“Mbufo Ẹma Jehovah, Kpukpru Mbon-Ima Esie”
Nditi N̄kpa Jesus ke April 4
1 Ke ediwak isua emi ẹkebede, ke ini Ukraine okodude ke idak ukara Communist, mbon ukara ẹma ẹsinen̄ede ẹyep nditọete nnyịn—akpan akpan ke ini Udia Mbubịteyo Ọbọn̄ ekesisan̄ade ekpere—sia mmọ ẹkesiyomde ndidiọn̄ọ ebiet emi mmọ ẹdisopde idem. Emi ama esikama mfịna kpukpru ini, sia edide ukara ẹma ẹsidiọn̄ọ usen Editi emi. Nso ke nditọete oro ẹkenam? Eyenete an̄wan kiet ama enyene ufọk idakisọn̄ emi mmọn̄ ekesitọde ofụk. Sia ukara mîkekereke ke mme owo ẹkeme ndisop idem do, nditọete ẹma ẹkọn̄ n̄kpoto ke enyọn̄ mmọn̄ oro ekesịmde owo edọn̄. Okposụkedi mmọ ẹkesinyenede ndisọsọrọ ke idak dek, owo ndomokiet ikafịnake mmọ nte mmọ ẹkesinịmde Editi mmọ ye idatesịt.
2 Ubiere nditọete nnyịn ke Ukraine ndinam ewụhọ oro ẹkewụkde ẹte ẹti n̄kpa Jesus ekedi utịbe utịbe usụn̄ mmọ ndiwụt ima oro mmọ ẹmade Abasi. (Luke 22:19; 1 John 5:3) Ini ekededi oro nnyịn isobode ubiọn̄ọ ke uwem, nnyịn ikpakam ibọ nsịnudọn̄ ito utọ uwụtn̄kpọ oro inyụn̄ ibiere ndidụk Udia Mbubịteyo Ọbọn̄ ke April 4. Ke inamde ntre, nnyịn iwụt ke inyene ukem ekikere andiwet psalm emi ọkọkwọde ete: “O, mbufo ẹma Jehovah, kpukpru mbon-ima esie.”—Ps. 31:23.
3 N̄wam Mbon En̄wen Ndikọri Ima Oro Mmọ Ẹmade Abasi: Ima oro imade Abasi anam nnyịn ikot mbon en̄wen ẹditiene nnyịn ẹbuana ke Editi. Esịne-esịt Utom Obio Ubọn̄ Nnyịn eke February ama esịn udọn̄ ọnọ nnyịn ndiwet enyịn̄ mbon oro iyomde ndikot ẹdi Editi. Nte afo ke anam emi ye ntịn̄enyịn ebe ke ndinọ owo kiet kiet oro ekewetde enyịn̄, ikot? Da ini nam an̄wan̄a owo oro se edinam emi ọwọrọde. Afo emekeme ndisịn udọn̄ nnọ mmọ ndidụk edinam emi ebe ke nditi mmọ ini ye usen Editi, ndien afo emekeme ndisan̄a ye mmọ ndụk usọrọ emi edieke oyomde ẹnam oro.
4 Ke itie usopidem emi, sịn san̄asan̄a ukeme ndikọm mbon oro ẹyerede ikot nnyịn, nyụn̄ dara mmọ. Didie ke afo ekeme ndinam ima oro mmọ ẹmade Jehovah ọkọri? Ben̄e idem ndibọrọ mme mbụme mmọ. Ben̄e idem n̄ko nditọn̄ọ ukpepn̄kpọ Bible ye mmọ edieke ekemede. Nọ mmọ ikot ndidụk mme mbono esop nnyịn eke urua ke urua. Mbiowo ẹyenen̄ede ẹnọ mme Christian oro mîwọrọke an̄wautom aba ntịn̄enyịn. Mmọ ẹkeme ndidiomi ndika n̄kese utọ mbon oro nnyụn̄ nsịn udọn̄ nnọ mmọ ndifiak ntọn̄ọ utom, ndien mmọ ẹkeme ndineme mme akpan n̄kpọ oro ẹkenemede ke utịn̄ikọ Editi oro.—Rome 5:6-8.
5 Ndinam Ima Oro Imade Jehovah Etetịm Otụn̄ọ: Nditie n̄kere mban̄a enọ ufak ekeme ndinam ima oro imade Jehovah ye Eyen esie etetịm otụn̄ọ. (2 Cor. 5:14, 15) Eyenete nnyịn an̄wan kiet emi ama okodụk Editi ke ediwak isua idahaemi ọkọdọhọ ete: “Nnyịn isak iso ise Editi. Enye esikabade edi ata akpan n̄kpọ kpukpru isua. Mmeti nte ndade ke ufọk unịm okpo ke isua 20 emi ẹkebede, nsede okpo edima ete mi nnyụn̄ ndide ndinyene ata ntotụn̄ọ esịtekọm mban̄a ufak. Mbemiso oro, enye ekedi ikpîkpu ifiọk ibuot. Oh, mma mfiọk kpukpru mme itie N̄wed Abasi ye nte n̄kemede ndinam mmọ ẹn̄wan̄a! Edi ekedi n̄kukụre ke ini n̄kokụtde nte n̄kpa edide ata idem n̄kpọ ke esịt mi ọkọyọhọ ye idatesịt kaban̄a se ẹdidade ọsọn̄urua ufak oro ẹnam ẹnọ nnyịn.”—John 5:28, 29.
6 Nte usenọfiọn̄ oro ẹdinịmde Editi eke isua emi asan̄ade ekpere, da ini wụk esịt fo ke edinam oro. (2 Chron. 19:3) Tie kere san̄asan̄a edikot Bible eke Editi, emi odude ke Ẹdụn̄ọde N̄wed Abasi ke Usen ke Usen—2004 ye ke 2004 Calendar. Ndusụk owo ẹsima ndidụn̄ọde ibuot 112-116 ke n̄wed Akakan Owo ke ini mmọ ẹnịmde ukpepn̄kpọ ubon. Mbon eken ẹsinam ndụn̄ọde efen efen ke mme n̄wed un̄wam ukpepn̄kpọ oro otu asan̄autom emi anamde akpanikọ, onyụn̄ enyenede ọniọn̄ ọnọde. (Matt. 24:45-47) Kpukpru nnyịn imekeme ndisiak enọ ufak oro ke akam ofụri esịt oro ibọn̄de. (Ps. 50:14, 23) Ke akpanikọ, ke ini Editi emi, nnyịn ikpakam ika iso nditie n̄kere ima oro Jehovah amade nnyịn inyụn̄ iyom mme usụn̄ ndiwụt ima oro imade enye.—Mark 12:30; 1 John 4:10.