Nte Ikpowụtde ke Imama Abasi ye Mbọhọidụn̄ Nnyịn

Kpa ye oro Abasi mîdọhọke ke ana mme Christian ẹnịm Ibet Moses, n̄kponn̄kan ewụhọ iba ke Ibet​—ndima Abasi ye mbọhọidụn̄ nnyịn​—osụk edi ofụri se Jehovah oyomde oto nnyịn. (Mt 22:​37-39) Nnyịn idaha-da utọ ima oro imana, ana ikpekpep. Didie ke ikeme ndinyene utọ ima emi? Akpan usụn̄ kiet edi ndisikot Bible kpukpru usen. Ke ini ikerede iban̄a nsio nsio edu Jehovah oro ikotde ke Bible, iyokụt “uyai” esie. (Ps 27:4) Oro ayanam inen̄ede ima enye inyụn̄ idomo ndikere n̄kpọ nte enye ekerede. Ndien emi ayanam inịm ibet Abasi, esịnede ndima mbon en̄wen nte Jesus akamade nnyịn. (Joh 13:​34, 35; 1Jo 5:3) Se n̄kpọ ita emi afo ekemede ndinam man esinem fi ndikot Bible:

• Tie kere se okotde nyụn̄ nam nte ke emetiene odu ke itie emi n̄kpọ oro eketịbede. Da nte ke etiene odu do. Nso ke okụt onyụn̄ okop? Ekere ke eketie didie mbon oro ẹkedude do ke idem?

  

• Kûnyene usụn̄ kiet emi esikotde. Se nsio nsio usụn̄ emi ekemede ndikot Bible mi: Kot uyo ọwọrọ, mîdịghe bre Bible emi ẹkotde-kot nyụn̄ tiene se nte ẹkotde. Kot ban̄a owo ke Bible m̀mê n̄kpọ emi ẹtịn̄de ẹban̄a ke Bible, utu ke ndikot ibuot n̄wed Bible ke adiana ke adiana. Ke uwụtn̄kpọ, da se idude ke Se Idin̄wamde Fi Ekpep Ikọ Abasi, Ikpehe 4 m̀mê 16, kpep n̄kpọ ban̄a Jesus. Kot ofụri ibuot n̄wed oro ẹdade itie N̄wed Abasi eke usen ke usen ẹto. Kot mme n̄wed Bible ke adiana ke adiana tiene ini emi ẹkewetde mmọ.

  

• Kot ke usụn̄ emi edin̄wan̄ade fi. Ndikot ọkpọkọm ibuot kiet kpọt ke usen nnyụn̄ ntie n̄kere se okotde ọfọn akan ndikot ediwak ibuot man ọsọp okụre Bible. Kere se iketịbede ke ini ẹkewetde mbụk oro. Tịm dụn̄ọde mme n̄kpọ oro ẹtịn̄de ẹban̄a. Se mme obio oro ẹsiakde ke map nyụn̄ kot mme itien̄wed en̄wen emi aban̄ade se ẹnemede oro. Dụn̄ọde se mîn̄wan̄ake fi, ọkpọkọm n̄kpọ kiet kpọt ke ekeme ndidụn̄ọde. Edieke ekemede, da ukem ini emi adade okot Bible tie kere se okotde.