Ndi Mmodot Ndikwọrọ Ikọ?
1. Ntak emi nnyịn mîkpekereke ke nnyịn idotke ndidi mme ọkwọrọikọ?
1 Ndi akanam omobụp utọ mbụme emi? Edieke edide ntre, kûfịna idem! Idịghe ifiọk n̄wed m̀mê ndammana ukeme anam nnyịn idot ndidi mme ọkwọrọikọ. Ẹdọhọ ke ndusụk akpa mbet Jesus ẹkedi “mmọ emi mîfiọkke n̄wed ye mme usụhọde owo.” Kpa ye oro, mmọ ẹkedi mme ọkwọrọ eti mbụk oro ẹkụtde unen sia mmọ ẹma ẹbiere ndikpebe uwụtn̄kpọ Jesus.—Utom 4:13; 1 Pet 2:21.
2. Ukpepn̄kpọ Jesus ekesitie didie?
2 Nte Jesus Ekesikpepde Mme Owo N̄kpọ: Ukpepn̄kpọ Jesus ama esimem, enen, onyun̄ ọsọp an̄wan̄a owo. Mme mbụme, uwụtn̄kpọ ye mbio mbio ntọn̄ọ ikọ esie ẹma ẹsidemede udọn̄ mbon oro ẹkekpan̄de utọn̄ ẹnọ enye. (Matt. 6:26) Enye ama enen̄ede enyene udọn̄ ke idem mme owo. (Matt. 14:14) Ke adianade do, Jesus ekesitịn̄ ikọ uko uko, onyụn̄ ọfiọk ke Jehovah ọkọdọn̄ onyụn̄ ọnọ imọ odudu ndinam utom imọ.—Luke 4:18.
3. Didie ke Jehovah esin̄wam nnyịn inam utom nnyịn ima?
3 Jehovah Esin̄wam Nnyin: Akwa Anditeme nnyịn amada Ikọ ye esop esie ọnọ nnyịn ukpep oro iyomde man ikụt unen ke utom ukwọrọikọ. (Isa. 54:13) Nnyịn imekeme ndidụn̄ọde nnyụn̄ n̄kpebe nte Jesus ekesikpepde mme owo n̄kpọ koro Jehovah ama anam ẹwet emi ẹnịm. Jehovah ọmọnọ nnyịn edisana spirit esie, onyụn̄ ekpep nnyịn n̄kpọ ke mme mbono esop. (John 14:26) Ke adianade ye emi, enye ọnọ nnyịn mme asuanetop oro ẹnyenede mbufiọk, emi ẹkemede ndin̄wam nnyịn inen̄ede inyene uforo.
4. Ntak emi nnyịn ikpekerede ke imodot ndikwọrọ ikọ?
4 Sia edide ‘Abasi anam nnyịn itịm idot,’ oro owụt ke imenyene ata ediwak ntak ndikere ke imodot ndikwọrọ ikọ. (2 Cor. 3:5) Ndinyene mbuọtidem ke Jehovah nnyụn̄ nda mme n̄kpọ oro enye ọnọde nnyịn nnam n̄kpọ ẹyenam ‘itịm idot, iben̄e idem ọyọhọ ọyọhọ ndinam eti utom ekededi.’—2 Tim. 3:17.