April—Ini ‘Ndinam Utom Ọkpọsọn̄ Nnyụn̄ Nsịn̄ede Idem’
1 Mme urua oro ẹbemde ẹnyụn̄ ẹtienede Editi ẹdi ini editie n̄kere n̄kpọ ọnọ ikọt Jehovah. Ini edi emi ndikere mban̄a se n̄kpa Christ akanamde ye idotenyịn emi Abasi ọnọde nnyịn ebe ke iyịp Jesus emi ẹkeduọkde. Nte afo ekerede afiak edem ekesịm April 19 isua oko, nso idụk fi ekikere? Nte afo emekeme nditi iso mme owo oro afo okokụtde ke mbubịteyo oro? idaha eke spirit ke Editi oro? akpan nneme Bible ye mme akam ofụri esịt oro? Eyedi afo ama ebiere ndiwụt ata ọyọhọ ọyọhọ ntọtọn̄ọ esịtekọm mban̄a ima oro Jehovah ye Jesus ẹwụtde fi. Didie ke utọ editie n̄kere oro otụk fi idahaemi?
2 An̄wan̄a nte ke ikọt Jehovah ẹsiwụt esịtekọm oro inua mîkemeke nditịn̄. (Col. 3:15, 17) Akpan akpan ke April isua oko, nnyịn ima iwụt esịtekọm iban̄a enọ edinyan̄a Jehovah ebe ke ndisịn idem nnyịn ke utom ukwọrọikọ Christian. Mme asiakusụn̄ unọ un̄wam ẹma ẹwak ke mme itie tọsịn, ẹdade mbahade 32 eke ikie ẹwak ẹkan n̄wakn̄kan ibat eke isua emi ekebede ke ukem ọfiọn̄ oro ke Nigeria. Ukeme mmọ, ke adianade ye eke kpukpru mme anditan̄a Obio Ubọn̄ eken, ama osụn̄ọ ke obufa n̄wakn̄kan ibat hour, magazine oro ẹnịmde, ye mfiakn̄ka. Ndikụt ẹtọn̄ọde tọsịn mbufa ukpepn̄kpọ Bible ye obufa n̄wakn̄kan ibat mme andidụk Editi ama etịp esịn ke idatesịt nnyịn!
3 Ke akpanikọ, nsọn̄ọ oro idotenyịn nnyịn enyenede edemede nnyịn ndinam n̄kpọ. Enye edi kpa nte apostle Paul ekewetde ete: “Edi emi esịn nnyịn ikpa utom ye en̄wan, koro nnyịn ikodoride enyịn ke odu-uwem Abasi, emi edide Andinyan̄a kpukpru owo, akpan-akpan Andinyan̄a mbon mbuọtidem.”—1 Timothy 4:10.
4 Ke ini Editi emi, didie ke afo edinam mbuọtidem fo ke mme enọ oro Jehovah ọnọde kaban̄a uwem owụt? Ke April isua oko nnyịn ima ikụt udiana n̄wakn̄kan ibat mme anditan̄a Obio Ubọn̄ oro akanam ẹnyenede ke Nigeria. Nte nnyịn imekeme ndiwak n̄kan ibat oro ke April isua emi? Nnyịn imekeme ndinam emi. Edi oyoyom kpukpru mme asuanetop, edide ẹma ẹna baptism ye oro mînaha baptism, ẹbuana. Ediwak mbufa owo n̄ko ẹkeme ndidot ndibuana. Ntem, nte afo anamde ndutịm ndinam utom ọkpọsọn̄ nnyụn̄ nsịn̄ede idemfo ke April isua emi, kere ban̄a mme usụn̄ oro afo ekemede ndidemede mbon efen, esịnede mbufa owo ye mbon oro mîtịmke inyene ifiọk, ndisan̄a ye afo.
5 Ndin̄wam Ndusụk Owo Ẹfiak Ẹtọn̄ọ Utom: Edieke afo ọdiọn̄ọde ndusụk owo oro mîwọrọke an̄wautom ke ọfiọn̄ kiet m̀mê iba, ndusụk afo emekeme ndisịn udọn̄ nnọ mmọ nnyụn̄ ndọhọ mmọ ẹsan̄a ye afo ke utom an̄wautom. Edieke ndusụk owo ke esop mînamke utom aba, mbiowo ẹyesịn san̄asan̄a ukeme ndika n̄kese mmọ nnyụn̄ nsịn udọn̄ nnọ mmọ ndifiak ntọn̄ọ ke April.
