Kpukpru Owo Ẹkeme Nditịp Nsịn ke Edinam Mbufa Mbet
1 Owo kiet kpọt ikemeke ndinam owo akabade edi mbet. Jehovah ekeme ndida kpukpru “nsan̄autom” esie n̄n̄wam nditọ ukpepn̄kpọ Bible ẹkọri ke n̄kan̄ eke spirit. (1 Cor. 3:6-9) Nnyịn owo kiet kiet imesin̄wam mbufa owo ebe ke ndinọ ibọrọ oro otode esịt ke mme mbono esop Christian ye ke ndidu eti uwem, emi owụtde in̄wan̄-in̄wan̄ nte ke spirit Abasi ke anam utom ke uwem nnyịn. (John 13:35; Gal. 5:22, 23; Eph. 4:22, 23) Nso efen ke ẹkeme ndinam man ẹn̄wam mbufa owo?
2 Nte Esop: Kpukpru nnyịn imekeme ndiwụt ke imenyene udọn̄ ke idem mbon oro ẹtọn̄ọde ndidụk mbono esop ebe ke ndikọm mmọ ufiop ufiop nnyụn̄ nneme nneme ye mmọ mbemiso mbono esop ọtọn̄ọde ye ke ẹma ẹkesuana. Kop se ete kiet eketịn̄de mi aban̄a akpa ini oro enye okodụkde mbono esop: “Ami mma nsobo ye mbon oro ẹnyenede ata ima ẹkan, ẹdide ata isenowo, ke usen kiet akan nte akanam nsobode ke ufọkederi oro ẹkemande mi ẹsịn. Ama ana in̄wan̄-in̄wan̄ nte ke ami mmokụt akpanikọ.” Enye ama ana baptism ke ọfiọn̄ itiaba ẹma ẹkebe tọn̄ọ nte enye okodụk akpa mbono esop.
3 Ke ini eyen ukpepn̄kpọ Bible anamde n̄kọri ke n̄kan̄ eke spirit, toro enye ke ofụri esịt. Nte enye ke ọyọ ukọbọ? Nte enye ke odụk mbono esop kpukpru ini? Nte enye ama enyene uko ndibọrọ mbụme? Nte enye esịn enyịn̄ ke Ufọkn̄wed Utom Ukara Abasi, mîdịghe nte enye ọtọn̄ọ ndibuana ke an̄wautom? Toro enye ke n̄kọri oro enye anamde. Emi eyesịn udọn̄ ọnọ enye onyụn̄ ọsọn̄ọ enye idem.—N̄ke 25:11.
4 Nte Ada Ukpepn̄kpọ Bible: Ndusụk mme asuanetop ẹmen̄wam nditọ ukpepn̄kpọ Bible mmọ ẹmehe ye mme owo ke esop ebe ke ndidọhọ mme asuanetop efen ẹtiene mmimọ ẹka ukpepn̄kpọ Bible mmimọ. Babak kot eyen ukpepn̄kpọ edidụk mbono esop. Ke ini enye ọtọn̄ọde ndidụk mbono esop, kûtre ndimen enye n̄wụt mbon en̄wen. Nte enye ke an̄wana ndikan idiọk edinam, utọ nte edin̄wọn̄ sika? Nte odu owo ke ubon mmọ oro mîmaha enye ekpep Bible? Enye ekeme ndibọ ufọn nto edinyene nneme ye asuanetop oro okosobode onyụn̄ akande ukem mfịna oro.—1 Pet. 5:9.
5 Mbufa owo ẹyom esop ẹn̄wam mmimọ ke n̄kan̄ eke spirit. Kpukpru owo ẹkeme ndin̄wam mmọ ẹnam n̄kọri ebe ke ndinyene ọkpọkpọ udọn̄ ke idem mmọ.