Tịm Idem Ben̄e Editi ye Idatesịt
1. Ini Editi edi akpan ini ndinam nso?
1 Editi emi ẹdinịmde ke Tuesday, March 26, ayanam nnyịn inyene eti ifet ndidat esịt mban̄a se Abasi akanamde man anyan̄a nnyịn. (Isa. 61:10) Idem mbemiso usen edinam emi, idatesịt ayan̄wam nnyịn itịm idem ọfọn. Didie ke edi ntre?
2. Nso isinam itịm idem iben̄e Editi?
2 Nte Ẹtịmde Idem Ẹben̄e Edinam Emi: Udia Mbubreyo Ọbọn̄ edi akpan edinam, edi ẹnam enye ke ukeuke usụn̄. Kpa ye oro, oyom ẹbak ẹtọn̄ọ ntịmidem mbak ẹdifre mme akpan n̄kpọ oro ẹkpenamde. (N̄ke 21:5) Ana ẹmek ini ye ebiet oro edifọnde. Ana ẹnyene nnennen n̄kpọ idiọn̄ọ. Ana ẹtịm ebiet emi ẹdinịmde Editi ẹnyụn̄ ẹnam enye asana. Owo emi ẹmekde ndinọ utịn̄ikọ enyene ndida ini ntịm idem, ndien ana ẹnọ mbon oro ẹdimende n̄kpọ idiọn̄ọ ẹsan̄a ye mme adaidaha nnennen ndausụn̄. Imenịm ke ẹma ẹnanam ediwak ke otu mme n̄kpọ emi. Idatesịt oro inyenede sia ifiọkde ke ufak Jesus ọyọnọ nnyịn edinyan̄a esinam nnyịn inen̄ede itịm idem inọ akpan edinam emi.—1 Pet. 1:8, 9.
3. Didie ke nnyịn ikeme nditịm esịt nnyịn mben̄e Udia Mbubreyo Ọbọn̄?
3 Tịm Esịt Fo: Oyom itịm esịt nnyịn n̄ko man itịm ifiọk se Editi ọwọrọde. (Ezra 7:10) Ke ntak emi, nnyịn inyene ndisio ini nnịm ntie n̄kot san̄asan̄a itien̄wed Bible oro ẹsikotde ke ini Editi, ekem ikere iban̄a mme akpatre usen uwem Jesus eke isọn̄. Nnyịn nditie n̄kere edu n̄waidem Jesus ayanam nnyịn ikpebe enye.—Gal. 2:20.
4. Ke otu mme ufọn emi ibọde ito ufak, ewe adat fi esịt akan?
4 N̄kpa Christ owụt ke Jehovah enyene unen ndikara. Osio nnyịn ke ufụn idiọkn̄kpọ ye n̄kpa. (1 John 2:2) Anam ikeme ndidu ke emem ye Abasi onyụn̄ anam ikeme ndinyene nsinsi uwem. (Col. 1:21, 22) Enye an̄wam nnyịn n̄ko isọn̄ọ ubiere oro ikanamde ke ini ikayakde idem inọ Jehovah onyụn̄ an̄wam nnyịn ika iso idi mbet Christ. (Matt. 16:24) Afo akpakam aka iso okop idatesịt nte etịmde idem eben̄e onyụn̄ odụkde Editi emi edide!