Tọn̄ọ Nneme ke Usụn̄ Oro Edemerede Owo Udọn̄
1. Nso ke ikeme ndikpep nto nsio nsio usụn̄ oro akpa mme Christian ẹkesidade ẹtọn̄ọ nneme?
1 Akpa mme Christian ẹma ẹsikwọrọ eti mbụk ẹnọ mme owo oro ẹketode nsio nsio idụt ye ido ukpono. (Col. 1:23) Okposụkedi emi se ẹkesikwọrọde akaban̄ade n̄kpọ kiet, oro edi, Obio Ubọn̄ Abasi, nte ẹkesitọn̄ọde nneme ye nsio nsio owo ama esikpụhọde. Ke uwụtn̄kpọ, ke ini Peter ọkọkwọrọde ikọ ọnọ mme Jew oro ẹketịmde ẹkpono N̄wed Abasi, enye ọkọtọn̄ọ nneme esie ke nditịn̄ se prọfet Joel ekewetde. (Utom 2:14-17) Ke n̄kan̄ eken, se mi nte Paul ọkọkọkde ibuot ye mme Greek ke Utom 17:22-31. Mfịn, mme owo ke ndusụk efakutom ẹsiwụt ukpono ẹnọ N̄wed Abasi, ntre imekeme ndikot Bible nnọ mmọ ke ini ikwọrọde ikọ ke ufọk ke ufọk. Edi oyoyom inen̄ede inyene mbufiọk ke ini ikwọrọde ikọ inọ mbon oro mînyeneke udọn̄ ke Bible m̀mê ke ido ukpono m̀mê oro mîdịghe mbon ido ukpono Christendom.
2. Didie ke ikeme ndida mme n̄wed oro ẹnọde n̄n̄wam mbon oro ẹmade Bible ọkọrọ ye mbon oro mîmaha?
2 Da Mme N̄wed Oro Ẹnọde Nam N̄kpọ nte Ọfọnde: Ke isua utom emi, ẹdisikpụhọ n̄wed oro ẹnọde kpukpru ọfiọn̄ iba iba, ndien se ẹdinọde ẹdidi mme magazine, tract, ye ndiye uduot n̄kpri n̄wed. Idem edieke mme owo ke efakutom nnyịn mînyeneke udọn̄ ke Bible, iyosụk inyene n̄wed oro idinọde emi editịn̄de se idemerede mmọ udọn̄. Imekeme nditre ndikot itie N̄wed Abasi ke akpa ini oro iwahade m̀mê nditịn̄ n̄kpọ nnennen nnennen mban̄a Bible, edi edieke enyeneufọk owụtde udọn̄ imekeme ndifiak n̄kan̄wam enye ọbuọt idem ye Andibot ye ke Ikọ esie eke odudu spirit. Ke n̄kan̄ eken, edieke ikwọrọde ikọ ke ebiet oro mme owo ẹmade Bible, imekeme nditọn̄ọ nneme Bible ye mmọ inyụn̄ inọ mmọ n̄wed oro odotde. Imakam ikeme ndinọ n̄wed Bible Ekpep m̀mê ediye uduot ekpri n̄wed Kpan̄ Utọn̄ Nọ Abasi m̀mê Kpan̄ Utọn̄ Nọ Abasi Nyụn̄ Du Uwem ke Nsinsi ini ekededi, inamke n̄kpọ m̀mê n̄wed ewe ke ẹnọ ke ọfiọn̄ oro. Akpan n̄kpọ edi nditọn̄ọ nneme ke usụn̄ oro edemerede owo udọn̄.
3. Didie ke esịt mme owo ke efakutom nnyịn ebiet isọn̄ emi ẹsitọde n̄kpọ?
3 Tịm Isọn̄ Kan̄a: Esịt owo ebiet isọn̄ emi ẹsitọde n̄kpọ. (Luke 8:15) Oyom ẹnen̄ede ẹtịm ndusụk isọn̄ mbemiso n̄kpasịp akpanikọ Bible oro ẹtọde ekeme ndinyene orụn̄ onyụn̄ ọkọri. Mme ọkwọrọ eti mbụk eke akpa isua ikie ẹma ẹtọ n̄kpasịp akpanikọ ke nsio nsio orụk isọn̄, mmọ ẹma ẹkụt unen ndien emi ama anam mmọ ẹkop idatesịt. (Utom 13:48, 52) Nnyịn imekeme n̄ko ndikụt unen ke nditọn̄ọ nneme nnyịn ke usụn̄ oro edidemerede owo udọn̄.