“Ka Iso Kpeme Utom Emi Afo Ọkọbọde ke Ọbọn̄”
“Ka iso kpeme utom emi afo ọkọbọde ke Ọbọn̄, man anam enye ama.”—COL. 4:17.
1, 2. Nso isọn ke mme Christian ẹkama ubonowo?
NNYỊN imakama mbon oro ẹdụn̄ọde ẹkan nnyịn ẹkụk akwa isọn. Mme ubiere oro mmọ ẹnamde idahaemi ediwọrọ uwem m̀mê n̄kpa ọnọ mmọ ke “akwa ukụt.” (Edi. 7:14) Owo emi Abasi ọkọnọde odudu spirit ada ewet Mme N̄ke, ekewet ete: “Nyan̄a mmọ eke ẹkade n̄kpa: ndien ama edi mmọ eke ẹfụmde ẹka ebiet n̄kpa, Oh, nam mmọ ẹbọhọ.” Ata n̄kpọsọn̄ ikọ ẹdi emi! Edieke nnyịn mîsianke mme owo se anade mmọ ẹmek, emi ekeme ndinam nnyịn inyene ubiomikpe iyịp. Ke nditịm ntịn̄, Mme N̄ke oro aka iso ete: “Afo ama ọdọhọ ete, ‘Sese, mmimọ ikọfiọkke;’ nte andidomo esịt itịmke ikụt? Nte andikpeme ukpọn̄ fo ifiọkke? Nte enye idinyụn̄ inọhọ owo nte utom owo edide?” Ke akpanikọ, mme asan̄autom Jehovah ikemeke ndidọhọ ke ‘mmimọ ifiọkke’ ke mme owo ẹkeme nditaba uwem mmọ.—N̄ke 24:11, 12.
2 Jehovah ada uwem ke akpan n̄kpọ. Enye esịn udọn̄ ọnọ mme asan̄autom esie ete ẹnen̄ede ẹsịn ukeme man ẹn̄wam ẹnyan̄a adan̄a uwem ediwak owo nte ẹkekeme. Ana asan̄autom Abasi kiet kiet anam mme owo ẹfiọk ọnọ-uwem etop oro ikụtde ke Ikọ Abasi. Utom nnyịn etie nte eke owo ukpeme oro esinọde ntọt ke ini enye okụtde n̄kpọndịk. Nnyịn iyomke iyịp mbon oro ẹkemede ndisobo ọkọbọ nnyịn. (Ezek. 33:1-7) Mmọdo, edi akpan n̄kpọ didie ntem nnyịn ndisịn ifịk ‘n̄kwọrọ ikọ’!—Kot 2 Timothy 4:1, 2, 5.
3. Nso ke ibuotikọ emi ye iba eken ẹdineme?
3 Ibuotikọ emi eyeneme nte afo ekemede ndikan mme n̄kpọ oro ẹkemede ndibiọn̄ọ fi ke utom unyan̄a uwem emi ye nte afo ekemede ndin̄wam ata ediwak owo. Ibuotikọ oro etienede eyeneme nte afo ekemede ndifori usọ unọ ukpep akpanikọ N̄wed Abasi. Ọyọhọ ibuotikọ ukpepn̄kpọ ita eyeneme nti utịp oro mme anditan̄a Obio Ubọn̄ ẹnyenede ke ofụri ererimbot. Nte ededi, mbemiso inemede mme ibuotikọ emi, ọfọn ineme ntak emi eyo nnyịn edide ata akpan ini.
Ntak Emi Ediwak Owo Mînyeneke Idotenyịn
4, 5. Nso ke ubonowo ẹsobo, ndien ediwak owo ẹnam n̄kpọ didie?
4 Mme n̄kpọntịbe ererimbot ẹwụt ke nnyịn idu ke “utịt editịm n̄kpọ emi” ye nte ke utịt enen̄ede ekpere. Ubonowo ke ẹsobo mme n̄kpọntịbe oro Jesus ye mme mbet esie ẹkedọhọde ke ẹdidi idiọn̄ọ “ukperedem ini.” “Ntọn̄ọ ubiak uman,” emi esịnede ekọn̄, unana udia, unyekisọn̄, ye afanikọn̄ eken ẹnọmọ ubonowo. Ubiatibet, ibụk, ye mme edu unana uten̄e Abasi eken ẹyọyọhọ. Emi edi “ndiọkeyo” ọnọ idem mbon oro ẹdomode ndida mme edumbet Bible ndu uwem.—Matt. 24:3, 6-8, 12; 2 Tim. 3:1-5.
