Ikpehe 9: Ndinịm Ukpepn̄kpọ Bible Oro Enyenede Uforo
Nditịm Nditọ Ukpepn̄kpọ Idem Ndinọ Ikọ Ntiense Ido Nneme
1 Ke ini Andrew ye Philip ẹkefiọkde ke Jesus ekedi Messiah oro ẹken̄wọn̄ọde, mmọ ikemen̄eke nditịn̄ aduai-owo-idem mbụk oro nnọ mbon en̄wen. (John 1:40-45) Ukem oro mfịn, nte nditọ ukpepn̄kpọ Bible ẹtọn̄ọde ndibuọt idem ke se mmọ ẹkpepde, esinụk mmọ nditịn̄ mban̄a emi. (2 Cor. 4:13) Didie ke nnyịn ikeme ndisịn udọn̄ nnọ mmọ ndinọ ikọ ntiense ido nneme ndinyụn̄ ntịm mmọ idem ndinam ntre uforo uforo?
2 Afo emekeme ndikam mbụp eyen ukpepn̄kpọ oro m̀mê enye eneme se enye ekpepde ke Bible ye mbon en̄wen. Ekeme ndidi enye enyene mme ufan ye mbonubon emi enye ekemede ndidọhọ ẹtiene ẹdụk ukpepn̄kpọ Bible imọ. Bụp enye m̀mê mme nsan̄autom, mme nsan̄a ufọkn̄wed, m̀mê mme ọdiọn̄ọ en̄wen ekededi ẹwụt udọn̄ ke eti mbụk. Enye ekeme ndida mme usụn̄ emi ntọn̄ọ ikọ ntiense. N̄wam enye ọdiọn̄ọ ke oyom enye owụt mbufiọk onyụn̄ owụt ukpono ye mfọnido ke ini enye etịn̄de ikọ ye mbon en̄wen aban̄a Jehovah Abasi ye mme uduak esie.—Col. 4:6; 2 Tim. 2:24, 25.
3 Ndineme Se Mmọ Ẹnịmde ke Akpanikọ ye Mbon Efen: Edi ata akpan n̄kpọ ndikpep nditọ ukpepn̄kpọ Bible ndida Ikọ Abasi ke ini ẹnemede se mmọ ẹnịmde ke akpanikọ ye mbon efen. Ke mme akpan ikpehe ke ini ukpepn̄kpọ, bụp eyen ukpepn̄kpọ: “Didie ke afo akpada Bible anam akpanikọ emi an̄wan̄a ubon fo?” mîdịghe “Ewe itien̄wed Bible ke afo akpada ọsọn̄ọ emi ọnọ ufan fo?” Kpan̄ utọn̄ kop nte enye ọbọrọde, nyụn̄ wụt nte enye ekemede ndikọn̄ ukpepn̄kpọ esie ke N̄wed Abasi. (2 Tim. 2:15) Ke ndinam ntre, afo etịm eyen ukpepn̄kpọ oro idem ndinọ ikọ ntiense ido nneme ndien ke ini enye odotde, etiene abuana ke utom ukwọrọikọ oro esop odiomide.
4 Owụt eti ibuot nditịm nditọ ukpepn̄kpọ Bible idem nnọ ubiọn̄ọ. (Matt. 10:36; Luke 8:13; 2 Tim. 3:12) Ke ini mbon en̄wen ẹbụpde mbụme m̀mê ẹtịn̄de ikọ ẹban̄a Mme Ntiense Jehovah, emi ekeme ndiberede ifet nnọ nditọ ukpepn̄kpọ ndinọ ikọ ntiense. Ediye uduot ekpri n̄wed oro Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ? ekeme ndinam mmọ ‘ẹben̄e idem’ ndida nnọ se mmọ ẹnịmde ke akpanikọ. (1 Pet. 3:15) Enye ọdọn̄ọ nti ntọt oro mbufa owo ẹkemede ndida n̄n̄wam mme ufan ye mbonubon oro ẹnyenede nti uduak ndifiọk mme ukpepn̄kpọ ye mme edinam nnyịn oro ẹkọn̄ọde ke Bible.