IBUOTIKỌ ỌFIỌN̄ EMI: “KWỌRỌ IKỌ, NAM EMI USỌP USỌP.”—2 TIM. 4:2.
Da Kpukpru Ifet Kwọrọ Obio Ubọn̄ Abasi!
1. Nso ke David ekpep nnyịn?
1 Edidem David ikayakke n̄kpọ ekededi anam idem emem enye. Ke uwụtn̄kpọ, enye ama oyom ndibọp ufọk nnọ Jehovah. Ke ini ẹkekpande enye ndinam oro, enye ama etịm mme n̄kpọ enịm man Solomon eyen esie ada ọbọp temple oro. (1 Ndi. 8:17-19; 1 Chron. 29:3-9) David iketiehe ikere se enye mîkemeke ndinam, enye eketịn̄ enyịn anam se enye ekemede. Didie ke uwụtn̄kpọ David ekeme ndin̄wam nnyịn ida nsio nsio usụn̄ ikwọrọ ikọ?
2. Nso ke mbon emi mîdịghe mme asiakusụn̄ ẹkpenam?
2 Nam Se Ekemede: Ediwak owo ẹsion̄o ubọk ke ediwak n̄kpọ man ẹkeme ndinam utom usiakusụn̄ unọ un̄wam m̀mê eke ofụri ini. (Matt. 6:22) Ndi emekeme ndikpebe mmọ? Edieke afiakde ese se esida ini fo anam, emekeme ndikụt ke eyenyene ini anam utom usiakusụn̄. Ke ntre, kûyak ifet oro ebe fi!—1 Cor. 16:8, 9.
3. Mme ifet ewe ke ikeme ndida n̄kwọrọ ikọ idem edieke nnyịn mîkemeke ndinam utom usiakusụn̄ idahaemi?
3 Edieke nte n̄kpọ etiede idahaemi mîyakke anam utom usiakusụn̄, nso ke akpanam? Ti ke emekeme ndida ifet eken emi enyenede ọkwọrọ ikọ. Ke uwụtn̄kpọ, edieke anamde utom ye mbon emi mîdịghe Mme Ntiense, da ini oro odotde kwọrọ ikọ nọ mmọ. Mîdịghe edieke ọdọn̄ọde, da ifet oro kwọrọ ikọ nọ mbon emi ẹsọbọde fi idem. Ti ke mbon emi usọn̄ m̀mê udọn̄ọ mîyakke mmọ ẹkwọrọ ikọ nte mbon eken ekeme ndinọ minit 15 m̀mê akan oro. Ke ini ọnọde ibatutom fo, ti ndisịn ofụri ini emi ọkọkwọrọde ikọ ke ido nneme, mme n̄wed emi ọkọnọde, esịnede tract, n̄wedikọt Editi, ye n̄wedikọt akamba mbono. Idem ekeme ndikpa fi ndikụt nte n̄kpri n̄kpri ini emi akadade anam mme n̄kpọ oro awakde eketre, ke ini atan̄de mmọ adian kiet!
4. Nso ke ebiere ndinam?
4 Inamke n̄kpọ m̀mê n̄kpọ etie didie ye nnyịn, yak ida ifet ekededi ikwọrọ eti mbụk. Ndien iyokop inemesịt sia imanam ofụri se ikemede man ikwọrọ Obio Ubọn̄ Abasi.—Mark 14:8; Luke 21:2-4.