Nte Ẹkpen̄wamde Mbon Oro Mînyeneke Udọn̄ Kan̄a ke N̄wed Bible Ekpep
1. Ndi kpukpru owo ẹdima ndibọ n̄wed Bible Ekpep ke akpa ini oro ẹnọde mmọ? Nam an̄wan̄a.
1 Ana owo ọfiọk se Bible ekpepde man enye akabade edi andituak ibuot nnọ Jehovah. Edi, ndusụk owo idịghe mbon ido ukpono Christendom inyụn̄ idaha Bible nte Ikọ Abasi. Mbon en̄wen inịmke ke Abasi odu inyụn̄ inyeneke ukpono inọ Bible. Mme n̄wed ye mme vidio ewe inen̄ede inyene ufọn inọ mbon oro mîmaha ndibọ n̄wed Bible Ekpep ke akpa ini oro ẹnọde mmọ? Ẹda mme ekikere oro ẹnọde mi ke idak ẹto se mme asuanetop ke nsio nsio idụt 20 ẹtịn̄de.
2. Edieke owo ọdọhọde ke imọ inịmke ke Abasi odu, nso ke ikpodomo ndifiọk, ndien ntak-a?
2 Mbon Oro Mînịmke ke Abasi Odu: Edieke owo ọdọhọde ke imọ inịmke ke Abasi odu, ọfọn ifiọk se idide ntak. Ndi koro enye enịm ke n̄kpọ okofoforo? Ndi utụk oro okponde ke ererimbot m̀mê mbubịk emi odude ke ido ukpono anam enye okûnyene mbuọtidem ke Abasi? Ndi enye oto idụt oro ẹkpande owo ndinịm Abasi ke akpanikọ? Ekeme ndidi enye ke idemesie isọn̄ọke idọhọ ke Abasi idụhe, edi akanam enye ikpaha nditie n̄kere m̀mê Abasi odu. Ediwak mme asuanetop ẹkụt ke ndibụp owo ẹte, “Ndi ọkọtọn̄ọ ke ekpri ekere ke Abasi idụhe?” ayanam enye etịn̄ ekikere esie. Kpan̄ utọn̄ kop se enye etịn̄de, kûsịbe enye ikọ ke inua. Ima idiọn̄ọ ntak emi owo mînịmke ke Abasi odu, iyọfiọk nte ikpọnọde ibọrọ ye n̄wed oro ikpọnọde enye.—N̄ke 18:13.
3. Didie ke ikeme ndiwụt ukpono nnọ owo ye se enye enịmde ke akpanikọ?
3 Ke ini ọnọde ibọrọ, kpeme mbak udûnam owo oro ekere ke ikọ fo ọwọrọ ke inenke imọ ndikere n̄kpọ ntre. Kop ekikere emi otode United States: “Ọfọn ọdiọn̄ọ ke mme owo ẹnyene unen ndinịm se ededi oro mmọ ẹmade. Utu ke ndiyom ndikan mfan̄a, ọfọn obụp owo oro mme mbụme oro ẹdinamde enye ekere n̄kpọ onyụn̄ esịm ubiere ke idemesie.” Esenyịn kiet oro asan̄ade-san̄a esidi ama akpan̄ utọn̄ okop se enyeneufọk etịn̄de, enye ọtọn̄ọ ibọrọ esie ntem, “Ndi akanam emekere ke onyụn̄ ekeme ndidi ntem?”
