Ata Edidianakiet Christian—Didie?
1 Nso ikeme ndidian se ibede owo miliọn itiokiet emi ẹtode idụt 234 ye n̄kpọ nte otu usem 380 ọtọkiet? Utuakibuot Jehovah Abasi kpọt ekeme. (Mic. 2:12; 4:1-3) Mme Ntiense Jehovah ẹfiọk ẹto ọkpọkpọ ifiọk n̄kpọntịbe nte ke ata edidianakiet Christian edi ata idem n̄kpọ mfịn. Nte “otu-erọn̄ kiet” ke idak “Ekpeme-erọn̄ kiet,” nnyịn imebiere ndibiọn̄ọ edu ubahade eke ererimbot emi.—John 10:16; Eph. 2:2.
2 Uduak Abasi oro mîkemeke ndikpu edi nte kpukpru enyene-ifiọk edibotn̄kpọ ẹdiana kiet ke utuakibuot akpanikọ. (Edi. 5:13) Ke ọfiọkde nte emi edide akpan n̄kpọ, Jesus ama ọbọn̄ akam ke ofụri esịt aban̄a edidianakiet mme anditiene enye. (John 17:20, 21) Didie ke nnyịn owo kiet kiet ikeme nditịp nsịn ke esop Christian ndidiana kiet?
3 Nte Ẹsan̄ade Ẹnyene Edidianakiet: Ke Ikọ ye spirit Abasi mîdụhe, mme Christian ikemeke ndidiana kiet. Nnyịn ndinam se nnyịn ikotde ke Bible ayak spirit Abasi anam utom ifụre ifụre ke uwem nnyịn. Emi anam nnyịn ‘ida emem nte urụk ibọp idem idian ọtọ kiet ke Spirit.’ (Eph. 4:3) Emi onụk nnyịn ndime ime ye kiet eken ke ima. (Col. 3:13, 14; 1 Pet. 4:8) Nte afo emesịn udọn̄ ọnọ edidianakiet ebe ke nditie n̄kere Ikọ Abasi kpukpru usen?
4 Utom oro nnyịn inyenede ndikwọrọ ikọ nnyụn̄ nnam mme mbet adian nnyịn n̄ko ọtọkiet. Ke ini nnyịn inamde utom ukwọrọikọ Christian ye mbon efen, ‘idade esịt kiet in̄wana en̄wan iban̄a mbuọtidem emi odude ke gospel,’ nnyịn ikabade idi “nsan̄autom ke akpanikọ.” (Phil. 1:27; 3 John 8, NW) Nte nnyịn inamde ntre, imọsọn̄ọ mbọbọ ima oro anamde edidianakiet odu ke esop. Ntak mûdọhọke owo oro afo mûsan̄ake kiet ke ndondo emi asan̄a ye afo ke an̄wautom urua emi-e?
5 Nso ifet ke nnyịn inyene ntem ndidi ubak n̄kukụre ata otu nditọete ofụri ererimbot ke isọn̄ mfịn! (1 Pet. 5:9) Ke ndondo emi, ediwak tọsịn owo ẹma ẹkụt edidianakiet ofụri ererimbot emi nnennen nnennen ke Ikpọ Mbono “Ẹnọ Abasi Ubọn̄” eke Ofụri Ererimbot. Nnyịn owo kiet kiet ikpakam itịp isịn ke ọsọn̄urua edidianakiet emi ebe ke ndikot Ikọ Abasi kpukpru usen, ebe ke ndida ima mbiere utọk, onyụn̄ ebe ke ndikwọrọ eti mbụk ke “esịt kiet.”—Rome 15:6.