Edikwọrọ Obio Ubọn̄—Ọsọn̄urua Ifetutom
1 Ediwak biliọn mme andidụn̄ isọn̄ ẹmebọ ufọn ke usen ke usen ẹto ndutịm oro Jehovah anamde man uwem aka iso. (Matt. 5:45) Nte ededi, ibat ibat owo ẹnyene n̄wọrọnda ifet ediwụt Andibot mmọ esịtekọm ebe ke ndikwọrọ eti mbụk Obio Ubọn̄ Abasi. (Matt. 24:14) Afo ada ifetutom emi ke ọsọn̄urua n̄kpọ adan̄a didie?
2 Edikwọrọ Obio Ubọn̄ ada ukpono ọsọk Abasi onyụn̄ anam mbon oro ẹfụhọde ke ntak ndutịme emi ẹdude mfịn ẹnyene idotenyịn ye emem. (Heb. 13:15) Mbon oro ẹnamde n̄kpọ ẹban̄a etop emi ẹyenyene nsinsi uwem. (John 17:3) Utom idịbi udia m̀mê ubọkọkọ ewe ekeme ndinọ utọ utịp oro? Apostle Paul ama owụt esịtekọm aban̄a utom ukwọrọikọ ke usụn̄ oro enye akanamde utom emi. Enye akada utom emi nte n̄kpọuto.—Utom 20:20, 21, 24; 2 Cor. 4:1, 7.
3 Ndiwụt Esịtekọm Mban̄a Ọsọn̄urua Ifetutom Nnyịn: Usụn̄ kiet oro nnyịn iwụtde esịtekọm ke ifet oro inyenede ndikwọrọ ikọ edi ndikere mban̄a uduot ukwọrọikọ nnyịn. Ndi nnyịn imesida ini itịm nneme oro editụkde esịt mme andikpan̄ utọn̄ nnọ nnyịn? Ndi nnyịn imekeme ndifori usọ nnyịn ke nte idade N̄wed Abasi inyene nneme ye ke nte ikọkde ibuot ye mme owo? Ndi nnyịn imesitịm inam utom ke efakutom oro ẹbaharede ẹnọ nnyịn? Ndi nnyịn imekeme nditọn̄ọ nnyụn̄ n̄ka iso nnịm ukpepn̄kpọ Bible? Ukem nte mme anam-akpanikọ Christian, eke ini edem ye eke idahaemi, nnyịn imenyene nnennen ekikere iban̄a utom emi, inyụn̄ ida ifet oro ke ọsọn̄urua n̄kpọ.—Matt. 25:14-23.
4 Ke idụkde idem akani owo, idem mîsọn̄ke nnyịn, m̀mê isobode n̄kpọsọn̄ idaha efen, edi n̄kpọ ndọn̄esịt ndifiọk nte ke ẹnen̄ede ẹdara ifịk ifịk ukeme oro isịnde ndibuana ke utom ukwọrọikọ. Ikọ Abasi anam nnyịn ifiọk ke Jehovah ada mme utọ ukeme oro isịnde ke ndinam n̄kpọ esie ke ọsọn̄urua, ọkọrọ ye n̄kpri ukeme oro mînyeneke se ọwọrọde ke enyịn mbon efen.—Luke 21:1-4.
5 Edikwọrọ Obio Ubọn̄ esinam ẹnen̄ede ẹkop uyụhọ. Eyenete an̄wan kiet oro ekedide isua 92 ke emana ọkọdọhọ ete: “Nso ifet ke edi ntem ndikere mban̄a se ibede isua 80 emi nyakde idem nnọ ndinam utom Abasi—ye unana editua n̄kpọfiọk! Edieke n̄kpekemede nditọn̄ọ ntak ndu uwem mi, n̄kpodu enye ke ukem usụn̄ emi koro, ke akpanikọ, ‘ima Abasi ọfọn akan uwem.’” (Ps. 63:3) Nnyịn n̄ko ikpakam iwụt esịtekọm ke ọsọn̄urua ifetutom emi Abasi ọnọde mi, oro edi, utom edikwọrọ Obio Ubọn̄.