4. Didie ke ikeme ndin̄wam mbon ido ukpono Buddha?
4 Ediwak mbon ido ukpono Buddha idiọn̄ọke se ẹkotde Abasi. Ke ini ndusụk mme asuanetop ke Britain ẹkwọrọde ikọ ẹnọ utọ mbon oro, mmọ ẹsiwak ndikama ediye uduot ekpri n̄wed Lasting Peace and Happiness—How to Find Them. Ke mmọ ẹma ẹketịn̄ n̄kpọ ẹban̄a ntọn̄ọikọ ẹma, mmọ ẹyeneme ikpehe oro ọdọhọde “Is There Really a Most High Creator?” ekem ẹneme “A Guidebook for the Blessing of All Mankind.” Nte ini akade, mmọ ẹyewụt enyeneufọk n̄wed Bible Ekpep ẹnyụn̄ ẹdọhọ ẹte: “Okposụkedi emi mûnịmke ke Abasi odu, ndikpep Bible enyene ufọn koro enye ọdọn̄ọ ediwak nti item.” Asiakusụn̄ kiet ke United States emi esikwọrọde ikọ ke efakutom emi mbon China ẹdude ama ọdọhọ ete: “Ediwak owo ke efakutom nnyịn ẹsima ndikot n̄wed. Ntre mmọ ẹsiwak ndikot n̄wed oro ikọnọde mmọ n̄kụre mbemiso ifiakde ika. Edi se ẹkotde ukpepn̄kpọ Bible in̄wan̄ake mmọ. Ntre mmesima ndinọ mmọ ediye uduot ekpri n̄wed Eti Mbụk akpa ini oro n̄wahade koro ẹwet n̄wed emi ke usụn̄ oro oyomde ẹneneme se idude ke esịt.” Esenyịn circuit emi anamde utom ke circuit usem Chinese ke United States ọdọhọ ke ẹkeme ndinọ n̄wed Bible Ekpep ke akpa ini emi ẹwahade. Edi ọkpọfọn ẹtọn̄ọ ukpepn̄kpọ ke ọyọhọ ibuot 2, emi enemede n̄kpọ aban̄a Bible, utu ke nditọn̄ọ ke ibuot 1, emi enemede n̄kpọ aban̄a Abasi.
5. Ntak oyomde inyene ime?
5 Esida ini mbemiso owo obuọt idem ye Abasi, ntre oyom inyene ime. Ekeme ndidi se idinemede ye owo ke akpa ini oro isobode ye enye idinamke enye enịm ke Andibot odu. Edi, nte ini akade, enye ekeme ndinyịme ete ke etie nte Abasi odu, mîdịghe ọdọhọ ke an̄wan̄a imọ ntak emi mme owo ẹsidọhọde ke Abasi odu.
6. Nso ikeme ndinam ndusụk owo ẹkûnyene udọn̄ ke Bible?
6 Mbon Emi Mînyeneke Udọn̄ ke Bible M̀mê Oro Mînịmke Se Bible Etịn̄de: Ediwak ini, owo oro ọdọhọde ke ekeme ndidi Abasi odu isinyeneke udọn̄ ke se Bible ekpepde sia enye mînịmke ke Bible edi Ikọ Abasi. Ekeme ndidi sia enye odụn̄de ke idụt oro ido ukpono mmọ mîdịghe ido ukpono Christendom onyụn̄ adade Bible nte n̄wed Christendom. Mîdịghe ekeme ndidi enye odụn̄ ke idụt inua-okot mme Christian emi mîsịnke idem ke ido ukpono, onyụn̄ ekeme ndikere ke Bible inyeneke ufọn inọ imọ. Didie ke ikeme ndinam utọ mbon oro ẹtọn̄ọ ndinyene udọn̄ ke Bible, ndien nte ini akade ẹnyịme ndikpep n̄wed Bible Ekpep?
7. Ewe usụn̄ ke ẹsiwak ndida nnam mme owo ẹnyene udọn̄ ke Bible?
7 N̄kọk itieutom ke Greece ẹkewet ẹte: “Mfọnn̄kan usụn̄ ndin̄wam mbon oro mînyeneke udọn̄ ke Bible edi ndikụbọde enye n̄wụt mmọ se idude ke esịt. Ediwak mme asuanetop ẹkụt ke etop Bible otụk owo esịt akan n̄kpọ ekededi oro mmọ ẹkemede nditịn̄. (Heb. 4:12) Ndikokụt enyịn̄ Abasi ke Bible esin̄wam ediwak owo ẹtọn̄ọ ndinyene udọn̄ ke Bible.” N̄kọk itieutom ke India ẹkewet ẹte: “Ediwak mbon ido ukpono Hindu ẹsinen̄ede ẹma ndikop n̄kpọ aban̄ade n̄kpa ye uwem. Mmọ n̄ko ẹsima un̄wọn̄ọ Bible oro ọdọhọde ke ini ke edi emi asari mîdidụhe ke ererimbot.” Ke ini mme asuanetop ẹtịn̄de n̄kpọ ẹban̄a mme mfịna emi ẹdude ke efakutom mmọ, emi esinọ mmọ ifet ndida Bible n̄wụt nte Obio Ubọn̄ Abasi editrede mme mfịna oro.