6 Ana kpukpru nnyịn ibọn̄ akam iben̄e spirit Jehovah ndisọn̄ọ nnyịn idem ke utom esie. (Luke 11:13) Nso ke nnyịn inyene ndinam man ibọ spirit oro? Kot Ikọ Abasi eke odudu spirit. (2 Tim. 3:16, 17) Ana nnyịn n̄ko ‘ikop se spirit ọdọhọde mme ufọk Abasi’ ebe ke ndidụk kpukpru mbono esop ition eke urua ke urua. (Edi. 3:6) Idahaemi edi ini oro odotde ndin̄wam mbon oro mînamke utom kpukpru ini ye mbon oro mînamke utom aba ẹnam n̄kọri ke edu ukpepn̄kpọ mmọ ẹnyụn̄ ẹnam edi ido mmọ ndidụk mme mbono esop kpukpru ini. (Ps. 50:23) Nnyịn inam emi ke adan̄aemi itịmde ise iban̄a mfọnọn̄kpọ eke spirit nnyịn. Kpa ye oro, oyom n̄kpọ efen.
7 Apostle Peter ama anam an̄wan̄a ete ke Abasi ọnọ “mmọ emi ẹkopde uyo esie” edisana spirit esie. (Utom 5:32) Utọ n̄kopuyo emi abuana ndinam ewụhọ oro ẹnọde ẹte “ikwọrọ inọ mbio-obio, inyụn̄ idi ntiense.” (Utom 1:8; 10:42) Ntem, okposụkedi edide akpanikọ nte ke nnyịn iyom spirit Abasi man ọsọn̄ọ nnyịn idem ndikwọrọ ikọ, onyụn̄ edi akpanikọ n̄ko nte ke nte nnyịn itọn̄ọde ndinyene udọn̄ ke ndinem Jehovah esịt, enye akaka iso an̄wam nnyịn. Akpakam nnyịn idehede ida nte ndinam mme akpa usio-ukot eke unyịme unyịme nsụkibuot oro edide akpan n̄kpọ ke usụhọde!
8 Ndin̄wam N̄kpri Owo: Mme ete ye eka, nte mbufo ẹmekụt uyarade nte ke nditọ mbufo ẹyom nditịn̄ ikọ nnọ mbon efen mban̄a akpanikọ? Nte mmọ ẹsisan̄a ye mbufo ẹka utom an̄wautom? Nte mmọ ẹnịm eti uwụtn̄kpọ ke edu uwem mmọ? Edieke edide ntre, ntak abiatde ini? Ka bịne kiet ke otu mme andibuana ke Kọmiti Utom Esop, nyụn̄ se m̀mê eyen fo odot ndidi se ẹbatde nte asuanetop ke April emi. (Se n̄wed Utom Nnyịn, page 100.) Diọn̄ọ ete ke nditọ fo ẹkeme nditịp nsịn ke akamba usụn̄ ndifiori itoro nnọ Jehovah ke ini Editi emi.—Matt. 21:15, 16.
9 Eka kiet emi edide Christian ke Georgia, U.S.A., esisịn udọn̄ ọnọ ekpri eyen esie nditịn̄ nnọ mbon efen mban̄a Jehovah. Isua oko nte n̄kaiferi oro akasan̄ade ye eka esie ke utom ukwọrọikọ, enye ama enịm ediye uduot ekpri n̄wed Oyom ọnọ eren kiet onyụn̄ etịn̄ ibio ibio aban̄a se isịnede. Eren emi ama obụp enye ete: “Afo edi isua ifan̄?” Enye ama ọdọhọ ete: “Itiaba.” Idem ama akpa eren oro ndikụt enye enyenede utọ enyene-ufọn nneme oro. Ẹkebọk eren oro ke akpanikọ edi enye akanam idaha enye ke akpan n̄kpọ nte usụn̄ uwem. Ibịghike, ẹma ọtọn̄ọ ukpepn̄kpọ Bible ye eren emi, n̄wan esie, ye eyen esie an̄wan.
