Ẹdi Mme Andikpep Owo Ikọ Abasi—Ẹkamade Ndiye Uduot N̄kpri N̄wed
1 Kpukpru mme asan̄autom Jehovah oro ẹma ẹkeyak idem ẹnọ ẹnyene mbiomo edibuana ke utom edikpep mbon en̄wen Ikọ Abasi. Nte utom emi edide akpan n̄kpọ ana in̄wan̄în̄wan̄ ke ini nnyịn ifiọkde ite ke edi enyeemi enyenede ofụri odudu ke heaven ye ke isọn̄ ọnọ nnyịn utom ete ‘inam kpukpru mme idụt ẹdi mbet, ikpep mmọ.’ (Matt. 28:18-20) Ntre, ndibuana ke edikwọrọ eti mbụk oyom ete nnyịn ikabade idi mme andikpep!—2 Tim. 2:2.
2 Ke August nnyịn imekeme ndida usọ unọ ukpep nnyịn nnam n̄kpọ ke ini inọde ndiye uduot n̄kpri n̄wed. Nnyịn imekeme ndisio ndusụk inem inem ekikere N̄wed Abasi nto mmọ inyụn̄ itịm n̄kpri utịn̄ikọ oro ẹdin̄wamde nnyịn itọn̄ọ nneme.
3 Ke ini ọnọde ediye uduot ekpri n̄wed oro “Nte Abasi Enen̄ede Ekere Aban̄a Nnyịn?” afo emekeme ndidọhọ:
◼ “Nnyịn imosobo ye ediwak mbọhọidụn̄ fo inyụn̄ ikụt ite ke mmọ ẹkere ẹban̄a usọp usọp n̄kọri oro odude ke ubiatibet, edinam oyomonsia, ye afai. Ke ekikere fo, nso inam emi edi akwa mfịna ntre? [Bet ibọrọ.] Edi akpan n̄kpọ udọn̄ ọnọ nnyịn ndifiọk nte ke Bible ama ebemiso etịn̄ ete ke emi eyetịbe. [Kot 2 Timothy 3:1-3.] Tịmfiọk ete ke emi enyene ndida itie ke ‘ukperedem ini.’ Emi owụt ete ke enyene n̄kpọ oro oyomde ndisịm utịt. Afo ekere ke enye edi nso?” Bet ibọrọ. Kụbọde ka page 22, wụt ndise oro, nyụn̄ neme itien̄wed kiet m̀mê iba oro ẹkotde ẹsịn ke page oro. Ekem nọ ediye uduot ekpri n̄wed oro ke etịbe ₦24 nyụn̄ nam ndutịm ndifiak n̄waha nte ini akade man akanam an̄wan̄a ntak nnyịn inịmde ke akpanikọ nte ke mme edidiọn̄ ẹmi ẹkpere.
4 Afo emekeme ndima ndida usụn̄ edisobo enyeemi ye owo ke ini ọnọde ediye uduot ekpri n̄wed oro “Nso Idi Uduak Uwem—Didie ke Afo Ekeme Ndikụt Enye?”:
◼ “Ediwak owo ẹsisobo mfịna ke ini ẹn̄wanade ndifiọk se inen̄erede idi uduak uwem. Ke adan̄aemi ibat ibat owo ẹnyenede esisịt inemesịt, ediwak owo ẹdu uwem oro ọyọhọde ye edikpu ye ndutụhọ. Nte afo ekere ke ntem ke Abasi okoyom nnyịn idu uwem? [Bet ibọrọ.] Bible owụt ete ke Abasi oyom nnyịn idu uwem ke ererimbot oro ebietde enyeemi.” Wụt ndise oro odude ke page 21, nyụn̄ kụbọde ka page 25 ye 26, ikpehe ekikere 4-6, nyụn̄ nam se enye ọn̄wọn̄ọde an̄wan̄a. Nọ ediye uduot ekpri n̄wed emi ke etịbe oro ẹsinọde. Bụp mbụme emi ndida nnyene nneme ke ini afiakde awaha: “Nnyịn ikeme didie nditịm mfiọk nte ke Abasi eyesu mme un̄wọn̄ọ esie?”
5 Afo emekeme ndinọ ediye uduot ekpri n̄wed oro “Dara Uwem ke Isọn̄ ke Nsinsi!” ebe ke ndiwụt ofụri ndise ẹdude ke mme ikpaedem esie nnyụn̄ mbụp ete:
◼ “Nte afo akpama ndidụn̄ ke ererimbot oro ọyọhọde ye mme owo oro ẹkopde inemesịt nte enyeemi? [Bet ibọrọ.] Bible asian nnyịn ete ke Abasi ama mme owo onyụn̄ oyom mmọ ẹdu uwem ke nsinsi ke inemesịt ke isọn̄ emi.” Kụbọde ka ọyọhọ ndise 49, nyụn̄ kot kiet ke otu mme itien̄wed Abasi oro ẹsiakde. Ekem, wụt ọyọhọ ndise 50, nyụn̄ nam an̄wan̄a se anade nnyịn inam edieke nnyịn iyomde ndidu uwem ke Paradise emi. Nọ ediye uduot ekpri n̄wed emi ke etịbe oro ẹsinọde nyụn̄ dọhọ ke iyefiak iwaha ndineme ntak emi edinyene mbuọtidem ke Jesus Christ edide akpan n̄kpọ ntre.
6 Jehovah esikop inemesịt ke ini nnyịn inamde ‘kpukpru owo ẹkụt n̄kọri nnyịn ebe ke nditịm n̄kpeme idem nnyịn ye se nnyịn ikpepde owo.’ (1 Tim. 4:15, 16) Ndiye uduot n̄kpri n̄wed nnyịn ẹkeme ndinen̄ede n̄n̄wam nnyịn ke ukeme oro nnyịn isịnde man in̄wam mbon oro ẹyomde ndikop “eti n̄kpọ.”—Isa. 52:7.