mme owo ke Bible emi ẹkenyenede ukem mfịna oro.

6. Ekpedi imenyene mme n̄kpọ emi iyịkde, didie ke mme mbono esop ẹkeme ndin̄wam nnyịn?

⁶ Ini en̄wen emi esitiede nte Jehovah etịn̄ ikọ ye nnyịn esidi ima idụk mbono esop. Ikpodụk mbono esop kpukpru ini, imekeme ndikop n̄kpọ ke utịn̄ikọ m̀mê ke mbụme emi owo ọbọrọde, emi edide nnennen se idin̄wamde nnyịn ke n̄kpọ emi iyịkde. (N̄ke 27:17) Ẹyak ise se ikemede ndinam mban̄a ndusụk se iyịkde.

EDIEKE EKEREDE M̀MÊ JEHOVAH OKỤT UTỌ OWO NTE AFO

7. Nso ke ndusụk owo ẹkeme ndibụp?

⁷ Ndi akanam emekere, ‘Ndi Jehovah osụk okụt utọ owo nte ami emi?’ Ekpetie fi nte ke inyeneke se edide, emekeme ndikere ke udûkemeke ndidi ufan ye Andikobot enyọn̄ ye isọn̄, ke idịghe utọ owo nte afo ke enye oyom. Etie nte ukem n̄kpọ oro ama odụk Edidem David ekikere. Ama akpa enye idem nte Jehovah ekekerede aban̄a obụk ye iyịp nte nnyịn, enye onyụn̄ obụp ete: “O Jehovah, owo edi nso eke afo ekerede aban̄a enye, Eyen owo edi nso eke afo abatde enye ke n̄kpọ?” (Ps. 144:3) Okpokụt ibọrọ utọ mbụme oro ke m̀mọ̀n̄?

8. Akpa Samuel 16:6, 7, 10-12 owụt ke nso ke Jehovah esikụt ke idem mme owo?

⁸ Se ikụtde ke Bible ekpep nnyịn ke Jehovah esikụt mbon emi ẹtiede nte ke mmọ idịghe n̄kpọ ke enyịn mbon en̄wen. Ke uwụtn̄kpọ, Jehovah ama ọdọn̄ Samuel aka ufọk Jesse ekeyet kiet ke otu nditọ esie irenowo aran man edi edidem ke Israel nte ini akade. Jesse ekenyene nditọ irenowo itiaita. Enye ama okot itiaba ẹdisobo ye Samuel, ikotke David emi ekekpride akan.b Edi David oro ke Jehovah ekemek. (Kot 1 Samuel 16:6, 7, 10-12.) Jehovah ama enen̄ede okụt utọ owo emi David ekedide, ke enye ekedi akparawa emi amade n̄kpọ Abasi etieti.

9. Nso ikeme ndinam enịm ke Jehovah ekere aban̄a fi? (Se ndise n̄ko.)

⁹ Kere mme usụn̄ emi Jehovah ama okowowụt ke imọ imokụt utọ owo nte afo. Enye esinọ fi item emi odụkde ye mfịna emi enyenede. (Ps. 32:8) Enye ekpekeme didie ndinam oro ekpedi enye ikenen̄ekede idiọn̄ọ fi? (Ps. 139:1) Ama anam item Jehovah onyụn̄ okụt nte item oro an̄wamde fi, eyenen̄ede enịm ke Jehovah ekere aban̄a fi. (1 Chron. 28:9; Utom 17:26, 27) Jehovah okụt kpukpru se etịmede ndinam nnọ enye. Enye ọdiọn̄ọ utọ owo emi afo enen̄erede edi, onyụn̄ ọdọn̄ enye ndidi ufan fo. (Jer. 17:10) Enye ọdọhọ yak afo edidi ufan imọ onyụn̄ oyom fi enyịme ndidi ufan imọ.​—1 John 4:19.

EDIEKE EKEREDE M̀MÊ SE IMỌ IKEBIEREDE KE INI EDEM AMA ỌFỌN

10. Nso ke ikeme ndibụp idem nnyịn ima ikere iban̄a mme n̄kpọ emi ikebierede ndinam ke ini edem?

¹⁰ Ndusụk ini, ndusụk owo ẹkeme ndikere m̀mê se ikebierede ke ini edem ama ọfọn. Ekeme ndidi mmọ ẹma ẹkpọn̄ utom emi ẹkekpede mmọ ediwak okụk m̀mê mbubehe emi ekesisiode okụk etieti ọnọ mmọ man ẹkeme ndinen̄ede nnyene ini nnam n̄kpọ nnọ Jehovah. Idahaemi isua 10, 20, m̀mê akande oro ebe. Mmọ ẹkeme ndidikụt mbon emi mmọ ẹdiọn̄ọde ye mme ufan mmọ emi ẹkenamde utọ utom oro m̀mê utọ mbubehe oro nte ẹnyenede ndisi okụk, enye onyụn̄ etie nte mmọ inyeneke mfịna ndomokiet ke uwem. Ke ntak oro mmọ ẹkeme ndikere ẹte: ‘Okûdi mme n̄kpọ emi n̄kosion̄ode ubọk n̄kpọn̄ ke ntak emi n̄koyomde ndinam n̄kpọ nnọ Jehovah akanam n̄kpọ atatak mi-o? Mîdịghe ndi mme n̄kpọ oro ama anam mme ifet emi n̄kpenyenede okụk ẹbe mi?’