8. Nso ke ikeme nditịn̄ ye mbon emi mîmaha Bible ke ntak Christendom?
8 Edieke owo mîmaha Bible ke ntak Christendom, nam enye ọfiọk ke Christendom inamke inyụn̄ ikpepke se isịnede ke Bible. N̄kọk itieutom ke India ẹkewet ẹte: “Ndusụk ini, ana in̄wam mme owo ẹkụt ke idịghe ufọkabasi ẹnyene Bible.” Mmọ ẹdọhọ ke mbon ido ukpono Hindu ẹsima ọyọhọ ikpehe 4 ke ediye uduot ekpri n̄wed Nso Idi Uduak Uwem? Didie ke Afo Ekeme Ndikụt Enye? emi owụtde nte mme ufọkabasi ẹdomode ndiyụrọde se idude ke Ikọ Abasi nnyụn̄ nsobo Bible mfep. Asiakusụn̄ kiet ke Brazil esidọhọ mme owo ntem: “Ntak mûdụn̄ọkede mme n̄kpọ efen emi ẹdude ke Bible? Ediwak owo ke ẹnam oro, inamke n̄kpọ m̀mê mmọ ẹka ewe ido ukpono. Se afo edikụtde ekeme ndikpa fi idem.”
9. Ntak emi nnyịn mîkpakpaha mba edieke owo mînyeneke udọn̄ ke se Bible ekpepde ke akpa ini oro isobode ye enye?
9 Jehovah esise owo kiet kiet esịt. (1 Sam. 16:7; N̄ke 21:2) Enye ke anam mbon emi ẹnyenede eti esịt ẹdụk esop esie. (John 6:44) Akananam owo ikpepke ediwak ke otu mbon emi n̄kpọ iban̄a Abasi mîdịghe mmọ inen̄ekede ifiọk n̄kpọ iban̄a Bible. Utom ukwọrọikọ nnyịn anam mmọ ẹnyene ifet ‘ndinyene edinyan̄a nnyụn̄ nsịm nnennen ifiọk akpanikọ.’ (1 Tim. 2:4) Ntem, edieke ndusụk owo mînyeneke udọn̄ ke se Bible ekpepde ke akpa ini oro osobode ye mmọ, kûkpa mba! Da kiet ke otu mme n̄wed ye vidio emi ẹdude ke usem mbufo n̄wam mmọ. Nte ini akade, eyedi afo eyekeme nditọn̄ọ nneme ye mmọ ke akpan n̄wed emi isidade ikpep mme owo Bible, oro edi, Nso ke Bible Enen̄ede Ekpep?
[Ekebe ke page 4]
Edieke enyeneufọk ọdọhọde ke imọ inịmke ke Abasi odu, nam emi ise:
• Bụp enye ete, “Ndi ọkọtọn̄ọ ke ekpri ekere ke Abasi idụhe?” man ọfiọk ntak.
• Edieke enye edide owo ido ukpono Buddha, neme ediye uduot ekpri n̄wed Lasting Peace and Happiness—How to Find Them, page 9-12, ye enye.
• Edieke enye ọdọhọde ke n̄kpọ okofoforo, mme n̄wed ye vidio emi ẹkeme ndin̄wam enye:
Ibuotikọ Ẹdemede! emi ọdọhọde “Ndi Ẹkebobot?”
Vidio The Wonders of Creation Reveal God’s Glory
Ndiye uduot n̄kpri n̄wed A Satisfying Life—How to Attain It, ikpehe 4; Was Life Created?; ye The Origin of Life—Five Questions Worth Asking
• Edieke edide utụk ye ufen ẹnam enye okûnyene aba mbuọtidem ke Abasi, n̄wed ye ndiye uduot n̄kpri n̄wed emi ẹkeme ndin̄wam enye:
N̄wed Is There a Creator Who Cares About You?, ibuot 10
Ndiye uduot n̄kpri n̄wed Nte Abasi Enen̄ede Ekere Aban̄a Nnyịn?, ikpehe 6, ye Nso Idi Uduak Uwem?, ikpehe 6
• Ndondo oro enyeneufọk ọtọn̄ọde ndikere ke etie nte Abasi odu, tọn̄ọ ndineme n̄kpọ ye enye ke n̄wed Bible Ekpep. Ọkpọfọn ọtọn̄ọ ke ibuot 2 m̀mê ke ibuotikọ efen emi okụtde ke ọyọfọn ye enye.
