San̄asan̄a Ubịnikọt Editọt Mme Owo Mban̄a Editi!
1. Nso ke mme asuanetop Obio Ubọn̄ ẹdinam ke ofụri ererimbot ọtọn̄ọde ke March 21, 2009, ndien ntak-a?
1 Ke Thursday, April 9, 2009, mme andituak ibuot nnọ Jehovah Abasi ke ofụri ererimbot ẹyesop idem man ẹti akakan edinam oro enye akanamde ndiwụt adan̄a nte imọ imade ubonowo. (Rome 5:6-8) Imenen̄ede idori enyịn ke ediwak miliọn mbon oro ẹnyenede udọn̄ ẹyetiene nnyịn ẹti n̄kpa Jesus. Ọtọn̄ọde ke March 21, ẹyedeme san̄asan̄a n̄wedikot Editi ke ofụri ererimbot.
2. Nso ye nso ke ana ekere aban̄a ke ini ọnọde n̄wedikot emi?
2 Mme N̄kpọ Anade Ekere Aban̄a: Da mme ndise, mbụme, ye itie N̄wed Abasi oro ẹsiakde ẹsịn ke n̄wedikot oro tọn̄ọ nneme. Ke uwụtn̄kpọ, afo emekeme ndiwụt owo ndise emi odude ke edem n̄wedikot oro onyụn̄ ọdọhọ enye ete: “Nyom afo edi editiene nnyịn eti n̄kpa Jesus, emi ẹdinịmde ke Thursday, April 9, 2009.” Ekem wụt enye ibuotikọ n̄wedikot oro nyụn̄ kot mme mbụme oro ẹdude do. Ti ndidọhọ owo oro ke enye ekeme ndikot mme iman esie ye mbon en̄wen emi enye amade ẹtiene ẹdi.
3. Nso ke afo akpanam aban̄a mbon oro ama ọkọnọnọ ikot ke ntọn̄ọ ubịnikọt emi?
3 Edieke efakutom esop mbufo okponde, mbiowo ẹkeme ndidọhọ ẹnịm n̄wedikot ke mme ufọk oro owo mîdụhe. Ke mme utịturua, nọ n̄wedikot ye mme magazine. Kụt ete ke imokot mbon oro esifiakde aka ekese, nditọ ukpepn̄kpọ Bible, mme iman, nsan̄a ufọkn̄wed, nsan̄autom, mbọhọidụn̄ ye mbon en̄wen oro afo ọdiọn̄ọde. Isua oko, eyenete an̄wan kiet ama okot iman esie 30, ekem enye esiti mmọ ke ini ke ini nte edinam emi edide akpan n̄kpọ. Esịt ekenem enye didie ntem ndikụt owo 25 ẹdide, inan̄ ke otu mmọ ẹnyụn̄ ẹnyịmede ukpepn̄kpọ Bible!
4. Nso ke ana inam idahaemi, ndien ntak-a?
4 Ben̄e Idem Idahaemi: Ediwak mme asuanetop ẹkeme ndinam n̄kọri ke utom ukwọrọikọ mmọ ke March ye April. Edieke afo enyenede nditọ m̀mê nditọ ukpepn̄kpọ Bible oro ẹnen̄erede ẹnam n̄kọri, emi ekeme ndidi ata eti ini ọnọ mmọ nditọn̄ọ ndiwọrọ an̄wautom nte mme asuanetop oro mînaha baptism. Ini edi emi nditọn̄ọ ntịm idem man ikpabuana ọyọhọ ọyọhọ ke ubịnikọt emi anamde ẹdiọn̄ọ edinam iba emi ẹwụtde akakan ima.—John 3:16; 15:13.