5 Nte ededi, ata ediwak owo ifiọkke ntak emi n̄kpọ ẹtiede ntem ke ererimbot. Emi anam ediwak owo ẹtịmede esịt ẹban̄a ifụre mmọ ye eke ubon mmọ. N̄kpa mbon oro mmọ ẹmade m̀mê mme ọkpọkpọ mfịna eken ẹbiak ediwak owo etieti. Mmọ inyeneke idotenyịn sia mînyeneke nnennen ifiọk iban̄a ntak emi mme n̄kpọ emi ẹtịbede ye ebiet emi mmọ ẹkemede ndinyene usọbọ.—Eph. 2:12.
6. Ntak emi “Akwa Babylon” mîkemeke ndin̄wam mme anditiene enye?
6 “Akwa Babylon,” kpa ukara ererimbot eke nsunsu ido ukpono, idọn̄ke ubonowo esịt. Utu ke oro, enye ada “wine use esie” etịmede ediwak owo ke n̄kan̄ eke spirit. Akan oro, sia nsunsu ido ukpono anamde n̄kpọ nte akpara, enye amatap onyụn̄ akara “ndidem isọn̄,” ada nsunsu ukpepn̄kpọ ye ubụpekpo enyịk mme owo ẹsụk ibuot ẹnọ ukara ukaraidem. Ke ntem, nsunsu ido ukpono emenyene odudu onyụn̄ ada ukara, edi ke ukem ini oro, enye emesịn akpanikọ ido ukpono ofụri ofụri.—Edi. 17:1, 2, 5; 18:23.
7. Nso iditịbe inọ ata ediwak owo, edi didie ke ẹkeme ndinyan̄a ndusụk mmọ?
7 Jesus ọkọdọhọ ke ata ediwak owo ẹdu ke ntatara inuaotop emi adade owo esịm nsobo. (Matt. 7:13, 14) Ndusụk owo ẹdu ke ntatara inuaotop emi koro mmọ ẹkokoi ẹsịn se Bible ekpepde, edi ediwak mbon eken ẹdu do ke ntak emi ẹtụnde mmọ usụn̄, mîdịghe mmọ ifiọkke se Jehovah enen̄ede oyom oto mmọ. Ekeme ndidi ndusụk mmọ ẹyekpụhọde usụn̄ uwem mmọ edieke ẹkụtde in̄wan̄-in̄wan̄ ntak ke N̄wed Abasi ndinam ntre. Edi ke “akwa ukụt,” owo idinyan̄ake mbon oro ẹkade iso ẹdu ke Akwa Babylon mînyụn̄ imaha ndinam se Bible ọdọhọde.—Edi. 7:14.
Ka Iso Kwọrọ Ikọ ye “Unana Edikpa Mba”
8, 9. Nso ke mme Christian akpa isua ikie ẹkenam ke ini mmọ ẹkesobode ubiọn̄ọ, ndien ntak-a?
8 Jesus ọkọdọhọ ke mbet imọ ẹyekwọrọ eti mbụk Obio Ubọn̄ ẹnyụn̄ ẹnam mme mbet. (Matt. 28:19, 20) Ntre, ata mme Christian ẹsida edibuana ke utom ukwọrọikọ nte akpan utom oro owụtde ke mmimọ imama Abasi ye nte se ikemede ndinam mbuọtidem mmimọ ọsọn̄ọ ada. Ntre, mme akpa mbet Jesus ẹma ẹka iso ẹkwọrọ ikọ idem ke ini ẹkesobode ubiọn̄ọ. Mmọ ẹma ẹnyene mbuọtidem ke Jehovah ọyọnọ mmimọ odudu, ẹnyụn̄ ẹbọn̄ akam ẹte enye ọnọ mmimọ ukeme ndika iso “ntịn̄ ikọ [esie] uko uko.” Jehovah ama ọbọrọ akam mmọ, ọnọ mmọ edisana spirit, ndien mmọ ẹma ẹtịn̄ ikọ Esie uko uko.—Utom 4:18, 29, 31.
9 Ke ini mme andibiọn̄ọ ẹketọn̄ọde ndinam n̄kpọ afai afai, ndi mme anditiene Jesus ẹma ẹsehede ke ubiere mmọ ndikwọrọ eti mbụk? Baba-o! Mme adaiso ido ukpono mme Jew ẹma ẹmụm mme apostle, ẹsịn mmọ ndịk ke idem, ẹnyụn̄ ẹmia mmọ ke ntak emi ẹkeyatde esịt ẹban̄a ukwọrọikọ mmọ. Kpa ye oro, mme apostle ẹma “ẹka iso ye unana edikpa mba ndikpep nnyụn̄ ntan̄a eti mbụk aban̄ade Christ, Jesus.” Mmọ ẹma ẹnen̄ede ẹfiọk ke mmimọ “inyene ndikop uyo Abasi nte andikara utu ke uyo owo.”—Utom 5:28, 29, 40-42.
