Ndi Ama Ọfiọk?

Ntak emi irenowo emi mîkedịghe nditọ Israel ẹkedude ke udịmekọn̄ Edidem David?

ZELEK owo Ammon, Uriah owo Hittite, ye Ithmah owo Moab ẹma ẹsịne ke otu mbonekọn̄ David emi mîkedịghe nditọ Israel.a (1 Chron. 11:39, 41, 46) ‘Mme Cherethite ye mme Pelethite ye mbon Gath’ ẹma ẹsịne n̄ko ke udịmekọn̄ David. (2 Sam. 15:18) Ẹkesibat mme Cherethite ye mme Pelethite ẹsịn ke otu mbon Philistia. (Ezek. 25:16) Mbon emi ẹkekotde mbon Gath do ẹkedụn̄ ke obio mbon Philistia emi ekekerede Gath.​—Josh. 13:2, 3; 1 Sam. 6:17, 18.

Nso ikanam David ayak isenowo ntre ẹdu ke udịmekọn̄ esie? David ama enen̄ede enịm ke mmọ iditọhọ imọ edem ke isọn̄; se ikedide akpan n̄kpọ ikan oro ekedi ke mmọ ẹkeda ikpat iba ye Jehovah. Ke uwụtn̄kpọ, n̄wed The New Interpreter’s Dictionary of the Bible enyene se etịn̄de aban̄a mme Cherethite ye mme Pelethite. Enye ọdọhọ ke ‘mmọ ẹma ẹsọn̄ọ ẹda ye David ini ata n̄kpọsọn̄ afanikọn̄ ẹketịbede ke ini ukara David.’ Didie ke mmọ ẹkewụt ke ida ye David? Ini “kpukpru mbon Israel” ẹkekpọn̄de Edidem David ẹkeda ye ‘obukpo owo kiet emi ekekerede Sheba,’ mme Cherethite ye mme Pelethite ikọkpọn̄ke David, mmọ ẹma ẹn̄wam enye akan Sheba ye mbon emi ẹkebaharede ẹda ye Sheba ẹsọn̄ ibuot ye David. (2 Sam. 20:1, 2, 7) Se ini efen emi mmọ ẹkewụtde ke ida ye David mi. Solomon edi owo emi akanade ada itie Edidem David. Edi Adonijah eyen David ama odomo ndinam idemesie edidem. Edi mme Cherethite ye mme Pelethite ẹkesụk ẹda ye David ẹnyụn̄ ẹn̄wam yak ẹnam Solomon emi Jehovah ekemekde ete ada itie Edidem David, edidem.​—1 Ndi. 1:24-27, 38, 39.

Esenowo efen emi ọkọdọhọde ke n̄kpa n̄kpa ikpọn̄ edidian̄ade imọ ye David ekedi Ittai owo Gath. Ini Absalom eyen Edidem David ọkọsọn̄de ibuot ye ete esie onyụn̄ osiode esịt mbon Israel ọkpọn̄ enye, Ittai ye mbonekọn̄ esie owo 600, ẹkeda ye David. Nsonso oro, David ama ọdọhọ Ittai okûn̄wana ọnọ imọ ke enye edi esenowo, edi Ittai ama ọdọhọ David ete: “Ma uwem Jehovah, ma uwem ọbọn̄ mi edidem, ebiet ekededi emi ọbọn̄ mi edidem edidude, edide n̄kpa m̀mê uwem, kpa do ke asan̄autom fo edinyụn̄ odu!”​—2 Sam. 15:6, 18-21.

Kpa ye emi mme Cherethite, mme Pelethite, ye mbon Gath ẹkedide isenowo, mmọ ẹma ẹnen̄ede ẹkpono Jehovah, ẹda enye nte ata Abasi, ẹnyụn̄ ẹda David nte enye emi Jehovah ekeyetde aran. Imenịm ke ama enen̄ede enem David nte utọ irenowo oro ẹkesọn̄ọde ẹda ye enye!