10 Ediwak n̄kpri owo ẹdedi mme asuanetop, ndien nnyịn imadara itie ebuana mmọ nte mmọ ẹsan̄ade ye nnyịn ẹnam utom. Mme uyen emi ẹkeme ndidemede nnyụn̄ nsịn udọn̄ nnọ mbon efen ẹdide n̄ka mmọ. Edi April edi n̄ko ini emi odotde ọnọ mme ubon kiet kiet ndisọn̄ọ mbọbọ mmọ nnyụn̄ n̄kọri eti idaha eke spirit ebe ke ndisan̄a ọtọkiet nnam edisana utom. Mme ibuot ufọk ẹkpenyene ndida usụn̄ ke emi.—N̄ke 24:27.
11 Ndin̄wam Mbufa Owo: Nso kaban̄a mbufa owo emi afo ekpepde Bible? Nte mmọ ẹkeme nditiene nsịn akpan ukeme ke April emi? Eyedi mmọ ẹma ẹwụt udọn̄ nditịn̄ se mmọ ẹkpepde nnọ mbon efen nte afo okokụrede ibuot 2, ikpehe ekikere 22, m̀mê ibuot 11, ikpehe ekikere 14, ke n̄wed Ifiọk. Edieke ekperede ndisịm utịt n̄wed emi, ben̄e idem ndineme n̄kpọ emi in̄wan̄-in̄wan̄ nte afo edikụrede ibuot 18, ikpehe ekikere 8, emi ọdọhọde ete: “Eyedi afo emenyene udọn̄ nditịn̄ se afo ekpepde nnọ mme iman fo, mme ufan, ye mbon efen. Ke akpanikọ, ekeme ndidi afo ama ananam emi, kpa nte Jesus ekesibuanade eti mbụk ye mbon efen ke mme ido nneme. (Luke 10:38, 39; John 4:6-15) Idahaemi afo emekeme ndiyom ndinam se ikande oro.” Nte emi edi ntre ye mbon oro afo ekpepde n̄kpọ?
12 Nte eyen ukpepn̄kpọ fo enịm Ikọ Abasi ke akpanikọ? Nte enye esida mme edumbet Bible esịn ke edinam? Nte enye anam uwem esie asan̄a ekekem ye mme idaha Abasi? Nte enye esidụk mme mbono esop? Nte enye oyom ndinam n̄kpọ Jehovah Abasi? Ndien ntak mûsịnke udọn̄ unọ enye nditịn̄ ye mbiowo man mmọ ẹkeme ndibiere m̀mê enye odot ndikabade ndi asuanetop oro mînaha baptism nnyụn̄ nnam utom ye afo ke April? (Se n̄wed Utom Nnyịn, page 97-100.) Ke usụn̄ emi enye ekeme nditọn̄ọ ndifiọk nnennen nte esop Jehovah edin̄wamde enye ke mme ukeme esie ndinam n̄kpọ Jehovah.
13 Ke akpanikọ, ndusụk nditọ ukpepn̄kpọ ẹkọri ẹkan mbon efen. Ntem, nte ekemde ye ndausụn̄ oro odude ke Utom Obio Ubọn̄ Nnyịn eke June 2000, page 4, ikpehe ekikere 5-6, ediwak owo ẹma ẹsikpep udiana n̄wed ye mme owo oro ẹkewụtde udọn̄ ke ntọn̄ọ ntọn̄ọ edi ẹkeyomde un̄wam efen efen man ẹbuana ifịk ifịk. Nnyịn idehede iduọk idotenyịn nte ke mbon esịt akpanikọ emi ẹyekabade ata mbet Christ, ‘edide ke ekpri ibio ini m̀mê ke anyan ini.’ (Utom 26:29, NW) Edi edieke ẹkemede nditịn̄ mban̄a ibat ọfiọn̄ emi afo ekekpepde n̄kpọ ye utọ owo oro nte “anyan ini,” nte ini Editi emi eyedi eti ifet eyen ukpepn̄kpọ fo nditọn̄ọ ndiwụt ntotụn̄ọ esịtekọm esie nnọ ufak Christ?
