N̄wam Mbon En̄wen Ẹkabade Ẹdi Mme Ufan Abasi
1 Mfịn, ke ẹkpep mme owo ẹtode kpukpru idụt mme usụn̄ Jehovah. (Isa. 2:2, 3) Nte ededi, man utọ mbon oro “ẹn̄wụm mfri ke ime,” ana mmọ ẹma Jehovah. (Luke 8:15; Mark 12:30) Ke utọ ima oro mîdụhe, mmọ idinyeneke odudu ndibiọn̄ọ ndiọi odudu m̀mê ndinyene uko ndinam se inende. Usụn̄ kiet ndin̄wam mbon en̄wen ẹnyene eti itie ebuana ye Jehovah edi ndinam mmọ ẹnen̄ede ẹma mme edu esie. Sịn udọn̄ nọ mmọ nditịm n̄kere mban̄a mme ntọt oro ẹdude ke n̄wed San̄a Kpere Jehovah.
2 Uwụtn̄kpọ Fo: Usụn̄ oro afo anamde n̄kpọ ekeme ndinyene okopodudu utịp ke esịt nditọ ukpepn̄kpọ Bible. Ke ini mmọ ẹkụtde nte afo adade itie ufan fo ye Jehovah ke akpan n̄kpọ ẹnyụn̄ ẹkụtde nte emi otụkde uwem fo, oro ekeme ndinụk mmọ ndikọri utọ ọkpọkpọ itie ebuana oro ke idemmọ. (Luke 6:40) Ke akpanikọ, uwụtn̄kpọ oro nnyịn inịmde esinen̄ede enyene odudu ke idem mbon en̄wen akan se nnyịn itịn̄de.
3 Akpan usụn̄ oro mme ete ye eka ẹkpepde nditọ mmọ ndima Jehovah edi ke uwụtn̄kpọ mmọ. (Deut. 6:4-9) Ebe ye n̄wan kiet oro ẹkeyomde ndibọk nditọ mmọ ke usụn̄ akpanikọ ẹma ẹyom item ẹto mme ete ye eka oro ẹkụtde unen. Ebe ọkọdọhọ ete: “Kpukpru mbon oro n̄kobụpde ẹkedọhọ ke uwụtn̄kpọ oro mme ete ye eka ẹnịmde edi akpan n̄kpọ.” Ntem, mme ete ye eka ẹkeme ndida ofụri usụn̄ uwem mmọ n̄wụt nditọ mmọ se ọwọrọde ndidi “ufan Abasi.”—Jas. 2:23.
4 Akam Ofụri Esịt: Afo emekeme n̄ko ndin̄wam mbon en̄wen ẹdi ufan Jehovah ebe ke ndikpep mmọ ndibọn̄ akam nto esịt. Afo emekeme ndiwụt mmọ akam uwụtn̄kpọ Jesus, ọkọrọ ye ediwak akam ofụri esịt oro ẹwetde ke N̄wed Abasi. (Matt. 6:9, 10) Afo emekeme ndida akam fo n̄kpep nditọ ye nditọ ukpepn̄kpọ Bible fo nte ẹkemede ndibọn̄ akam. Ke ini mmọ ẹkopde se afo etịn̄de ke ofụri esịt, mmọ ẹyefiọk nte afo ekerede aban̄a Jehovah. Sịn udọn̄ nọ mmọ ‘ndikọbọ ke akam’ ke ini mmọ ẹsobode mme idomo. (Rome 12:12) Ke ini mmọ ẹkụtde nte Jehovah an̄wamde mmọ ke mme ini mbaba, mmọ ẹyeberi edem ke Jehovah ẹnyụn̄ ẹma enye nte ata ufan.—Ps. 34:8; Phil. 4:6, 7.