11. Nso ikafịna andikewet Psalm 73?

¹¹ Ekpedi utọ mme mbụme emi isụk ibụpde do ẹsifịna fi, kere nte eketiede andikewet Psalm 73 ke idem. Enye ama okụt nte mbon emi mîkponoke Jehovah ẹforode, idem eye mmọ, enye etie nte mmọ inyeneke mfịna ndomokiet ke uwem. (Ps. 73:3-5, 12) Ekedi enye okụt mmọ ye kpukpru nti n̄kpọ emi ẹtiede nte ẹsịm mmọ, enye ekere ke ofụri emi imọ isịnde idem inam n̄kpọ Abasi atatak. Utọ ekikere oro ama ọnọ enye “ufen ofụri usen.” (Ps. 73:13, 14) Nso ikan̄wam enye osio utọ ekikere oro efep ke esịt?

12. Didie ke Psalm 73:16-18 owụt nte andikewet itien̄wed oro okokụtde ibọrọ mme n̄kpọ emi ẹkefịnade enye?

¹² Kot Psalm 73:16-18. Andikewet Psalm oro ama aka itie emi ẹsituakde ibuot ẹnọ Jehovah. Itie oro ekedi itie emem. Enye ama ekeme nditie do n̄kere n̄kpọ yak ọfọn. Enye ama edikụt ke kpa ye emi etiede nte uwem ndusụk owo edi we-we-we, ke utọ mbon oro inyeneke idotenyịn ini iso. Utọ ekikere oro ama anam esịt ana enye sụn̄, enye ọdiọn̄ọ ke owo ndinam n̄kpọ Abasi edi mfọnn̄kan n̄kpọ emi owo ekpebierede ndinam. Oro ama anam enye enen̄ede ebiere ndika iso nnam n̄kpọ nnọ Jehovah.​—Ps. 73:23-28.

13. Ekpedi ke ekere m̀mê se imọ ikakam ibierede ndinam ke ini edem ama enen, nso ikeme ndinam esịt ana fi sụn̄? (Se ndise n̄ko.)

¹³ Ikọ Abasi ekeme ndinam esịt ana fi sụn̄ n̄ko. Didie? Kere nti n̄kpọ emi afo enyenede, utọ nte, nte Jehovah amade fi onyụn̄ ekerede aban̄a fi. Men oro ndien domo ye utịt mbon emi ẹdide n̄kukụre utịp mmọ edi se mmọ ẹdiade ke ererimbot emi. Mmọ ẹkeme ndidia uwem nte ẹkpemama-o ẹnyụn̄ ẹnam se ẹmama ke ererimbot emi sia inyeneke n̄kpọ ndomokiet en̄wen ke ini iso emi mmọ ẹdoride enyịn ndinyene. Edi okwo edi ke se Jehovah ọn̄wọn̄ọde ndinọ fi ke ini iso awak etieti; ekpekere nte ekekere, udûdiọn̄ọke uma. (Ps. 145:16) Se n̄kpọ en̄wen emi ekpekerede mi: Ndi imekeme ndinen̄ede ndiọn̄ọ nte uwem nnyịn ekpetiede ekpedi nnyịn ikemekke ndinam se inamde idahaemi? Se idiọn̄ọde edi ke mbon emi ẹbierede se ẹkpedade uwem mmọ ẹnam ke ntak emi mmọ ẹmade Abasi ye mbọhọidụn̄ mmọ isinanake eti n̄kpọ ndomokiet ke uwem.

EDIEKE ETIEDE FI NTE KE UNYENEKE UFỌN UNỌ JEHOVAH

14. Nso idi mfịna ndusụk owo? Nso ke mmọ ẹkeme ndibụp ke ntak oro?

¹⁴ Usọn̄ ke ada ndusụk ikọt Jehovah ọdọn̄ ndọk. Ndusụk, udọn̄ọ iyakke ẹbọ emem. Ndusụk ẹdi mbụn̄ọ, nnan, ye ntre ntre eken. Oro ekeme ndinam mmọ ẹkere ke etie nte mmimọ idịghe n̄kpọ ke enyịn Jehovah. Mmọ ẹkeme ndibụp ẹte, ‘Ndi ke nsụk nnyenyene ufọn nnọ Jehovah?’