[Ekebe ke page 5]
Edieke enyeneufọk mînịmke se Bible etịn̄de, nam emi ise:
• Neme n̄wed Life—How Did It Get Here? By Evolution or by Creation? ibuot 17 ye 18, ye enye
• Edieke edide owo ido ukpono Hindu, neme ediye uduot ekpri n̄wed Why Should We Worship God in Love and Truth? ye enye
• Edieke edide owo Jew, neme ediye uduot ekpri n̄wed Will There Ever Be a World Without War?, page 3-11, ye enye
• Neme mme ufọn emi ẹdibọde edieke ẹnamde mme edumbet Bible. Mme n̄wed ye vidio emi ekemede ndida n̄wụt owo ufọn emi Bible enyenede ẹdi:
Ibuotikọ Ẹdemede! emi ọdọhọde “Se Idin̄wamde Mme Ubon”
Vidio The Bible—Its Power in Your Life
Ndiye uduot n̄kpri n̄wed Eti Mbụk Emi Otode Abasi!, ukpepn̄kpọ 9 ye 11; N̄wed Ofụri Owo, page 22-26; ye A Satisfying Life—How to Attain It, ikpehe 2
Edieke edide owo ido ukpono Buddha, neme ediye uduot ekpri n̄wed The Pathway to Peace and Happiness, page 3-7, ye enye.
Edieke edide owo Muslim, neme ediye uduot ekpri n̄wed Real Faith—Your Key to a Happy Life, ikpehe 3, ye enye.
Edieke ọkwọrọde ikọ ke ebiet emi mme owo ẹsuade Bible, ọkpọfọn okûsiak ebiet emi adade nti ikọ emi afo etịn̄de tutu afo afiak aka ediwak ini.
• Tịn̄ nte mme ntịn̄nnịm ikọ Bible ẹsude. N̄wed ye vidio emi ekemede ndida nnam emi ẹdi:
Vidio The Bible—Accurate History, Reliable Prophecy
Ediye uduot ekpri n̄wed N̄wed Ofụri Owo, page 27-29
• Ndondo oro owo oro obụpde fi nsio nsio n̄kpọ emi Bible ẹkpepde, tọn̄ọ nneme ye enye ke n̄wed Bible Ekpep.
[Ekebe ke page 6]
Edieke enyeneufọk ọdọhọde ete: “Nnịmke ke Abasi odu,” afo emekeme ndidọhọ ete:
• “Ndi emekeme ndinọ mi minit ifan̄ ntịn̄ se ikanamde mi nnịm ke Andibot odu?” Ekem neme ndusụk n̄kpọ emi ẹdude ke n̄wed Reasoning, page 84-86, ye enye mîdịghe diomi ndida n̄wed emi afo akamade ndikot nsọk enye.
• “Edieke Abasi okpodude, akpama enye etie didie?” Ediwak mme enyeneufọk ẹsidọhọ ke mmimọ ikpama Abasi emi enyenede ima, mbọm, ekpede unenikpe, inyụn̄ inamke asari. Da Bible wụt enye ke Abasi enyene mme edu emi. (Emekeme ndikam ntọn̄ọ nneme ye enye ke ibuot 1, ikpehe ekikere 6, ke n̄wed Bible Ekpep.)
Edieke enyeneufọk ọdọhọde ete: “Nnịmke se Bible etịn̄de,” afo emekeme ndidọhọ ete:
• “Ediwak owo ẹdọhọ ntre. Ndusụk mmọ ẹkere ke Bible itịn̄ke n̄kpọ iban̄a ifiọk ntaifiọk mîdịghe ẹkere ke mme edumbet Bible inyeneke ufọn. Mbọk, ndi akanam omokot Bible? [Bet ibọrọ. Ekem wụt enye ntọn̄ọikọ emi odude ke page 3 ke ediye uduot ekpri n̄wed N̄wed Ofụri Owo, nyụn̄ nọ enye n̄wed oro.] Ediwak owo ẹsua Bible ke ntak emi ido ukpono ẹyụrọrede se Bible ekpepde. Mma mfiak ndi, nyama ineme uwụtn̄kpọ kiet ke page 4 ye 5.”
• “Ediwak owo ẹkere ntre n̄ko. Ndi mmekeme ndiwụt fi n̄kpọ emi anamde mma Bible? [Kot Job 26:7 m̀mê Isaiah 40:22, emi owụtde ke se Bible etịn̄de ekem ye ifiọk ntaifiọk.] Bible enyene n̄ko nti item emi ẹkemede ndin̄wam mme ubon. Mma mfiak ndi, n̄kpama ndiwụt fi uwụtn̄kpọ kiet.”
• “Amanam nte etịn̄de se ekerede ọnọ mi. Edieke Abasi ekpewetde n̄wed ọnọ mme owo, afo ekere ke nso ikpesịne ke utọ n̄wed oro?” Ekem wụt owo oro n̄kpọ ke Bible emi ọsọn̄ọde se enye etịn̄de.