14 Nte Ẹdin̄wamde Mmọ Ndibuana: Nnyịn imekpep ediwak n̄kpọ iban̄a ndin̄wam mbon oro ẹdotde nditọn̄ọ utom ukwọrọikọ ebe ke ndidụn̄ọde nte Jesus ekekpepde mbon efen. Enye n̄kukụre ikoyomke otuowo inyụn̄ idọhọ mme mbet esie ẹtọn̄ọ nditịn̄ ikọ. Enye ekebem iso odori nsọn̄uyo ke utom ukwọrọikọ, esịn udọn̄ ọnọ edu edibọn̄ akam, ndien ekem ọnọ mmọ akpan n̄kpọ ita: nsan̄a, efakutom, ye etop. (Matt. 9:35-38; 10:5-7; Mark 6:7; Luke 9:2, 6) Afo emekeme ndinam ukem oro. Edide afo edin̄wam eyen fo, obufa eyen ukpepn̄kpọ, m̀mê owo oro mînọhọ ibatutom ekededi ke ndusụk ini, oyodot ndisịn akpan ukeme ndibịne mme n̄kpọ emi ẹtienede mi.
15 Sio Ufọn Wụt: Nam owo oro ọfiọk nte utom ukwọrọikọ edide akpan n̄kpọ. Dat esịt ban̄a enye. Bụk mme ifiọkutom oro ẹwụtde se esop anamde ke utom ukwọrọikọ. Wụt edu oro Jesus okowụtde ke Matthew 9:36-38. Sịn udọn̄ nọ asuanetop ini iso emi m̀mê owo oro mînamke utom aba ndibọn̄ akam mban̄a enye ndinyene ọkpọkpọ ebuana ke utom ukwọrọikọ ọkọrọ ye edikụt unen ke utom ke ofụri ererimbot.
16 Nam Owo Oro Ekere Aban̄a Ediwak Ifet Ẹdude Ndinọ Ikọ Ntiense: Dọhọ ke enye ekeme ndibuana ye mme otu ukpepn̄kpọ n̄wed ndinam edinọ ikọ ntiense eke ufọk ke ufọk. Tịn̄ ban̄a edinyene nneme ye mme iman ye mme ọdiọn̄ọ m̀mê ndinyene nneme ye mme nsan̄autom m̀mê mme nsan̄a ufọkn̄wed ke ini udia uwemeyo. Ke ini akade isan̄ ke n̄kpọisan̄ ofụri owo, ediwak ini owo ekeme nditọn̄ọ nneme mmemmem mmemmem ebe ke ndiwụt ọkpọkpọ udọn̄ ke idem mme ekemmọ akaisan̄. Ke ini inamde usio-ukot, emi esiwak ndiberede ifet man inọ eti ikọ ntiense. Ke akpanikọ ediwak ifet ẹdu ndibuana idotenyịn nnyịn ye mbon efen “kpukpru usen.”—Ps. 96:2, 3.
17 Nte ededi, eyedi se itịmde ifọn afo ye obufa asuanetop emi ndisan̄a ọtọkiet ke ufọk ke ufọk usọp usọp nte ekekeme. Edieke afo ekenịmde utịtmbuba ndinam n̄kọri ke utom fo ke April, bụp asan̄autom esede aban̄a efakutom m̀mê efakutom efen oro ọfọnde odu. Edieke edide ntre, emi ekeme ndinọ fi mme ifet ndinam utom ke esịt ọyọhọ ọyọhọ. Ke uwụtn̄kpọ, ke ini okụrede utom m̀mê akade mbono esop m̀mê mme ebiet efen, afo emekeme ndikụt nte ke owo odu ke ufọk ke ebietidụn̄ oro owo mîkodụhe ke mbemiso m̀mê ke ebiet emi ẹkenyenede udọn̄. Edieke odotde, nam ibio ibio ediwaha n̄kese ke ini edinen̄erede okụt unen. Nte utịp, emi eyetịp esịn ke ndinyene uyụhọ ye inemesịt ke utom ukwọrọikọ.
18 Tịm Etop Oro Edemerede Udọn̄: Edi n̄kpọ kiet owo ndiyom ndinyene udeme ke etop Obio Ubọn̄, edi edi ata n̄kpọ efen enye ndinyene mbuọtidem ke usụn̄ oro enye edidade enyene nneme emi, akpan akpan edieke enye edide obufa owo m̀mê owo oro mîkanamke utom ke anyan ini. Ini oro ẹdade ndin̄wam mbufa owo ye mbon oro mînamke utom aba nditịm idem odot. Mme Esoputom ye mme mbono an̄wautom ẹkeme ndinọ mme ekikere oro ẹn̄wamde, edi n̄kpọ efen ikemeke ndida itie ọkpọkpọ ntịmidem.