15. Nso ke andikewet Psalm 71 ekenen̄ede enịm?

¹⁵ Andikewet Psalm 71 ama eseme aban̄a mbiet n̄kpọ oro. Enye ama ọbọn̄ akam ete: “Ke ini odudu mi okụrede, kûkpọn̄ mi.” (Ps. 71:9, 18) Kpa ye emi eketiede enye ntre ke idem, enye ama enen̄ede enịm ke edieke imọ isọn̄ọde ida inam n̄kpọ inọ Jehovah, ke Jehovah ayada imọ usụn̄ onyụn̄ an̄wam imọ. Enye ama edikụt ke Jehovah esinem esịt ye mbon emi ẹdomode ofụri ukeme mmọ ndinam n̄kpọ nnọ enye, kpa ye emi mme mfịna mmọ mîyakke mmọ ẹnam nte ọdọn̄de mmọ ndinam.​—Ps. 37:23-25.

16. Didie ke nditọete emi ẹma ẹkekpon owo ẹnyene ufọn ẹnọ Jehovah? (Psalm 92:12-15)

¹⁶ Nditọete emi ẹma ẹkekpon owo, ẹda idem mbufo nte Jehovah adade mbufo. Enye ekeme ndin̄wam mbufo ẹsọn̄ọ ẹda ẹnam n̄kpọ ẹnọ enye kpa ye emi idem mîyakke. (Kot Psalm 92:12-15.) Ẹkûsịn ekikere ke se mbufo mîkemeke ndinam aba, ẹkam ẹsịn ke se mbufo ẹkemede ndinam. Ke uwụtn̄kpọ, eti uwụtn̄kpọ mbufo ye nte ẹkerede ẹban̄a mbon en̄wen ẹkeme ndisọn̄ọ mmọ idem. Emekeme nditịn̄ nnọ mme owo nte Jehovah ọsọn̄ọde mbufo idem ofụri isua emi ye nte mbufo ẹnen̄erede ẹnịm ke mme n̄kpọ emi enye ọkọn̄wọn̄ọde ndinam ẹyesu. Ẹkûfre ke akam ofụri esịt emi ẹbọn̄de ẹsịn mbon en̄wen ekeme ndin̄wam mmọ etieti. (1 Pet. 3:12) Inamke n̄kpọ m̀mê n̄kpọ etie didie ye nnyịn, kpukpru nnyịn imenyene se ikemede ndinam nnọ Jehovah ye mbon en̄wen.

17. Ntak emi ikpodomode nte ikekeme nditre ndimen idem nnyịn ndomo ye mbon en̄wen?

¹⁷ Ekpedi esịt ọdiọk fi ke ntak emi mûkemeke ndinam ekese aba nnọ Jehovah, nịm ke enye idaha se ekemede ndinam idahaemi ke n̄kpọ mbubru. Ekeme ndidọn̄ fi ndimen se ekemede ndinam ndomo ye se mbon en̄wen ẹnamde. Kûnam idemfo utọ n̄kpọ oro! Ntak idọhọde ntre edi ke Jehovah isimenke se afo anamde ikodomo ye se mbon en̄wen ẹnamde. (Gal. 6:4) Se uwụtn̄kpọ mi. Mary ekedep ata ọsọn̄urua edifuọn̄ aran edifiọn̄ọ Jesus. (John 12:3-5) Edi ubuene ebeakpa emi eketịpde okụk ke temple eketịp n̄kpri okudọk okụk iba, emi mîkenyeneke akpan n̄kpọ ndomokiet emi ẹkekemede ndida ndep ini oro. (Luke 21:1-4) Edi Jesus akada ke iban iba oro ẹnyene mbuọtidem, ke owo kiet kiet ọkọnọ se enye ekekemede. Jehovah Ete esie enen̄ede ama se ededi emi anamde ọnọ Enye ke ntak emi amade Enye onyụn̄ ọsọn̄ọde eyịre ye Enye, ọkpọkọm n̄kpọ oro ekpri fi didie ke enyịn.

18. Ekpedi imenyene se iyịkde, nso ikeme ndin̄wam nnyịn ikan n̄kpọ oro? (Se n̄ko ekebe emi, “Ikọ Jehovah Ekeme Ndin̄wam Fi Akan Eyịghe.”)

¹⁸ Kpukpru nnyịn imesinyene mme n̄kpọ emi iyịkde ndusụk ini. Edi imokụt ke Bible, oro edi Ikọ Abasi emi ikemede ndiberi edem, ekeme ndin̄wam nnyịn isio mmọ ifep ke esịt nnyịn. Ntre domo nte ekekeme ndisio se eyịkde mfep ke esịt; utu ke nditịmede esịt, eyekeme ndisọn̄ idem fo esịt. Jehovah okụt fi. Enye enem esịt nte akayakde mme n̄kpọ ẹtak fi man ekeme ndinam n̄kpọ nnọ enye, onyụn̄ ebiere ke imọ iyọdiọn̄ fi. Nịm ke Jehovah ada kpukpru nti ikọt esie nte mbon emi enye ekemede ndima nnyụn̄ nse mban̄a.