Mme Isụn̄utom Emem Abasi Ẹsop Idem
“NNYỊN imesibọ nsịnudọn̄ ito kpukpru mbono district ẹmi isidụkde,” ntre ke ebiowo Christian kiet otode United States ọdọhọ. “Nte ededi, eke isua emi edi se inua mîkemeke nditịn̄. Nnyịn ikesinyọn̄ ke usen kiet kiet ikerede nte usen efen edidide etịp atua, ndien nnyịn ikekwe edikpu!”
Ke edide afo ama odụk kiet ke otu Mme Mbono District “Mme Isụn̄utom Emem Abasi,” afo nte eyịghe mîdụhe eyenyịme ye idara idara andidụk emi. Usen mbono kiet kiet ọkọkọn̄ọ ke isio isio ikpehe utom oro Mme Ntiense Jehovah ẹnamde nte mme isụn̄utom Abasi. Ẹyak nnyịn idụn̄ọde ndutịm usen ita oro ise.
‘Owo eke Ọkwọrọde Emem Eye Didie’
Emi ekedi ibuotikọ akpa usen mbono. Enye ọkọkọn̄ọ ke Isaiah 52:7. Ke n̄kpọsọn̄ ini ẹmi, ediwak owo ke ẹnam n̄kpọ Jehovah ke n̄kpọsọn̄ idaha. Utịn̄ikọ oro “Ndikop Nto Ifịk Ifịk Mme Anditan̄a Emem” ama esịne ndụn̄ọde ẹkenamde ye ndusụk ke otu mme anam-akpanikọ ẹmi. Ndikop ọkpọkpọ ikọ mmọ ekenen̄ede edi n̄kpọ nsịnudọn̄, ndien ẹma ẹsọn̄ọ ẹtịn̄ ẹnọ mme andidụk mbono nte ke Jehovah ekeme ndisọn̄ọ mmọ idem n̄ko, idem ọnọde “akwa ubom odudu” ndin̄wam mmọ ẹyọ.—2 Corinth 4:7.
Mme n̄kpọ oro Jehovah oyomde ibiakke owo idem. (1 John 5:3) Ẹma ẹnam emi an̄wan̄a ke akpatre utịn̄ikọ ndutịm usenubọk oro, adade ekesịm ata utịt ke edisio ediye uduot ekpri n̄wed oro enyenede page 32 emi ẹkotde Nso ke Abasi Oyom Oto Nnyịn? Obufa un̄wam ukpepn̄kpọ emi enyenede ndiye uduot ndise mi nte eyịghe mîdụhe eyenyene akamba udeme ke ndin̄wam ediwak owo efen efen ẹkpep ẹban̄a mme uduak Abasi. Mme ikọ oro ẹtịn̄de ke nte ẹkamade obufa n̄wed emi ẹdu ke akpatre ibuotikọ ukpepn̄kpọ ke magazine emi ye ke page 16 ye 17.
Utịn̄ikọ oro “Ndime Ime ke Utom Oro Edide Eti” ama ọsọn̄ọ etịn̄ nte ke Jehovah etịm ọfiọk mme idomo oro nnyịn isobode. Ndiyọ ọwọrọ ete nnyịn isọn̄ọ ida ikûnyụn̄ iduọk idotenyịn. Jehovah ọmọnọ nnyịn Ikọ esie, spirit esie, ye esop esie ndin̄wam nnyịn. Oyom ime man ikwọrọ ikọ, edi edikwọrọ ikọ an̄wam nnyịn ndiyọ, koro enye anam mbuọtidem nnyịn enyene uwem. Kemi itịmde ikpere utịt mi, nnyịn ikpenyeneke ndiyak mme mfịna nnyịn ẹnam ifịk nnyịn emem, koro edi mbon oro ẹdimede ime tutu esịm akpatre kpọt ke ẹdinyan̄a.—Matthew 24:13.
Utịn̄ikọ ibuotikọ mbono, “Udeme Nnyịn nte Mme Isụn̄utom Emem Abasi,” ama odụri ntịn̄enyịn owụt edision̄o mme Jew oro ẹkedude ke ntan̄mfep ke Babylon ye edifiak n̄wụk edisana utuakibuot ke Jerusalem ke 537 M.E.N. N̄kpọntịbe emi, nte etịn̄ikọ akanamde an̄wan̄a, akakam edi ntabinse ke se Obio Ubọn̄ Abasi edinamde ke ofụri isọn̄ ke mîbịghike. (Psalm 72:7; Isaiah 9:7) Utom oro nnyịn inyenede idahaemi ndinam edi ndikwọrọ eti mbụk aban̄ade Obio Ubọn̄ emi nnyụn̄ ndu uwem ke n̄kemuyo ye etop oro. Ima oro inyenede inọ Abasi ye mbọhọidụn̄ ekpenyene ndinụk nnyịn ndika iso ke utom emi ye unana edidop.—Utom 5:42.
