Ikọ Abasi Enyene Odudu
1. Nso idi ibuotikọ usen akpan mbono eke 2014?
1 Bible itiehe nte n̄wed oro mme anana-mfọnmma owo ẹwetde koro enye enyene odudu ndikpụhọde nnyịn, nnyụn̄ nnam mme ekikere ye mme edinam nnyịn ẹkekem ye uduak Jehovah. Edi Ikọ Abasi enyene odudu adan̄a didie? Didie ke nnyịn ikeme ndiyak odudu esie anam n̄kpọ ke uwem nnyịn ọyọhọ ọyọhọ? Didie ke nnyịn ikeme ndida enye nnam n̄kpọ uforo uforo nnyụn̄ n̄n̄wam mbon en̄wen? Nnyịn imenịm ke nte ẹdinemede mme akpan n̄kpọ emi ke ndutịm usen akpan mbono eke 2014 ẹyetetịm ẹsọn̄ọ kpukpru nnyịn idem ke n̄kan̄ eke spirit. Ibuotikọ mbono emi edi “Ikọ Abasi Enyene Odudu.” Ẹda enye ẹto Mme Hebrew 4:12.
2. Mme ibọrọ mbụme ewe ke ikpoyom nte isụk ikpan̄de utọn̄?
2 Yom Mme Ibọrọ Mbụme Emi: Nte akpan̄de utọn̄ okop mme utịn̄ikọ ke mbono emi, wet mme ibọrọ mbụme oro ẹtienede mi.
• Ntak emi ikpọbuọtde idem ke Ikọ Jehovah? (Ps. 29:4)
• Nso ke ikpanam man Ikọ Abasi enyene odudu ke idem nnyịn? (Ps. 34:8)
• Didie ke ikpanam mme owo ẹkụt odudu oro Ikọ Abasi enyenede ke ini ikwọrọde ikọ? (2 Tim. 3:16, 17)
• Nso ke ikpanam man ifep abian̄a abian̄a odudu ererimbot Satan? (1 John 5:19)
• Didie ke mbufo mme uyen ẹkpekụt unen ke n̄kan̄ eke spirit? (Jer. 17:7)
• Didie ke ikpokop odudu idem ke adan̄aemi ikopde mmemidem? (2 Cor. 12:10)
• Nso idin̄wam nnyịn ika iso inam ukpụhọde, idem ọkpọkọm nnyịn inyene mme edu emi ẹsọn̄ọde ẹdọn̄ n̄kam? (Eph. 4:23)
3. Ke adianade ye nnyịn ndikpan̄ utọn̄ n̄kop mme utịn̄ikọ, ewe usụn̄ efen ke nnyịn ikeme ndibọ ufọn nto usen akpan mbono nnyịn?
3 Nnyịn iyenen̄ede ibọ ufọn ke ini ikpan̄de utọn̄ inọ mme akpan n̄kpọ oro ẹdinemede. N̄ko, ukem nte esidide ke mme mbono circuit ye district, usen akpan mbono emi ọyọnọ nnyịn ifet ndisobo nnyụn̄ mmehe ye nditọete nnyịn iren ye iban emi ẹtode mme esop en̄wen ẹdi. (Ps. 133:1-3; 2 Cor. 6:11-13) Ntre sio ini nịm man ada enyene nneme ye n̄kani ufan onyụn̄ ọtọn̄ọ mbufa ufan. Edieke etịn̄ikọ emi otode-to edi, utọ nte esenyịn district m̀mê eyenete emi otode Bethel, odụkde usen akpan mbono mbufo, da ifet emi kọkọm enye ye n̄wan esie. Ke akpanikọ nnyịn imenyene ekese ntak nditie mbet usen akpan mbono nnyịn oro edide.