Nen̄ede Kere Ban̄a Mbon Efen—Ebe ke Ndifọn Ido
1 ‘Jehovah ọfọn ido.’ (Ps. 145:8) Okposụkedi enye edide Andikara Ekondo, enye ọfọn ido, ekere aban̄a, onyụn̄ ọfiọk nte anamde n̄kpọ ye mme anana-mfọnmma ubonowo. (Gen. 13:14; 19:18-21, 29) Nnyịn imekeme ndifori usụn̄ oro ikwọrọde eti mbụk ebe ke ndikpebe Abasi mfọnido. (Col. 4:6) Emi abuana se ikande edinyene eti ido ye ediwụt ukpono ke ini itịn̄de ikọ.
2 To ke Enyịnusụn̄ Sịm Enyịnusụn̄: Nso edieke ikade ikese enyeneufọk ke ini oro mîfọnke ye enye m̀mê ke ini oro enye mînyeneke ifet ndineme nneme ye nnyịn? Ọkpọfọn nnyịn ndifiọk utọ ini emi ebe ke ndinam nneme nnyịn edi ata ibio ibio mîdịghe ebe ke nnyịn ndidọhọ ke iyafiak idi ini efen. Nnyịn ikpọkọbọke ke ndidọhọ mme owo ẹbọ mme n̄wed nnyịn edieke mmọ mîyomke. Edikere mban̄a mbon efen n̄ko ayanam nnyịn iwụt ukpono inọ inyene mmọ utọ nte ke ndiberi inuaotop ye mme usụn̄ufọk, ndision̄o ikpaukot mbemiso idụkde ufọk mmọ, ndinyụn̄ n̄kpep nditọ nnyịn ndinam ntre. Nnyịn ikpenyene ndikụt nte ke n̄wed ekededi oro nnyịn inịmde inọ mbon oro mîdụhe ke ufọk inaha ke ebiet emi mbon efen ẹkụtde. Ke akpanikọ, mfọnido oyonụk nnyịn ndinam n̄kpọ ye mbon efen ke ukem usụn̄ oro ikpoyomde mmọ ẹnam ye nnyịn.—Luke 6:31.
3 Ke Utom Efak: Ke ini inamde utom efak, nnyịn imekeme ndiwụt mfọnido ebe ke ndinọ mbon efen ufan̄ ndisan̄a mbe, ndinyụn̄ ntre ndikwi iso urua owo. Nnyịn ikpenyene ndinen̄ede mfiọk idaha mme owo, idomode ndinyene nneme ye mbon oro ẹnyenede esisịt ini utu ke mbon oro nnyịn inen̄ede ikụt ke inyeneke ini. Ndusụk ini esiyom nnyịn imenede uyo itịn̄ ikọ ke efak oro etiede uyom uyom man ẹkop se itịn̄de. Edi nnyịn ikpenyene ndinam ntre ukpono ukpono, idịghe ndiwọn̄ọde ntịn̄enyịn mbon efen nnọ idem nnyịn.—Matt. 12:19.
4 Ke Ini Idade Urụk Ukopikọ Inọ Ikọ Ntiense: Edikere mban̄a mbon efen ayanam nnyịn ida urụk ukopikọ inọ ikọ ntiense ke ebiet oro mîtiehe uyom uyom. Ke ini nnyịn isọpde inam ẹdiọn̄ọ owo oro nnyịn idide ye ntak oro nnyịn ikotde, nnyịn iwụt nti edu. Edieke itịn̄de ikọ nnennen isịn ke n̄kpọ utịn̄ikọ, inyụn̄ ikamade uyo nte ọfọnde, mbon efen ẹyetiene ẹbuana ke nneme N̄wed Abasi oro ọbọpde-bọp. (1 Cor. 14:8, 9) Nnyịn ikpebe Jehovah Abasi emi ọfọnde ido, ebe ke ndifọn ido, ndikere mban̄a mbon en̄wen, nnyụn̄ nnyene eti edu uwem ke nsio nsio usụn̄ emi.