Akpan n̄kpọ ke ndutịm Friday ekedi nneme oro “Ẹkpeme Ẹbiọn̄ọ Mme Ndedịbe Afia Unọ Idem Inemesịt.” Mme ikwọ, ndise senima, vidio, edinam television, mbre vidio, n̄wed, magazine, ye mme mbre mbubru eyomfịn ẹsiwak ndiwụt ekikere mme demon. Ke ntre, oyom nnyịn “isua se idiọkde” inyụn̄ ‘iyịre se ifọnde.’ (Rome 12:9) Ih, ana nnyịn ida oburobụt unọ idem inemesịt nte n̄kpọ itekesịt inyụn̄ ifep enye, ke adan̄aemi nnyịn isịnde idem ke mme n̄kpọ oro ẹsanade, eke eti ido odude, ye eke odotde itoro. (Philippi 4:8) Mme n̄wed ye mme n̄kpọ ndụn̄ọde oro esop Jehovah ọnọde ẹsidemede esịt nnyịn ye mme ekikere oro ẹbọpde-bọp ẹnyụn̄ ẹnọ nnyịn ukpep ndidiọn̄ọ se ifọnde ye se idiọkde. (Mme Hebrew 5:14) Nnyịn ikpenyene ndisọn̄ọ nyịre ke mme ndutịm ẹmi ukem nte ikpọsọn̄ọde iyịre ke eto ke mmọn̄ oro akpa adahade.
Utịn̄ikọ efen ekedi “Ẹbiọn̄ọ Devil—Ẹkûyọ Ndomoidem.” Esisịt ini mbemiso ẹkeyomde ndibe ndụk Isọn̄ Un̄wọn̄ọ, ẹma ẹtap ediwak tọsịn nditọ Israel ẹsịn ke oburobụt ido. Phinehas ikọyọhọ ndomoidem ndomokiet kaban̄a utuakibuot akpanikọ. Enye ama anam n̄kpọ ye iwụk aban̄a mme anamidiọk oro, ndien san̄asan̄a utuakibuot esie ama enem Jehovah esịt. (Numbers 25:1-13) Utịtmbuba Satan edi ndinam owo nnyịn kiet kiet okûdot ndidụk obufa ererimbot Abasi. Ukem nte Phinehas, ana nnyịn ke ntre ibiọn̄ọ mme ukeme oro Devil esịnde ndisabade nnyịn. Edide imọdọ ndọ m̀mê idọhọ, ana nnyịn ‘ifehe ibọhọ use.’—1 Corinth 6:18.
“Ndisọn̄ọ Mmụm Akpanikọ Ikọ Abasi N̄kama” ekedi akpatre utịn̄ikọ akpa usen mbono. Ediwak mme akabade n̄wed ẹsikpụhọde mîdịghe ẹbe ẹkpọn̄ mme ikpehe N̄wed Abasi. Ke uwụtn̄kpọ, man ẹnam esịt enem mbon oro ẹtorode n̄ka uwọrọ ufụn iban, mme andikabade The New Testament and Psalms: An Inclusive Version itịn̄ke iban̄a Abasi nte Ete, edi nte Ete-Eka ẹnyụn̄ ẹtịn̄ ẹban̄a Jesus nte “Enyeemi Edide Owo” utu ke “Eyen owo.” Ke edide isio ye oro, New World Translation ọsọn̄ọ eyịre ketket ke usem akpa uwetn̄kpọ tutu ẹda enye ke ndinen̄ede ekikere nnyịn kaban̄a ediwak n̄kpọ N̄wed Abasi. Ke uwụtn̄kpọ, etịn̄ikọ ama ọdọhọ ete: “Ekedi nnennen edikabade ke New World Translation ọkọnọ isọn̄ kaban̄a nnyịn ndifiak ntịm mme esop ebe ke ndimek mme otu mbiowo, ke nditịm n̄kpere uwụtn̄kpọ oro ẹkenịmde ke esop Christian akpa isua ikie.” Nnyịn iwụt nsọn̄ọnda nnyịn inọ Ikọ Abasi ebe ke ndikot enye kpukpru usen nnyụn̄ nda item esie nsịn ke edinam. Etịn̄ikọ ama etịn̄ n̄ko ete: “Nnyịn iwụt ke nnyịn idi mme anam-akpanikọ andida nnọ Ikọ Abasi ebe ke ndikwọrọ enye ifịk ifịk nnọ mbon en̄wen onyụn̄ ebe ke nditịn̄ enyịn n̄kama enye nte nnyịn ikpepde mbon en̄wen n̄kpọ, idehede idomo ndinam enye ekem ye mme ekikere nnyịn ebe ke ndiyụt m̀mê nditat se enye etịn̄de mbe adan̄a.”