10. Nso idomo ke mme Christian ẹsobo mfịn, edi nso utịp ke eti edu mmọ ekeme ndida ndi?
10 Owo imiaha inyụn̄ ikọbi ata ediwak mme asan̄autom Abasi mfịn ke ntak utom ukwọrọikọ mmọ. Edi mme ata Christian ẹsobo mme orụk ukọbọ ye idomo en̄wen. Ke uwụtn̄kpọ, ubieresịt fo oro Bible ọnọde ukpep ekeme ndinam emek usụn̄ uwem oro mme owo mîmaha m̀mê oro anamde fi edi isio. Nsan̄autom, nsan̄a ufọkn̄wed, m̀mê mme mbọhọidụn̄ ẹkeme ndikere ke afo anam n̄kpọ esen esen sia adade mme edumbet Bible anam mme ubiere fo. Edi ikpanaha ayak idiọk ikọ mmọ anam idem emem fi. Ererimbot odu ke ekịm eke spirit, edi ana mme Christian “[ẹyama] nte se inọde un̄wana.” (Phil. 2:15) Iso-ọfọn, oro ekeme ndinam ndusụk owo oro ẹnyenede esịt akpanikọ ẹkụt ẹnyụn̄ ẹma nti utom fo ẹnyụn̄ ẹnọ Jehovah ubọn̄.—Kot Matthew 5:16.
11. (a) Nso ke ndusụk owo ẹkeme ndinam mban̄a utom ukwọrọikọ? (b) Nso orụk ubiọn̄ọ ke apostle Paul okosobo, ndien nso ke enye akanam?
11 Oyom inyene uko man ika iso ikwọrọ etop Obio Ubọn̄. Ndusụk owo, idem mme iman fo, ẹkeme ndisak fi, mîdịghe ẹdomo ndinam idem emem fi ke usụn̄ en̄wen. (Matt. 10:36) Ẹma ẹmia apostle Paul ẹbe ini kiet ke ntak emi enye ọkọsọn̄ọde ada ọkwọrọ ikọ. Kop nte enye akanamde n̄kpọ aban̄a utọ ubiọn̄ọ oro. Enye ekewet ete: “Ke ima ikebem iso ikụt ukụt inyụn̄ ibọ emiom . . . [ida] uko ke Abasi nnyịn itịn̄ eti mbụk Abasi inọ mbufo ye ọkpọsọn̄ en̄wan.” (1 Thess. 2:2) Ke akpanikọ, ama oyom Paul enyene uko man aka iso ọkwọrọ eti mbụk ke ẹma ẹkefịk enye ẹmụm, ẹsion̄o ọfọn̄, ẹda eto ẹmia, ẹnyụn̄ ẹkọbi. (Utom 16:19-24) Enye akada m̀mọ̀n̄ uko aka iso ọkwọrọ ikọ? Uko esie okoto ọkpọsọn̄ udọn̄ emi enye ekenyenede ndinam utom ukwọrọikọ emi Abasi ọkọnọde enye.—1 Cor. 9:16.
12, 13. Mme mfịna ewe ke ndusụk owo ẹsobo, ndien didie ke mmọ ẹdomo ndikọk mme mfịna emi?
12 Ekeme ndisọn̄ n̄ko ndika iso nnyene ifịk ke mme efakutom oro mme owo mîsiwakke ndidu ke ufọk m̀mê ke ebiet oro owo mîsiwakke ndinyịme etop Obio Ubọn̄. Nso ke ikeme ndinam ke mme utọ idaha oro? Ekeme ndiyom inen̄ede inyene uko man inọ mme owo ikọ ntiense ke ido nneme. Ekeme ndiyom nnyịn ikpụhọ ndutịm ukwọrọikọ nnyịn n̄ko m̀mê inen̄ede isịn ukeme ikwọrọ ikọ ke mme ebiet oro ikemede ndikụt ediwak owo.—Men John 4:7-15; Utom 16:13; 17:17 domo.
