Mmọ Ẹma Ẹnam Uduak Jehovah

Enọ Unyịmesịt Ndinam Edisana Utuakibuot Aka Iso

NDITỌ Israel ẹma ẹkụt odudu edinyan̄a Jehovah. Mmọ ẹma ẹkụt mmọn̄ Ididuot Inyan̄ abaharede ke utịbe utịbe usụn̄, ayakde mmọ ẹsan̄a ke edisat isọn̄ ẹbe ẹnyụn̄ ẹbọhọ udịmekọn̄ Egypt. Ke edem inyan̄ oko, mmọ ẹma ẹda ke eti itie ẹse nte mmọn̄ oro ọkọtọde ofụk mbon oro ẹkebịnede mmọ. Jehovah ama anyan̄a uwem mmọ!—Exodus 14:21-31.

Nte ededi, ke mfụhọ, ndusụk nditọ Israel ikowụtke esịtekọm iban̄a se Abasi mmọ akanamde. Ke adan̄aemi Moses okodude ke Obot Sinai, mmọ ẹma ẹnọ Aaron mme n̄kpọmbana gold mmọ ẹte ada anam edisọi n̄kpọ man mmimọ ituak ibuot inọ. Ke ọnyọn̄de edi, Moses ama okụt otu mbon nsọn̄ibuot ẹmi ẹdiade udia, ẹn̄wọn̄de n̄kpọ, ẹnekde unek, ẹnyụn̄ ẹnụhọde ẹnọ eyen enan̄ o-gold! Ke idak ndausụn̄ Jehovah—ẹma ẹwot n̄kpọ nte owo 3,000—eyedi mme akpan owo oro ẹkesịnde nsọk ẹnọ nsọn̄ibuot oro. Usen oro, ikọt Abasi ẹma ẹkpep akpan ukpepn̄kpọ aban̄ade edinọ Jehovah san̄asan̄a utuakibuot.—Exodus 32:1-6, 19-29.

Esisịt ini ke n̄kpọntịbe emi ama ekebe, Moses ama etịm idem ndinam ewụhọ Abasi nte ẹbọp ataya, kpa ataya utuakibuot oro ẹkekemede ndimemen nsan̄a. Utom ubọpn̄kpọ emi oyoyom mme ọsọn̄urua n̄kpọutom ye mbonutom oro ẹnyenede usọ. Ẹdida mmọ ẹto m̀mọ̀n̄? Ndien nso ke nnyịn ikeme ndikpep nto mbụk Bible emi?

Ndinọ Mme N̄kpọutom ye Usọ

Ebede ke Moses, Jehovah ama owụk nditọ Israel ete: “Ẹda enọ mbufo ẹsọk Jehovah: yak kpukpru owo eke esịt mmọ ẹnyịmede, ẹda enye ẹdi nte enọ Jehovah.” Nso orụk enọ? Ndusụk ke otu n̄kpọ oro Moses akasiakde ẹkedi gold, silver, okpoho, ndidi, flax, ikpaunam, eto, ye mme ọsọn̄urua itiat.—Exodus 35:5-9.

Nditọ Israel ẹma ẹnyene n̄kpọ awak ekem ndinọ utọ enọ ntatubọk oro. Ti, ke ini mmọ ẹkekpọn̄de Egypt, mmọ ẹma ẹtan̄ mme n̄kpọ gold ye silver, ọkọrọ ye ediwak edisịnen̄kpọ. Ke akpanikọ, ‘mmọ ẹma ẹbụme n̄kpọ nditọ Egypt.’a (Exodus 12:35, 36) Ke mbemiso, nditọ Israel ke unyịmesịt ẹma ẹkpọn̄ mme n̄kpọmbana mmọ ẹnọ man ẹda ẹnam edisọi mbiet kaban̄a nsunsu utuakibuot. Ndi mmọ idahaemi ẹyewụt ke mmimọ imenyene ọkpọsọn̄ udọn̄ kpasụk ntre ndinọ n̄kpọ man ẹda ẹnam utuakibuot akpanikọ aka iso?

Tịm fiọk ete ke Moses ikasiakke nnennen udomo oro owo kiet kiet ekenyenede ndinọ, m̀mê ndida ubiomikpe m̀mê esuene nnam n̄kpọ man onụk owo ndinọ enọ. Utu ke oro, enye ekesịn in̄wan̄în̄wan̄ eben̄e ọnọ “kpukpru owo eke esịt mmọ ẹnyịmede.” Nte an̄wan̄ade, Moses ikekwe ufọn edinyenyịk ikọt Abasi. Enye ama enyene mbuọtidem nte ke owo kiet kiet ọyọnọ kpukpru se enye ekemede.—Men 2 Corinth 8:10-12 domo.

