Nso Idi ‘Ntak Idatesịt’ Fo?
1. Nso isidi ntak idatesịt nnyịn ke utịtọfiọn̄ kiet kiet?
1 Ke ini ẹdọhọde kpukpru owo ẹnọ ibatutom an̄wautom mmọ ke utịtọfiọn̄ kiet kiet, nso isidi ‘ntak idatesịt’ fo? (Gal. 6:4) Edide idi mme akpan asiakusụn̄ emi isinọde hour 130 m̀mê idi mme asuanetop emi ẹnyịmede ẹtọt ke nsụhọde n̄kaha minit 15 ke ibatutom nnyịn, kpukpru nnyịn ikpenyene ndikop idatesịt ke utom ofụri ukpọn̄ oro inamde inọ Jehovah.—Ps. 100:2.
2. Ntak emi ikpesịnde ifịk inam utom Jehovah?
2 Sia Jehovah edide Akakan Andikara ekondo, odot inọ enye mfọnn̄kan n̄kpọ oro nnyịn inyenede. (Mal. 1:6) Ke ntak oro imade enye, nnyịn imayak ofụri uwem nnyịn isịn ndinam uduak esie. Ntem, ke utịt usen m̀mê ke utịtọfiọn̄, edieke nnyịn inịmde ke imọnọ “akpa mbun̄wụm” nnyịn, ke ndisịn ini, ukeme, ye odudu nnyịn ke utom Jehovah, nnyịn owo kiet kiet imenyene ntak ndidat esịt. (N̄ke 3:9) Edi edieke ubieresịt nnyịn ọdọhọde ke imekeme ndinam ọfọn akan oro, do ana ikere se ikpanamde man inam n̄kọri.—Rome 2:15.
3. Ntak emi mîwụtke eti ibuot ndimen idem nnyịn ndomo ye mbon en̄wen?
3 “Idịghe ke Ndimen Idem Ndomo ye Owo En̄wen”: Iwụtke eti ibuot ndimen idem nnyịn ndomo ye mbon en̄wen m̀mê ndimen se nnyịn inamde idahaemi n̄kodomo ye ini emi ikesikopde odudu. Mme idaha ẹsikpụhọde. Ukeme mme owo ẹdi nsio nsio. Ndimen idem ndomo ye owo efen esiwak ndisụn̄ọ ke umia mbuba m̀mê owo ndikere ke imọ iwọrọke n̄kpọ. (Gal. 5:26; 6:4) Jesus ikesimenke se owo kiet anamde idomo ye eke owo en̄wen. Utu ke oro, enye ekesitoro mme owo etiene ukeme mmọ.—Mark 14:6-9.
4. Nso akpan n̄kpọ ke ikeme ndikpep nto n̄ke Jesus oro aban̄ade talent?
4 Ke n̄ke Jesus oro aban̄ade talent, ẹkenọ owo utom kiet kiet talent etiene “nte ukeme esie edide.” (Matt. 25:15) Ke ini eteufọk mmọ ọkọnyọn̄de edi onyụn̄ ọdọhọde mmọ ẹditịn̄ se mmọ ẹkenamde, ẹma ẹtoro mbon oro ẹkesịnde ifịk ẹnam utom nte ukeme mmọ ye idaha mmọ ẹkeyakde, mmọ ẹma ẹnyụn̄ etiene eteufọk mmọ ẹdat esịt. (Matt. 25:21, 23) Ukem ntre, nte nnyịn isịnde idem ke utom edikwọrọ Obio Ubọn̄, nnyịn imenịm ke Jehovah ọyọnọ nnyịn unyịme esie, nnyịn iyonyụn̄ inyene ntak ndidat esịt!