Ediyarade—Ubọn̄ Ubọn̄ Ata-Utịt Esie Emekpere!
1 “Inemesịt edi eke enye emi okotde ye mmọ emi ẹkopde ntịn̄nnịm ikọ emi, ẹnyụn̄ ẹnịmde mme n̄kpọ eke ẹwetde ke esịt, koro edimek ini emekpere.” (Edi. 1:3) Mme ikọ emi ẹwụt ufọn oro n̄wed Ediyarade enyenede, akpan akpan sia nnyịn idude uwem ke edimek ini oro ediwak ke otu ntịn̄nnịm ikọ esie ẹsude. Nte odotde, nnyịn iyọtọn̄ọ ndikpep n̄wed Ediyarade—Ubọn̄ Ubọn̄ Ata-Utịt Esie Emekpere! ke Ukpepn̄kpọ N̄wed Esop ke urua ọtọn̄ọde January 8, 2007.
2 Ọtọn̄ọde ke akpatre ini oro nnyịn ikekpepde n̄wed Ata-Utịt Ediyarade ke Ukpepn̄kpọ N̄wed Esop, ererimbot omokpụhọde ke ediwak usụn̄. (1 Cor. 7:31) N̄ko n̄ko, ediwak owo oro ẹtienede ẹbuana ke udịm mme ọkwọrọ eti mbụk Obio Ubọn̄ akananam itieneke ibuana ke edineme mme ufan̄ikọ kiet kiet ke n̄wed Ediyarade. Edikpep n̄wed Ata-Utịt Ediyarade ekpenyene ndin̄wam nnyịn ika iso idu ke edidemede iban̄a se inade ke iso.—Edi. 16:15.
3 Biere ndidụk Ukpepn̄kpọ N̄wed Esop kpukpru urua. Se ẹdikpepde ayan̄wam nnyịn ndika iso ndu ke ukpeme, mme etop oro Jesus ọkọnọde ẹsọk ufọkabasi itiaba ẹyen̄wam nnyịn n̄ko ndifep se ikemede ndibiat idaha nnyịn ke n̄kan̄ eke spirit ye ebuana nnyịn ke an̄wautom.—Edi. 1:11, 19.
4 Nen̄ede Tịm Idem: Mbemiso akade ukpepn̄kpọ n̄wed esop, kot mme ufan̄ikọ oro ẹdinemede ke n̄wed Ediyarade. Tịm fiọk nte N̄wed Abasi ọkọkde ibuot aban̄a onyụn̄ anamde mme ufan̄ikọ emi ẹn̄wan̄a. Domo ndifiọk mme akpan n̄kpọ man ẹkeme nditụk fi esịt. (Neh. 8:8, 12) Da ini tie kere nyụn̄ bụp idemfo ete: ‘Nso ke emi ekpep mi aban̄a Jehovah ye nte enye anamde uduak esie osu? Didie ke n̄keme ndinam n̄kpọ ekekem ye uduak esie nnyụn̄ n̄n̄wam mbon efen?’
5 Isua 92 ẹbe tọn̄ọ nte “usen Ọbọn̄” ọkọtọn̄ọ ke 1914. (Edi. 1:10) Mme n̄kpọntịbe emi ẹnyen̄ede ererimbot, oro ẹkebemde iso ẹtịn̄ ẹban̄a ke n̄wed Ediyarade ẹyetịbe ke ini iso. Ukpepn̄kpọ n̄wed Ata-Utịt Ediyarade eyenen̄ede enem onyụn̄ ọsọn̄ọ mbuọtidem nnyịn nte ke “ekọn̄ akwa usen Abasi Ata Ọkpọsọn̄” ye obufa ererimbot ke ẹkpere.—Edi. 16:14; 21:4, 5.