19 Didie ke ekeme ndin̄wam mbufa owo nditịm idem nnọ utom? Tọn̄ọ ye nte ẹnọde magazine, ndien nam enye emem onyụn̄ edi ibio ibio! Dọhọ mmọ ẹkere ẹban̄a mme n̄kpọntịbe ke mbụk oro mme owo ke efakutom ẹdinyenede udọn̄ ẹban̄a, ndien ekem yom akpan n̄kpọ ke kiet ke otu mme magazine ndondo emi oro enyenede ebuana ye enye. Ẹkpep nneme emi ọtọkiet, ẹnyụn̄ ẹda enye ẹnam n̄kpọ usọp usọp nte ẹkekeme ke utom ukwọrọikọ.
20 Fori Ukeme Nnyịn nọ N̄kọri Ini Iso: Isua oko mme andidụk Editi ke ofụri ererimbot ẹma ẹbe miliọn 14.8. Ibat mbon oro ẹkenọde ibatutom nte mme asuanetop ekedi sụk se ibede miliọn itiokiet. Emi ọwọrọ ete ke n̄kpọ nte owo miliọn 8.8 ẹma ẹnyene udọn̄ ekem ndidụk akpan ndutịm emi, emi mmọ ẹkekopde nte ẹnamde kiet ke otu mme akpan ukpepn̄kpọ Bible an̄wan̄a. Ẹma ẹdidiọn̄ọ ndusụk nnyịn kiet kiet, oro etiede nte ama enen̄ede otụk mmọ. Ediwak mmọ ẹma ẹtịn̄ nte ọfọnde ẹban̄a nnyịn, ẹtịp n̄kpọ ẹsịn ke utom nnyịn eke ofụri ererimbot, ẹnyụn̄ ẹn̄wana ẹnọ nnyịn ke iso mbon efen. Akwa otu emi ẹnọ idotenyịn kaban̄a n̄kọri ini iso. Nso ke nnyịn ikeme ndinam man in̄wam mmọ ẹnam n̄kaiso n̄kọri?
21 N̄wakn̄kan ke otu mbon oro ẹdụkde Editi ẹnam emi nte utịp ọkpọkpọ ikot oro kiet ke otu nnyịn ọnọde. Nte ido edide, emi ọwọrọ ete ke mmọ ẹnyene ke nsụhọde n̄kaha ọkpọkpọ ọdiọn̄ọ kiet ke otuowo. Edieke owo edide edidụk ke ntak ediyere ikot nnyịn, nnyịn imenyene mbiomo ndidara enye nnyụn̄ n̄n̄wam enye man ọbọ ọyọhọ ufọn oto ndutịm emi. Sia mme owo ẹdiyọhọde ufọkmbono, n̄wam enye enyene itie. Nọ enye Bible, nyụn̄ dọhọ enye etiene abuana n̄wedikwọ ye afo. Bọrọ mme mbụme ekededi oro enye obụpde. Ufiop ufiop ọkpọkpọ ntịn̄enyịn ekeme ndidi akpan usụn̄ ndifori udọn̄ esie. Nte ededi, kpukpru nnyịn imabuana ke mbiomo emi—edieke ikụtde iso owo emi nnyịn mîmeheke, nọ ufiop ufiop ekọm nyụn̄ nyene ibio ibio nneme man emehe ye enye.
22 Edidụk Editi ekeme ndinen̄ede ntụk ekikere owo. Akpanikọ oro nte ke enye edi mbono esop ọnọ ekikere nte ke enye ikwe se enye oyomde ke ebiet efen ye nte ke nnyịn imọnọ se enye oyomde nditịm ndụn̄ọde. Ndinam utịbe utịbe enọ ufak an̄wan̄a ekeme ndidi ntotụn̄ọ uyarade ọnọ owo emi mînyeneke ekikere iban̄a anana-utịt ima Jehovah. Enye ekeme ndisọp n̄kụt nte ke nnyịn idi isio—imenyene esịt akpanikọ, itie ufan ufan, inyụn̄ inyene ima ye ukpono. Ufọk mbono nnyịn ibietke se enye esikụtde ke mme ufọkabasi emi ẹwụtde ndisọi mbiet ye mme ido edinam emi mînyeneke se ẹwọrọde. Mbufa owo ẹyekụt ke akpanikọ nte ke otuowo esịne mme owo ẹtode nsio nsio idaha ke uwem ye nte ke owo itan̄ke etịbe. Se mmọ ẹkụtde emi ekeme ndidi okopodudu n̄kpọ nsịnudọn̄ ọnọ mmọ ndifiak ndi.