13 Mfịna en̄wen oro ediwak owo ẹnyenede edi ke mmọ ikemeke ndinam utom ukwọrọikọ nte mmọ ẹkpemade ndinam ke ntak usọn̄ ye ke ntak unana nsọn̄idem. Edieke emi edide mfịna fo, kûyak idem emem fi. Jehovah enen̄ede ọfiọk unana ukeme fo onyụn̄ adat esịt aban̄a se afo ekemede ndinam. (Kot 2 Corinth 8:12.) Se ededi mfịna oro afo osobode—edide edi ubiọn̄ọ, unana udọn̄, m̀mê unana nsọn̄idem—nam ofụri se idaha fo ayakde anam ke utom edikwọrọ eti mbụk.—N̄ke 3:27; men Mark 12:41-44 domo.
‘Ka Iso Kpeme Utom Fo’
14. Nso uwụtn̄kpọ ke apostle Paul ekenịm ọnọ ekemmọ mme Christian, ndien nso item ke enye ọkọnọ?
14 Apostle Paul akada utom ukwọrọikọ esie nte ata akpan utom, enye okonyụn̄ esịn udọn̄ ọnọ nditọete esie ete ẹnam ntre n̄ko. (Utom 20:20, 21; 1 Cor. 11:1) Owo kiet emi Paul ọkọnọde san̄asan̄a nsịnudọn̄ ekedi Christian akpa isua ikie emi ekekerede Archippus. Paul ekewet ntem ke leta oro enye ọkọnọde ẹsọk mbon Colossae: “Ẹdọhọ Archippus ẹte: ‘Ka iso kpeme utom emi afo ọkọbọde ke Ọbọn̄, man anam enye ama.’” (Col. 4:17) Nnyịn ifiọkke m̀mê anie ekedi Archippus m̀mê n̄kpọ eketie didie ye enye, edi ana in̄wan̄-in̄wan̄ ke enye ama ọbọ utom. Edieke afo edide Christian emi ama akayak idem ọnọ, afo n̄ko ọmọbọ utom. Ndi ke aka iso ekpeme utom oro man anam enye ama?
15. Nso ke Christian ndiyak idem nnọ abuana, ndien mme mbụme ewe ke emi ẹdemede?
15 Nnyịn ima ibọn̄ akam ofụri esịt, inyụn̄ iyak idem nnyịn inọ Jehovah mbemiso ikanade baptism. Emi ọwọrọ ke ima ibiere ndinam uduak esie. Ntre, odot ibụp idem nnyịn idahaemi ite, ‘Ndi ndinam uduak Abasi enen̄ede edi ata akpan n̄kpọ ke uwem mi?’ Imekeme ndinyene ediwak utom oro Jehovah oyomde inam—utọ nte edinọ ubon nnyịn n̄kpọ udu uwem. (1 Tim. 5:8) Edi nso ke nnyịn isida nyọhọ-nsụhọ ini ye odudu nnyịn inam? Nso idi ebeiso n̄kpọ ke uwem nnyịn?—Kot 2 Corinth 5:14, 15.
16, 17. Nso ke mme uyen Christian m̀mê mbon oro mîbiomke ikpọ mbiomo ẹkpekere?
16 Nte afo edi uyen Christian emi ama akayak idem ọnọ, emi okụrede m̀mê ekperede ndikụre ufọkn̄wed sekọndri? Ekeme ndidi unyeneke kan̄a ekese mbiomo ubon. Ntre, nso ke oyom ndida uwem fo nnam? Nso ubiere ẹdinen̄ede ẹn̄wam fi anam un̄wọn̄ọ oro ọkọn̄wọn̄ọde ndinam uduak Jehovah? Ediwak uyen ẹdiomi ndutịm mmọ man ẹkeme ndinam utom usiakusụn̄, ndien emi anam mmọ ẹkop akwa idatesịt ye uyụhọ.—Ps. 110:3; Eccl. 12:1.
17 Ekeme ndidi afo edi akparawa. Afo emesinam utom idịbi udia uyọhọ ini, edi ubiomke akamba mbiomo ke mîbọhọke ndise mban̄a idemfo. Anaedi emesima nditiene mbuana ke mme edinam esop adan̄a nte ndutịm fo ayakde. Okûdi emekeme ndinam idatesịt fo etetịm okpon? Ndi emekere aban̄a editat utom ukwọrọikọ fo? (Ps. 34:8; N̄ke 10:22) Ke ndusụk efakutom, ekese utom osụk ododu ndinam man ẹda ọnọ-uwem mbụk akpanikọ emi ẹsọk kpukpru owo. Ndi emekeme ndikpụhọde usụn̄ uwem fo man ekeme ndinam utom ke ebiet oro ẹnen̄erede ẹyom mme anditan̄a etop Obio Ubọn̄?—Kot 1 Timothy 6:6-8.
