Ekebe Mbụme

◼ Nso ikpedi idaha usịnen̄kpọ ye ukamaidem nnyịn ke ini ikade ndise mme ufọkidụn̄ Bethel ye mme ufọkutom n̄kọk itieutom?

Ke ini nnyịn ikade ndise Bethel, edide ndisan̄a n̄kanade mme itieutom m̀mê ndika n̄kese mme andibuana ke ubon Bethel, “usịnen̄kpọ, ukamaidem, ye eduuwem nnyịn ẹkpenyene ndidi ukem ye se ẹdoride enyịn ndikụt nto nnyịn ke ini idụkde mme mbonoesop kaban̄a utuakibuot ke Ufọkmbono Obio Ubọn̄.” (om-EF 131) Nte ededi, ẹmekụt ẹte ke ini ẹkade ndise mme ọfis n̄kọk itieutom, ndusụk nditọete iren ye iban ẹsiwak ndisịne n̄kpọ ata nsuahade nsuahade. Emi idotke ke ini ẹkade ndise mme itieutom emi. Usịnen̄kpọ nnyịn ekpenyene ndinịm eti uwụtn̄kpọ, nditịm ndot, nnyụn̄ n̄wụt iso o-bụt, asana ekem onyụn̄ owụt uku oro odotde ye mme asan̄autom Jehovah Abasi.—1 Tim. 2:9, 10.

Emi enen̄ede edi akpan n̄kpọ ke ini ẹkade ndise mme ufọkidụn̄ Bethel ye mme ufọkutom n̄kọk itieutom koro emi esidụri ntịn̄enyịn ediwak mme andida nse oro mîdịghe Mme Ntiense. Utọ mme andida nse oro ẹkeme ndisịm ubiere mban̄a ikọt Abasi ye esop esie ọkọn̄ọde ke se mmọ ẹkụtde. Ọkpọfọn ndineme ye nditọ ukpepn̄kpọ Bible ye mbon en̄wen emi ẹdikade man iti mmọ iban̄a nte edide akpan n̄kpọ ndinọ ntịn̄enyịn ke usịnen̄kpọ ye ukamaidem oro odotde. Ubon Bethel ẹyema mbufo ẹnam emi.

Nte mme asan̄autom Christian, nnyịn inyene ndikpeme mbak usịnen̄kpọ nnyịn edinịm ubiọn̄ọ baba kiet. (2 Cor. 6:3, 4) Utu ke oro, nnyịn kpukpru ini ikpakam “inam ukpepn̄kpọ Abasi Andinyan̄a nnyịn enyene uku ke kpukpru usụn̄” ebe ke eti ukamaidem nnyịn.—Titus 2:10.