‘Emem Abasi Ayan̄a Ifiọk Owo’
Ibuotikọ emi, oro ọkọkọn̄ọde ke Philippi 4:7, ekeberede ọyọhọ usen mbono iba. Ekese ntọt oro ẹkenọde ekeneme aban̄a owo ndinyene nnennen ekikere mban̄a utom ukwọrọikọ esie, ubon, uyakidem, ye mme ikpehe eken ke uwem eke usen ke usen.
Ke ẹma ẹkeneme itien̄wed usen oro, ẹma ẹwụt nneme oro ọkọdọhọde “Mme Isụn̄utom Ẹdade Eti Mbụk Emem Ẹdi.” Etop nnyịn edi eke emem, ndien ẹkpenyene ndinọ enye ke emem emem ido. (Ephesus 6:15) Uduak nnyịn edi ndisịm esịt, idịghe mfan̄a. Ukpep ye mme n̄wed oro ibọde ito esop Jehovah ẹn̄wam nnyịn ndinam kpa ntre. Nnyịn ikpenyeneke ndiyak umiọn̄ m̀mê unana udọn̄ ẹnam idem emem nnyịn. Utu ke oro, nnyịn ikpenyene ndika iso ‘nsịn idem,’ inyenede eti ndutịm ukpepn̄kpọ idemowo, idụkde mbonoesop, inyụn̄ ibuanade ke utom ukwọrọikọ. (2 Timothy 2:15) Owo ikpenyeneke ndifụmi edinam eti n̄kpọ nnọ mbon en̄wen, akpan akpan mbon oro ẹbuanade n̄kpọ ye nnyịn ke mbuọtidem. (Galatia 6:10) Nte ededi, ndisịn idem iwọrọke ndinam utom n̄kpa mba. Se owo kiet kiet ekemede ndinam nte ukeme ye mme ifet esie ẹyakde edi se Jehovah enyịmede.
Ikọt Abasi ẹsinọ ini, ukeme, ye inyene mmọ ndida n̄n̄wam mme udọn̄ n̄kpọ Obio Ubọn̄. Utịn̄ikọ oro “Edinọ ke Inemesịt ke Esop Jehovah” ama owụt nte ke adan̄a nte ediwak mbon mbieterọn̄ ẹnamde n̄kpọ ẹban̄a etop Obio Ubọn̄, oyom ẹnyene mme n̄kpọutom, mme itie mbonoesop, ye mme ufọkutom n̄kọk itieutom efen efen. Mme etịbe nnyịn ẹn̄wam esop ndinyene se ededi oro ẹyomde man ẹnam utom ukwọrọikọ ofụri ererimbot emi. Enọ ntatubọk n̄ko ọnọ Jehovah ukpono onyụn̄ ada idatesịt ọsọk andinọ. Ke ntre, nte mme Christian, inaha nnyịn ifụmi akpan ikpehe utuakibuot nnyịn enyeemi.—2 Corinth 8:1-7.
Utịn̄ikọ baptism—emi kpukpru ini esidide akpan n̄kpọ udọn̄ ke ikpọ mboho Mme Ntiense Jehovah—ekeberi ikpehe usenubọk. Ekedi n̄kpọ idatesịt didie ntem ndikụt mbufa mbon oro ẹkeyakde idem ẹnọ nte ẹtienede nde-ikpat Jesus ebe ke ndinyịme baptism mmọn̄! (Matthew 3:13-17) Kpukpru mbon oro ẹkenamde usio-ukot emi ẹma ẹbọ ukpep ẹto ebiet emi n̄kponn̄kan ọniọn̄ otode—kpa Bible. Akan oro, mmọ ẹkụt ata uduak ke uwem, ndien mmọ ẹnyene emem oro otode ke ndifiọk nte ke mmimọ ke inam se inende.—Ecclesiastes 12:13.
