Nte Ẹkpedepde Ifet
1 Ndinyene ekese ndinam ke utom Jehovah anam nnyịn iyọhọ ye utom! (1 Cor. 15:58) Nnyịn imokụt ufọn ndikpep n̄kpọ ọkpọkpọ ye nte ubon, ndikot Bible ke usen ke usen, nditịm idem nnọ nnyụn̄ ndụk mme mbonoesop, ndinyụn̄ mbuana kpukpru ini ke utom ukwọrọikọ. Mme esenyịn ẹnyene mme mbiomo ubọkerọn̄, ndien mmọ ẹsise ẹban̄a mme utom eken ke esop. Ndusụk owo ẹnyene ndodobi mbiomo ubon m̀mê nsio nsio n̄kpọ ndinam nnọ mbon en̄wen. Man ẹnam kpukpru n̄kpọ nte odotde, kpukpru owo ẹyom edida ukem ukem ye ọkpọkpọ ndutịm.
2 Nịm Mme Ebeiso N̄kpọ: Ndinyene unen ke ‘ndidep ifet’ ọkọn̄ọ ke mbufiọk ye eti ubiere nnyịn. (Eph. 5:15, 16) Nnyịn inyene ndibiere se “se ifọnde ikan” ẹdide inyụn̄ inịm mmọ ke enyọn̄ enyọn̄ udịm mme ebeiso n̄kpọ nnyịn. (Phil. 1:10) Ebe ye n̄wan kiet ẹketịn̄ ẹban̄a ubon mmọ edide eke ukara Abasi ntem: “Nnyịn iyọhọ uwem nnyịn ye akpanikọ . . . Akpanikọ idịghe ubak uwem nnyịn, enye edi uwem nnyịn. Kpukpru n̄kpọ eken ẹkọn̄ọ ke enye.” Owo ndinịm utuakibuot ye utom Jehovah akpa ke uwem esie edi akpan n̄kpọ.
3 Diọn̄ọ Mme N̄kpọ Oro Ẹsibiatde Ini: Hour 168 ẹdu ke urua kiet, ndien oyom nnyịn ida ini oro nnyịn inyenede inam n̄kpọ ọniọn̄ ọniọn̄. Man inyene ini oro ekemde inọ mme utom ukara Abasi, oyom nnyịn idiọn̄ọ inyụn̄ isio urua ke mme n̄kpọ oro ẹsibiatde ini. Ndụn̄ọde kiet ayarade nte ke ukeuke akwa owo ke United States esibiat se iwakde ikan hour 30 ke urua ndise TV! Ye mmọ en̄wen, ẹsida ekese ini ke ndikot mme n̄wed ererimbot. Ndusụk owo ẹkeme ndikụt ke mmimọ imesịn akamba udomo ini ke mme edinam n̄kaowo, mme edinam ini nduọkodudu, unọ idem nduọkodudu, m̀mê ndusụk orụk mbre esịtufọk. Eyedi oyom nnyịn itịm ise mme edinam ofụri ini nnyịn eke usen ke usen man ikụt nte ikemede ndida ini nnam n̄kpọ ke usụn̄ oro ọfọnde akan. Ọniọn̄ oyom ete inịm mme adan̄a ke udomo ini oro nnyịn ibiatde ke mme edinam oro mîdịghe akpan n̄kpọ.
4 Nyene Eti Edinam Ofụri Ini: Inamke n̄kpọ m̀mê nso idi ọkpọkpọ idaha nnyịn, nnyịn owo kiet kiet imekeme ndidep ifet nnọ mme ubọkọkọ eke spirit. Ndusụk owo ẹkụt ke ndibabak ntọn̄ọ ke usen kiet kiet an̄wam mmimọ ndinam ekese. Edieke nnyịn isibiatde ekese ini ndiwat n̄ka utom m̀mê ke ndibet mbon en̄wen, nnyịn imekeme ndida ndusụk ke otu ini oro n̄kot Bible, ntịm idem nnọ mme mbonoesop, m̀mê n̄kpan̄ utọn̄ ke mme n̄kpọ ẹmi N̄ka omụmde esịn ke mme ọkpọ umụmikọ. Mme ubon ẹsibọ ufọn akamba akamba ke ndisio san̄asan̄a ini nnịm nnọ edikpep n̄kpọ ọtọkiet kpukpru ini. Edieke andibuana kiet kiet ke ubon edide ukpepn̄kpọ ubon ke eti ini, oro eyenam ndusụk ini osụhọ ọnọ kpukpru owo.
5 Ye usen kiet kiet emi ebede, nnyịn ikpenyene nditetịm mfiọk nte ke “ẹsịbe mme usen omụhọ.” (1 Cor. 7:29) Uwem nnyịn ẹkọn̄ọ ke nte idade ọsọn̄urua ini oro osụhọde inam n̄kpọ. Ẹyediọn̄ nnyịn edieke idepde ifet man ikeme ndinịm mme udọn̄ n̄kpọ Obio Ubọn̄ ke akpa itie!—Matt. 6:33.