Didie ke Nnyịn Ikpọkwọrọ Ikọ Inọ Mme Iman Nnyịn?
1. Ntak oyomde iwụt mbufiọk ke ini ikwọrọde ikọ inọ iman nnyịn?
1 Nso akwa idatesịt ke ekpedi ntem ndidụk obufa ererimbot ye mbon ima nnyịn, idianade kiet ye mmọ ikpono Jehovah! Ebede ke ndikwọrọ ikọ nnọ iman nnyịn, idara idara idotenyịn emi ekeme ndikabade ndi ata idem n̄kpọ. Nte ededi, man inam oro ke usụn̄ emi ọnọde nduọkodudu, oyom iwụt mbufiọk. Esenyịn circuit kiet ọkọdọhọ ete: “Edi mbon oro ẹdemerede udọn̄ mme iman mmọ ke ndinọ ikọ ntiense ke usụn̄ oro enyenede-nyene udomo ẹsinyene nti utịp.” Didie ke ikpanam emi?
2. Didie ke edinyene udọn̄ ke iman nnyịn ekeme ndidemede udọn̄ mmọ?
2 Demede Udọn̄ Mmọ: Tịm kere nte ekpedemerede udọn̄ iman fo. (N̄ke 15:28) Nso ibehe mmọ? Mme mfịna ewe ke mmọ ẹsobo? Eyedi afo emekeme ndiwụt mmọ ibuotikọ m̀mê nditịn̄ mban̄a inem inem itie N̄wed Abasi ke ibuotikọ oro edide akpan n̄kpọ udọn̄ ọnọ mmọ. Edieke iman fo mîdụn̄ke ikpere fi, afo emekeme ndida leta m̀mê urụk ukopikọ nnam emi. Ye unana edin̄wan̄a ikọ mfụk mmọ, tọ n̄kpasịp akpanikọ nyụn̄ beri edem ke Jehovah ayanam mmọ ẹkọri.—1 Cor. 3:6.
3. Didie ke udọn̄ oro iman nnyịn ẹnyenede ke idem nnyịn ekeme ndiberede usụn̄ nnọ nnyịn ndikwọrọ ikọ nnọ mmọ?
3 Jesus ama eteme owo oro enye ekebịnde mme demon osion̄o ke idem ete: “Nyọn̄ ufọk tiene mme ufan [iman, NW] fo, nyụn̄ sian mmọ ikpọ n̄kpọ eke Ọbọn̄ akanamde ọnọ fi, ye nte enye akatuade fi mbọm.” (Mark 5:19) Kere nte emi okotụkde iman esie! Okposụkedi afo mûnyeneke utọ ifiọk n̄kpọntịbe emi, anaedi mme iman fo ẹnyene udọn̄ ke mme n̄kpọ oro afo m̀mê nditọ fo ẹnamde. Nditịn̄ mban̄a utịn̄ikọ emi afo ọkọnọde ke Ufọkn̄wed Utom Ukara Abasi, mbono emi afo okodụkde, afo ndika n̄kese Bethel, m̀mê akpan n̄kọri emi afo anamde, ekeme ndiberede usụn̄ nnọ fi nditịn̄ mme n̄kpọ en̄wen oro ẹban̄ade Jehovah ye esop esie nnọ mmọ.
4. Nso ke nnyịn ikpefep ke ini inọde iman nnyịn ikọ ntiense?
4 Wụt Mbufiọk: Ke ini ọkwọrọde ikọ ọnọ mme iman, kûn̄wan̄a kpukpru ikọ ufụk mmọ inikiet. Eyenete kiet emi etide ini oro enye ọkọtọn̄ọde ndikpep Bible ọdọhọ ete: “Ami ndien mma nsida ediwak hour ntịn̄ se ikperede ndidi ofụri n̄kpọ oro n̄kekpepde nto Bible ye unana nduọkodudu nnọ eka mi, ndien emi ekesiwak ndisụn̄ọ ke eneni, akpan akpan ye ete mi.” Idem ke ini iman owụtde udọn̄ ke etop Bible, bọrọ mme mbụme esie ke usụn̄ oro anamde enye oyom ndifiọk n̄kpọ efen efen. (N̄ke 25:7) Ke kpukpru idaha, wụt ukpono, mfọnido, ye ime, ukem nte akpanamde ke ini etịn̄de ikọ ye isenowo ke utom ukwọrọikọ.—Col. 4:6.
5. Nso ke nnyịn ikpanam edieke iman nnyịn mînyịmeke ikwọrọ ikọ inọ mmọ?
5 Ke idaha kiet, mme iman Jesus ẹkekere ke ibuot ọbọhọ enye. (Mark 3:21) Ke ukperedem, ndusụk mmọ ẹma ẹkabade ẹdi mme andinịm ke akpanikọ. (Utom 1:14) Kûkpa mba edieke akpa usio-ukot ke ndineme ikọ Abasi ye iman fo mîn̄wụmke mfri. Mme idaha ye ido mmọ ẹkeme ndikpụhọde. Ka iso ndiyom ifet en̄wen ndibuana n̄kpọ oro ekemede ndidemede udọn̄ mmọ. Afo emekeme ndinyene inemesịt oro asan̄ade ye edin̄wam mmọ ẹsan̄a ke usụn̄ oro adade esịm nsinsi uwem.—Matt. 7:13, 14.