Ẹma ẹnọ nnennen item ke utịn̄ikọ oro “Yak Mbufiọk Ekpeme Fi.” Mbufiọk edi ata akpan n̄kpọ ke mme edinam mbubehe. Nnyịn ikpenyeneke ndinam mme ọkpọkpọ mbubehe ke Ufọkmbono Obio Ubọn̄, nnyịn ikponyụn̄ idaha mme ekemmọ Christian ibịn mbubịne. (Men John 2:15, 16 domo.) Oyom mbufiọk n̄ko ke ini inamde mbubehe m̀mê ke ini inọde m̀mê ibọde okụk ke ebuọt. Etịn̄ikọ ama ọdọhọ ete: “Edikpu oro mme edinam mbubehe ẹkpude ke otu mme Christian amada ekesịm edikpu idem adade ekesịm editaba idaha eke spirit ke n̄kan̄ ndusụk owo oro ẹkesịnde idem usọp usọp ke ediomi unam okụk oro ekemede ndisobo ntakurua.” Okposụkedi mîdiọkke mme Christian ndinam mbubehe ye kiet eken, enen̄ede owụt ifiọk ndidu ke ukpeme. Ndien ke ini ẹnamde ediomi mbubehe ke ufọt mme anam mbubehe iba, ẹkpenyene ndiwewet se ẹnyenede ndinam nsịn ke n̄wed kpukpru ini.
Ẹma ẹneme ẹban̄a idaha oro Abasi oyomde oto irenowo ye iban ke utịn̄ikọ oro “Eren ye N̄wan ke Enye Obot Mmọ.” Ẹmetịmede udeme oro eren m̀mê n̄wan enyenede ke ofụri mbụk. Etịn̄ikọ ama ọdọhọ ete: “Ediwak owo ke ndudue ẹda nsọn̄ido nsọn̄ido ukara, editie ikaki ikaki, m̀mê ntan̄idem erenowo nte edu erenowo. . . . Ke ndusụk ido edinam ekpedi ọkpọsọn̄ n̄kpọ, idem n̄kpọ o-bụt, erenowo nditua eyet ke eferife m̀mê idem ke ndịbe. Edi, John 11:35 obụk ete ke adan̄aemi okodude ke otuowo ke an̄wa udi Lazarus, ‘Jesus [ama] atua eyet.’” Nso kaban̄a iban? Ẹsiwak ndida edu an̄wan nte idiọn̄ọ uyai ikpọkidem. Edi etịn̄ikọ ama obụp ete: “Edieke n̄wan eyede edi anana ifiọk onyụn̄ esifan̄a efan̄a, esitịn̄ ikọ uyat uyat, m̀mê okohode idem, ndi enye ekeme ndinen̄ede nye ke ataata usụn̄ifiọk ikọ oro, [enyene] ata edu an̄wan?” (Men Mme N̄ke 11:22; 31:26 domo.) Ke utịn̄ikọ, eduuwem, ye ukamaidem mmọ, iren ye iban Christian ẹdomo nditiene mme idaha oro Bible enịmde. Etịn̄ikọ ama ọdọhọ ete: “Emem utom ndikpono eren oro owụtde mbun̄wụm spirit, onyụn̄ emem utom ndima n̄wan eke anamde ntre.”—Galatia 5:22, 23.
Utịn̄ikọ efen ekedi nneme oro “Abasi Emem Ese Aban̄a Fi.” Ediwak Christian ẹnyene editịmede esịt ẹban̄a okụk. Edi, Jehovah ọn̄wọn̄ọ ete: “Ndikpụhọ fi, ndinyụn̄ n̄kpọn̄ke fi.” (Mme Hebrew 13:5) Kpa ye nsọn̄ọn̄kpọ ndutịm uforo, ndusụk owo ẹbuọt idem ke un̄wọn̄ọ emi ebe ke ndidụk utom usiakusụn̄ unọ un̄wam m̀mê eke ofụri ini. Mbon eken ẹmi mîkemeke ndisiak usụn̄ idahaemi ẹnịm mme udọn̄ n̄kpọ Obio Ubọn̄ akpa ebe ke ndida kpukpru ifet oro ẹbererede nnọ ikọ ntiense. (Matthew 6:33) Ẹnyene nditoro ofụri utọ ukeme oro! Esop Jehovah ọmọnọ ediwak n̄wed ndin̄wam nnyịn ke utom ukwọrọikọ nnyịn ndinyụn̄ n̄n̄wam nnyịn iyọ mme mfịna nnyịn. Edieke iwụtde esịtekọm ke mme ndutịm eke spirit oro Jehovah ọnọde, enye ọyọnọ nnyịn emem ke ntịme ntịme ini ndutịm uforo ẹmi.—Psalm 29:11.
