Kûkere ke Udûkemeke—Nte Owo Akpakande Ekikere Edidọhọ ke Imọ Idotke
1. Ntak emi ndusụk owo mîsinịmke ukpepn̄kpọ Bible?
1 Ndi emesitre ndinịm ukpepn̄kpọ Bible sia ekerede ke imọ ikemeke ndinịm enye uforo uforo? Ndusụk ini mme anam-akpanikọ mme asan̄autom Abasi ke eset, utọ nte Moses ye Jeremiah, ẹma ẹsikere ke mmimọ idotke ndinam utom oro ẹkedọn̄de mmimọ. (Ex. 3:10, 11; 4:10; Jer. 1:4-6) Ntre ke ediwak owo ẹsikere n̄ko. Edi didie ke ẹkeme ndikan utọ ekikere emi?
2. Ntak emi nnyịn mîkpọdọhọke ke n̄kukụre se ikemede ndinam edi utom ukwọrọikọ eke ufọk ke ufọk, ndien ke mbon en̄wen ẹyenịm ukpepn̄kpọ Bible?
2 Nnyịn ikpenyene nditi nte ke akananam Jehovah idọhọke nnyịn inam se nnyịn mîkemeke ndinam. (Ps. 103:14) Ntre utom oro ẹnọde nnyịn, oro edi, ‘ndinam mme owo ẹdi mbet,’ ye ‘ndikpep mme owo n̄kpọ,’ ẹdi se nnyịn ikemede ndinam. (Matt. 28:19, 20) Utom emi idịghe utom oro Jehovah ọnọde sụk mbon oro ẹnen̄erede ẹnyenede ifiọk m̀mê usọ. (1 Cor. 1:26, 27) Ntre, nnyịn ikpọdọhọke ke n̄kukụre se ikemede ndinam edi utom ukwọrọikọ eke ufọk ke ufọk, ndien ke mbon en̄wen ẹyenịm ukpepn̄kpọ Bible.
3. Didie ke Jehovah anam nnyịn idot inyụn̄ ikeme ndinịm ukpepn̄kpọ Bible?
3 Jehovah Anam Nnyịn Idot: Jehovah anam nnyịn idot inyụn̄ ikeme ndinam mme owo ẹdi mbet. (2 Cor. 3:5) Enye ada esop esie ekpep nnyịn akpanikọ Bible emi mbon oro ẹnyenede ifiọkn̄wed ẹkan ke ererimbot mîkam ifiọkke. (1 Cor. 2:7, 8) Enye ama anam ẹwet mme usụn̄ oro Jesus, kpa Akwa Andikpep ekesikpepde mme owo n̄kpọ man nnyịn ikpebe, enye onyụn̄ aka iso ndida esop esie nnọ nnyịn ukpep. Ke adianade do, Jehovah ọnọ nnyịn mme n̄kpọ ndida n̄kpep mme owo Bible. Enye ọnọ nnyịn utọ n̄kpọutom nte n̄wed Bible Ekpep, emi anamde akpanikọ an̄wan̄a ke usụn̄ oro esịnede ifiọk onyụn̄ ememde ndifiọk. Ntre, ndinịm ukpepn̄kpọ Bible inen̄ekede isọn̄ nte ikerede.
4. Ntak emi ikpenịmde ke Jehovah ayan̄wam nnyịn?
4 Jehovah ama an̄wam Moses ye Jeremiah ẹnam utom oro enye ọkọdọn̄de mmọ. (Ex. 4:11, 12; Jer. 1:7, 8) Nnyịn n̄ko imekeme ndiben̄e Jehovah ite an̄wam nnyịn. Kamse, ke ini inịmde ukpepn̄kpọ Bible, nnyịn ikpep owo akpanikọ oro aban̄ade Jehovah, kpa n̄kpọ oro enemde enye esịt. (1 John 3:22) Mmọdo, biere nditiene mbuana ke ndikpep mme owo Bible, kpa ikpehe utom ukwọrọikọ oro enemde onyụn̄ enyenede ufọn akan.