23 Ke Editi asuanade, owo ekpenyene ndidu ke mben̄eidem man ọnọ kpukpru mbufa owo oro ẹdụkde n̄kaiso un̄wam. Edieke afo okokotde mbufa owo, afo emenyene akpan mbiomo. Mbemiso mmọ ẹnyọn̄ọde, kụt ete ke mmọ ẹdiọn̄ọ ẹban̄a mme mbono esop eken ke Ufọkmbono Obio Ubọn̄. Siak ibuotikọ utịn̄ikọ an̄wa urua efen. Nam mmọ ẹfiọk ebiet ye ini Ukpepn̄kpọ N̄wed Esop emi ekperede ufọk mmọ akan.
24 Nam akpan ndutịm ndifiak n̄kese mmọ ke ufọk mmọ. Kụt ete ke mmọ ẹnyene ediye uduot ekpri n̄wed Oyom ye n̄wed Ifiọk, emi edinamde mmọ ẹmehe ye mme akpan ukpepn̄kpọ Bible. Edieke mmọ mîtọn̄ọke kan̄a ndikpep n̄kpọ, tọn̄ọ ukpepn̄kpọ Bible ye mmọ. Nọ mmọ ekikere ndikot ediye uduot ekpri n̄wed Mme Ntiense Jehovah, emi owụtde in̄wan̄-in̄wan̄ nte nnyịn inamde utom nte esop. Ke ebiet ekemede, nọ mmọ ikot ndise mme vidio nnyịn, utọ nte Our Whole Association of Brothers. Nam ndutịm nọ mmọ ndisobo ye mbon efen ke esop. Ke mme ọfiọn̄ emi ẹdide, san̄a se mbufa owo; nọ mmọ ikot ndidụk mme mbono esop ke ini esenyịn circuit edide m̀mê ke ini ẹnyenede mbono circuit m̀mê usen akpan mbono. Nọ mmọ kpukpru ifet ndiwụt idem mmọ nte mmọ emi “ẹkenịmde ẹnọ nsinsi uwem”!—Utom 13:48.
25 Se Mbiowo Ẹkemede Ndinam: Ke akamba udomo, edikụt unen ke ọkpọsọn̄ ukeme oro ẹsịnde ke utom ukwọrọikọ ke April emi edikọn̄ọ ke mbiowo. Edieke afo edide ada ukpepn̄kpọ n̄wed, wet mme n̄kpọ oro afo ekemede ndinam ndin̄wam kpukpru owo ke otu ukpepn̄kpọ n̄wed fo man ẹbuana ke mme akpan edinam emi. Nte odu mme owo ekededi oro ẹnọde ẹdi otu ukpepn̄kpọ n̄wed fo emi ẹdide n̄kpri owo, mbufa owo, mbon oro mînamke utom kpukpru ini, m̀mê oro mînamke utom aba? Se m̀mê mme ete ye eka, mme asiakusụn̄, m̀mê mme asuanetop ẹnam usio-ukot ndin̄wam mmọ. Nọ ọkpọkpọ un̄wam ekededi emi ekemede ndinọ. Eyenete an̄wan kiet oro mînamke utom an̄wautom kpukpru ini ke isua iba ama abiat se iwakde ibe hour 50 ke utom ukwọrọikọ ke April isua oko. Nso ikan̄wam enye? Enye ọkọdọhọ ete ke edi utom ubọkerọn̄ emi ọbọpde-bọp oro mbiowo ẹkenamde.