Ke utịt akpatre utịn̄ikọ usen oro, “Ẹbịne Emem Abasi ke Uwem Ubon,” mme andidụk mbono ẹma ẹkop inemesịt ndibọ obufa n̄wed oro, Ukpọhọde Inemesịt Ubon. Etịn̄ikọ ama ọnọ nsịnudọn̄ ete: “Ẹsịn ifịk ẹkpep n̄wed emi ọkpọkpọ ye nte mme otu ubon. Ẹdomo ke ofụri esịt ndida mme item esie ẹkọn̄ọde ke Bible nsịn ke edinam, ndien mbufo ke akpanikọ ẹyefori emem ye inemesịt ke ubon mbufo.”
“Ẹda Emem nte Urụk Ẹbọp Idem Ẹdian Ọtọ Kiet”
Ọkọn̄ọde ke Ephesus 4:3, emi ekedi ibuotikọ oro odotde ọnọ akpatre usen mbono. Mme Ntiense Jehovah, ẹmi ẹtode kpukpru idụt ke ererimbot, ẹmebọ ukpep ẹto Abasi. Ke ntre, mmọ ẹma ẹmem. Mmọ ẹtiene uwụtn̄kpọ Jesus ẹnyụn̄ ẹdomo ‘ndida emem nte urụk mbọp idem ndian ọtọ kiet ke Spirit.’
Ẹma ẹsio emem oro atarade ọyọhọ esop Abasi ẹwụt ke nneme oro “Ndidiọn̄ọ Mme Nnennen Orụk Isụn̄utom.” Nsunsu prọfet ẹma ẹdu ke Israel. Nte ededi, mme ata isụn̄utom Abasi—mme utọ prọfet nte Isaiah, Ezekiel, ye Jeremiah—ẹma ẹbem iso ẹtịn̄ nte enende ẹban̄a iduọ Jerusalem, ini ntan̄mfep, ye edisana ikọt Abasi nyak ke akpatre. Ukem idaha oro odu mfịn. Mme nsunsu isụn̄utom ẹyọyọhọ ke ikpehe mbre ukara ye nsunsu ido ukpono. Kpa ye oro, Jehovah osion̄o Mme Ntiense esie ẹdi man ẹtan̄a uduak esie aban̄ade editịm n̄kpọ emi. Akpan akpan ọtọn̄ọde ke 1919, ẹmeda ikọt Jehovah nditan̄a etop Abasi. Mmọ ẹkpụhọde didie ntem ye mme nsunsu isụn̄utom eke Christendom! Nnyịn ikpakam isịn ifịk inam udeme nnyịn ke utom emi tutu Jehovah ọdọhọ ke ekem.
Utịn̄ikọ oro “Kpan̄ Utọn̄ Nọ Nyụn̄ Nam Ikọ Abasi” ama ọsọn̄ọ etịn̄ nte ke N̄wed Abasi edi akakan ebiet ndausụn̄, ndọn̄esịt, ye idotenyịn. (Isaiah 30:20, 21; Rome 15:4) Ererimbot mfịn etetịm anana ukpan. Oyom nnyịn ke ntre itetịm ikpan̄ utọn̄ inọ item oro otode Ikọ ye esop Abasi ikan nte akanam edide. Jehovah ọfiọk mme mmeme nnyịn, ndien ke Ikọ esie enye owụt usụn̄ edinam oro edidade ufọn ọsọk nnyịn in̄wan̄în̄wan̄. Ndifiọk nte ke Jehovah ke ọnọ nnyịn ibetedem anam nnyịn inyene uko ndika iso nnam n̄kpọ ekededi oro enye oyomde oto nnyịn.
