Ntọt Mme Anditan̄a Obio Ubọn̄

Ndida Kpukpru Ifet Nnam N̄kpọ

MME NTIENSE JEHOVAH ẹdi se ẹdiọn̄ọde ke ofụri ererimbot kaban̄a utom unọ ukpep mmọ ke Bible. Edi mmọ n̄ko ẹsinam mme edinam oro ẹdade mme ufọn efen ẹsọk n̄kaowo. Ẹsitịm ẹdara utom ufọn emi, nte mme ifiọkutom ẹtienede mi ẹmi ẹtode Ecuador ẹwụtde.

◻ Mme akamautom ke akamba usiakifia unam akrasi ẹma ẹyom ndidiomi ukpepn̄kpọ aban̄ade ufọn ubon nnọ mbonutom mmọ. Adausụn̄ kaban̄a mfọnọn̄kpọ mbonutom ama okot ediwak mme oku Catholic ẹditiene ẹbuana edi ikọbọhọ ibọrọ ndomokiet. Oku kiet ama asian enye ete ke ibat ibat oku kpọt ẹkedot nditịn̄ ikọ ke ibuot nneme oro anam ke etie nte owo ndomokiet ididụhe. Ke okopde emi, Ntiense kiet edide anamutom ama anam ndutịm eyenete oro esiwakde ndinam utom ke efakutom mbubehe ndidi usiakifia oro.

Ke ndan̄nsiere, Ntiense oro ama aka ebịne adausụn̄ kaban̄a mfọnọn̄kpọ mbonutom ye ndutịm ukpepn̄kpọ oro okodiomide. Ẹma ẹda nsio nsio ibuot nneme ẹto mme n̄wed Watch Tower Society. Ama otụk adausụn̄ oro ke idem. Enye ama emek ibuotikọ ita ndida nnyene nneme—mme itie ebuana owo, edu ke itieutom, ye edu ke ubon. Do ẹma ẹnam ndutịm ndineme ntọt oro ye ofụri mbonutom.

Ẹma ẹbahade mbonutom ẹdọn̄ ke otu itiaba emi kiet kiet esịnede owo 30, ekem nditọete iren ita ẹmi ẹdotde ẹma ẹneme ntọt oro ye mmọ. Nso ikedi utịp? Ata ediwak mbonutom ẹma ẹdọhọ ẹdi ẹbịne mmimọ ke ufọk, ndien ẹma ẹnịm mme n̄wed un̄wam ukpep Bible 216. Emi ama otụk mme akamautom tutu mmọ ẹbụp m̀mê Mme Ntiense ẹkeme nditịm mme utịn̄ikọ efen.

◻ Ndondo emi, Ecuador ama ọbọp ibet oro enyịmede ẹkpep ido ukpono ke ufọkn̄wed. Eyenete an̄wan edide isụn̄utom ama aka ebịne n̄wan kiet edide esenyịn ke ufọkn̄wed praimari okobụp nte obufa ibet oro okụtde unen. Esenyịn oro ama anam an̄wan̄a ete ke ẹma ẹsịn ukeme nditọn̄ọ ndutịm ke utuakibuot nnọ Mary edi owo ikekemeke ndinam. Ke ini eyenete an̄wan oro ọkọdọhọde ke utọ utuakibuot oro ekeme ndida mfịna nsọk nditọ ufọkn̄wed oro mîdịghe mbon Catholic, esenyịn oro ama enyịme. “Ke n̄kan̄ eken,” isụn̄utom oro ama ọdọhọ ete, “nnyịn imenyene ndutịm ndikpep mme edumbet ido uwem nto Bible oro mînyịkke owo ndinyịme akpan ido ukpono kiet.” Esenyịn oro ama ọbọrọ ete: “Ini ewe ke afo ekpekeme ndidi? Okụt?” Ke isụn̄utom oro ama okowụt enye n̄wed oro Edikpañ Utöñ nö Aqua Andikpep, ẹma ẹbiere nte ke mmimọ idineme ibuot oro ọdọhọde “Öföfön Önö me Anam Emem.”

Ke ini enye akafiakde aka, isụn̄utom oro ama ada hour ita ndidụk nsio nsio ubet ukpepn̄kpọ itiaba ye esenyịn oro akpan̄de utọn̄. Ke ama okokụre ye ubet ukpepn̄kpọ ọyọhọ ikpehe ition, kiet ke otu nditọ ufọkn̄wed ama ọdọhọ ete: “Mma, mbọk kụt ete omodụk ubet ukpepn̄kpọ ọyọhọ ikpehe itiokiet. Mmọ kpukpru ini ẹsiyom ndimamia nnyịn ẹnyụn̄ ẹtọn̄ọ en̄wan!” Andikpep kiet ama ọdọhọ ete: “Afai edi ata akpan ibuotikọ. Nnyịn imoyom ekese ini ndida nneme n̄kpọ emi.”

Ẹma ẹnam ndutịm ndifiak n̄ka ufọkn̄wed oro man ẹkeneme mme utọ ibuotikọ nte n̄kopitem ye usu nsu. Kan̄a ke emi, ata nti utịp ẹdu. Idahaemi ke ini isụn̄utom eyenete an̄wan emi asan̄ade ebe ke efak, nditọwọn̄ ẹsifehe ẹkekọm enye ẹnyụn̄ ẹbụp enye mme mbụme Bible. Mbon en̄wen ẹsimen enye ẹwụt mme ete ye eka mmọ uko uko. Adianade do, ẹma ẹtọn̄ọ ukpepn̄kpọ Bible ye iba ke otu nditọ ufọkn̄wed oro.