26 Mbiowo ye mme asan̄autom unamutom ẹkpenyene ndinam utom ọtọkiet man ẹkụt ẹte ke efakutom, mme magazine, ye n̄wed oro ẹkemde ẹdu ke ọfiọn̄ oro edide. Nte ẹkeme ndinam ndutịm nnọ mme mbono an̄wautom efen efen? Ke edide ntre, nam ẹfiọk mme akpan ndutịm emi. Ke akande kpukpru, ke akam oro mbufo ẹbọn̄de ọkpọkpọ ye an̄wan̄wa, ẹben̄e edidiọn̄ Jehovah ẹnọ ọfiọn̄ edinam n̄kọri emi ke utom Obio Ubọn̄ nnyịn.—Rome 15:30, 31; 2 Thess. 3:1.
27 Ke April isua oko ke esop kiet ke North Carolina, mbiowo ẹma ẹnen̄ede ẹsịn udọn̄ ẹnọ edinam n̄kọri ke utom ukwọrọikọ. Ke mbono esop ke urua kiet kiet, mmọ ẹma ẹsịn udọn̄ ẹnọ mme asuanetop ẹkere ke akam ẹban̄a m̀mê mmimọ imekeme ndisịn enyịn̄ nte mme asiakusụn̄ unọ un̄wam. Ke kpukpru ifet, ofụri otu mme asan̄autom ẹma ẹtịn̄ ke ifiopesịt ẹban̄a ndinam April edi mfọnn̄kan ọfiọn̄ oro akanam inyenede. Nte utịp, mbahade asuanetop 58 eke ikie, esịnede kpukpru mbiowo ye mme asan̄autom unamutom, ẹma ẹnam utom usiakusụn̄ ke ọfiọn̄ oro!
28 Idatesịt Edinyene Ọyọhọ Ebuana: Nso idi mme edidiọn̄ ke “ndinam utom ọkpọsọn̄ nnyụn̄ nsịn̄ede idem” ke utom ukwọrọikọ? (1 Tim. 4:10) Kaban̄a ifịk ifịk utom esop mmọ ke April isua oko, mbiowo oro ẹtịn̄de ẹban̄a ke enyọn̄ emi ẹma ẹwet ẹte: “Nditọete ẹtịn̄ ediwak ini ẹban̄a ima efen efen ye edidianakiet oro mmọ ẹnyenede ye kiet eken tọn̄ọ nte mmọ ẹketọn̄ọ ndinen̄ede nnam utom ke an̄wautom.”
29 Akparawa kiet emi ekenyenede ukeuke ukeme ndisan̄a isan̄ ama enyene udọn̄ ndibuana ke akpan edinam ke April isua oko. Ebe ke eti ndutịm ye un̄wam eka esie ye nditọete esie eke spirit, enye ama anam utom ke ọfiọn̄ n̄kọri emi nte asiakusụn̄ unọ un̄wam. Ifiọk n̄kpọntịbe emi eketie enye didie ke idem? Enye ọkọdọhọ ete: “Ke akpa ini ke uwem mi, ama etie mi ke idem nte ke ndi owo oro enyenede ukeme.”
30 Eyịghe idụhe nte ke Jehovah ọdiọn̄ mbon oro ẹbatde ifetutom oro mmọ ẹnyenede ndibụk ubọn̄ esie ke ọsọn̄urua n̄kpọ. (Ps. 145:11, 12) Nte nnyịn itide n̄kpa Ọbọn̄ nnyịn, imọfiọk ite ke mme edidiọn̄ kaban̄a uten̄e Abasi ẹyekam ẹnen̄ede ẹwak ke ini iso. Apostle Paul ama enen̄ede enyene udọn̄ ke utịp nsinsi uwem. Edi, enye ama ọfiọk ete ke emi ikedịghe n̄kpọ oro enye ekemede n̄kukụre ndisụhọde ntetie nnyene idotenyịn. Enye ekewet ete: “Mmonyụn̄ n̄kpa utom mban̄a n̄kpọ emi, nda odudu Abasi, emi ọsọn̄ọde anam utom ke idem mi, n̄wan̄wana ndinam.” (Col. 1:29) Ebede ke Jesus, Jehovah ama anam Paul okop odudu man okụre utom unyan̄a uwem, ndien Enye ekeme ndinam ukem oro nnọ nnyịn mfịn. Nte oro eyedi ọkpọkpọ ifiọkutom fo ke April emi?
[Ekebe ke page 3]
Anie ke Afo Ekeme Ndisịn Udọn̄ nnọ Ndikwọrọ Ikọ ke April?
Eyen fo?
Eyen ukpepn̄kpọ Bible?
Owo oro mînamke utom aba?