Emi ama etịm otuowo ekikere ọnọ drama emi ẹsịnede ndiye ọfọn̄ oro eketienede. Ibuotikọ esie ekedi “Ntak Okponode Mme Ndutịm Ukara Abasi?” Ke akamade mbụk Bible aban̄ade Gideon nte isọn̄, nneme emi ama ọsọn̄ọ owụt okopodudu ukpepn̄kpọ—ana nnyịn itiene item Abasi inyụn̄ itre ndida ekikere idem nnyịn n̄kpụhọ m̀mê ndidomo ndifụmi item ukara Abasi.
Utịn̄ikọ an̄wa ọkọkọn̄ọ ke ibuotikọ oro “Ata Emem ke Akpatre!—Oto Ebiet Ewe?” Emem oro Abasi ọn̄wọn̄ọde okpon akan n̄kpọ ekededi oro ererimbot emi ekemede ndikere mban̄a. “Ata emem ọwọrọ emem kpukpru usen,” ntre ke etịn̄ikọ ọkọdọhọ. “Emem Abasi ọwọrọ ererimbot oro udọn̄ọ, ubiak, mfụhọ, ye n̄kpa mîdụhe.” Bible asian nnyịn ete ke Jehovah “anam ekọn̄ etre tutu esịm ke utịt ekondo.” (Psalm 46:9) Didie ke enye edinam emi? Ebe ke ndisio esịn nsọk nnọ ekọn̄ oro, Satan kpa Devil, mfep. (Ediyarade 20:1-3) Emi eyeberede usụn̄ ọnọ mbon nsụkidem ‘ndida isọn̄ nnyene ndien ediwak emem onyụn̄ enem mmọ esịt.’—Psalm 37:11.
Ke etienede utịn̄ikọ ke ibuotikọ ukpepn̄kpọ Enyọn̄-Ukpeme eke urua oro, ẹma ẹnọ akpatre utịn̄ikọ mbono. Ke ibuotikọ ọdọhọde “Ndika Iso Iso nte Mme Isụn̄utom Emem Abasi,” edemede-owo-udọn̄ utịn̄ikọ emi ama ọsọn̄ọ etịn̄ nte ke utom ukwọrọikọ nnyịn edi n̄wọrọnda ye usọp usọp n̄kpọ. Idahaemi idịghe ini nditek ubọk, nnam ubịghi, m̀mê ndifiak edem mbịne mme nsunsu ekikere. Ẹda se nnyịn iyomde ẹtịm nnyịn idem—etop Abasi, edisana spirit esie, ye ediwak ndutịm oro ẹtode ima ima esop ukara Abasi esie. Nte ikọt Jehovah, nnyịn ke ntre ikpakam ika iso iso nte mme isụn̄utom emem Abasi!
[Ekebe/Mme ndise ke page 9]
Ima Ima Ndutịm Ẹnamde Ẹnọ Mme Ubon
Mbon oro ẹkedude ke Mbono District “Mme Isụn̄utom Emem Abasi” ke ọyọhọ usen iba ẹma ẹkop nduaidem ndibọ obufa n̄wed oro ẹkotde Ukpọhọde Inemesịt Ubon. N̄wed emi ọdọn̄ọ ntọt N̄wed Abasi oro edinyenede ufọn ọnọ kpukpru ubon oro ẹmade Abasi.
Ebiowo kiet otode Connecticut, U.S.A., ọdọhọ ete: “Ke June 15, nnyịn ima ibọ n̄wed Inemesịt Ubon nnyịn. Ke June 16, mma n̄kot mbahade iba esie. Ke ọyọhọ usenọfiọn̄ 17, nnyịn ima ida enye inịm akpa ukpepn̄kpọ ubon nnyịn, ndien nnyịn ima ibọ nsịnudọn̄ etieti! Kpa ke usen oro, mma n̄kot n̄wed oro n̄kụre. Ediye n̄wed emi nte eyịghe mîdụhe eyedi ọsọn̄urua n̄kpọ ọnọ kpukpru mbon oro ẹdade enye ẹnam n̄kpọ. In̄wan̄în̄wan̄ ntọt oro ekemde ye idahaemi oro odude ke n̄wed emi ọnọ n̄kaiso uyarade nte ke ‘asan̄autom emi anamde akpanikọ, onyụn̄ enyenede ọniọn̄’ ke ọnọ ‘udia ke edikem ini’ onyụn̄ etịm ọfiọk se nnyịn iyomde ke n̄kpọsọn̄ ini ẹmi.”—Matthew 24:45-47.
[Ndise ke page 7]
N̄kpri ye ikpọ ẹyom ndifiọk se Abasi oyomde