18. Nso ukpụhọde ke ebe ye n̄wan oro ẹdide n̄kparawa ẹkenam, ndien nso ikedi utịp?
18 Kere ban̄a uwụtn̄kpọ Kevin ye Elena, emi ẹtode United States.a Mmọ ẹma ẹkere ke akpana idep ufọk, kpa nte mbufa mme ọdọ ndọ ke edem mmọ ẹsinamde. Ebe ye n̄wan emi ẹma ẹnam utom idịbi udia uyọhọ ini ẹnyụn̄ ẹdu ata inem inem uwem. Edi ndutịm utom mmọ, ye mme n̄kpọ oro mmọ ẹkesinamde ke ufọk ikayakke mmọ ẹsinen̄ede ẹnyene ini ẹwọrọ an̄wautom. Mmọ ẹma ẹdifiọk ke imayak se ikperede ndidi ofụri ini ye ukeme mmimọ isịn ke inyene mmimọ. Nte ededi, ke ini Kevin ye Elena ẹkekụtde nte ebe ye n̄wan emi ẹdide mme asiakusụn̄ ẹkopde inemesịt ke ntak emi ẹdude mmemmem uwem, mmọ ẹma ẹbiere ndikpụhọde se mmọ ẹdade nte ebeiso n̄kpọ. Ke ẹma ẹkebọn̄ akam ẹyom ndausụn̄ Jehovah, mmọ ẹma ẹnyam ufọk mmọ ẹnyụn̄ ẹwọn̄ọ ẹkedụn̄ ke ubet ifan̄. Elena ikesinamke aba utom idịbi udia ibịghi nte ekesinamde, enye ama onyụn̄ akabade edi asiakusụn̄. Se Elena akanamde emi ama esịn udọn̄ ọnọ Kevin ebe esie, ntre enye ama ọkpọn̄ utom idịbi udia uyọhọ ini onyụn̄ ọtọn̄ọ ndinam utom usiakusụn̄. Nte ini akakade, mmọ ẹma ẹkpọn̄ do ẹka idụt kiet ke Edem Usụk America ẹkenam utom ke ebiet oro ẹnen̄erede ẹyom mme ọkwọrọ Obio Ubọn̄. Kevin ọdọhọ ete: “Ndọ nnyịn okosụk enenem toto ke ntọn̄ọ, edi ke ima ikọtọn̄ọ ndibịne mme utịtmbuba eke spirit, inemesịt nnyịn ama enen̄ede okpon.”—Kot Matthew 6:19-22.
19, 20. Ntak emi utom ukwọrọikọ edide ata akpan utom mfịn-e?
19 Edikwọrọ eti mbụk edi ata akpan utom oro ẹnamde mfịn ke isọn̄. (Edi. 14:6, 7) Enye etịp esịn ke ndinam enyịn̄ Jehovah asana. (Matt. 6:9) Etop Bible omofori uwem ata ediwak owo oro ẹnyịmede enye ke isua ke isua, ndien emi ekeme ndinam ẹnyan̄a mmọ. Nte ededi, apostle Paul okobụp ete: “Didie, . . . ke mmọ ẹdikop ke owo mîkwọrọke?” (Rome 10:14, 15) Nnyịn isụk ibụp kpa ntre! Biere ndinam ofụri se ekekeme man anam utom fo ama.
20 Usụn̄ en̄wen oro afo ekemede ndin̄wam mme owo ẹfiọk se ẹyomde ẹto mmọ ke ndiọkeyo emi ye se ididide utịp ubiere oro mmọ ẹnamde, edi ndifori mme ukeme fo nte andikpep. Iyeneme nte afo ekemede ndinam emi ke ibuotikọ oro etienede.
[Ikọ Idakisọn̄]
a Ẹkpụhọ mme enyịn̄.
Didie ke Afo Ọkpọbọrọ?
• Nso isọn ke mme Christian ẹkama ubonowo?
• Didie ke ikeme ndikan mme n̄kpọ ubiọn̄ọ ke ini inamde utom ukwọrọikọ?
• Didie ke ikeme ndinam utom oro ikọbọde mma?
[Ndise ke page 5]
Oyom inyene uko man ikwọrọ ikọ ke ini ubiọn̄ọ
[Ndise ke page 7]
Nso ke akpanam edieke ọkwọrọde ikọ ke efakutom oro mme owo mîsiwakke ndidu ke ufọk?