Ndi Ọmọdiọn̄ọ Orụk Usọbọ Oro Ekemede Ndimek?
Ediwak mbiausọbọ ke Nigeria ke ẹsọbọ owo idem ye unana edikịm iyịp nsịn ke idem. Ndi afo ọmọdiọn̄ọ nsio nsio usụn̄ oro ẹkemede ndisọbọ owo idem ye unana edikịm iyịp nsịn ke idem? Ọfọn ọdiọn̄ọ man anam eti edimek ke n̄kpọ aban̄ade usọbọ ye usiakidem. Se vidio oro No Blood—Medicine Meets the Challenge. Ke oro ebede, bọn̄ akam nyụn̄ da mbụme ẹdude ke idak emi dụn̄ọde se ekekpepde.—Tịm fiọk: Sia vidio emi esịnede n̄kpri itie oro ẹsiakde owo idem, mme ete ye eka ẹkpenyene ndiwụt mbufiọk ke ini ẹsede vidio emi ye n̄kpri nditọ mmọ.
(1) Nso idi akpan ntak emi anamde Mme Ntiense Jehovah ẹsịn edikịm iyịp nsịn ke idem? (2) Ke se iban̄ade usụn̄ usọbọidem, nso ke Mme Ntiense Jehovah ẹyom? (3) Nso akpan unen ke mbon udọn̄ọ ẹnyene? (4) Ntak emi owụtde eti ibuot ndimek ibọkusọbọ efen oro ẹnọde utu ke ndikịm iyịp nsịn ke idem-e? (5) Ke ini ekese iyịp ọwọrọde owo ke idem, ewe n̄kpọ iba ke mbiausọbọ ẹkpesọsọp ẹnam? (6) Nso idi akpan n̄kpọ inan̄ oro ẹkpenamde ẹban̄a ibọkusọbọ efen oro ẹnọde utu ke edikịm iyịp nsịn ke idem? (7) Didie ke mbiausọbọ ẹkeme (a) ndisụhọde uwọrọiyịp, (b) ndibiọn̄ọ ndatndat nsen iyịp ndiwọrọ, (c) ndin̄wam idem owo osion̄o iyịp edi, (d) ndifiak mbọ iyịp oro ọwọrọde? (8) Tịn̄ nte (a) ẹsibuakde mmọn̄ ibọk ke iyịp, ye nte (b) ẹsidụhọrede nsen iyịp. (9) Nso ke afo okpoyom ẹtịn̄ ẹnọ fi ẹban̄a usọbọ efen ekededi oro ẹnọde utu ke edikịm iyịp nsịn ke idem? (10) Ndi ẹkeme ndinam akpan ye awak-n̄kukọhọ usiakidem ye unana edikịm iyịp nsịn ke idem? (11) Nso eti ndutịm ke n̄ka mme ọfiọk ibọkusọbọ ẹnam idahaemi?
Ndinyịme ndusụk usọbọ oro ẹwụtde ke vidio emi edi ọkpọkpọ ubiere nte ekemde ye ubieresịt owo kiet kiet oro Bible ọnọde ukpep. Ndi amanam ubiere aban̄a orụk usọbọ eke idemfo ye eke nditọ fo oro afo ekpenyịmede ndibọ, ndien ekem ewet n̄kpọ ọyọhọ kad DPA? Man ọdiọn̄ọ kpukpru se ẹtịn̄de ẹban̄a n̄kpọ emi, tịn̄ enyịn dụn̄ọde “Mme Mbụme Ẹtode Mme Andikot” ke nsiondi Enyọn̄-Ukpeme eke June 15, 2004, ye October 15, 2000. Ekem da babru mbụme emi odude ke esịne-esịt Utom Obio Ubọn̄ Nnyịn eke December 2006, emi ibuotikọ edide, “Didie ke N̄kpese N̄kpri N̄kpatan̄a N̄kpọ Emi Ẹdade Ẹto Iyịp ye Mme Usụn̄ Usọbọidem Oro Ẹbuanade Iyịp Mi?,” nam ubiere idemfo ban̄a orụk ibọkusọbọ emi afo edinyịmede ye enye emi mûdunyịmeke. Ke akpatre, kụt ete ke imosion̄o se emekde iwet ke kad DPA fo. Akpana etịm anam mbon oro afo emekde nte mme anditịn̄ ikọ ke ibuot fo mban̄a usọbọidem ye iman fo emi mîdịghe Mme Ntiense ẹdiọn̄ọ mme ubiere fo.
[Ekebe ke page 2]
• Nte afo emebiere m̀mê ewe usụn̄ usọbọidem ke imọ ye nditọ imọ idinyịme ndibọ?
• Ndi afo emesikama kad DPA asan̄a mbak n̄kpọ ekpetịbe ke mbuari?