Nte ededi, utom ubọpn̄kpọ oro ama oyom se ikande editịp mme n̄kpọ ubọpn̄kpọ. Jehovah ama ọdọhọ nditọ Israel n̄ko ete: “Yak kpukpru mbon ifiọk ke otu mbufo ẹdi, ẹnam kpukpru se Jehovah okowụkde.” Ih, utom ubọpn̄kpọ emi ama oyom mbon usọ. Ke akpanikọ, ama oyom “kpukpru orụk ubọk usọ”—esịnede usọ eto, usọ ukwak, ye mme odom-utịm—man ẹkụre utom ubọpn̄kpọ emi. Nte ededi, Jehovah ọkọnọ ndammana ukeme eke mme anamutom ẹmi ndausụn̄, ndien nte enende itoro otode unen oro ẹkekụtde ke utom emi akaka ebịne enye.—Exodus 35:10, 30-35; 36:1, 2.

Nditọ Israel ẹma ẹnam n̄kpọ ifịk ifịk ẹban̄a ikot oro ẹkenọde ẹte ẹnọ inyene mmọ ye usọ mmọ. Mbụk Bible oro ọdọhọ ete: “Kpukpru owo eke esịt mmọ ẹdemerede mmọ, ye kpukpru owo eke spirit mmọ anamde mmọ ẹnyịme, ẹdi, ẹda ẹnọ Jehovah ẹdisọk ke edinam tent esop, ye ke ofụri utom esie, ye ke edisana edisịne-n̄kpọ. Ntem ke mmọ ẹdi, iren ye iban, kpukpru owo eke esịt mmọ ẹnyịmede.”—Exodus 35:21, 22.

Ukpepn̄kpọ Odude Ọnọ Nnyịn

Mfịn ẹda mme enọ unyịmesịt ẹnam akwa utom edikwọrọ eti mbụk Obio Ubọn̄ Abasi. Ediwak ini, ẹmi ẹsidi okụk. Ke mme idaha en̄wen, nditọete Christian iren ye iban ẹsida akpakịp ifiọkutom mmọ ẹn̄wam ke ndibọp mme Ufọkmbono Obio Ubọn̄, mme Ufọk Mbono, ye mme n̄kọk itieutom. Ndien ẹnam ediwak utom ke se iwakde ikan mme ufọkidụn̄ Bethel ikie ke ofụri ererimbot, utom esịnede ediwak nsio nsio usọ. Kpukpru mbon unyịmesịt emi ẹnọde mme utọ enọ oro ẹkeme ndinịm ke akpanikọ nte ke Jehovah idifreke ọkpọsọn̄ utom mmimọ!—Mme Hebrew 6:10.

Ukem oro ke edi ye udeme oro nnyịn kiet kiet inyenede ke utom ukwọrọikọ Christian. Ẹsịn udọn̄ ẹnọ kpukpru owo ndidedep ifet man ẹbuana ifịk ifịk ke ukwọrọikọ. (Matthew 24:14; Ephesus 5:15-17) Ndusụk owo ẹnam emi nte mme ọkwọrọikọ uyọhọ ini m̀mê mme asiakusụn̄. Ke ntak mme idaha, mbon en̄wen ikemeke ndibiat ini okponde ke utom ukwọrọikọ ntre nte asiakusụn̄. Kpa ye oro, mmọ n̄ko ẹnem Jehovah esịt. Ukem nte etịbe ataya, Jehovah isiakke nnennen udomo oro owo kiet kiet enyenede ndinọ. Nte ededi, se enye oyomde edi owo nnyịn kiet kiet ndinam n̄kpọ esie ke ofụri esịt, ofụri ukpọn̄, ofụri ekikere, ye ofụri odudu nnyịn. (Mark 12:30) Edieke edide nnyịn ke inam oro, nnyịn imekeme ndinịm ke akpanikọ nte ke enye ọyọnọ nnyịn utịp ke enọ unyịmesịt oro nnyịn inọde man inam utuakibuot akpanikọ aka iso.—Mme Hebrew 11:6.

[Ikọ idakisọn̄]